BYA KULONGA SHI BINTU BIBAKANDA BEI

Kulupila’mba Bintu Bisa Kushinta

Le bintu bidi bei bininge mu yenu ntanda ino abe kusokolangapo lupeto luvule? Le ukolelwanga kwikwatakanya nansha kukwatakanya ba mu kisaka? Shi i amo, padi ye uno wi musele mutyima kūlu pa musa kwikadila būmi kumeso’ku. Ino, nansha shi būmi i bukomo namani, kokajimija kikulupiji.

MWANDA WAKA I KYA MVUBU

Bantu badi na lukulupilo kebatengelangapo’tu enka bintu bishinte. Ino lukulupilo lwibapanga bukomo bwa kushinta bintu mungya bukomo bwabo. Kimfwa bwifundi bulombola’mba bantu badi na lukulupilo . . .

bōmininanga na mutyima mutūke
bapēlelwanga kushinta
bakwatanga butyibi buyampe bwibakwasha bekale na bukomo bwa ngitu buyampe

BYOBWANYA KULONGA

Dibajinji, bandaula muswelo ubwanya kukukwasha Bible. Mu Bible mudi madingi mayampe abwanya kukukwasha uyuke bya kulonga shi bintu bibakanda bei. Ano madingi ne myanda mikwabo idi’mo, bibwanya kukukwasha mu būmi bwa dyalelo ne kukuteakanya ku makambakano abwanya kukutana mu mafuku a kumeso.

“Bukomo bwa kulanga bukakulamanga nyeke, ne kusansanya nako kukakukiñanga.”—Nkindi 2:11.

Dya bubidi, bandaula binena Bible pa mafuku a kumeso. Shi uyuke mvubu idi na tunangu tudi mu Bible, nabya ukasangela bininge kuyuka senene myanda ya kumeso idi mu dino dibuku. Kadi, ukayuka’mo amba Leza usaka wikale na “būmi bwa kumeso ne lukulupilo,” ne amba kudi kintu kiyampe kya kukulengeja ukulupile uno mulao. (Yelemia 29:11) Kino kintu i Bulopwe bwa Leza.

LE BULOPWE BWA LEZA I BIKA, NE I BIKA BYOBUSA KULONGA?

Bulopwe bwa Leza i umbikalo usa kuludika ntanda yonso panopano. (Danyele 2:44; Mateo 6:10) Busa kuludikila tamba mūlu, mu kine kitatyi’kya i kutupu muntu ukasusuka dikwabo nansha kwikala mulanda, kadi muntu ne muntu ukekala mu ndoe ne kwikala na bintu bimuletela nsangaji.

“Ukekalanga wa nsangaji ne kumona biyampe.”—Ñimbo ya Mitōto 128:2.

“[Babikalwa ba Bulopwe] kebakaputumapo na mingilo bya bitupu.”—Isaya 65:23.

“Kukekalanga miseke mivule pa ntanda.”—Ñimbo ya Mitōto 72:16.

Bantu midiyo ne midiyo bakulupile ino milao, kadi bakulupile amba Leza “kabwanyapo kubepa.” (Tetusa 1:2) Le wabulwa’po kwifunda’ko Bible? Shi wifunde’ye, ukekala na lukulupilo lukakukwasha mu bitatyi bya makambakano kadi ukayuka’mba bintu bisa kushinta kumeso’ku.