Lubatyijo I Kitungo Kiyampe Kwitungila!

Yesu wāfundije amba bene Kidishitu bonso bafwaninwe kubatyijibwa. (Tangai Mateo 28:19, 20.) Ino le lubatyijo i bika? Ne i bika bifwaninwe kulonga muntu pa kusaka’mba abatyijibwe?

1. Lelo lubatyijo i bika?

Kishima “kubatyija” i kitambe ku kishima kya mu Kingidiki kishintulula “kutokenya” mu mema. Yesu paābatyijibwe, wāubijibwe mu Munonga wa Yodano, kupwa ‘waabuka mu mema.’ (Mako 1:9, 10) Mo monka, ne mwine Kidishitu wa bine nandi ubatyijibwanga na kutokenibwa nansha kūbijibwa aye yense mu mema.

2. Lelo lubatyijo lulombola bika?

Shi muntu wabatyijibwa, walombola’mba wepāna aye mwine kudi Yehova Leza. Lelo muntu wipānanga namani? Kumeso kwa kubatyijibwa, ulombelanga milombelo ya pa bunka, mine yasapwila’mo Yehova amba usaka kumwingidila nyeke ne nyeke. Mo mwalaya kutōta’nka Yehova bunka bwandi, kadi kulonga kiswa-mutyima kya Leza kubaikala bu kintu kya mvubu mpata mu būmi bwandi. Watonge ‘kwipela aye mwine ne kulonda nyeke’ bufundiji ne kimfwa kya Yesu. (Mateo 16:24) Kwipāna kwandi ne lubatyijo lwandi bibamupe mukenga wa kupwana bininge na Yehova ne na batōtyi nandi.

3. Le muntu ubwanya kwendelela namani kufika ne ku kubatyijibwa?

Ubwanya kwiteakanya mwa kufikila ku kubatyijibwa na kwifunda myanda ya Yehova ne kukomeja lwitabijo lobe mwadi. (Tangai Bahebelu 11:6.) Poenda uvudija buyuki bobe ne lwitabijo, po pene ne buswe bwa kusanswa Yehova bukenda buningila’ko. Ne kutatana kwine mpika, ukakimba kusapwila bantu myanda ya Yehova ne kwiendeja mu būmi na kulonda misoñanya yandi. (2 Temote 4:2; 1 Yoano 5:3) Shi muntu washilula kunangila “mwa kufwaninwa Yehova mwanda wa kumusangaja ne pa mfulo,” ubwanya papo kutonga kupāna būmi bwandi kudi Leza ne kubatyijibwa.​—Bene Kolose 1:9, 10.a

LANGULUKA BININGE

4. Tubwanya kwifunda bivule ku lubatyijo lwa Yesu

Tangai Mateo 3:13-17 mwa kuyukila myanda mikwabo itala lubatyijo lwa Yesu. Kupwa kemwisambila pa bino bipangujo:

• Lelo Yesu wādi ukidi mwanā lukeke paābatyijibwe?

• Le wābatyijibwe namani? Le i na kumukushila mema?

Yesu wāshilwile mwingilo wa pa bula wāmupēle Leza pano pa ntanda pa kupwa kubatyijibwa. Tangai Luka 3:21-23 ne Yoano 6:38, ne kwisambila pa kino kipangujo:

• Yesu pa kupwa kubatyijibwa, i mwingilo’ka waābadikije kumeso mu būmi bwandi?

5. Nobe ubwanya kubatyijibwa

Mulangwe wa kwipāna ne kubatyijibwa ukokeja kumweka ku ngalwilo bu kiselwa kilēma. Inoko, ubwanya kwendelela kufika’nka ne byowiivwana’mba pano ukokeja kubatyijibwa. Pa kuyuka bantu bamo balongele uno muswelo, talai VIDEO.

VIDEO: Kutamija Bulunda na Yehova (1:11)

Tangai Yoano 17:3 ne Yakoba 1:5, ne kwisambila pa kino kipangujo:

• Le i bintu’ka bibwanya kukwasha muntu afikile pa kubatyijibwa?

1. Twipānanga kudi Yehova na kumusapwila amba tusaka kumwingidila lonso

2. Potubatyijibwa, tulombolanga ku bonso batala amba ke tudi bepāne kudi Leza

6. Kubatyijibwa i kutwela mu kisaka kya Yehova

Potubatyijibwa, tutwelanga mu kisaka kya ntanda yonso kidi umbumo. Nansha twikale ba kwepi ne ba bibidiji’ka, tudi’nka na nkulupilo imo yonka kadi tulondanga misoñanya imo yonka ya mu mwikadilo. Tangai Ñimbo ya Mitōto 25:14 ne 1 Petelo 2:17, ne kwisambila pa kino kipangujo:

• Le lubatyijo lwa muntu lulengejanga kipwano kyandi na Yehova ne na batōtyi-nandi kikale namani?

MU KĪPI

Yesu wāfundije amba bene Kidishitu bafwaninwe kubatyijibwa. Pa kusaka muntu afikile pa kino kitungo, ufwaninwe kukomeja lwitabijo lwandi mudi Yehova, kulonda mu būmi misoñanya yandi, ne kwipāna kwadi.

Pitulukai’mo

• Lelo lubatyijo i bika, ne mwanda waka ludi na mvubu?

• Le kwipāna ne kubatyijibwa i bikwatañane namani?

• I matabula’ka atwala ku kwipāna ne ku kubatyijibwa?

KIMBA

Wifunde uyuke mwine mushintulwila kubatyijibwa.

“Lelo Lubatyijo I Bika?” (Kishinte kya pa Entelenete)

Tala miswelo ibwanya kwendelela’mo muntu kufika ne ku kubatyijibwa.

“Kusanswa Yehova ne Mutyima wa Kumufwija’ko Bikakulengeja Ubatyijibwe” (Kiteba kya Mulami, Kweji 3, 2020)

Tanga myanda ya muntu umo kakwetepo butyibi bwa kubatyijibwa na kubezemuka’tu.

“Badi Basaka Nsokole Bubinebine Ami Mwine” (Kiteba kya Mulami, 1 Kweji 2, 2013)

Bandaula kine kikadile lubatyijo bu kitungo kiyampe kwitungila ne muswelo wa kwiteakanya.

“Le Mfwaninwe Kubatyijibwa?” (Bipangujo bya Bankasampe ne Bilondololwa Bibakwasha, Volime 2, shapita 37)