KIFUNDWA 20
Muswelo Ulongolwelwe Kipwilo
Yehova i Leza wa ndudi. (1 Bene Kodinda 14:33) Nanshi i kyendele’mo bantu bandi bekale balongololwe. Lelo kipwilo kya bwine Kidishitu i kilongololwe namani? Ne i muswelo’ka otubwanya kutuntwila ku kuno kulongololwa?
1. Lelo mutwe wa kipwilo i ani?
“Kidishitu [ye] mutwe wa kipwilo.” (Bene Efisesa 5:23) Tamba mūlu, utalanga mingilo ya bantu ba Yehova ntanda yonso. Yesu i mutonge “umpika mukōkele ne mudyumuke”—kisumpi kityetye kya bakulumpe ba bwino kiyukene ne bu Kitango Kyendeji. (Tangai Mateo 24:45-47.) Pamo’nka bwa batumibwa ba mu myaka katwa kabajinji ne bakulumpe bādi mu Yelusalema, Kitango Kyendeji kiletanga bulombodi ku bipwilo ntanda yonso. (Bilongwa 15:2) Inoko bano bana-balume ke abopo bendeji ba bulongolodi bwetu. Bakimbanga bwendeji kudi Yehova ne mu Kinenwa kyandi, kadi bakōkelelanga bumutwe bwa Yesu.
2. Le bakulumpe i bāni ne badi na mwingilo’ka?
Bakulumpe i bana-balume bene Kidishitu ba bwino bafundija myanda ya mu Bisonekwa ne kukumba bantu ba Yehova na kwibakwasha ne na kwibakankamika. Kebafutwangapo pa mwingilo wabo. Ino, bengilanga “na mutyima tō ku meso a Leza; ke na kusanswapo kamweno ka budimbidimbi, ino i pampikwa nsengwa.” (1 Petelo 5:1, 2) Bakulumpe bakwashibwanga’ko na bengidi ba mingilo, bene babwanya nabo kwingila bu bakulumpe mwenda mafuku shi ababwanya bisakibwa.
Kitango Kyendeji kitoñanga bakulumpe bamo bu batadi ba bipindi. Bano batadi bapempulanga bipwilo palapala mwanda wa kwibipa bulombodi ne kwibikankamika. Batadi ba bipindi batoñanga batutu babwenye bisakibwa bya mu Bisonekwa amba bengile bu bakulumpe ne bu bengidi ba mingilo.—1 Temote 3:1-10, 12; Tetusa 1:5-9.
3. Lelo Kamoni ense udi na mwingilo’ka?
Muntu ense mu kipwilo ‘utendelanga dijina dya Yehova’ na kutanwa ku kupwila kwa pa kipwilo ne na kutambila mu mwingilo wa busapudi mungya ngikadilo yadi’mo.—Tangai Ñimbo ya Mitōto 148:12, 13.
LANGULUKA BININGE
Wifunde, uyuke shi Yesu i mwendeji wa muswelo’ka, uyuke muswelo umwiula bakulumpe, kadi uyuke ne muswelo okokeja kwingidila nandi pamo ne na bakulumpe bene.
4. Yesu i mwendeji utūjañana
Yesu witwita na nsangaji. Tangai Mateo 11:28-30, ne kwisambila pa kino kipangujo:
Lelo Yesu usaka tumone bwendeji bwandi namani?
Lelo bakulumpe beulanga kimfwa kya Yesu namani? Talai VIDEO.
Bible i mulombole patōkelela muswelo ufwaninwe kuvuija bakulumpe mwingilo wabo.
Tangai Isaya 32:2 ne 1 Petelo 5:1-3, ne kwisambila pa bino bipangujo:
Lelo ubeivwana namani pa kumona’mba bakulumpe baloñanga bukomo bwa kutūja bakwabo pamo bwa Yesu?
Le i mu miswelo’ka mikwabo bakulumpe mobeula Yesu?
5. Bakulumpe bafundijanga kupityila ku kimfwa kyabo
Lelo Yesu usaka bakulumpe bamone namani mwingilo wabo? Talai VIDEO.
Yesu i mulete musoñanya ku boba bonso batangidila mu kipwilo. Tangai Mateo 23:8-12, ne kwisambila pa kino kipangujo:
Le i bika byakutulumuna pa muswelo wishidile musoñanya wa mu Bible obapēle bakulumpe na byobya byokodi mumone mu bendeji ba bipwilo?
Bakulumpe balamanga kipwano kyabo na Leza kadi bakomeja ne kya bisaka byabo kine
Bakulumpe batanga bonso badi mu kipwilo mutyima
Bakulumpe basapulanga kyaba ne kyaba
Bakulumpe i bafundiji. Ino kadi bakwashanga ku kukundula ne ku mingilo mikwabo
6. Tubwanya kukōkela bakulumpe
Bible uleta bubinga bwa mvubu mpata botufwaninwe kukōkelelela bakulumpe. Tangai Bahebelu 13:17, ne kwisambila pa bino bipangujo:
Le ulanga bino bitusoñanya Bible bya kukōkela ne kukōkelelela boba betutangidile i byendele’mo? Mwanda waka ubanena nankyo?
Tangai Luka 16:10, ne kwisambila pa kino kipangujo:
Mwanda waka tufwaninwe kukōkela bakulumpe enka ne mu myanda imweka bu mityetyetyetye?
BANTU BAMO BANENANGA’MBA: “Kekidipo na mvubu kwikala mu kipwilo kampanda.”
I byabuyabuya’ka bidi mu kutōta Leza koku wikele mu kipwilo?
MU KĪPI
Yesu ye mutwe wa kipwilo. Tukekala na nsangaji shi tukōkela bakulumpe bengila munshi mwa buludiki bwandi, mwanda betutūjanga ne kwitufundija kupityila ku bimfwa byabo.
Pitulukai’mo
Lelo mutwe wa kipwilo i ani?
Le bakulumpe bakwashanga namani kipwilo?
Mutōtyi ense wa Yehova udi na mwingilo’ka?
KIMBA
Tala bukamoni bulombola’mba Kitango Kyendeji ne bakulumpe bakwabo batele bininge mutyima banababo bene Kidishitu dyalelo.
Wifunde uyuke mwingilo wingila batadi ba bipindi.
Tanga umone mwingilo wa bana-bakaji mu kipwilo.
“Le Batumoni ba Yehova Badi na Bengidi Bana-Bakaji?” (Kiteba kya Mulami, 1 Kweji 9, 2012)
Tala muswelo wingila bininge bakulumpe mwanda wa kukankamika banababo mu lwitabijo.
“Bakulumpe Bene Kidishitu—‘Bakwashi ba mu Kusepelela Kwetu’” (Kiteba kya Mulami, 15 Kweji 1, 2013)