Yehezekele

1 Mu tshidimu tshia 30, mu dituku ditanu dia ngondo muinayi, pamvua kumpenga kua musulu wa Kebâ+ munkatshi mua bantu bavuabu bakuate baye nabu ku babende,+ diulu diakabululuka ne meme kutuadija kumona bikena kumona bia Nzambi. 2 Mu dituku ditanu dia ngondo, mmumue ne: mu tshidimu tshitanu tshia dikuatshibua ku babende dia mukalenge Yehoyakina,+ 3 dîyi dia Yehowa diakalua kudi Yehezekele* muana wa muakuidi Buzi ku muelelu kua musulu wa Kebâ mu buloba bua bena Kasada.+ Kuoku aku tshianza tshia Yehowa tshiakalua pambidi pende.+

4 Pamvua ntangila, ngakamona tshipepele tshikole+ tshifumina ku nord, ne kuvua ditutu dinene ne kapia kalakuka*+ binyunguluka kudi butoke bukole, ne munkatshi mua kapia muvua tshintu tshivua tshimueneka bu bukenke bua or musambakaja ne arjan.+ 5 Munda muaku muvua tshivua tshienze bu bifukibua binayi bidi ne muoyo,+ ne tshimuenekelu tshia tshionso tshia kudibi tshivua bu tshia muntu. 6 Tshionso tshivua ne mpala inayi ne mapuapua anayi.+ 7 Makasa abi avua muololoke, ne muinshi mua makasa abi muvua bu mua muana wa ngombe, ne avua abalakana bu bukenke bua tshiamu tshia mitaku tshinona.+ 8 Bivua ne bianza bia bantu muinshi mua mapuapua abi mu nseke yonso inayi, ne bunayi buabi bivua ne mpala ne mapuapua. 9 Mapuapua abi avua alengangana dimue ne dikuabu. Kabivua bikudimuka pavuabi biya to; tshionso tshivua tshiya tshitangile anu kumpala.+

10 Mpala yabi ivua ne tshimuenekelu etshi: Tshionso tshia ku binayi tshivua ne mpala wa muntu ne mpala wa ntambue+ ku dia balume, mpala wa ngombe mulume+ ku dia bakaji, ne tshionso tshia ku binayi tshivua ne mpala+ wa nyunyi wa mukanku.+ 11 Ke muvua mpala yabi nanku. Mapuapua abi avua mabalula pa mutu pabi. Tshionso tshivua ne mapuapua abidi avua alengangana dimue ne dikuabu, ne mapuapua abidi mabuikile mibidi yabi.+

12 Tshionso tshivua tshiya tshitangile anu kumpala, tshiya kuonso kuvua nyuma ubisaka bua kuya.+ Kabivua bikudimuka pavuabi biya to. 13 Bifukibua bidi ne muoyo ebi bivua ne tshimuenekelu tshia makala a kapia adi atema, ne tshintu tshivua tshienze bu bimunyi bia kapia kakole tshivua tshiya tshialukila munkatshi mua bifukibua bidi ne muoyo, ne mupenyi uvua wela ufumina mu kapia.+ 14 Pavua bifukibua bidi ne muoyo ebi biya bialukila, diya ne dialukila diabi edi divua ne tshimuenekelu tshia diela dia mupenyi.

15 Pamvua ntangila bifukibua bidi ne muoyo ebi, ngakamona lukata lumue pa buloba ku luseke lua tshifukibua tshionso tshia ku bifukibua bidi ne muoyo bidi ne mpala inayi+ ebi. 16 Nkata eyi ne mushindu uvuayi mienza ivua imueneka ikenka bu dibue dia krizolite, ne yonso inayi ivua muomumue. Tshimuenekelu tshiayi ne mushindu uvuayi mienza bivua bimueneka anu bu ne: lukata lumue luvua munda mua lukata lukuabu.* 17 Pavuayi yasa luendu, ivua mua kuya mu nseke yonso inayi kayiyi ikudimuka pavuayi iya. 18 Jante yayi ivua mitumbuke bikole yenza ne buôwa, ne jante ya yonso inayi ivua miuwule tente ne mêsu mubidi mujima.+ 19 Dîba dionso divua bifukibua bidi ne muoyo biasa luendu, nkata ivua payi yasa luendu pamue nabi, ne pavua bifukibua bidi ne muoyo bijuka pa buloba bibanda muulu, nkata ivua payi ibanda muulu.+ 20 Bivua biya kuonso kuvua nyuma ubisaka bua kuya, kuonso kuvua nyuma uya. Nkata ivua ibanda muulu pamue nabi, bualu nyuma uvua wenzeja bifukibua bidi ne muoyo malu* ke uvua kabidi mu nkata. 21 Pavuabi biasa luendu, ivua payi yasa luendu; ne pavuabi bimana, ivua payi imana; pavuabi bijuka pa buloba bibanda muulu, nkata ivua ibanda muulu pamue nabi, bualu nyuma uvua wenzeja bifukibua bidi ne muoyo malu ke uvua kabidi mu nkata.

22 Pa mutu pa mitu ya bifukibua bidi ne muoyo pavua tshimfuanyi tshia tshipapu tshivua tshitua nsese bu dibue dia mashika didi dikuatshisha buôwa, tshibalula pa mutu pa mitu yabi.+ 23 Muinshi mua tshipapu etshi, mapuapua abi avua molola* dimue ditue ku dikuabu. Tshionso tshivua ne mapuapua abidi bua kubuikila luseke lumue lua mibidi yabi ne abidi makuabu bua kubuikila luseke lukuabu. 24 Pamvua mumvue tshiona tshia mapuapua abi, tshivua anu bu tshiona tshia mâyi a nkuaka mukole, bu tshiona tshia Wa Bukole Buonso.+ Pavuabi biasa luendu, tshiona tshivua anu bu tshia tshiluilu. Pavuabi bimana, bivua bipuekesha mapuapua abi.

25 Dîyi divua diumvuika pa mutu pa tshipapu tshivua pa mutu pa mitu yabi. (Pavuabi bimana, bivua bipuekesha mapuapua abi.) 26 Pa mutu pa tshipapu tshivua pa mutu pa mitu yabi pavua tshintu tshienze bu dibue dia safire,+ ne tshivua tshifuanangane ne nkuasa wa bukalenge.+ Uvua musombe kuulu mu nkuasa wa bukalenge uvua ne tshimuenekelu tshifuane tshia muntu.+ 27 Ngakamona tshintu tshikenka bu or musambakaja ne arjan+ tshivua bu kapia kabalakana, kumbukila ku tshivua tshimueneka bu tshimono tshiende kubanda; ne kumbukila mu tshimono tshiende kupueka, ngakamona tshintu tshifuanangane ne kapia.+ Nsese ivua mimunyunguluke yeye yonso 28 bu ya muanza nkongolo+ mu ditutu dituku dia mvula. Ke muvua butoke buvua buela nsese buvua bumunyunguluke bumueneka nanku. Tshivua bu tshimuenekelu tshia butumbi bua Yehowa.+ Pamvua mutshimone, ngakatua mpala panshi, meme kutuadija kumvua dîyi dia muntu wakula.