KIFUNDWA 47
Lelo Wi Mwiteakanye Kubatyijibwa?
Ubefunde bintu bivule padi Yehova kupityila ku kifundwa kyobe kya Bible. Padi kodi mushinte ne bintu bimobimo mwanda wa kulonda mu būmi myanda yowefundile. Inoko padi, kukokeja kwikala kintu kampanda kikujokeja kunyuma uleke kwipāna kudi Yehova ne kubatyijibwa. Kino kifundwa kisa kwisambila pa bijika bimobimo bivudile kujikakanya bantu baleke kubatyijibwa, ne muswelo obwanya kwibinekenya.
1. Le i buyuki bwa muswelo’ka bofwaninwe kwikala nabo kumeso kwa kubatyijibwa?
Pa kubatyijibwa, ufwaninwe “kwikala na buyuki bwinebwine bwa bubine.” (1 Temote 2:4) Kino kekishintululapo amba ufwaninwe bidi kuyuka bilondololwa byonso bitala pa Bible kumeso kwa kubatyijibwa. Nansha ke bene Kidishitu babatyijibwe ke padi myaka, bakyendelela na kwifunda. (Bene Kolose 1:9, 10) Inoko ufwaninwe kuyuka bufundiji bwa Bible bwa kyalwilo. Bakulumpe pa kipwilo bakakukwasha uyuke shi kodi na buyuki bufwaninwe.
2. I matabula’ka ofwaninwe kutabula kumeso kwa kubatyijibwa?
Kumeso kwa kubatyijibwa, ufwaninwe ‘kwisāsa ne kwalamuka.’ (Tangai Bilongwa 3:19.) Kino kishintulula’mba ufwaninwe kwialakanya pa bubi bonso bokodi mulonge ne kulomba Yehova akufwile lusa. Ino ufwaninwe kadi ne kupela na kusumininwa mwiendelejo mubi ne kusumininwa kwikala na būmi busangaja Leza. Kadi, ukokeja kushilula ne kwingidila pamo na kipwilo, na kupwila ebiya ne na kusapula pamo bu musapudi wampikwa kubatyijibwa.
3. Mwanda waka kufwaninwepo kuleka moyo ukujokeje kunyuma?
Bamo bevwananga moyo amba kebakabwanyapo kuvuija byobya byobalaile Yehova. Eyo, kyaba kimo ukaluba ne kuluba pamo’nka na mwālubīle bana-balume ne bana-bakaji ba kikōkeji batelelwe mu Bible. Inoko Yehova kalombengapo batōtyi bandi bekale babwaninine. (Tangai Ñimbo ya Mitōto 103:13, 14.) Usangalanga polonga bukomo bobe bonso bwa kulonga biyampe! Ukakukwasha. Yehova mwine witukulupija’mba i kutupu kikabwanya “kwitusansanya na buswe” bwandi.—Tangai Bene Loma 8:38, 39.
LANGULUKA BININGE
Wimwene mwa kunekenenya bijika bikankajanga bavule kubatyijibwa poenda uyukila’ko Yehova biyampe, kadi itabija bukwashi bwandi.
4. Yuka Yehova senene
Le ufwaninwe kuyuka Yehova senene kufika ne mu ludingo’ka kumeso kwa kubatyijibwa? Ufwaninwe kumuyuka biyampe mu muswelo ulengeja umusanswe ne kusaka kumusangaja. Talai VIDEO mumone bantu ba koku ne koku badi befunda Bible mobabwaninye. Kupwa, mwisambilei pa kipangujo kilonda’kya.
Mu ino video, i bika byakweshe bano bantu beteakanye mwanda wa kubatyijibwa?
Tangai Bene Loma 12:2, ne kwisambila pa bino bipangujo:
Lelo ukitatananga myanda imo ifundija Bible nansha le ukiipangulanga shi byobya bifundija Batumoni ba Yehova i bya bine?
Shi bidi nankyo, i bika byofwaninwe kulonga pa kuno kutatana?
