BYA KULONGA SHI BINTU BIBAKANDA BEI
Yuka Amba Kudi Bintu Byo Kubwanyapo Kushinta
I bikomo kujingulula’mba bei yendanga ikanda, nakampata shi mfutwa yetu nayo yendanga ikanda. Ino shi bei yenda ikanda inoko mfutwa kukanda mpika, tubwanya kusela mutyima kūlu ne kuzumbija mutyima, kutabukidila shi tudi na kisaka kyotulelele.
Ketubwanyapo kukankaja bintu bileke kukanda bei. Inoko tukamwena’mo shi tulame mu ñeni amba i bintu byo ketubwanyapo kushinta.
MWANDA WAKA I KYA MVUBU
Bantu betabija amba kukanda kwa bei i bintu byo kebabwanyapo kushinta, bapēlelwanga . . .
kutūkija mutyima. Shi tutūkije mutyima tubwanya kulanguluka senene, ne kukwata butyibi bwa tunangu.
kwepuka bibidiji byampikwa tunangu. Kimfwa, kupota bintu byampikwa mvubu ne kusupakanya makuta.
kuleka kwipotomeja na ba mu kisaka pa mwanda wa lupeto.
kujingulula bya kulonga mwanda wa kupota bintu byobasakilwa. Bibwanya padi kwibalomba baleke kwingidija lupeto luvule ne kuyuka bintu bine byobasakilwa.
BYOBWANYA KULONGA
Ikala na mutyima wa kushinta. Kitatyi kikanda bei, i kya tunangu kutyepeja’ko madepanse shi bibwanika. Bantu bamo batompanga kwikala na būmi bwa katūtu abo papo kwikala na kintu mpika, bine bidi pamo bwa koila nansha kusumba wenda ukandija munonga wa mema akuka mulungu bininge! Ku mfulo betana kwampikwa kintu. Shi udi na kisaka, ubwanya kwiipangula mobwaninya kusokola bisakibwa bya ba mu kyobe kisaka—ke bibipo! Inoko lama kino mu ñeni: Ba mu kyobe kisaka basakilwa bininge wibalombole buswe, upityije nabo kitatyi ne kwibata mutyima kupita kintu kikwabo kyo-kyonso.
Kutompa kwikala na būmi bwa katūtu bupityile misokwe yobe, bidi pamo bwa koila nansha kusumba wenda ukandija munonga wa mema akuka mulungu bininge