Leza I Mulaye Amba Ntanda Ikapanda

Bino byo byafudile ku kunena kisumpi kimo kya bakimbi ba ntanda yonso pa kumona muswelo ushinta bitatyi. Shi ukulupile amba kudi Umpangi utele bantu mutyima, nabya bino binenwa bya befundi ba sianse bibwanya padi kukuvuluja bukomo bwa kipangila bwishileshile bwātūdile Leza mu ntanda, bwa kwilongolola ayo mine.

Ino, bantu byobendelela kona ntanda mu ludingo lukatampe mpata, kino i kilengeje bukomo bwa kipangila bwa ntanda kwilongolola ayo mine bwikale butyetye. Nansha nankyo, mwanda waka tubwanya kukulupila’mba Leza kakatalepo kino na meso bitupu?

Tala bisonekwa bidi mu kapango bitukulupija’mba ntanda ikapanda ne kwikala biyampe.

• Ino ntanda yāpangilwe na Leza. “Ku ngalwilo Leza wāpangile madiulu ne ntanda.”—Ngalwilo 1:1

• Leza witela bu mwinē ntanda. “Ntanda i ya Yehovaa ne bintu byonso bidi’mo.”—Ñimbo ya Mitōto 24:1

• Leza wāpangile ntanda’mba ikale’ko nyeke. “Aye ushimatyije ntanda pa byalwilo byayo; Keikajinapo pa kifuko kyayo nyeke ne nyekeke.”— Ñimbo ya Mitōto 104:5

• Leza i mulaye amba bantu bakekala nyeke pano pa ntanda. “Leza wa bine, Mwine wapungile ntanda, . . . kapangile’yopo bitupubitupu, ino walongele’yo amba ikalwe.”—Isaya 45:18

• Leza i mulaye amba bantu bakashikata pa ntanda nyeke. “Boloke bakapyananga ntanda, kadi bakekalanga’po nyeke.”—Ñimbo ya Mitōto 37:29

Leza wāpangile ntanda na bukomo bwa kwikinga ku bintu bibi bilonga bantu mwanda wa kwiyonakanya. Bible ulaya’mba Yehova Leza ukatalula’ko bintu byonso bilongwa mwanda wa kona ino ntanda pa kitatyi kyatungile. —Kusokwelwa 11:18

Bible ulaya’mba Leza ukālamuna ino ntanda ke paladisa miyampe mpata, kadi ukabāla kuboko kwandi ne “kuvuija bisaka mutyima wa bintu byonso byūmi.”—Ñimbo ya Mitōto 145:16