5. Nekenya bijika bibwanya kukukankaja kubatyijibwa
Batwe bonso tutanwanga na bikoleja kitatyi kyotukwata butyibi bwa kwipāna kudi Yehova ne kubatyijibwa. Pa kumona’ko bikoleja bimo, talai VIDEO, ne kwisambila pa bipangujo bilonda’bya.
Mu ino video, le i bijika’ka byadi bifwaninwe kunekenya Narangerel pa kusaka kwingidila Yehova?
Le buswe bwaadi usenswe Yehova bwamukweshe namani anekenye bino bijika?
Tangai Nkindi 29:25 ne 2 Temote 1:7, ne kwisambila pa kino kipangujo:
I bika bitupanga bukomo bwa kunekenya bijika?
6. Kulupila Yehova akukwashe
Yehova ukakukwasha umusangaje. Talai VIDEO, ne kwisambila pa bino bipangujo.
Mu ino video, i bika byalengeje uno mwifundi wa Bible ekake kubatyijibwa?
Le i bika byawefundile bine byamukweshe aningije kikulupiji kyandi mudi Yehova?
Tangai Isaya 41:10, 13, ne kwisambila pa kino kipangujo:
Mwanda waka i biyampe ukulupile amba ukabwanya kufikidija mulao osa kulaya Yehova mu difuku dyobe dya kubatyijibwa?
7. Fwija’ko Yehova bininge pa buswe bwakusenswe
Kitatyi kyoenda ulangulukila bininge pa muswelo ukusenswe Yehova, po pene nobe ukakimba kumufwija’ko, kadi po pene ukakimba kumwingidila nyeke ne nyeke. Tangai Ñimbo ya Mitōto 40:5, ne kwisambila pa kino kipangujo:
Le i madyese’ka atamba kudi Yehova osangelanga bininge?
Mupolofeto Yelemia wāsenswe Yehova ne kinenwa kyandi, kadi wāsangedile bininge dyese dya kwityilwa pa dijina dya Yehova. Wānenene amba: “Kinenwa kyobe kyaikele kondi ke kusepelela ne nsangaji ya mutyima wami, mwanda naityīlwe pa dijina dyobe, a Yehova Leza.” (Yelemia 15:16) Londolola bino bipangujo:
Mwanda waka kwikala Kamoni wa Yehova i dyese dya pa bula?
Le usakanga kubatyijibwa nobe wikale bu Kamoni wa Yehova?
Le kudi kintu kampanda kikukankaja?
Molangila, i bika byofwaninwe kulonga pa kufikila pa kitungo kya kubatyijibwa?
BANTU BAMO BANENANGA’MBA: “Nkikabwanyapo kulonga byobya bilombwa ku bantu babatyijibwe.”
Lelo nobe ye mowiivwanina?
MU KĪPI
Na bukwashi bwa Yehova, ukabwanya kunekenya kijika kyo-kyonso kikukankaja kubatyijibwa.
Pitulukai’mo
Le ufwaninwe kwikala na buyuki bwa muswelo’ka bwa mu Bible kumeso kwa kubatyijibwa?
I bintu’ka bikulomba kushinta mu būmi kumeso kwa kubatyijibwa?
Mwanda wa bika kufwaninwepo kuleka moyo ukujokeje kunyuma?
KIMBA
Tala kine kifwaninwe kukulengeja ukwate butyibi bwa kubatyijibwa.
“Le Kodi Mwiteakanye Mwanda wa Kubatyijibwa?” (Kiteba kya Mulami, Kweji 3, 2020)
Wifunde mwa kunekenenya bikoleja bibwanya kukujokeja kunyuma.
“Le Kinkankaja Kubatyijibwa I Kika?” (Kiteba kya Mulami, Kweji 3, 2019)
Tala mwana-mulume umo mwaanekenenye senene bijika bivudile kumweka amba abatyijibwe.
Dibajinji bidi, muntu umo witwa bu Ataa wadi utyina kubatyijibwa. Ino tala byamunekenye atabule dino ditabula dya mvubu mpata.