KIFUNDWA 39
Byobya Binena Leza pa Mwanda Utala Mashi
Mashi adi na mvubu. Shi keadi’kopo, longa i kutupu pano potudi muntu udi na būmi. Leza byadi ye Umpangi, nanshi udi na bubinga bwa kwitulombola muswelo ufwaninwe kwingidijibwa mashi. Le i bika byanenene pa mwanda utala mashi? Le akokeja kudibwa nansha kwiela’o mu mijilo? I muswelo’ka okokeja kukwata butyibi buyampe mu uno mwanda?
1. Le Yehova unena bika pa mwanda utala mashi?
Yehova wāsapwidile batōtyi bandi mu kitatyi kyālembelwe Bible amba: “Būmi bwa ngitu ya muswelo o-onso i mashi ayo.” (Bene Levi 17:14) Nanshi kudi Yehova, mashi elekeja būmi. Būmi byobudi bujila, bukola, ne bu kyabuntu kitupēle Leza, nanshi ne mashi nao i ajila.
2. Le muswelo wa kwingidija mashi upeleje Leza i wepi?
Yehova wāsoñenye batōtyi bandi ba kumeso kwa bwine Kidishitu amba kebafwaninwepo kudya mashi. (Tangai Ngalwilo 9:4 ne Bene Levi 17:10.) Yehova wākomeneje monka uno mwanda kitango kyendeji pokyāsoñenye bene Kidishitu ‘belame ku mashi.’—Tangai Bilongwa 15:28, 29.
Lelo kwilama ku mashi kushintulula bika? Shi dokitele wakudyumuna amba wilame ku mālwa, nalanga kukatome’opo. Ino le ukadya’ko bidibwa bidi’mo mālwa nansha kwiela’o mu mijilo? Mhm, kukalongapo nankyo. Mo monka ne musoñanya wa Leza utala pa mashi ulombola’mba ketufwaninwepo kutoma’o nansha kudya mwita wampikwa kutyindya. Kadi ketufwaninwepo ne kudya bidibwa byobabwejeje’mo mashi.
Le tunene namani pa mwingidijijo wa mashi mu bundapi? Myundapilo imo ijilulanga patōkelela bijila bya Leza. Kimfwa na kwela mu mijilo mashi matuntulu nansha bipindi byao bikatampe—ko kunena’mba miseke ityila, miseke itōka, miseke ikwatyija mashi, ne lwima. Kudi myundapilo mikwabo nayo keimwekejangapo patōkelela shi i kujilula’ni nansha ke kujilulapo kwa bijila bya Leza. Kimfwa, myundapilo ya kwingidija tubipindi tutyetutye twa mu kipindi kampanda kikatampe kya mashi. Kudi kadi ne myundapilo ya kwingidija mashi a muntu mwine. Pa mwanda utala ino myundapilo, muntu ne muntu ufwaninwe kwikwatyila butyibi aye mwine.a—Bene Ngalatea 6:5.
LANGULUKA BININGE
Bandaula, uyuke mwa kukwatyila butyibi bwa bundapi mu myanda itala mashi.
3. Tonga mundapilo usangaja Yehova
Le i muswelo’ka okatonga mundapilo ukwatañene na byobya binena Leza pa mwanda utala mashi? Talai VIDEO, ne kwisambila pa matabula alonda’a a mvubu mikatampe.
Lomba tunangu.—Yakoba 1:5.
Kimba misoñanya ya mu Bible ne muswelo wa kwiingidija.—Nkindi 13:16.
Kimba kuyuka myundapilo palapala idi kokwa koshikete.
Jingulula i yepi yobwanya kwitabija.
Tala shi butyibi bokokwata bukakushiya na mutyima wa mundamunda utōka.—Bilongwa 24:16.b
Yuka’mba kekudipo muntu nansha umo—mwinē pobe, mukulumpe, nansha ke yewa omwifundanga nandi Bible—ufwaninwe kukulombola butyibi bwa kukwata mu myanda itala mutyima wa mundamunda.—Bene Loma 14:12.
