Le Bible Ubwanya Kukukwasha shi Ubela Misongo ya Zenzeka?

Bilondolola Bible

En-en. Leza utele mutyima bengidi bandi babela. Bible unena pangala pa mwingidi wa kikōkeji amba: “Yehova ukamukwasha pa kitanda kyandi kya misongo.” (Ñimbo ya Mitōto 41:3) Shi udi na misongo ya zenzeka, bino bintu bisatu bibwanya kukukwasha ūminine:

1. Lomba bukomo bwa kūminina. Ubwanya kupebwa “ndoe ya Leza itabukile ñeni yonso,” mine ikakukwasha uleke kuzumbija mutyima bininge.—Bene Fidipai 4:6, 7.

2. Ikala na mumweno muyampe. Bible unena’mba: “Mutyima wa nsangaji i bwanga buyampe, ino mushipiditu muvingakane utyepejanga bukomo bwa muntu.” (Nkindi 17:22) Longa’ko ne mizaulo, mwanda kulonga namino kekukakupupo’nka bulanda, ino ukekala mukomo mu ngitu senene.

3. Ningija lukulupilo lobe lwa mu mafuku a kumeso. Lwitabijo lukomo lubwanya kukukwasha wikale na nsangaji nansha ke mu misongo ya zenzeka. (Bene Loma 12:12) Bible ulaile kitatyi ‘kekikanenapo mwikadi amba: Nabela.’ (Isaya 33:24) Ebiya Leza ukondapa misongo yonso ya zenzeka ikomenwe kundapa bamiñanga. Kimfwa, Bible ulombola mukekadila banunu amba: “Ngitu yandi ifufume kupita ne pa bunkasampe; ajokele ku mafuku a bukomo bwa bunkasampe bwandi.”—Yoba 33:25.

Vuluka: Nansha Batumoni ba Yehova byobayukile amba Leza wibakwashanga, bendanga ne kukondapwa misongo ya zenzeka. (Mako 2:17) Inoko, ketulombolangapo muntu mundapilo kampanda; tumwene amba muntu ne muntu ufwaninwe kukwata butyibi aye mwine.