Yehezekele

17 Dîyi dia Yehowa diakalua kabidi kundi, diamba ne: 2 “Muana wa muntu, ela kasumu ne lusumuinu bua bualu bua nzubu wa Isalele.+ 3 Udi ne bua kuamba ne: ‘Mona tshidi Mukalenge Mutambe Bunene Yehowa wamba: “Nyunyi munene wa mukanku+ muikale ne mapuapua manene, ne nsongo ya mapuapua mile, ne masala a bungi a mekala mekala, wakalua ku Lebanona,+ kutulaye lusongo lua mutshi wa sedre.+ 4 Wakatula lutonga lua mu lusongo menemene, kuyaye nalu mu buloba bua bangenda mushinga,* kulutekaye panshi mu tshimenga tshia bangenda mushinga.+ 5 Pashishe wakangata ndambu wa mamiinu a mu buloba abu,+ kuelaye mu budimi bua bufuke. Wakaakuna bu mutshi wa sole pabuipi ne mâyi a bungi. 6 Nunku akatoloka, kuluawu muonji wa tumuma tua mvinyo muîpi uvua ulamba+ muikale ne mabeji matangile munda ne miji yawu ikola muinshi muawu. Nunku wakalua muonji wa tumuma tua mvinyo, wowu kusampila, kupatulawu matamba.+

7 “‘“Kuakalua nyunyi mukuabu munene wa mukanku+ muikale ne mapuapua manene ne nsongo ya mapuapua mile.+ Pashishe muonji wa tumuma tua mvinyo eu wakatuma miji yawu kudiye ne luzuku, kule ne mabula a mu budimi muvuabu bawukune, ne wakatuma mabeji awu kudiye bua yeye amone mua kuwenzela minkoloji ya mâyi.+ 8 Bakavua bawukune mu budimi buimpe pabuipi ne mâyi a bungi bua wase matamba, ukuame bimuma, ne bua ulue muonji munene wa tumuma tua mvinyo.”’+

9 “Amba ne: ‘Monayi tshidi Mukalenge Mutambe Bunene Yehowa wamba: “Newukole anyi? Muntu kakujula miji yawu,+ kubolesha bimuma biawu ne kuenza bua ntonga yawu ifubidile anyi?+ Newume mu mushindu wikalabi kabiyi bikengela diboko dia bukole peshi bantu ba bungi bua kuwujudila ku miji yawu nansha. 10 Nansha mudibu bawutentule, newukole anyi? Kawakuma wonso pawututabu kudi lupepele lua ku est anyi? Newumine mu dibula dia mu budimi muvuabu bawukune.”’”

11 Dîyi dia Yehowa diakalua kabidi kundi, diamba ne: 12 “Ambila koku nzubu wa bantomboji ne: ‘Kanuena nujingulula tshidi malu aa umvuija anyi?’ Amba ne: ‘Monayi! Mukalenge wa Babilona wakalua mu tshimenga tshia Yelushalema, kuangataye mukalenge watshi ne bakokeshi batshi, kupinganaye nabu mu Babilona.+ 13 Wakangata kabidi umue wa mu bana ba* bukalenge,+ yeye kudia nende tshipungidi, kumuenzejaye mutshipu.+ Pashishe wakaya ne bantu ba lumu ba mu buloba,+ 14 bua bukalenge bupuekeshibue, kabuyi mua kubanda kabidi, bua bumone mua kutungunuka ne kuikalaku anu padibu bulama tshipungidi tshiende.+ 15 Kadi ndekelu wa bionso, mukalenge eu wakamutombokela+ pakatumaye batuadi bende ba mukenji mu Ejipitu bua bamupeshe tubalu+ ne tshiluilu tshinene tshia basalayi.+ Neatshimune anyi? Muntu udi wenza malu aa neapanduke ku dinyoka anyi? Udi mua kushipa tshipungidi, yeye kupanduka anyi?’+

16 “‘“Bushuwa bu mundi ne muoyo,” ke mudi Mukalenge Mutambe Bunene Yehowa wamba, “yeye neafuile mu Babilona, muaba udi mukalenge* uvua mumuteke* mukalenge musombele, yeye muena mutshipu uvuaye mupetule ne muena tshipungidi tshivuaye mushipe.+ 17 Tshiluilu tshinene ne bisumbu bia bungi bia basalayi ba Palô kabiakuikala ne dikuatshisha nansha dimue mu mvita,+ pikala bibumba bikole bia kutshintshimika nabi bimanyika ne bimanu bia kutshintshimika nabi bibaka bua kubutula mioyo* ya bungi. 18 Yeye mmupetule mutshipu ne mmushipe tshipungidi. Nansha muvuaye muenze dilaya diende,* mmuenze malu onso aa, ne kakupanduka to.”’

19 “‘Nunku mona tshidi Mukalenge Mutambe Bunene Yehowa wamba: “Bushuwa bu mundi ne muoyo, nentume bipeta bia dipetula dia mutshipu wanyi+ ne dishipa dia tshipungidi tshianyi pa mutu wende. 20 Nemmuele bukondo buanyi, ne yeye neakuatshibue mu bukondo buanyi.+ Nenye nende ku Babilona ne nempite nende ku tshilumbuluidi kuoku aku bua muvuaye mupange kundeja lulamatu.+ 21 Bonso ba mu bisumbu biende bia basalayi badi banyeme nebakuluke ku muele wa mvita, ne badi bashala nebabatangalaje mu nseke yonso.*+ Nunku nenufike ku dimanya ne: meme muine, Yehowa, ngudi muakule.”’+

22 “‘Mona tshidi Mukalenge Mutambe Bunene Yehowa wamba: “Nengangate lutonga ku lusongo lua mutshi mutumbuke wa sedre+ ne nendukune, nentule lutonga lutekete mu ntonga yawu ya ku lusongo,+ ne meme nkayanyi nendukune pa mukuna mule, mutumbuke.+ 23 Nendukune pa mukuna mule wa Isalele; ne matamba alu neakole, nelukuame bimuma ne nelulue mutshi munene wa sedre. Nyunyi ya mishindu yonso neyisombele muinshi muawu ne neyisombele mu dileji dia mabeji awu. 24 Mitshi yonso ya mu mpata neyifike ku dimanya ne: meme muine, Yehowa, ngudi mupuekeshe mutshi mule ne mubandishe mutshi muîpi;+ ndi mumishe mutshi mubishi ne muenze bua mutshi mume wele bilongo.+ Meme muine, Yehowa, ngudi muambe bualu ebu ne mubuenze.”’”