KIFUNDWA 30
Baswe Bobe Bafwile Babwanya Kwikala Monka Bōmi!
Lufu luletanga njia ne bulanda bukatampe. O mwanda Bible utela lufu bu walwana. (1 Bene Kodinda 15:26) Mu Kifundwa 27, wefundile’mo amba Yehova usa kunekenya uno walwana. Pene’pa, le boba bafwile kala nabo? Mu kino kifundwa, usa kwifunda’mo mulao mukwabo wa kutendelwa ulaile Yehova—ke wa kujokeja kadi bantu midiyala ne midiyala ku būmi amba bekale na būmi bwa nyeke. Usa kwibasangula! Bine’tu? Ino le usa kwibasangwila mūlu’ni nansha pano panshi?
1. Lelo i bika bisaka kulonga Yehova ku baswe betu bafwile?
Yehova udi na kipyupyu kya kujokeja bantu bonso bafwile ku būmi. Muntu umo wa kikōkeji witwa bu Yoba, wādi ukulupile amba shi wafu, Leza kakamwilwapo. Wānenene Leza amba: “Uketanga, nami nkakwitaba [mu kibundu].”—Tangai Yoba 14:13-15.
2. Le tubayuka namani amba bafwe babwanya kusangulwa?
Yesu paādi pano pa ntanda, Leza wāmupēle bukomo bwa kusangula bantu. Yesu wāsangwile mwana mwana-mukaji wa myaka 12 ne mwanā mukaji wa kishala bāikala ke bōmi. (Mako 5:41, 42; Luka 7:12-15) Kitatyi pa kupita’po, Lazalasa mulunda na Yesu wāfwa. Nansha Lazalasa byaāfwile wājīkwa ke padi mafuku aná, Yesu wāmujokeje ku būmi. Yesu pa kupwa kulomba kudi Leza, wānena’tu ku kibundu amba: “Lazalasa, tamba’mo!” “Muntu wadi mufwe’wa watamba’mo”—ke mūmi! (Yoano 11:43, 44) Langa’po mwāsangedile babutule ba Lazalasa balunda nandi!
3. Le i bika bisa kulongwa baswe bobe bafwile?
Bible i mulaye amba: “Kukekalanga lusangukilo.” (Bilongwa 24:15) Boba bāsangwilwe na Yesu kebāendelepo mūlu. (Yoano 3:13) Bāikele na nsangaji ya kusangwilwa ku būmi pano pa ntanda. Mo monka ne bantu midiyala ne midiyala bakasangulwa na Yesu, bakekala pano pa ntanda mu paladisa. Wānenene amba “boba bonso badi mu bibundu”—kubadila’mo ne boba bamweka bu bavulaminibwe ino abo bekele mu luté lwa Leza—bakasangulwa.—Yoano 5:28, 29.
LANGULUKA BININGE
Bandaula bukamoni bwa mu Bible bulombola’mba bafwe babwanya kusangulwa ne amba bakasangulwa. Wifunde, umone lusangukilo molubwanya kukusengela ne kukupa lukulupilo.
4. Yesu wālombwele amba ubwanya kusangula bafwe
Wifunde bivule bya muswelo wāsangwile Yesu mulunda nandi Lazalasa. Tangai Yoano 11:14, 38-44, ne kwisambila pa bino bipangujo:
Le tubayuka namani amba Lazalasa wādi bine mufwe?—Tala vese 39.
Shi Lazalasa wādi mūlu, le ulanga Yesu wādi wa kumujokeja amba ekale na būmi pano pa ntanda?
5. Bantu bavule bakasangulwa!
Tangai Ñimbo ya Mitōto 37:29, ne kwisambila pa kino kipangujo:
Lelo bantu midiyala ne midiyala bakasangulwa bakashikata kwepi?
Yesu kakasangulapo’tu enka bantu bādi batōta Yehova. Tangai Bilongwa 24:15, ne kwisambila pa kino kipangujo:
Le i ani okimba kumona ujokela ku būmi?
Yuka kino: I kipēla kudi Yesu kusangula muntu pamo’nka bwa tata ulangula mwana ulēle
6. Lusangukilo lubwanya kukusenga ne kukupa lukulupilo
Nsekununi ya mu Bible ya mwanā Yelusa ke misenge ne kukankamika bantu bavule bene badila. Tangai ino nsekununi ya bine mu Luka 8:40-42, 49-56.
Yesu, kumeso kwa kusangula mwanā Yelusa mwana-mukaji, wāsapwidile shandi amba: “Kokakwatwa moyo, abe ikala’tu na lwitabijo.” (Tala vese 50.) Lelo lukulupilo lwa lusangukilo lubwanya namani kukukwasha . . .
kitatyi kifwa muntu osenswe?
kitatyi kidi būmi bobe mu kyaka?
Talai VIDEO, ne kwisambila pa kino kipangujo:
Lelo lukulupilo lwa lusangukilo lwasengele namani ne kukankamika bambutwile ba Phelicity?
BANTU BAMO BANENANGA’MBA: “Lusangukilo i luyampe mpata ino kelubwanikapo kulongeka.”
Le abe ulanga’po namani?
I kisonekwa’ka kyokengidija mwanda wa kulombola’mba kukekalanga lusangukilo?
MU KĪPI
Bible ulaya’mba bantu midiyala ne midiyala bafwile bakasangulwa. Yehova usakanga bekale monka bōmi, kadi i mupe Yesu bukomo bwa kwibasangula.
Pitulukai’mo
Le tubayuka namani amba ba Yehova ne Yesu badi na kipyupyu kya kujokeja ku būmi bantu bafwile?
Bantu midiyala ne midiyala bakasangulwa bakashikata kwepi—mūlu’ni pano panshi? Mwanda waka ubanena nankyo?
Le i kika kyakukulupija’mba baswe bobe bafwile bakekala monka bōmi?
KIMBA
Tala matabula a kamweno a kutabula pa kunekenya bulanda.
Le misoñanya ya mu Bible ibwanya bine kukwasha muntu udila?
Lelo bana babwanya kulwa namani na misanshi ya kufwilwa muntu obasenswe?
Le kudi ne bakasangwilwa kwenda mūlu? Le i bāni kebakasangulwapo?