Yeshaya
38 Mu matuku au, Hezikiya wakasama ne ukavua ukeba kufua.+ Muprofete Yeshaya+ muana wa Amoza wakalua kudiye, kumuambilaye ne: “Mona tshidi Yehowa wamba: ‘Ambila ba mu nzubu muebe malu adibu ne bua kuenza, bualu neufue; kuakumvua bimpe to.’”+ 2 Ke Hezikiya kutangija mpala wende mu tshimanu, kutuadijaye kulomba Yehowa wamba ne: 3 “Ndi nkusengelela, Yehowa wanyi, uvulukaku+ mundi muende kumpala kuebe ne lulamatu luonso ne muoyo mujima,+ ne ndi muenze malu avua mimpe ku mêsu kuebe.” Pashishe Hezikiya wakatuadija kudila bikole.
4 Pashishe dîyi dia Yehowa diakalua kudi Yeshaya, diamba ne: 5 “Pingana wambile Hezikiya+ ne: ‘Mona tshidi Yehowa Nzambi wa nkambua webe Davidi wamba: “Ndi mumvue disambila diebe.+ Ndi mumone binsonji biebe.+ Mona, ndi nsakidila bidimu 15 ku matuku ebe a muoyo,*+ 6 ne nenkusungile wewe ne tshimenga etshi mu tshianza tshia mukalenge wa Ashû, ne nenkube tshimenga etshi.+ 7 Mona tshimanyinu tshia kudi Yehowa bua kukuleja ne: Yehowa neakumbaje dîyi didiye muambe:+ 8 Mona, nempingaje mundidimbi wa dîba udi upueka pa tshibandilu* tshia Ahaza panyima bidiatshilu dikumi.”’”+ Nunku dîba diakapingana panyima bidiatshilu dikumi pa tshibandilu pakavuadi dipueke.
9 Malu akafunda* Hezikiya mukalenge wa Yuda pavuaye musame ne mumvue bimpe ku disama diende.
10 Ngakamba ne: “Munkatshinkatshi mua matuku anyi a muoyo
Ndi ne bua kubuela mu biibi bia Lukita.*
Nebampangishe bidimu bianyi bidi bishale.”
11 Ngakamba ne: “Tshiakumona Yah,* Yah mene mu buloba bua badi ne muoyo.+
Tshiakutangila kabidi bukua bantu
Pandi pamue ne badi basombele muaba udi malu onso imana.
12 Mbatule tshisombelu tshianyi, mbatshiumbushe kundi+
Bu ntenta wa mulami wa mikoko.
Ndi muvunge muoyo wanyi bu muluki wa bilamba;*
Yeye udi unkosa bu manda a tshilamba a mu bule.
Kubangila ku dinda too ne padi butuku buila wewe udi utungunuka ne kuya nanyi too ne ku ndekelu.+
13 Ndi nditukija too ne mu dinda.
Bu ntambue, yeye udi utungunuka ne kutshibula mifuba yanyi yonso;
Kubangila ku dinda too ne padi butuku buila wewe udi utungunuka ne kuya nanyi too ne ku ndekelu.+
14 Bu nyunyi wa kandindi anyi wa mutendi,* ke mundi ntungunuka ne kudila;+
Ndi ntungunuka ne kudila bu nyunyi wa nkutshi.+
Mêsu anyi mmatangile ne dipungi ku muaba mutumbuke:+
15 Nengambe tshinyi?
Yeye mmuyukile nanyi ne mmuenze bualu.
16 ‘Yehowa wanyi, muntu yonso udi ne muoyo bua malu aa,*
Ne munda muawu ke mudi muoyo wa nyuma wanyi.
Neumpeshilule bukole bua mubidi ne neundame ne muoyo.+
17 Tangila! Pamutu pa ditalala, mvua ne kanyinganyinga kakole;
Kadi bua muudi munnange* bikole,
Uvua munkube ku tshina tshia kabutu.+
Udi mukupe mpekatu yanyi yonso panyima pebe.*+
Badi bapueka mu tshina kabena mua kutekemena lulamatu luebe.+
19 Muntu udi ne muoyo, muntu udi ne muoyo udi mua kukutumbisha,
Anu bu mundi ngenza dituku edi.
Tatu udi mua kupesha bana bende dimanya dia bualu bua lulamatu luebe.+
20 Yehowa wanyi, umpandishe,
Netuimbe misambu yanyi ne biombelu bia nshinga+
Matuku etu onso a muoyo mu nzubu wa Yehowa.’”+
21 Pashishe Yeshaya wakamba ne: “Luayi ne dibulu dia mfigi miumisha mibondakaja pamue, nuditeke pa tshiwuja, bua yeye umvue bimpe.”+ 22 Hezikiya uvua muebeje ne: “Ntshimanyinu kayi tshidi tshileja ne: nembande ku nzubu wa Yehowa?”+