Mukanda wa Kumpala wa Kulondolola

29 Mpindieu, mukalenge Davidi wakambila tshisumbu tshijima ne: “Muananyi Solomo, muntu udi Nzambi musungule,+ utshidi muana ne kena ne dimanya dia bungi to,*+ ne mudimu ngua bungi, bualu ntempelo* ki ngua muntu to, kadi ngua Yehowa Nzambi.+ 2 Tshiena mulaminyine bukole nansha bukese bua kulongolola bintu bua nzubu wa Nzambi wanyi to; ndi mufile or bua bintu bia kuenza ne or, arjan bua bintu bia kuenza ne arjan, biamu bia mitaku bua bintu bia kuenza ne biamu bia mitaku, biamu bifiike bua bintu bia kuenza ne biamu bifiike,+ mabaya+ bua bintu bia kuenza ne mabaya, mabue a onikse, ne mabue a kulamika ne potopoto, nsoka ya mekala mekala ya kulengeja nayi, mabue a mushinga mukole a mishindu yonso, ne mabue a alabasta a bungi menemene. 3 Pashishe, bu mundi nsanka bua nzubu wa Nzambi wanyi,+ kudi kabidi tshibutshilu tshianyi meme nkayanyi+ tshia or ne arjan tshindi mfila ku nzubu wa Nzambi wanyi, pa kumbusha bionso binkadi mulongolole bua nzubu wa tshijila, 4 kusangisha ne ntalanta* 3 000 ya or ya ku Ofî+ ne ntalanta 7 000 ya arjan mulengeja, bua kulamika ku bimanu bia nzubu, 5 or bua bintu bia kuenza ne or ne arjan bua bintu bia kuenza ne arjan, ne bua mudimu wonso wenzabu kudi bansenda. Mpindieu, mbanganyi badi badifila lelu bua kulua ne dipa mu tshianza bua kupesha Yehowa?”+

6 Nunku bakokeshi ba nzubu ya batatu, bakokeshi ba bisa bia Isalele, bamfumu ba bantu tshinunu tshinunu ne ba bantu lukama lukama,+ ne bamfumu ba midimu ya mukalenge+ bakadifila ku budisuile. 7 Bua mudimu wa nzubu wa Nzambi mulelela, bakafila ntalanta 5 000 ya or, darike* binunu 10, ntalanta binunu 10 ya arjan, ntalanta binunu 18 ya biamu bia mitaku, ne ntalanta binunu 100 ya biamu bifiike. 8 Muntu yonso uvua ne mabue a mushinga mukole wakaafila mu tshibutshilu tshia nzubu wa Yehowa, tshilama kudi Yehiele+ muena Gêshona.+ 9 Bantu bakasanka bua kufila milambu ya budisuile eyi, bualu bavua bapesha Yehowa milambu ya budisuile ne muoyo mujima,+ ne mukalenge Davidi wakasanka pende bikole.

10 Pashishe Davidi wakatumbisha Yehowa ku mêsu kua tshisumbu tshijima. Davidi wakamba ne: “Wewe Yehowa Nzambi wa tatuetu Isalele, utumbishibue kashidi ne tshiendelele.* 11 Wewe Yehowa, bunene+ ne bukole+ ne bulengele ne butumbi ne bukokeshi*+ mbiebe, bualu bintu bionso bidi mu diulu ne pa buloba mbiebe.+ Bukalenge mbuebe, wewe Yehowa.+ Wewe ke udi udibandisha bua wikale ku mutu kua bionso. 12 Biuma ne butumbi bidi bifumina kuudi,+ udi ukokesha bintu bionso,+ mu tshianza tshiebe mudi bukokeshi+ ne bukole,+ ne tshianza tshiebe tshidi mua kuvuija muntu yonso munene+ ne kupesha bantu bonso bukole.+ 13 Mpindieu, wewe Nzambi wetu, tudi tukuela tuasakidila ne tutumbisha dîna diebe dilengele.

