Lukulupilo lwa Bine lwa Būmi Bulumbuluke bwa Kumeso
Le ukulupile amba bintu bisa kulumbuluka mu mafuku a kumeso? Bantu bavule badi nyeke na mumweno muyampe nansha byokudi makambakano makatampe otwikonda nao dyalelo. Ino le bine tubwanya kukulupila’mba bintu bisa kulumbuluka? En-en! Bible witupa lukulupilo lwa bine lwa būmi bulumbuluke bwa kumeso.
Le Bible uleta lukulupilo’ka?
Bible witabija’mba muzo wa muntu wikondanga na makambakano makatampe. Inoko, i mulae amba ano makambakano keaketususulapo nyeke. Langulukila pa bino bimfwa.
Makambakano: Kubulwa mwa kwikala
Binena Bible: “Bakobakanga mobo ne kwikala’mo.”—Isaya 65:21.
Mobishintulwila mu mafuku a kumeso: Bantu bakekala na abo mobo.
Makambakano: Kubulwa kaji ne bulanda
Binena Bible: “Batongwe bami bakasangela bya binebine mingilo ya makasa abo”—Isaya 65:22.
Mobishintulwila mu mafuku a kumeso: Bantu bonso bakekala na mingilo isangaja, miyampe, yobamwena’mo.
Makambakano: Bukondame
Binena Bible: “Bamfumu bakabikala mwanda wa bululame.”—Isaya 32:1.
Mobishintulwila mu mafuku a kumeso: Bukondame mu myanda ya nkoba, ya mizo ne ya lupeto, bukatalulwa’ko lonso. Muntu yense bakamulongela bintu mu muswelo muyampe.
Makambakano: Misongo ya makempe ne Nzala
Binena Bible: “Kukekalanga miseke mivule pa ntanda; ikekalanga mingimingi pangala pa ngulu.”—Ñimbo ya Mitōto 72:16.
Mobishintulwila mu mafuku a kumeso: Muntu ense ukekala na byakudya bivule bya bumeni. I kutupu muntu ukalāla na nzala nansha kususuka na misongo ya makempe.
Makambakano: Butapani ne bya lūma
Binena Bible: “Bakashikata, muntu ne muntu munshi mwa muñanza wandi ne munshi mwa kikuyu kyandi, I kutupu muntu nansha umo ukebakwatyija moyo.”—Mika 4:4.
Mobishintulwila mu mafuku a kumeso: Muntu yense ukekala biyampe kadi ku matwi talala mwanda babi kebakekala’kopo, kadi “boloke bakapyananga ntanda.”—Ñimbo ya Mitōto 37:10, 29.
Makambakano: Mavita
Binena Bible: “Muzo keukatululapo kipete pa muzo mukwabo, kadi kebakefundepo monka divita.”—Isaya 2:4.
Mobishintulwila mu mafuku a kumeso: Kukekala ndoe pa ntanda yonso. (Ñimbo ya Mitōto 72:7) I kutupu muntu ukadila madilo a muntu wasenswe ufwile mu divita nansha kukimba kwa kunyemena divita.
Makambakano: Misongo ne mba
Binena Bible: “i kutupu mwikadi ukanena’mba: ‘Nabela.’”—Isaya 33:24.
Mobishintulwila mu mafuku a kumeso: Bantu kebakasusukapo na bulema nansha kubela. (Isaya 35:5, 6) Bible i mulaye’nka ne kulaya’mba “lufu kelukekala’kopo dikwabo.”—Kusokwelwa 21:4.
Makambakano: Koneka kwa bifuko bikelwe
Binena Bible: “Mu ntanda mutuputupu ne ntanda myūmu tē bikasepelela, kadi dilungu mudi zolē dikasangala ne kutōya maluba pamo bwa safelona.”—Isaya 35:1.
