Yehezekele
27 Dîyi dia Yehowa diakalua kabidi kundi, diamba ne: 2 “Kadi wewe, muana wa muntu, elela Tulo kasala ka muadi,*+ 3 ne ambila Tulo ne:
‘Wewe udi musombele ku bibuelelu bia mbuu,
Ngenda mushinga wa bukua bantu ba mu bidiila* bia bungi,
Mona tshidi Mukalenge Mutambe Bunene Yehowa wamba:
“Wewe Tulo, wewe muine udi muambe ne: ‘Ndi mulengele tshishiki.’+
4 Maloba ebe adi munkatshinkatshi mua mbuu,
Ne bibaki bebe mbavuije bulengele buebe bukumbane tshishiki.
5 Bavua benze mabaya ebe onso ne mitshi ya jenevriye ya ku Senî,+
Ne bavua bangate mutshi wa sedre wa ku Lebanona bua kukuenzela mutshi wa kusuikila tshilamba tshitubu baludika natshi mazuwa.
6 Bavua bakuenzele nkaya* yebe ne mitshi ya nsanga ya ku Bashana,
Ne diulu diebe divua dia mutshi wa sipré mulamika mubanga wa ku bidiila* bia Kitima.+
7 Tshilamba tshia line tshia mu Ejipitu ke tshivua bu tshilamba tshiebe tshia kuludika natshi mazuwa,
Ne tshilamba tshiebe tshia kubuikila pa mutu pa mazuwa tshivua tshia manda a dikala dia ble ne miosa mikunzubile ya mikoko bia ku bidiila* bia Elishaha.+
8 Bantu badi basombele mu Sidona ne mu Âwada+ ke bavua biitshi bebe ba mazuwa.
Bantu bebe bapiluke, wewe Tulo, bavua bendeshi bebe ba mazuwa.+
9 Bantu badi ne dimanya dia bungi* ne bapiluke ba mu Gebala+ bakajika mitanta yebe.+
Mazuwa onso a pa mbuu ne badi benda nawu bakalua kuudi bua kupanyishangana nebe bintu.
10 Bantu ba mu Pelasa, Luda, ne Puta+ bavua mu tshiluilu tshiebe, bena mvita bebe.
Bavua bakudike ngabu yabu ne bifulu biabu munda muebe, ne bakakupetesha butumbi.
11 Bantu ba ku Âwada bavua mu tshiluilu tshiebe bavua bimane pa bimanu biebe ku nseke yonso,
Ne bantu ba bukitu bavua basombele mu bibumba biebe.
Bavua bakudike ngabu yabu ya bijengu ku nseke yonso ya bimanu biebe
Ne bavua bavuije bulengele buebe bukumbane tshishiki.
12 “‘“Tâshishi+ wakenda nebe mushinga bua bungi bua biuma biebe.+ Bakashintakaja tshiamu tshia arjan, tshiamu tshifiike, tshiamu tshia eten, ne tshiamu tshia plomb ku bintu biebe bia kusumbisha.+ 13 Yawana, Tubala,+ ne Mesheke+ bakenda nebe mushinga, bashintakaja bapika+ ne bintu bia tshiamu tshia mitaku ku bintu biebe bia kupanyisha. 14 Nzubu wa Togâma+ wakashintakaja tubalu tua majitu, tubalu tua kubanda ne mpunda ku bintu biebe bia kusumbisha. 15 Bantu ba Dedana+ bakenda nebe mushinga; wewe kuangata bangenda mushinga ba mu bidiila* bia bungi ku mudimu; bobu kukufuta mibanga+ ne mabaya bu mulambu webe. 16 Edome wakenda nebe mushinga bua bungi bua bintu biebe. Wakafila mabue a tirkuaze, miosa mikunzubile ya mikoko, tshilamba tshia mekala tshilengeja ne manda, tshilamba tshimpe, mabue a koraye ne mabue a ribi bua kushintakaja ku bintu biebe bia kusumbisha.