14 “Kadi meme ne bena mu tshisamba tshietu tudi banganyi bua tuetu kufila milambu ya budisuile mushindu eu? Bualu bintu bionso bidi bifumina kuudi, ne tuetu tudi bakupeshe anu tshidi tshifumine ku tshianza tshiebe wewe. 15 Bualu tudi bantu badi basombe buenyi kumpala kuebe ne bena tshimuangi anu bu bankambua betu.+ Bualu matuku etu pa buloba adi anu bu mundidimbi,+ kaayi ne ditekemena. 16 Wewe Yehowa Nzambi wetu, bubanji buonso ebu butudi balongolole bua kukuibakila nzubu bua dîna diebe dia tshijila budi bufumina mu tshianza tshiebe, ne buonso mbuebe wewe. 17 Nzambi wanyi, ndi mumanye bimpe ne: udi ukonkonona muoyo+ ne udi usanka bua muoyo mutoke.*+ Mu bululame* bua muoyo wanyi, ndi mufile bintu bionso ebi ku budisuile, ne ndi ne disanka dia bungi bua kumona bantu bebe badi muaba eu bafila milambu ya budisuile kuudi. 18 Wewe Yehowa, Nzambi wa Abalahama, wa Izaka, ne wa Isalele, bankambua betu, lama dijinga edi ne meji aa mu mioyo ya bantu bebe bua kashidi, ne uludike mioyo yabu kuudi.+ 19 Upeshe kabidi muananyi Solomo muoyo mujima,*+ bua atumikile mêyi ebe,+ mavuluija ebe, ne mêyi ne mikandu biebe ne bua enze malu onso aa ne ibake ntempelo* undi mulongoluele bintu.”+

20 Pashishe Davidi wakambila tshisumbu tshijima ne: “Mpindieu tumbishayi Yehowa Nzambi wenu.” Nunku tshisumbu tshionso tshiakatumbisha Yehowa Nzambi wa bankambua babu ne tshiakinama, kutua mpala panshi kumpala kua Yehowa ne kua mukalenge. 21 Bakatungunuka ne kufila milambu kudi Yehowa ne kufila milambu ya kuosha+ kudi Yehowa dituku diakalonda: bana balume ba ngombe tshinunu, bimpanga bia mikoko tshinunu, ne bana ba mikoko ba mpanga tshinunu, ne milambu yabi ya bia kunua;+ bakafila milambu ya bungi menemene bua Isalele mujima.+ 22 Bakatungunuka ne kudia ne kunua kumpala kua Yehowa dituku adi ne masanka a bungi,+ ne bua musangu muibidi bakateka Solomo muana wa Davidi mukalenge ne kumuelabu manyi kumpala kua Yehowa bua ikale mulombodi,+ kabidi ne Sadoka bua ikale muakuidi.+ 23 Solomo wakasomba mu nkuasa wa bukalenge wa Yehowa+ bu mukalenge pa muaba wa tatuende Davidi, ne malu ende onso avua enda bimpe, ne bena Isalele bonso bavua bamutumikila. 24 Bakokeshi bonso,+ bilobo bia mvita,+ ne kabidi bana ba mukalenge Davidi bonso+ bakakokela mukalenge Solomo. 25 Yehowa wakavuija kabidi Solomo munene menemene ku mêsu kua Isalele mujima ne wakamupesha bukokeshi bunene buvua mukalenge nansha umue wa Isalele kumpala kuende kayi mupete.+

26 Nunku Davidi muana wa Yishai wakakokesha Isalele mujima, 27 ne bule bua* bukokeshi buende mu Isalele buvua bua bidimu 40. Wakakokesha bidimu muanda mutekete mu Hebelone,+ ne wakakokesha bidimu 33 mu Yelushalema.+ 28 Wakafua mukulakaje bikole,+ muikale ne matuku a muoyo a bungi,* ne bubanji, ne butumbi; muanende Solomo wakalua mukalenge pa muaba wende.+ 29 Bua malu a mukalenge Davidi, kutuadijila ku mbangilu kuawu too ne ku ndekelu, mmafunda mu mêyi a Samuele mumonyi wa malu, muprofete Natana,+ ne Gada+ mumonyi wa bikena kumona, 30 pamue ne malu adi atangila bukokeshi buende buonso, bukole buende ne malu avua mamuenzekele, menzekele Isalele ne makalenge onso avua mamunyunguluke.