Mwa Kulongolwela Kipwano Kyobe na Yehova

MWAKA ne mwaka, mikōko milēme mivule ijokejibwanga mu kipwilo kya bwine Kidishitu. Fwatakanya’po nsangaji mikatampe ikalanga “mūlu” shi umo’tu ubajoka! (Luka 15:7, 10) Shi wajokejibwe, ubwanya kukulupila amba Yesu, bamwikeulu, ne Yehova mwine i basangale pa kwikala kowaikala monka mu kipwilo. Inoko polongolola kipwano kyobe na Yehova, ubwanya kutanwa na makambakano. Le i makambakano’ka amoamo, ne i bika bibwanya kukukwasha?

MAKAMBAKANO AMOAMO

Banabetu bavule bekondanga na milangwe mibi nansha ke pa kupwa kujokela mu kipwilo. Padi ubaivwanija mwēivwanine Mulopwe Davida. Nansha ke pa kupwa kulekelwa bubi bwandi, wānenene amba: “Bilubo byami . . . bibandēmenena.” (Ñim. 40:12; 65:3) Shi muntu wajokela kudi Yehova, ubwanya kwikala na milangwe ya kwitopeka nansha bumvu mu myaka mivule. Isabelle, wapangilwe mu bula bwa myaka 20.a Unena’mba: “Nadi nkomenwa kwitabija’mba Yehova ubwanya kundekela.” Shi utyumukwe mutyima, ukokeja kuzoza monka ku mushipiditu. (Nki. 24:10) Kokaleka kino kikufikile.

Bakwabo nabo batuyukanga pa bintu bya kulonga mwanda wa kulongolola kipwano kyabo na Yehova. Antoine wanenene pa kupwa kujokejibwa amba: “Namwene amba nadi kendi mwilwe bintu bivule byonefundile ne byonadi nonga ponadi Kamoni.” Kulanga uno muswelo, kubwanya kulengeja bantu bamo bekake kwingila ne pa mfulo mingilo ya Yehova.

Kimfwa, shi njibo ya muntu yasenswe bininge ibaonakanibwa na kimpumpu, ubwanya kutyumukwa mutyima palangulukila pa bukomo ne kitatyi kya kūbakulula ino njibo. Mu muswelo umo onka, shi kipwano kyobe na Yehova kyaonekele pa mwanda wa bubi bukatampe bowalongele, ubwanya kulanga’mba bikakulomba kulonga bivule pa kulongolola kipwano kyobe na Yehova. Inoko kudi muntu ubwanya kukukwasha.

Yehova witwita’mba: “Pano iyai, tusendulule myanda.” (Isa. 1:18) Walongele kala bukomo bwa ‘kusendulula myanda.’ Yehova ukusenswe pa buno bukomo bowalongele. Langa’po bidi: Wi mupe Yehova bubinga bwa kulondolwela ku lonji lwa Satana!—Nki. 27:11.

Byojokēle kudi Yehova, wimufwene kala kwadi, kadi nandi i mulaye kukufwena. (Yak. 4:8) Inoko bilomba kulonga bivule kupita’ko’tu kuyukana mu kipwilo amba ubajokela kudi Yehova. Ufwaninwe kuningija nyeke buswe bosenswe Yehova, Shobe kadi Mulunda nobe. Le ukebuningija namani?

WITUNGILE BITUNGO BYOBWANYA KUFIKILA’PO POLONGOLOLA KIPWANO KYOPWENE NANDI

Witungile bitungo byobwanya kufikila’po. Vuluka’mba ukiyukile bintu bya kyalwilo byowefundile padi Yehova ne pa milao yandi. Ino pano usakilwa kwikala monka na bibidiji biyampe, kimfwa kusapula myanda miyampe, ne kupityija monka kitatyi na batutu ne bakaka. Langulukila pa bino bitungo.

Wisambe na Yehova kyaba kyonso. Shobe uyukile amba shi udi nyeke na milangwe ya kwitopeka, ukakomenwa kumulomba. (Loma 8:26) Ino abe ‘takamana mu milombelo,’ lombola Yehova amba usakanga kupwana nandi. (Loma 12:12) Andrej uvuluka’mba: “Nadi netopeka bininge ne kwivwana bumvu. Ino ponso ponadi mpwa kulombela, nadi neivwana biyampe. Nadi ngikala na ndoe ya mutyima.” Shi kuyukilepo bya kulomba mu milombelo, tala milombelo ya kwisāsa ya Mulopwe Davida idi mu Ñimbo ya Mitōto shapita 51 ne shapita 65

Wifunde Bible kitatyi ne kitatyi. Kino kikakukwasha wikale na lwitabijo lukomo kadi usanswe Yehova bininge. (Ñim. 19:7-11) Felipe unena’mba “kubulwa kutanga ne kwifunda Bible kitatyi ne kitatyi kyo kintu kyanengeje nzoze ne kusanshija Yehova. Byonkyadipo nsaka kulonga kino kilubo musunsa wa bubidi, nakwete butyibi bwa kwifunda pa kasuku.” Nobe ubwanya kulonga namino. Shi usakilwa bukwashi pa kuyuka myanda ya kwifunda, nena mulunda nobe mutame ku mushipiditu akukwashe.

