29 Pakavuabu bapatuka mu Yeliko, musumba munene wa bantu wakamulonda. 30 Monayi! bampofu babidi bavua basombe ku muelelu kua njila bakumvua ne: Yezu uvua upita, bakela mbila ne: “Mukalenge, Muana wa Davidi, tumvuilaku luse!”+ 31 Kadi musumba wa bantu wakabatandisha, babambila bua bapuwe; kadi bakela mbila mikole, bamba ne: “Mukalenge, Muana wa Davidi, tumvuilaku luse!” 32 Ke Yezu kuimana, kubabikilaye, yeye kubebeja ne: “Nudi basue nnuenzele tshinyi?” 33 Bakamuambila ne: “Mukalenge, mêsu etu atabale.” 34 Luse luakakuata Yezu, yeye kulenga mêsu abu,+ diakamue bakapetulula lumonu, bakamulonda.

46 Pashishe, bakabuela mu Yeliko. Kadi pavuaye yeye ne bayidi bende ne musumba munene wa bantu bapatuka mu Yeliko, Bâtimayo (muana wa Timayo), mpofu mulombi wa ka pa luse, uvua musombe ku muelelu kua njila.+ 47 Pakumvuaye ne: Yezu muena Nazaleta ke uvua upita, wakatuadija kuela mbila, wamba ne: “Yezu, Muana wa Davidi,+ ngumvuilaku luse!”+ 48 Bantu ba bungi bakatuadija kumutandisha, bamuambila bua kupuwa, kadi wakatungunuka ne kuela dîyi bikole ne: “Muana wa Davidi, ngumvuilaku luse!” 49 Ke Yezu kuimana, kuambaye ne: “Mumbikidilayi.” Nunku bakabikila mpofu au, bamuambila ne: “Kolesha muoyo! Juka; udi ukubikila.” 50 Wakimansha tshilamba tshiende tshia pa mutu, kutumpikaye, kuyaye kudi Yezu. 51 Ke Yezu kumukonka ne: “Udi musue nkuenzele tshinyi?” Mpofu kumuambila ne: “Laboni,* mpetulule lumonu luanyi.” 52 Nunku Yezu wakamuambila ne: “Ndaku. Ditabuja diebe ndikuondope.”+ Diakamue wakapetulula lumonu luende,+ kutuadijaye kumulonda mu njila.