Mobishintulwila mu mafuku a kumeso: Ntanda yonso ikekala ke paladisa ya kwikala’mo bantu, monka mwādi musakila kala Leza.—Ngalwilo 2:15; Isaya 45:18.
Le i bibi kukulupila’mba milao ya mu Bible ikafikidila?
Shako ubwanya kulanga’mba i amo. Inoko tubakukankamika ulangulukile bininge pa byobya binena Bible pa mafuku a kumeso. Mwanda waka? Milao idi mu Bible i mishile bininge na milao ya bantu ne bintu byobabadikila kunena. Milao ya mu Bible i Leza ulaile’yo. Kyotunenena’mba i mishile na mikwabo i kino:
Leza i ukulupilwa. Bible unena’mba Leza “kabwanyapo kubepa.” (Tetusa 1:2) Ne kadi, Leza kete ye udi na bukomo bwa kulaya bya kumeso. (Isaya 46:10) Mu Bible mudi bimfwa bivule bilombola’mba byobya bilaya Leza bifikidilanga nyeke. Shi usaka kuyukila’ko bivule, tala video inena’mba Le Tukayuka Namani Amba Bible I wa Bine?
Leza udi na bukomo bwa kupwa makambakano. Bible unena’mba Leza udi na bukomo bwa kulonga “kintu kyonso kyasaka kulonga.” (Ñimbo ya Mitōto 135:5, 6) Mu muneneno mukwabo, i kutupu kintu kibwanya kumulengeja aleke kufikidija milao yandi. Ne kadi, Leza usakanga kwitukwasha mwanda tumusenswe.—Yoano 3:16.
Padi ubeipangula’mba, ‘shi Leza usakanga kwitukwasha ne udi na bukomo bwa kwitukwasha, mwanda waka tukifikilwa na makambakano mavule nenki?’ Pa kulondolola kino kipangujo, tala video inena’mba Mwanda Waka Leza Ulekele’ko Masusu?
Le luno lukulupilo lukafikidila namani?
Leza ukengidija Bulopwe bwandi, buludiki bwa mūlu, mwanda wa kufikidija milao yandi. I mutonge Yesu Kidishitu bu Mulopwe wa buno Bulopwe, kadi i mumupe lupusa lwa kutala ntanda ne buntu badi’po. Yesu paādi pano pa ntanda, wābelwile misongo, wādisha banzala, wānekenya bintu bya kipangila, wāsangula’nka ne bafwe. (Mako 4:39; 6:41-44; Luka 4:40; Yoano 11:43, 44) Mu uno muswelo, wālombwele byakalonga pakekala Mulopwe wa Bulopwe bwa Leza.
Shi usaka kuyukila’ko bintu bivule bikakulongela Bulopwe bwa Leza, tala video inena’mba Bulopwe bwa Leza Lelo I Bika.
Le luno lukulupilo lukafikidila kitatyi’ka?
I panopano ponka! Le i bika bitukulupija? Bible wālaile bintu byadi bya kulombola’mba Bulopwe bwa Leza kebusa kushilula kuludika ntanda. (Luka 21:10, 11) Tumonanga bino bintu bilaile Bible bilongeka dyalelo.
Shi usaka kuyukila’ko bivule, tanga kishinte kenena’mba “Le Bulopwe bwa Leza Bukaludika Ntanda Kitatyi’ka?”
Le lukulupilo lwitupa Bible lubwanya kwitukwasha namani dyalelo?
Mulembi umo wādingakenye lukulupilo luleta Bible na “ñanga wa muya.” (Bahebelu 6:19) Ñanga monka mwakwashishanga kyombo kileke kulumbakana mu kivula, lukulupilo lwa mu Bible lwa kumeso nalo lubwanya kwitukwasha mu makambakano otwikonda nao dyalelo. Lukulupilo lwetu lubwanya kulama bukomo bwetu bwa kulanga, enka ne kwitwikadija biyampe ku ngitu.—1 Bene Tesalonika 5:8.