Longolola kipwano kyobe na batutu ne bakaka. Bantu bamo bajokelanga mu kipwilo, bazumbijanga mutyima’mba banababo bakebamona bibi. Larissa unena’mba: “Naivwene bumvu bininge. Nadi mwene amba ne musanshije batutu ne bakaka. Naikele na ino milangwe mu kitatyi kilampe.” Yuka’mba bakulumpe ne banabetu batame ku mushipiditu basakanga kukukwasha ulongolole kipwano kyobe na Yehova. (Tala kapango kanena’mba “Le I Bika Bibwanya Kulonga Bakulumpe?”) I basangale pa kujoka kowajoka, kadi basakanga wikale na nsangaji!—Nki. 17:17.

Le i bika bibwanya kukukwasha ufwene kudi batutu ne bakaka? Longa bintu byobalonga—kutanwa ku kupwila ne kusapula kitatyi ne kitatyi. Le kulonga namino kukakukwasha namani? Felix wanenene amba: “Kipwilo kyadi kitengele njoke. Namwene amba i bansanswe. Abo bonso bankweshe ngikale monka mu kisaka, mone amba i bandekele, kadi ñendelele kwingidila Yehova.”—Tala kapango kanena’mba “Le I Bika Byobwanya Kulonga?”

KOKALEKA’BYO!

Satana ukendelela kukutumina “makambakano” mwanda wa kukuzozeja uleke kulongolola kipwano kyobe na Yehova. (Luka 4:13) Witeakanye na kuningija kipwano kyobe tamba’nka pano.

Yehova i mulaye mikōko yandi amba: “Nkakimba owa mujimine, nkajokeja owa mulube, nkakuta bilonda bya owa mutapwe, kadi nkakomeja owa muzoze.” (Ezk. 34:16) Yehova ke mukwashe bantu bavule balongolole kipwano kyobadi bapwene nandi kyaonekele. Kulupila’mba usakanga kukukwasha uningije nyeke kipwano kyopwene nandi.

Le I Bika Bibwanya Kulonga Bakulumpe?

Bakulumpe babwanya kulonga bivule pa kukwasha basapudi bajokejibwe balongolole kipwano kyabo na Yehova. Tala bintu byobabwanya kulongela boba bajokejibwe.

Kwibakulupija. Mutumibwa Polo wādi uyukile amba kipya-mambo wesāsa ubwanya kulēmenenwa “na kufītwa mutyima bipitepite.” (2 Ko. 2:7) Ubwanya kwivwana bumvu ne kutyumukwa mutyima. Polo wādingile kipwilo amba: “Mulekelei na mutyima tō ne kumusenga.” Boba bajokejibwe basakilwa kukulupijibwa amba Yehova ne banababo mu lwitabijo bebasenswe bininge. Babwanya kuleka kutyumukwa mutyima shi twibafwija’ko kitatyi ne kitatyi ne kwibakwasha mu muswelo mupotoloke.

Kulombela nabo. “Milombelo ya kuzenza ya moloke idi na lupusa lukatampe.” (Yak. 5:16) Larissa otwatelanga kala unena’mba: “Nadi nombola bakulumpe kutatana kwami ne moyo onadi nao. Badi balombela pa mwanda wami. Naivwanija’mba bakulumpe kebanfītyilwepo. Badi basaka kunkwasha nongolole kipwano kyami na Yehova.” Theo unena’mba: “Milombelo ya bakulumpe yaunkulupije amba Yehova unsenswe bya binebine ne amba umwene ne biyampe bidi mondi, ke enkapo bibi.”

Kupwana nabo. Boba bajokejibwa basakilwa balunda mu kipwilo. Mukulumpe umo witwa bu Justin unena’mba, “kimba mukenga o-onso wa kwibanena mukasapule nabo, ne nakampata, kebanangile ku mobo abo. I biyampe kupwana nabo!” Henry mukulumpe mukwabo unena’mba, “shi bantu bakwabo mu kipwilo bamona bakulumpe bapwana na muntu wajokejibwe, nabo bakapwana nandi.”

Kwibakwasha befunde. Mulunda mutame ku mushipiditu ubwanya kukwasha yewa wajokejibwe ekale na kibidiji kiyampe kya kwifunda. Mukulumpe umo witwa bu Darko unena’mba: “Nsenswe kwibalombola byabulēme byonasokwele mu kifundwa kyami kya pa kasuku, ne kwibalombola muswelo onsangelanga kwifunda Bible. Kadi ntulanga’ko mpangiko ya kwifunda nabo pamo myanda imoimo.” Clayton mukulumpe mukwabo unena’mba: “Nebakankamikanga bakimbe mānga ya mu Bible ya bantu bātenwe na myanda na ibatene.”

Kwibakumba. Bantu bajokejibwe bamwene bakulumpe bebatyibila mambo. Ino pano basakilwa kwibamona bu bakumbi. (Yel. 23:4) Pejai pa kwibevwana ne kwibafwija’ko. Mwisambei nabo kitatyi kyonso. Marcus, mukulumpe umo uloñanga bupempudi bwa bukumbi unena’mba: “Twibatangilanga Bisonekwa, twibafwija’ko, ne kwibakulupija’mba twibasenswe pa bukomo bobalongele bwa kujoka ne amba Yehova nandi wibasenswe. Ku mfulo kwa bupempudi bonso, twibalombolanga difuku dikwabo dya kwibapempula.”

a Majina mu kino kishinte i mashintwe.