Yobo
3 Bushuwa, wewe udi mumutuishile dîsu diebe,
4 Nnganyi udi mua kupatula muntu mukezuke ku muntu udi kayi mukezuke?+
Kenaku to!
5 Biamukoselabu matuku,
Bungi bua ngondo yende budi kuudi;
Udi mumuelele mukalu bua kamanyi mua kuya dia muamua.+
6 Umbusha mêsu ebe kudiye bua amone mua kuikisha,
Too ne pajikijaye dituku diende bu muntu udibu bangate ku mudimu.+
7 Bualu ditekemena didiku nansha bua mutshi.
Biawukosabu, neusampile kabidi,
Ntonga yawu neyitungunuke ne kusasa.
8 Muji wawu wowu mukulakajile mu buloba
Ne tshikuku tshiawu tshifuile mu buloba,
9 Padiwu umvua mupuya wa mâyi newusampile;
Newupatule matamba bu mutshi mupiamupia.
10 Kadi muntu udi ufua ne ulala kayi ne bukole;
Padi muntu ukuula muoyo, udi penyi?+
11 Mâyi adi ajimina mu mbuu,
Ne musulu udi ukama ne uma.
12 Muntu udi ulala kabidi panshi ne kena ujuka to.+
Kabakubika too ne pikala diulu kaditshiyiku,
Kabakubajula nansha ku tulu tuabu to.+
13 Kaah! Bu wewe nansha munsokoke mu Lukita,*+
Bu wewe nansha munsokoke too ne padi tshiji tshiebe tshipita,
Bu wewe nansha munkosele tshikondo, mulue kumvuluka!+
14 Muntu yeye mufue, udi mua kupetulula kabidi muoyo anyi?+
Nengindile matuku onso a mudimu udibu bangenzeja ku bukole
Too ne padi disulakana dianyi dilua.+
15 Wewe neubikile, ne meme nenkuitabe.+
Neujinge* bikole mudimu wa bianza biebe.
16 Kadi bua mpindieu, udi utungunuka ne kubala tshiendedi tshianyi tshionso;
Udi utangila anu bua kumona mpekatu wanyi.
17 Dishipa dianyi dia mikenji ndikangila mu tshibuta,
Ne wewe udi ukanga tshilema tshianyi ne budimbu.
18 Bu mudi mukuna ukuluka ne uvingutuka
Ne dibue dinene diumbushibua pa muaba wadi,
19 Bu mudi mâyi apelula mabue
Ne nkuaka yawu ikoka lusenga lua pa buloba,
Ke muudi mubutule ditekemena dia muntu ufuafua.
20 Udi utungunuka ne kumupita bukole too ne padiye ujimina;+
Udi ushintulula tshimuenekelu tshiende, umuipata.
21 Badi bapesha bana bende bunême, kadi yeye kena umanya bualu ebu to;
Badi balua bantu tshianana, kadi yeye kena ujingulula bualu ebu to.+
22 Yeye udi umvua bimusama anu patshidiye ne misunyi pambidi pende;
Yeye* udi udila anu patshidiye ne muoyo.”