Le Yesu Wādi na Mukaji? Le Yesu Wādi na Banababo?

Bilondolola Bible

Nansha Bible byakanenenepo mu muswelo mupotoloke pa kusonga ne bukungulume bwandi, ino ulombola patōkelela’mba Yesu kāsongelepo.a Langulukila pa myanda ilonda’ko.

1. Divule dine Bible wisambilanga pa kisaka kya ba Yesu ne pa bana-bakaji baādi wenda nabo mu busapudi kadi bādi kubwipi nandi pobādi bamwipaya, ino kalombwelepo nansha dimo amba wādi na mukaji. (Mateo 12:46, 47; Mako 3:31, 32; 15:40; Luka 8:2, 3, 19, 20; Yoano 19:25) Bible byakanenepo kintu pa uno mwanda, nanshi kāsongelepo.

2. Pa mwanda wa boba kebasongelepo nansha kusongwa mwanda wa kulonga bivule mu mwingilo wa Leza, Yesu wāsapwidile bandi bana ba bwanga amba: “Yewa ubwanya kwitabija’o etabije’o.” (Mateo 19:10-12) Wāshidile boba batonga kuleka kusonga ne kusongwa kimfwa mwanda wa bepāne bininge kudi Leza.—Yoano 13:15; 1 Bene Kodinda 7:32-38.

3. Kumeso’tu kwa kufwa, Yesu wākwete mpango ya mwa kulelela inandi. (Yoano 19:25-27) Shi Yesu wādi na mukaji ne bana, wādi wa kukwata’ko mpango ya mwa kuvuijija bisakibwa byabo.

4. Bible utela Yesu bu kimfwa ku balume, ino kesambilangapo pa muswelo waādi wa kwikala na mukaji wa mashi ne mema. Ino unena’mba: “Banwe balume, sanswai nyeke bakaji benu, monka mwasanshilwe Kidishitu kipwilo, wepāna ne kwipāna pa mwanda wakyo.” (Bene Efisesa 5:25) Shi bine Yesu wāsongele paādi pano pa ntanda, wādi wa kwikala mulume mubwaninine utelelwe mu uno vese.

Le Yesu wādi na banababo?

Bine, Yesu wādi bidi na banababo basamba. Kimfwa, Yakoba, Yosefa, Shimona, Yudasa ne banababo babidi bana-bakaji. (Mateo 13:54-56; Mako 6:3) Bano banababo bādi bana ba inandya Yesu, Madia ne wandi mulume Yosefa. (Mateo 1:25) Bible utela Yesu bu “umbedi” wa Madia, kintu kilombola’mba wādi na bana bakwabo.—Luka 2:7.

Bilanga bantu pa banababo na Yesu

Pa kusaka kukwatakanya mulangwe wa amba Madia wāikele mujike mu būmi bwandi bonso, bantu bamo bashintululanga kishima “banababo” mu miswelo mishileshile. Kimfwa, bamo balañanga’mba banababo na Yesu i bana babutwile Yosefa mu busongi bubajinji. Ino, Bible ulombola’mba Yesu wāpyene lupusa lwa mungya bijila lwa kubikala bulopwe bobālaile Davida. (2 Samwele 7:12, 13; Luka 1:32) Shi Yosefa wādi na bana bakulu kupita Yesu, umbedi mu abo ye wādi wa kwikala mpyana wa Yosefa.

Lelo bino binenwa kebibwanyapo kufunkila pa bana ba bwanga ba Yesu, nansha banababo ba ku mushipiditu? Uno mulangwe wipatanyanga na Bisonekwa, mwanda Bible unena’mba “na bubine, banababo kebadipo balombola lwitabijo mwadi.” (Yoano 7:5) Bible ushiyañanya banababo na Yesu ne bandi bana ba bwanga.—Yoano 2:12.

Mungya lufundijo lukwabo, banababo na Yesu bādi bana ba muyomba wandi. Inoko Bisonekwa bya Kingidiki bingidije bishima bishile pa kishima “banabenu,” “babutule,” ne “mwanenu.” (Luka 21:16; Bene Kolose 4:10) Bafundi bavule ba Bible babingija’mba banababo na Yesu bana-balume ne bana-bakaji bādi banababo ba munda mwabo. Kimfwa dibuku dimo (The Expositor’s Bible Commentary) dinena’mba: “Muswelo muyampe wa kwivwanija kishima ‘banababo’ . . . i amba kifunkila pa bana ba Madia ne Yosefa, ko kunena’mba banababo na Yesu ba munda mwa inandi.”b