Yehezekele

47 Pashishe, wakapingana nanyi ku tshibuelelu tshia ntempelo,+ kuoku aku ngakamona mâyi apueka matangile ku est afumina muinshi mua lutanda lua ntempelo,+ bualu luseke lua kumpala lua ntempelo luvua lutangile ku est. Mâyi avua apueka afumina muinshi ku luseke lua dia balume dia ntempelo, ku sud kua tshioshelu.

2 Pashishe, wakapatukila nanyi mu njila wa ku tshiibi tshia ku nord,+ kupatukaye nanyi pambelu, kunyunguluka, kuya nanyi ku tshiibi tshia pambelu tshidi tshitangile ku est,+ meme kumona mâyi apueka afumina ku luseke lua dia balume.

3 Pavua muntu au muye mutangile ku est ne nshinga wa kupima nende mu tshianza tshiende,+ wakapima nkubita* tshinunu, kumpitshishaye mu mâyi; mâyi avua akuatshila mu tupombo.

4 Pashishe, wakapima tshinunu tshikuabu, kumpitshishaye mu mâyi, avua afika mu binu.

Yeye kupima tshinunu tshikuabu, yeye kumpitshishamu, mâyi avua afika mu tshimono.

5 Pakapimaye tshinunu tshikuabu, avua mâyi a nkuaka mukole amvua tshiyi mua kusabuka ku makasa, bualu mâyi avua male bikole avua alomba bua muntu kuowela, mâyi a nkuaka mukole avua muntu kayi mua kusabuka ku makasa.

6 Yeye kungebeja ne: “Muana wa muntu, udi mumone bualu ebu anyi?”

Pashishe wakangendesha, kumpingajaye ku muelelu kua kasulu. 7 Pangakapingana, ngakamona ne: ku muelelu kua kasulu aku kuvua mitshi ya bungi nseke yonso ibidi.+ 8 Pashishe, yeye kungambila ne: “Mâyi aa adi apueka matangile ku tshitupa tshia buloba tshia ku est ne adi atungunuka ne kupueka apitshila mu Alabâ,*+ abuela mu mbuu. Padiwu abuela mu mbuu,+ mâyi adimu neondopibue. 9 Bisumbu bia bifukibua* bidi ne muoyo nebisombele muaba wonso udi mâyi aa apueka.* Nemuikale mishipa mivule bualu mâyi aa neapuekamu. Mâyi a mu mbuu neondopibue, ne tshintu tshionso netshikale ne muoyo muaba wonso udi kasulu aku kaya.

10 “Balobi nebimane kumpenga kuawu kumbukila ku Ene-gedi+ too ne ku Ene-gelayima, muaba wikala kaba ka kuanyikila tupamba. Nemuikale mishipa mivule ya mishindu ya bungi, bu mishipa ya mu Mbuu Munene.*+

11 “Neikale ne miaba ya bisense ne miaba ya lunteke, miaba eyi kayakondopibua to. Nebayilekeele mukele.+

12 “Mitshi ya biakudia ya mishindu yonso neyitoloke ku mielelu yonso ibidi ya kasulu aku. Mabeji ayi kaakufubidila to; nansha bimuma biayi kabiakupangika to. Neyikuame bimuma bipiabipia ku ngondo ne ku ngondo, bualu mâyi ayi adi apueka afumina mu muaba munsantu.+ Bimuma biayi nebikale biakudia, ne mabeji ayi neikale bua luondapu.”+

13 Mona tshidi Mukalenge Mutambe Bunene Yehowa wamba: “Ebu ke buloba buwapesha bisamba 12 bia Isalele bu buloba bua bumpianyi, Jozefe neapete bitupa bibidi.+ 14 Nenubupiane ne nenupete bitupa bia bunene bua muomumue.* Mvua muditshipe bua kupesha bankambua benu buloba ebu,+ mpindieu mbanupeshabu* nuenu bu bumpianyi.

15 “Eu ke mukalu wa buloba luseke lua ku nord: Udi umbukila ku Mbuu Munene mu njila wa ku Hetelona+ mutangile ku Sedada,+ 16 Hamate,+ Belota,+ ne ku Sibelayima udi pankatshi pa tshitupa tshia buloba tshia Damaseke ne tshitupa tshia buloba tshia Hamate too ne ku Hasê-hatikona udi ku mukalu wa Haulana.+ 17 Nunku mukalu newumbukile ku mbuu mutangile ku Hasâ-enana,+ ulonda mukalu wa Damaseke lua ku nord, ne ku mukalu wa Hamate.+ Eu ke mukalu wa ku nord.

18 “Luseke lua ku est ludi lupitshila pankatshi pa Haulana ne Damaseke, lulonda musulu wa Yadene pankatshi pa Gilada+ ne buloba bua Isalele. Udi ne bua kupima kumbukila ku mukalu too ne ku mbuu wa ku est.* Eu ke mukalu wa ku est.

19 “Mukalu wa ku sud* newikale kumbukila ku Tamâ too ne ku mâyi a Melibota-kadeshe,+ pashishe uya ku Kasulu ka tshilonda nkoka,* uya too ne ku Mbuu Munene.+ Eu ke mukalu wa ku sud.*

20 “Ku luseke lua ouest kudi Mbuu Munene, kumbukila ku mukalu kubanda too ne muaba udi mutangilangane ne Lebo-hamata.*+ Eu ke mukalu wa ku ouest.”

21 “Nudi ne bua kuabanyangana buloba ebu munkatshi muenu, munkatshi mua bisa 12 bia Isalele. 22 Nudi ne bua kubuabanyangana bu bumpianyi munkatshi muenu nuenu ne bantu ba ku babende badi basombe nenu badi balele bana padibu basombele munkatshi muenu; nebikale kunudi bu bena Isalele ba ku tshilelelu. Nebapete bumpianyi munkatshi mua bisa bia Isalele pamue nenu. 23 Nudi ne bua kupesha muntu udi musombe buenyi bumpianyi mu tshitupa tshia buloba tshia tshisa mudiye musombele,” ke mudi Mukalenge Mutambe Bunene Yehowa wamba.