22 Bantu bonso bavuabu basungule bua kuikala balami ba ku biibi ku bibuelelu bavua 212. Bavua basombe miaba yabu ya kusombela bilondeshile muvuabu badifundishe bilondeshile dilondangana dia mêku abu.+ Davidi ne Samuele mumonyi wa malu+ bavua bateke bantu aba mu mudimu wabu wa kueyemenyibua. 23 Bobu ne bana babu ba balume bavua batangila mudimu wa bulami bua biibi bia nzubu wa Yehowa,+ nzubu wa ntenta. 24 Balami ba ku biibi bavua ku nseke inayi: ku est, ku ouest, ku nord, ne ku sud.+ 25 Ku musangu ne ku musangu, bana babu ba balume bavua balua bua matuku muanda mutekete bafumina miaba yabu ya kusombela bua kuenza nabu mudimu. 26 Kuvua bamfumu* banayi ba balami ba ku biibi mu mudimu wa kueyemenyibua. Bavua bena Lewi, ne bavua batangila bibambalu* ne bibutshilu bia nzubu wa Nzambi mulelela.+ 27 Bavua bapitshisha butuku miaba yabu ya midimu banyunguluke nzubu wa Nzambi mulelela, bualu bavua batangila mudimu wa bulami ne bavua balama nsapi ne bakangula nzubu dinda dionso.