17 “‘“Yuda ne buloba bua Isalele bakenda nebe mushinga, bafila ntete ya blé ya ku Minita,+ biakudia bitambe buimpe, buitshi,+ mafuta ne budimbu bua mutshi wa bome+ bua kushintakaja ku bintu biebe bia kusumbisha.+
18 “‘“Damaseke+ wakenda nebe mushinga bua bungi bua bintu biebe ne biuma biebe bionso, wenda mushinga wa mvinyo wa ku Helebone ne miosa ya mikoko ya ku Sakole.* 19 Wedana ne Yawana ba ku Uzala bakafila tshiamu tshifiike tshifula bimpe, mutshi wa kasia* ne disele dia mupuya muimpe* bua kushintakaja ku bintu biebe bia kusumbisha. 20 Dedana+ wakenda nebe mushinga wa bilamba bia kusombela* pa nyima pa tubalu. 21 Wewe wakangata bena Arabe ne bamfumu bonso ba bena Kedâ+ ku mudimu bavua benda mushinga wa bana ba mikoko, bimpanga bia mikoko ne mbuji.+ 22 Bangenda mushinga ba ku Sheba ne ku Lâma+ bakenda nebe mushinga; bakafila manananshi matambe buimpe a mishindu yonso, mabue a mushinga mukole, ne or bua kushintakaja ku bintu biebe bia kusumbisha.+ 23 Halana,+ Kane, Edene,+ bangenda mushinga ba ku Sheba,+ Ashû,+ ne Kilemada bakenda nebe mushinga. 24 Mu tshisalu tshiebe bakendamu mushinga wa bilamba bilengele, bizaku bienza ne buanda bua dikala dia ble bilengeja ne manda a mekala, ne bilamba bia kuadija panshi bia mekala mekala, bionso bisuika ne bipila mionji bimpe.
25 Mazuwa a ku Tâshishi+ ke avua bisumbu biebe bia bena ngendu bua bintu biebe bia kupanyisha,
Nunku wewe uvua muwujibue ne munemeshibue bujitu* munkatshinkatshi mua mbuu mualabale.
26 Biitshi bebe ba mazuwa mbaye nebe mu mbuu ya mâyi a bungi;
Lupepele lua ku est ndukutshibuile munkatshinkatshi mua mbuu mualabale.
27 Biuma biebe, bintu biebe bia kusumbisha, bintu biebe bia kupana, bantu bebe bendi ba pa mâyi, ne bendeshi bebe ba mazuwa,
Bajiki ba mitanta yebe, badi benduluka mushinga ne bintu biebe bia kupanyisha,+ ne balume bonso ba mvita,+
Musumba* mujima udi munda muebe,
Buonso buabu nebadiine munkatshinkatshi mua mbuu mualabale dituku dia dikuluka diebe.+
28 Padi bendeshi bebe ba mazuwa badila, maloba a ku mielelu kua mbuu neazakale.
29 Biitshi bonso ba mazuwa, bendi ba pa mâyi, ne bendi ba pa mbuu
Nebatuluke mu mazuwa abu ne nebimane pa buloba.
30 Nebabandishe mêyi abu ne nebakudile ne kanyinganyinga kakole+
Padibu badiela buloba mu mitu yabu ne badivuanda mu butu.
31 Nebadikungule mutu ne nebavuale bilamba bikayabale;
Nebakudile ne kanyinganyinga kakole* ne kabobo ka muadi kakole.
32 Mu muadi wabu, nebele kasala ne nebimbe badila bua bualu buebe ne:
‘Nnganyi udi bu Tulo udi mpindieu mupuwe munkatshi mua mbuu?+
33 Pavua bintu biebe bia kusumbisha biluile pa mbuu mualabale, wakukutshisha bisamba bia bungi bia bantu.+
Biuma biebe bivule ne bintu biebe bia kupanyisha biakavuija bakalenge ba pa buloba babanji.+
34 Mpindieu udi mutshibukile mu mbuu mualabale, mu mâyi male,+
Ne bintu biebe bionso bia kupanyisha ne bantu bebe mbadine nebe.+
35 Bantu bonso badi basombele mu bidiila* nebashale bakutangile bakatshila,+
Ne bakalenge babu nebazakale ne buôwa,+ mpala yabu neyilubakane.
36 Bangenda mushinga badi munkatshi mua bisamba nebele tushiba bua tshivua tshikufikile.
Nshikidilu webe nealue mu tshimpitshimpi ne neikale wa dikema,
Ne kuakuikalaku kabidi bua kashidi.’”’”+