Le Bulopwe bwa Leza Bukalonga Bika?

BINTU BILONGELE KALA BULOPWE BWA LEZA

Mu kishinte kibadikile twi besambile’mo pa kiyukeno kyāletele Yesu. Kino kiyukeno kileta bukamoni bumwekelēle bulombola’mba, Bulopwe bwa Leza bwashimikilwe momwa mūlu ne amba Yesu Kidishitu ye Mulopwe.

Bible unena’mba Yesu paabikele, wapangile Satana ne bandemona bandi momwa mūlu. Pano bengidilanga mingilo yabo pano pa ntanda, o mwanda bintu i bibipile’ko tamba mu mwaka wa 1914.​—Kusokwelwa 12:7, 9.

Nansha ngikadilo ya ntanda byoyenda ibipila’ko, Yesu Mulopwe wa Bulopwe bwa Leza, i mulonge bintu mwanda wa kukwasha bantu pa ntanda yonso. Byokudi mwingilo wa kufundija bantu Bible ntanda yonso wālaile Yesu, bantu bavule bafundanga misoñanya ya mu Bible ne kwiingidija mu būmi bwabo bwa difuku ne difuku. (Isaya 2:2-4) Bantu midiyo ne midiyo i befunde mwa kwikadila na mumweno muyampe pa kaji, kulumbulula būmi bwa bisaka byabo, ne mwa kwikadila na bintu bya ku ngitu pampikwa kwikala bapika babyo. Bano bantu i befunde muswelo wa kumwena’mo tamba’nka pano ne mwa kwikadila bu bantu basaka Leza mu Bulopwe bwandi.

LE I BIKA BIKWABO BISA KULONGA BULOPWE BWA LEZA?

Nansha Yesu byaludika kala momwa mūlu, maludiki a bantu nao akiludika pano pa ntanda. Inoko, Leza wāsoñenye Yesu amba: “Nekenya mu bukata mwa balwana nobe.” (Ñimbo ya Mitōto 110:2) Panopano ponka, Yesu usa konakanya balwana nandi bonso ne kukūla boba bakōkele Leza na mutyima tō.

Mu kino kitatyi, Bulopwe bwa Leza bukalonga’po kintu mwanda wa:

• Kutalula’ko bipwilo bya bubela. Bipwilo bifundija myanda ya bubela itala padi Leza ne kulengeja bantu bakomenwe mu būmi, kebikekala’kopo. Bible welekeja bipwilo bya bubela na ndumba. Konakanibwa kwabyo kukasansa bantu bavule.​—Kusokwelwa 17:15, 16.

• Kufudija buludiki bwa bantu. Bulopwe bwa Leza bukalonga’po kintu mwanda wa kufudija maludiki a bantu.—Kusokwelwa 19:15, 17, 18.

• Kutalula’ko bantu babi. Le i bika bikafikila boba basumininwe kulonga bibi kadi bapela kukōkela Leza? “Babi, abo bakatyibwanga’ko pa ntanda.”​—Nkindi 2:22.

• Kutalula’ko Satana ne bandemona. Satana ne bandemona kebakekalapo na bukomo bwa kongola “monka mizo.”​—Kusokwelwa 20:3, 10.

Le bino byonso bikekala na buluji’ka ku boba betabije Bulopwe bwa Leza?

LE BULOPWE BWA LEZA BUKALONGELA BANTU BIKA?

Yesu byaludika momwa mūlu bu Mulopwe, ukalonga bivule kutabuka bintu bibwanya kulonga muntu yense ubikele. Ukakwashibwa na bantu 144 000 bakaludika nabo, batongelwe mu muzo wa muntu. (Kusokwelwa 5:9, 10; 14:1, 3) Ukalengeja kiswa-mutyima kya Leza kilongeke pano pa ntanda. Le Bulopwe bwa Leza bukalongela bantu bekele pano pa ntanda bika?

• Bukatalula’ko misongo ne lufu. “I kutupu mwikadi ukanena’mba: ‘Nabela,’” ne “lufu kelukekala’kopo dikwabo.”​—Isaya 33:24; Kusokwelwa 21:4.

• Bukaleta ndoe ya bine ne mutyima-ntenke. “Ndoe ya bobe bana bana-balume ikavula,” kadi “bakashikata, muntu ne muntu munshi mwa muñanza wandi ne munshi mwa kikuyu kyandi, i kutupu muntu nansha umo ukebakwatyija moyo.”​—Isaya 54:13; Mika 4:4.

• Bukaleta kaji kayampe. “Batongwe bami bakasangela bya binebine mingilo ya makasa abo. Kebakaputumapo na mingilo bya bitupu.”​—Isaya 65:22, 23.

• Bukapwa makambakano mu bifuko bishiketwe’mo. “Mu ntanda mutuputupu ne ntanda myūmu tē bikasepelela, kadi dilungu mudi zolē dikasangala ne kutōya maluba pamo bwa safelona.”​—Isaya 35:1.

• Bukafundija bantu bya kulonga pa kwikala’ko nyeke. “Buno’bu bo būmi bwa nyeke, bendelele kukuyuka abe, Leza umo kete wa bine, ne yewa owatumine, Yesu Kidishitu.”​—Yoano 17:3.

Leza ukusakila ano madyese. (Isaya 48:18) Kishinte kilonda’ko kisa kushintulula byokokeja kulonga tamba’nka pano, amba ukekale mu buno būmi bulumbuluke bwa kumeso.