Mpangiko ya Bifuko bya Kutōtela’po

BATŌTYI ba bine ba Yehova i basoñanibwe kwibungila pamo mwa kufundijibwa ne kwikankamika abo bene na bene. (Bah. 10:23-25) Kifuko kibajinji kya kutōtela’po kya bantu batongwe ba Leza, bene Isalela, kyādi “kipema, pema wa kubungakena’ko.” (Div. 39:32, 40) Mwenda myaka, Solomone mwanā Davida wāubaka njibo, nansha tempelo, ya kutumbija Leza. (1 Ba. 9:3) Tempelo pa kupwa konakanibwa mu 607 Yesu kaile, Bayuda bākwata mpangiko ya kwitanina mu mobo etwa bu mashinankonka mwanda wa kutōta Leza. Mwenda mafuku, tempelo yāūbakululwa, yāanza monka kwingila bu kité kya mutōtelo wa bine. Yesu wādi ufundija mu mashinankonka ne mu tempelo mwine. (Luka 4:16; Yoa. 18:20) Yesu wāpwidile’nka ne ku lūlu na bantu.​—Mat. 5:1–7:29.

² Yesu pa kufwa, bene Kidishitu bādi ke bebungila mu bifuko bya bantu bonso, ne mu mobo a bantu mwanda wa kufundija Bisonekwa ne kusangela kwitana pamo na banababo betabije. (Bil. 19:8, 9; Loma 16:3, 5; Kol. 4:15; Fil. 2) Kyaba kimo byādi na kamweno bene Kidishitu babajinji betanine pamo mu bifuko bya kufula mwanda wa kutyina kusokolwa na bebapangapanga. Bine, bengidi ba kikōkeji ba Leza ba pa kala bādi basaka na mutyima onso kwibungila mu bifuko bya kutōtela’po mwanda wa ‘kufundijibwa na Yehova.’​—Isa. 54:13.

³ Dyalelo nadyo, bifuko bya bantu bonso ne mobo a bantu bingidijibwanga mwanda wa kupwila kwa bwine Kidishitu. Mobo a bantu engidijibwanga divule bu bifuko bya kulongela’mo kupwila kwa kwenda mu busapudi. Boba bapāna abo mobo bu a kupwidila’mo kuno kupwila bamonanga’mba i dyese. Bavule bamwene amba bamwenine’mo ku mushipiditu pobapēne abo mobo mwanda wa kino kitungo.

NJIBO YA BULOPWE

⁴ Kifuko kine kipwidilanga’mo Batumoni ba Yehova i Njibo ya Bulopwe. Divule tupotanga lubanza, ne kūbaka Njibo ya Bulopwe mipya nansha kulongolola dipya njibo yadi’po. Pa kusaka kukwatakanya misokwe ne kwingidija senene byūbakwa, bipwilo bivule bibwanya kwishintakanya mu Njibo ya Bulopwe imo shi bibwanika. Mu bibundi bimo, i biyampe kufutyila mobo. Mobo a Bulopwe mapya ne oa alongolwelwe dipya bininge, i biyampe kwikale mpangiko ya kwiapāna. Ino shi Njibo ya Bulopwe i milongololwe bityetye’tu, kekukekalapo mpangiko ya kwiipāna.

⁵ Njibo ya Bulopwe keifwaninwepo kwikala mineñenye bipitepite mwanda’tu wa bantu batyikuke’yo. Nansha shi myūbakilo i mishileshile mungya bifuko, kitungo kyoyūbakilwa i kwingidijibwa’yo. (Bil. 17:24) Mungya ngikadilo ya kwenu, inenwe kwikala kifuko kiyampe kadi kifwaninwe kya kupwidila’mo kupwila kwa bwine Kidishitu.

⁶ Bipwilo byonso bya Batumoni ba Yehova bitūlanga byabuntu bya kwingidija pa kukwatakanya ne kulongolola Njibo ya Bulopwe yobapelwe. Kemuloñwangapo mukongo; nansha kulomba ba lupeto. Mutūlwanga kasanduku ka byabuntu, ne boba batanwa ku kupwila babwanya kutūla lupeto lwa kwingidija ku bintu bya mvubu bya ku ino njibo. Batūlanga’byo pampikwa kuningilwa ne na mutyima tō.​—2 Ko. 9:7.

⁷ Bonso badi mu kipwilo bamwene amba i dyese kukwatakanya Njibo ya Bulopwe na lupeto ne kwingila na mutyima tō mingilo ya kwiilama ikale nyeke itōka, kadi milongololwe senene. Divule mukulumpe nansha mwingidi wa mingilo ye wimaninanga mpangiko ya uno mwingilo. Ne kadi bukundwe buloñwanga divule na bisumpi bya busapudi, mutadi wa kisumpi nansha mukwashi wandi ye ukemanina’bo. Njibo ya Bulopwe yonso ifwaninwe kumwekeja senene bulongolodi bwa Yehova munda ne panja pene.

