Yobo

 2 Bualu dilaminangana malu munda nedishipe muntu mutshimbakane,

Ne dialakana nedishipe muntu udi ne lungenyi lukese.

 3 Ndi mumone mutshimbakane wela miji,

Kadi diakamue muaba wende wa kusombela udi wedibua mulawu.

 4 Bana bende badi kule ne bukubi,

Ne badi babazajila ku tshiibi tshia tshimenga,+ kakuyi wa kubapandisha.

 5 Muntu udi ne nzala udi udia tshidiye upuola,

Utshipatuila nansha munkatshi mua mêba,

Ne bintu biabu mbikuatshibue mu buteyi.

 6 Bualu bintu bitu bienzelangana bibi kabitu bitoloka mu lupuishi to,

Ne lutatu kalutu lupatuka mu buloba nansha.

 7 Bualu muntu mmuledibue anu bua lutatu,

Bushuwa anu bu mudi tupia tutudika tubanda muulu.

 8 Kadi meme nendombe kudi Nzambi,

Ne kudi Nzambi nkungafunda tshilumbu tshianyi,

 9 Kudi Eu udi wenza malu manene adibu kabayi mua kulondolola,

Malu a dikema bungi kabuyi kubala.

10 Yeye udi upesha buloba mvula

Ne udi utuma mâyi mu mpata.

11 Udi ubandisha bapuekele kuulu,

Ne udi ubandisha udi mubungame bikole too ne ku lupandu.

12 Udi utatakaja mayele a bena budimu,

Nunku mudimu wa bianza biabu kawena ulubuluka.

13 Yeye udi ukuata bena meji mu budimu buabu nkayabu,+

Nunku malu adi bantu badi badimuke bapangadija adi apangila.

14 Badi batuilangana ne mîdima mu munya,

Badi babubuta munda munya bienze anu bu butuku.

15 Udi upandisha ku muele wa mvita wa mukana muabu,

Upandisha bapele ku tshianza tshia bantu badi ne bukole,

16 Ufikisha bapuekele ku dikala ne ditekemena,

Kadi mukana mua malu adi kaayi makane mmukangibue.

17 Mona! Wa diakalenga mmuntu udi Nzambi ubela;

Nunku kubengi dinyoka dia Wa Bukole Buonso to!

18 Bualu udi ukebesha kusama, kadi udi ujingila tshilamba pa mputa;

Udi utshibula bitupa bitupa, kadi udi wondopa ne bianza biende.

19 Neakupandishe ku makenga asambombo,

Nansha dia muanda mutekete kadiakukuenzela bibi to.

20 Mu tshiyole tshia nzala yeye neakukuule ku lufu,

Ne ku bukokeshi bua muele wa mvita mu mvita.

21 Neukubibue ku mututu wa ludimi,+

Kuakutshina kabutu padiku kalua to.

22 Neuseke kabutu ne nzala,

Kuakutshina nyama ya tshisuku ya pa buloba nansha.

23 Bualu mabue a mu mpata kaakukuenzela bibi to,*

Ne nyama ya tshisuku ya mu mpata neyikale nebe mu ditalala.

24 Neumanye ne: ntenta webe udi mu bukubi,*

Tshintu katshiakupangika paudi ukonkonona muaba webe wa kudishila nyama.

25 Neupete bana ba bungi,

Ne ndelanganyi yebe neyikale bungi tshianana bu bisonsa bia pa buloba.

26 Newikale anu ne bukole paudi uya mu lukita,

Bu bisumbu bia ntete bisangisha mu tshikondo tshiabi.