KIFUNDWA 28
Fwija’ko pa Byobya Bikulongēle Yehova ne Yesu
Le wiivwananga namani shi mulunda nobe wakupe kyabuntu kiyampe? Na bubine ukasangala, kadi ukakimba kulombola mulunda nobe amba wi musangele’kyo. Yehova ne Yesu, nabo i betupe kyabuntu kikatampe kutabuka byonso. Le i kyabuntu’ka, ne i muswelo’ka otukalombola’mba tufwijanga’ko pa kino kyabuntu?
1. Le i muswelo’ka umo otubwanya kufwija’ko Leza ne Kidishitu pa byobya byobetulongēle?
Bible ulaya’mba “ense ulombola lwitabijo mudi [Yesu]” ubwanya kwikala mūmi nyeke. (Yoano 3:16) Kulombola lwitabijo le kulomba bika ne bika? Ke kukulupilapo’tu mudi Yesu kete, mhm. Ino tusakilwa kulombola lwitabijo lwetu kupityila ku butongi botutonga ne ku bintu byotulonga. (Yakoba 2:17) Shi tulombole lwitabijo lwetu mu byotulonga ne mu byotunena, nabya tukakomeja kipwano kyetu na Yesu ne na Shandi, Yehova.—Tangai Yoano 14:21.
2. Le i kinkumenkume’ka kya pa bula kitukwasha tufwije’ko Yehova ne Yesu pa byobetulongēle?
Yesu wāsapwidile balondi bandi mu kyolwa kibadikila lufu lwandi muswelo mukwabo wa kulombola kufwija’ko pa kitapwa kyandi. Wāshilwile kivulukilo kya pa bula kitela Bible bu “Bidibwa bya Kyolwa bya Mfumwetu,” biyukene ne bu Kivulukilo kya lufu lwa Kidishitu. (1 Bene Kodinda 11:20) Yesu wāshilwile kino kivulukilo mwanda wa bana bandi ba bwanga pamo ne bene Kidishitu bonso bakalonda’po, bavuluke amba wāpēne būmi bwandi pa mwanda wa bantu. Pa kino Kivulukilo, Yesu usoñanya’mba: “Longai nyeke namino ke pa kumvulukila.” (Luka 22:19) Potanwa ku Kivulukilo, ulombolanga’mba, ufwijanga’ko pa buswe bukatampe bwitulombwele Yehova ne Yesu Kidishitu.
LANGULUKA BININGE
Bandaula miswelo mikwabo ya kulombola’mo kufwija’ko kobe pa buswe bukatampe bukulombwele Yehova ne Yesu. Kadi yuka ne mvubu idi na Kivulukilo kya lufu lwa Kidishitu.
3. Mutyima wa kufwija’ko witutonona tulonge’po kintu
Langa ubalobela pa mema kokimbe kufwa, ino muntu waiya kukwabula. Lelo ukavulaminwa’tu kino kilongwa kyakulongela uno muntu? Nansha le ubulwe kukakimba muswelo wa kumufwija’ko pa byobya byaakulongela?
Būmi bwetu butamba kudi Yehova. Tangai 1 Yoano 4:8-10, ne kwisambila pa bino bipangujo:
Mwanda waka kitapwa kya Yesu i kyabuntu kya pa bula?
Ubeivwana namani pa byobya bikulongēle Yehova ne Yesu?
Le tukalombola namani kufwija’ko kwetu pa byobya bitulongēle Yehova ne Yesu? Tangai 2 Bene Kodinda 5:15 ne 1 Yoano 4:11; 5:3. Pa kupwa kutanga kisonekwa ne kisonekwa, mwisambilei pa kino kipangujo:
Mungya kino kisonekwa, i bika byotufwaninwe kulonga pa kulombola kufwija’ko kwetu?
4. Iula Yesu
Muswelo mukwabo wa kufwija’ko i kwiula Yesu. Tangai 1 Petelo 2:21, ne kwisambila pa kino kipangujo:
I muswelo’ka obwanya kulonda senene mu mayo a Yesu?
Yesu wādi usenswe Kinenwa kya Leza, wādi usapula myanda miyampe, kadi wādi ukwasha bakwabo
5. Longa Kivulukilo kya lufu lwa Kidishitu
Pa kumona bine byālongekele mu difuku dibajinji dyādilwe Bidibwa bya Kyolwa bya Mfumwetu, tangai Luka 22:14, 19, 20. Kupwa mwisambilei pa bino bipangujo:
Lelo Bidibwa bya Kyolwa bya Mfumwetu byālongelwe namani?
Mukate ne vinyu byelekeja bika?—Tala vese 19 ne 20.
Yesu wādi usaka bana bandi ba bwanga bavuluke Bidibwa bya Kyolwa bya Mfumwetu musunsa umo pa mwaka mu difuku dyaāfwile. O mwanda Batumoni ba Yehova betananga pamo mwaka ne mwaka mwanda wa kuvuluka lufu lwa Kidishitu monka mu muswelo waāsoñenye kwibilonga. Pa kuyuka bivule pa kuno kupwila kwa mvubu mpata, talai VIDEO. Kupwa, mwisambilei pa kino kipangujo:
I bika biloñwanga mu difuku dya Kivulukilo?
Mukate ne vinyu i byelekejo. Mukate welekeja mubidi mubwaninine wa Yesu waāpēne pa mwanda wetu. Vinyu yelekeja mashi andi
BANTU BAMO BANENANGA’MBA: “Kya mvubu pa kupanda, i kwitabija’tu mudi Yesu.”
Le i muswelo’ka okengidija Yoano 3:16 ne Yakoba 2:17 pa kulombola’mba kudi ne bikwabo bilombwa?
MU KĪPI
Tulombolanga kufwija’ko kwetu pa byobya byētulongēle Yesu na kulombola lwitabijo mwadi ne na kutanwa ku Kivulukilo kya lufu lwandi.
Pitulukai’mo
Le kulombola lwitabijo mudi Yesu kushintulula bika?
I muswelo’ka osa kulombola kufwija’ko kobe pa byobya bikulongēle Yehova ne Yesu?
Mwanda waka i kya mvubu kutanwa ku Kivulukilo kya lufu lwa Kidishitu?
KIMBA
Le lufu lwa Kidishitu lwitutonona tulonge bika?
Yukila’ko bivule pa mwikadile lwitabijo ne muswelo wa kwilulombola.
“Lombola Lwitabijo mu Milao ya Yehova” (Kiteba kya Mulami, Kweji 10, 2016)
Mu nsekununi inena’mba, “Nkikidipo wa Disubi Kadi Nasangela ne Būmi,” tala’mo kwifunda myanda ya kitapwa kya Kidishitu mokwashintyile būmi bwa mwana-mukaji umo.
“Bible Ushintanga Būmi” (Kiteba kya Mulami, 1 Kweji 8, 2011)
Tala mwanda waka i batyetye’tu badyanga ku byelekejo bya pa Kivulukilo.