⁸ Kokwa kudi bipwilo bivule bipwidila mu njibo imo, bakulumpe ba bipwilo bipwidila’mo bakabunda’ko Komite Utala Mingilo ya Njibo ya Bulopwe, mwine ukemanina myanda ya njibo ne lubanza. Bitango bya bakulumpe bikatonga tutu umo wa kwingila bu mukwatakani wa komite utala mingilo. Uno komite utala mingilo wingilanga na kulonda bwendeji bwa bitango bya bakulumpe, ye utala bukundwe bwa njibo, ne kuta mutyima amba njibo i milongololwe senene ne amba kudi bingidilwa bibwane. Kino kilomba bipwilo byonso bingidile mu bumo.

⁹ Shi kudi bipwilo bivule bipwidila mu Njibo ya Bulopwe imo, mpangiko ya bitatyi bya kupwila ikokeja kushintwashintwa. Bakulumpe bakatūla’ko mpangiko na mushipiditu wa kulangila bakwabo ne wa buswe bwa bu bana na bana. (Fid. 2:2-4; 1 Pe. 3:8) I kutupu kipwilo nansha kimo kya kwipapila akyo kine butyibi butala bipwilo bikwabo. Shi mutadi wa kipindi upempula kipwilo kimo mu Njibo ya Bulopwe, bipwilo bikwabo bikasendulula bitatyi bya kupwila kwabyo mobifwaninwe mu mwine yenga’wa.

¹⁰ Njibo ya Bulopwe ikokeja kwingidijibwa pa butundaile ne pa lufu shi Komite wa Mingilo wa pa Kipwilo waitabija kwingidija’yo. Bano bakulumpe babandaulanga na katentekeji bine byalombwa’bya ebiya batyiba butyibi na kulonda bwendeji bwa bilo ya musambo.

¹¹ Boba bapebwa kwingidija Njibo ya Bulopwe ku ino myanda banenwe kwiendeja mu muswelo ufwaninwe kutelelwa bene Kidishitu ba bine. Kekudipo kintu kifwaninwe kulongwa ku Njibo ya Bulopwe kibwanya kufityija kipwilo mutyima nansha kufutulwija Yehova ne dijina diyampe dya kipwilo. (Fid. 2:14, 15) Mungya buludiki bwa bilo ya musambo, Njibo ya Bulopwe ikokeja kwingidijibwa ku mingilo mikwabo ya ku mushipiditu, kimfwa Masomo a Mwingilo wa Bulopwe ne Masomo a Mwingilo wa Bapania.

¹² Bipwilo bifwaninwe nyeke kukwata bifuko byabo bya kutōtela’po na bulēme. Muvwadilo, mwidyangwilo, ne muswelo wa kwineñenya bifwaninwe kumwekeja kalēmo kakwatañene na mutōtelo wa Yehova. (Mus. 5:1; 1 Tm. 2:9, 10) Shi tulonde madingi mu uno mwanda, tukalombola’mba tufwijanga’ko pangala pa kupwila kwetu kwa bwine Kidishitu.

¹³ Kulama ndudi kitatyi kya kupwila kudi na mvubu. I biyampe bana bashikate na bambutwile babo. Bambutwile badi na bana bankasampe i bakankamikwe kushikata kokwa kokebabwanyapo kukambakanya bininge pa kutamba na bana panja mwanda wa kwibalemununa nansha kwibalongela bintu bikwabo.

¹⁴ Batutu babwenye bisakibwa bengilanga mwingilo wa kutundaila bāya ku kupwila ku Njibo ya Bulopwe. Bafwaninwe kwikala bantu batadija, badi biyampe, balonga bintu na bujalale. Mu biselwa byabo mudi ne kwimuna bapya ne kwibalengeja beivwane biyampe, kukwasha boba balondela bamone pa kushikata, kulemba buvule bwa batenwe ku kupwila, ne kuta mutyima biyampe ku kukabija senene mu njibo nansha kupepa’mo luvula. Shi bibwanika, batundaila bāya bakanena bambutwile balame babo bana biyampe kutyina’mba bakashilula kunyema lubilo kumeso nansha kupwa kwa kupwila nansha kukaila ku lukala. Utundaila bāya ukokeja kunena na kanye ne na bunwa mbutwile udi na mwana kadingidika atambile na mwana panja, kutyina’mba bevwaniki bakalabikwa bininge. Mwingilo wingila batundaila bāya ukwashanga mpata bantu bonso bamwene mu kupwila. I biyampe bakulumpe ne bengidi ba mingilo bengile bu batundaila bāya.

LŪBAKO LWA MOBO A BULOPWE

¹⁵ Mu myaka katwa kabajinji, bene Kidishitu bamo bādi na bintu bivule kupita bakwabo, o mwanda mutumibwa Polo wālembele amba: “Pa kwenzankanya bintu, bya musubu byenu pano bibwanye pa byobabudilwe, amba bya musubu byabo nabyo bibwanye pa byobya byomubudilwe, amba kwikale kwenzankana.” (2 Ko. 8:14) Ne dyalelo nadyo, “kwenzankana” kulongekanga. Lupeto lutūlwanga na bipwilo bya ntanda yonso lwingidijibwanga mwanda wa kukwasha mwa kūbakila ne kulongolola Mobo a Bulopwe. Bulongolodi ne bipwilo bikwashibwa bisangelanga bininge byabuntu bya na mutyima tō biletwa na banabetu ba ntanda yonso.

