Misambu
Miketame* wa Davidi.
16 Nzambi wanyi, undame, bualu ndi munyemene kuudi.+
2 Ndi muambile Yehowa ne: “Wewe udi Yehowa, Mpokolo wanyi wa buimpe.
3 Ne bansantu badi pa buloba,
Bantu banene, badi bangenza disanka dia bungi.”+
4 Bantu badi balonda nzambi mikuabu badi bavudija tunyinganyinga tuabu.+
Tshiakupongolola milambu yayi ya bia kunua ya mashi nansha,
Anyi mishiku yanyi kayakutela mêna ayi nansha.+
5 Yehowa ke tshianyi tshitupa, tshianyi tshidibu bampeshe,+ ne dikopo dianyi.+
Wewe udi ulama bumpianyi buanyi.
6 Mbampimine meme miaba milengele.
Bushuwa, ndi nsanka ne bumpianyi buanyi.+
7 Nentumbishe Yehowa udi mumpeshe mibelu.+
Nansha mêba a butuku, meji a munda muanyi menemene* adi ambela.+
8 Ndi muteke Yehowa kumpala kuanyi misangu yonso.+
Bu mudiye ku tshianza tshianyi tshia balume, tshiakunyungishibua* nansha kakese.+
9 Nunku, muoyo wanyi udi usanka, meme mujima ndi* ne disanka.
Ndi musombe* talalaa.
10 Bualu wewe kuakundekela* mu Lukita* to.+
Wewe kuakuitaba bua muena lulamatu webe amone dijimba* to.+
11 Wewe udi ummanyisha njila wa muoyo.+