Lemba butyibi bowakwata.
4. Batumoni ba Yehova bakimbanga mundapilo muyampe
Bikokejika kukōkela kijila kya Leza ne kundapwa pampikwa kwelwa mashi. Talai VIDEO.
Tangai Tetusa 3:2, ne kwisambila pa kino kipangujo:
Mwanda waka kwikala batalala ne kumvwañana na bamuñanga i kuyampe?
Bya kupela |
Bya abe mwine kutonga |
|---|---|
A. Lwima |
Tupindi twa mu lwima |
B. Miseke itōka |
Tupindi twa mu miseke itōka |
C. Miseke ikwatyija mashi |
Tupindi twa mu miseke ikwatyija mashi |
D. Miseke ityila |
Tupindi twa mu miseke ityila |
5. Tupindi twa mashi ne bundapi
Mashi adi na bipindi biná bikatampe—miseke ityila, miseke itōka, miseke ikwatyija mashi, ne lwima. Bino bipindi bikatampe nabyo bidi na tupindi tutyetutye, tutelwa bu tupindi twa mashi.c Tupindi tumo twa mashi twingidijibwanga mu bundapi mwanda wa kulwa na misongo nansha mwanda wa kwimika mashi atamba.
Pa mwanda utala tupindi tutyetutye twa mashi, mwine Kidishitu ense ufwaninwe kwikwatyila butyibi bwimanine pa mutyima wa mundamunda mufundijibwe na Bible. Bamo babwanya kupela bundapi nansha mundapilo ulomba kwingidija tuno tupindi twa mashi. Ino bakwabo nabo, mutyima wabo wa mundamunda ubwanya kwibetabijija tuno tupindi twa mashi.
Shi kokwata butyibi bobe, bandaula bidi kino kipangujo:
Le nkashintulwila dokitele namani kine kyonapelela nansha kyonaitabijija bengidije tupindi tumo twa mashi?
MUNTU UBWANYA KWIPANGULA’MBA: “Le i kibi’ka kidi’ko shi naitabija bangele mashi mu mijilo?”
Le abe ukanena’po namani?
MU KĪPI
Yehova usaka tumone mashi bu ajila.
Pitulukai’mo
Mwanda waka Yehova umwene mashi bu ajila?
Le tubayuka namani amba musoñanya wa Leza wa kwilama ku mashi ulondwanga ne mu mwanda utala kwiela’o mu mijilo?
I muswelo’ka okakwata butyibi buyampe mu mwanda utala bundapi bulomba kwelwa mashi?
KIMBA
Le i myanda’ka ifwaninwe kukuludika pokwata butyibi mu myundapilo ilomba mashi?
“Bipangujo bya Batangi” (Kiteba kya Mulami, 1 Kweji 11, 2000)
I bika byofwaninwe kubandaula kumeso kwa kwitabija nansha kupela tupindi tutyetutye twa mashi?
“Bipangujo bya Batangi” (Kiteba kya Mulami, 15 Kweji 6, 2004)
Tala bine byalengeje muñanga umo etabije amba byobya binena Yehova pa mwanda utala mashi i byendele’mo?
“Naitabije Byobya Binena Leza pa Mwanda Utala Mashi” (Langukai!, 8 Kweji 12, 2003)
Tala bakulumpe bengila mu Makomite Atala Myanda ya Lupitalo mobakwashishanga batutu ne bakaka.
a Tala Kifundwa 35, “Mwa Kukwatyila Butyibi Buyampe.”
b Tala mwanda wa butano unena’mba, “Tupindi twa Mashi ne Bundapi” ne Bilembwa bya ku Mfulo 3 binena’mba, “Myundapilo Ilomba Mashi.”
c Badokitele bamo bamonanga bino bipindi bikatampe bya mashi bu tupindi twa mashi. O mwanda nanshi, bikokeja kukulomba kwibashintulwila kine kyowapelela mashi matuntulu, miseke ityila, miseke itōka, miseke ikwatyija mashi, ne lwima.