Yehezekele

15 Dîyi dia Yehowa diakalua kabidi kundi, diamba ne: 2 “Muana wa muntu, mmunyi mudi lukunyi lua muonji wa tumuma tua mvinyo mua kudifuanyikija ne lua mutshi mukuabu kayi wonso anyi ne ditamba dia mitshi ya muitu? 3 Badi mua kuenza mudimu ne mukamba wawu anyi? Peshi bantu badi mua kuenza nawu tshintu tshia kukudikila bintu bia tshikuku anyi? 4 Tangila! Badi bawela mu kapia bu tshintu tshia kutemesha natshi kapia, ne kapia kadi kabutula ntengu yonso ibidi ne kosha pankatshi. Udiku ukumbana bua kuenzabu nawu mudimu mukuabu mpindieu anyi? 5 Nansha pavuawu mujima, kabavua mua kuenza nawu mudimu nansha umue to. Kadi anu pakadi kapia kawubutule ne kawoshe, ke penzabu nawu tshinyi?”

6 “Nunku mona tshidi Mukalenge Mutambe Bunene Yehowa wamba: ‘Anu bu lukunyi lua muonji wa tumuma tua mvinyo munkatshi mua mitshi ya muitu lundi mufile bu tshintu tshia kutemesha natshi kapia, ke mungenzela bantu badi basombele mu Yelushalema.+ 7 Ndi mutangije mpala wanyi kudibu bua kubaluisha. Mbapanduke ku kapia, kadi kapia nekababutule. Nunku nenufike ku dimanya ne: meme ndi Yehowa pandi ntangija mpala wanyi kudibu bua kubaluisha.’”+

8 “‘Nunku nemvuije buloba ebu munda mutupu+ bualu mbenze malu a dipanga lulamatu,’+ ke mudi Mukalenge Mutambe Bunene Yehowa wamba.”