¹⁶ Kukwatañana na mpangiko ya kipindi kya ntanda, bilo ya musambo yabanyanga bipwilo ku Mobo a Bulopwe. Kadi bilo ya musambo yo ilombolanga kitatyi ne kifuko kwa kūbaka Mobo a Bulopwe mapya ne kulongolola dipya mobo adi’ko kala mu mwaba wa musambo. Shi bimpengele bibapone, kukwatwanga mpangiko ya kulongolola Mobo a Bulopwe onekele, dimodimo ne mobo a banabetu mene.

¹⁷ Bilo ya musambo yo iludikanga bengidi ba kwilanga ba kupota lubanza, ba kuteakanya myūbakilo ya Mobo a Bulopwe, ba kulongeja mikanda ya kupebwa lupusa lwa kūbaka, ba kūbaka, ne ba kulongolola. Kusakilwa bengidi bavule ba kwilanga mwanda kukisakilwa Mobo a Bulopwe mangi mu matanda mavule. Basapudi bonso babatyijibwe babwenye bisakibwa ne badi na mutyima wa kukwasha i bakankamikwe kudinga fomu ne kupa’ye Komite wa Mingilo wa pa Kipwilo kyabo. Nansha ke basapudi ba kubulwa kubatyijibwa nabo babwanya kukwasha ku lūbako nansha ku kulongololwa dipya kwa Njibo ya Bulopwe yabo.

MOBO A BITANGO

¹⁸ Bene Kidishitu babajinji bādi divule betanina pamo mu bisumpi bityebitye. Inoko, kyaba kimo i “kibumbo kikata’tu” kyādi kibungila pamo. (Bil. 11:26) Mo monka ne bantu ba Yehova dyalelo nabo betananga pamo ku bitango bikatampe bya kipindi ne ku bitango bya ntanda. Mobo a mu bibundi ekalanga afutyilwa mwanda wa kino kitungo, ino kokwa kekudipo mobo mayampe, kifuko kya kutōtela’po kitwa bu Njibo ya Bitango kibwanya kupotwa.

¹⁹ Mu bitatyi bimo, njibo ipotwanga, yalongololwa dipya keingidijibwa bu Njibo ya Bitango. Divule dine, bamonanga bidi lubanza ebiya kwaūbakwa njibo mipya. Mobo a Bitango i meshile bukata, kukwatañana na bisakibwa bya kifuko ne kifuko. Bilo ya musambo ikwatanga butyibi bwa kupota nansha kūbaka ano mobo enka shi abapu kubandaula na katentekeji bungi bwa lupeto lulombwa ne kuyuka misunsa yoikengidijibwa.

²⁰ Bilo ya musambo yo itoñanga’ko batutu ba kukwatakanya ne kulongolola Njibo ya Bitango. Kukwatwanga mpangiko mwanda wa bipindi bīye bikundule’yo kitatyi ne kitatyi, kukundula misunsa ibidi ku mwaka, ne kulongolola bintu kumeso kwa koneka’yo. I kya kamweno banabetu ba kwilanga bengile uno mwingilo. Ne kadi, bipwilo i binenwe kukwatakanya ino mpangiko na mutyima umo.​—Ñim. 110:3; Mal. 1:10.

²¹ Kyaba kimo, Njibo ya Bitango ibwanya kwingidijibwa ku mingilo mikwabo ya kiteokratike, kimfwa masomo a kwifunda Bible ne kupwila kwa pa bula kwa batadi ba bipindi. Pamo’nka bwa Njibo ya Bulopwe, Njibo ya Bitango nayo i kifuko kipānwe kya kutōtela’po. Potupwila ku Njibo ya Bitango, mwiendelejo wetu, muvwadilo, ne mwidyangwilo bifwaninwe kwikala bya bulēmantu, enka na motupwidilanga ku Njibo ya Bulopwe mwanda wa kutōta.

²² Bapya bavule batūtyikilanga mu bulongolodi bwa Leza mu bula wa kipindi kya mfulo kya ano mafuku a mfulo. Kino i kilomboji kya madyese a Yehova. (Isa. 60:8, 10, 11, 22) O mwanda tusakanga kukwatakanya mpangiko ya kwikala na mobo ne kulama senene bifuko bilumbuluke bya kutōtela’po. Shi tulonge namino, nabya tubalombola mutyima wetu wa kufwija’ko pangala pa mwingilo wingila ano mobo pa kwitupa muswelo wa kwikankamika batwe bene na bene nakampata pano potwamona’mba difuku dya Yehova dibafwena pabwipi.