Yehezekele

45 “‘Panudi nuabanya buloba bu bumpianyi,+ nudi ne bua kupesha Yehowa tshitupa tshia tshijila tshia buloba abu bu dipa.+ Bule buatshi budi ne bua kuikala bua nkubita* binunu 25, ne butshiama buatshi bua nkubita binunu 10.+ Tshipapu tshiabu tshionso* netshikale tshitupa tshia tshijila. 2 Munda muatshi nemuikale tshitupa tshia buloba tshia nseke inayi ya bule bumue bua muaba wa tshijila, tshikale ne nkubita 500 mu bule ne nkubita 500 mu butshiama,*+ ne netshikale ne nkubita 50 mu nseke yonso bu miaba ya kudishila nyama.+ 3 Mu muaba udibu bapime eu, udi ne bua kupima binunu 25 mu bule ne binunu 10 mu butshiama, ne munda nemuikale muaba munsantu, tshintu tshitambe tshijila. 4 Netshikale tshitupa tshia buloba tshia tshijila bua bakuidi,+ bena mudimu ba muaba munsantu, badi basemena bua kuenzela Yehowa mudimu.+ Netshikale muaba wa nzubu yabu ne muaba mujidila bua muaba munsantu.

5 “‘Nekuikale tshitupa tshia bule bua nkubita binunu 25 ne butshiama bua nkubita binunu 10+ bua bena Lewi, bena mudimu ba ku ntempelo, ne nebikale ne bibambalu bia kudiila 20*+ bu bumpianyi.

6 “‘Nudi ne bua kukosa tshipapu tshia bule bua nkubita binunu 25 (tshikumbanangane ne dipa dia tshijila) ne butshiama bua nkubita 5 000+ bua tshikale buloba bua tshimenga. Buloba abu nebuikale tshintu tshia nzubu mujima wa Isalele.

7 “‘Nekuikale buloba bua mfumu mu nseke yonso ibidi ya dipa dia tshijila ne ya tshipapu tshipesha tshimenga. Nebuikale pabuipi ne dipa dia tshijila ne bumpianyi bua tshimenga. Nebuikale ku luseke lua ku ouest ne ku luseke lua ku est. Bule buabu kumbukila ku mukalu wa ku ouest too ne ku mukalu wa ku est nebuikale bukumbanangane ne bua tshimue tshia ku bitupa bia buloba bia bisa.+ 8 Buloba ebu nebulue buende yeye mu Isalele. Bamfumu banyi kabakukengesha kabidi bantu banyi nansha,+ ne nebapeshe ba mu nzubu wa Isalele buloba bilondeshile bisa biabu.’+

9 “Monayi tshidi Mukalenge Mutambe Bunene Yehowa wamba: ‘Nudi baye kule menemene, nuenu bamfumu ba Isalele!’

“‘Lekelayi tshikisu tshienu ne dikengeshangana, ne enzayi tshidi tshimpe ne tshiakane.+ Lekelayi kunyenga bintu bia bantu banyi,’+ ke mudi Mukalenge Mutambe Bunene Yehowa wamba. 10 ‘Nudi ne bua kupima ne bipiminu bia bujitu bijalame, tshipiminu tshia efa* tshijalame ne tshipiminu tshia bata* tshijalame.+ 11 Kudi ne bua kuikala bunene bukosa bua tshipiminu tshia efa ne tshipiminu tshia bata. Tshipiminu tshia bata tshidi ne bua kuikala tshia dikumi tshia tshipiminu tshia homer,* ne tshipiminu tshia efa tshidi ne bua kuikala tshia dikumi tshia tshipiminu tshia homer. Tshipiminu tshia homer netshikale tshipiminu tshia tshidikijilu. 12 Nshekele*+ umue udi ne bua kuikala mumue ne gera* 20. Nshekele 20 kusangisha ne nshekele 25 kusangisha ne nshekele 15 neyenze manehe* umue buenu nuenu.’

13 “‘Edi ke dipa dinudi ne bua kufila: tshia bisambombo tshimue tshia efa mu homer yonso wa blé, ne tshia bisambombo tshimue tshia efa mu homer yonso wa orje. 14 Bungi bua mafuta a kufila nebuikale bilondeshile tshipiminu tshia bata. Bata umue udi tshia dikumi tshimue tshia kore,* ne bata dikumi idi yenza homer umue, bualu bata dikumi idi mumue ne homer umue. 15 Mu tshisumbu tshia bimuna bia Isalele, mu mikoko 200 yonso nenufile mukoko umue. Yoyi eyi neyikale bua mulambu wa ntete,+ mulambu wa kuosha mujima,+ ne bua milambu ya diumvuangana,+ bua kubuikidila bantu mpekatu yabu,’+ ke mudi Mukalenge Mutambe Bunene Yehowa wamba.

16 “‘Bantu bonso ba mu buloba ebu nebafile dipa edi+ kudi mfumu mu Isalele. 17 Kadi mfumu neikale utangila milambu ya kuosha mijima,+ mulambu wa ntete+ ne mulambu wa bia kunua mu bikondo bia bibilu,+ bia dibala dia ngondo, bia Nsabatu,+ ne bia bibilu bia disanka bionso bijadika bia nzubu wa Isalele.+ Yeye neikale ufila mulambu wa mpekatu, mulambu wa ntete, mulambu wa kuosha mujima, ne milambu ya diumvuangana bua kubuikidila ba mu nzubu wa Isalele mpekatu yabu.’

18 “Mona tshidi Mukalenge Mutambe Bunene Yehowa wamba: ‘Mu ngondo wa kumpala, mu dituku dia kumpala dia ngondo, udi ne bua kuangata muana mulume wa ngombe muimpe wa mu tshisumbu tshia ngombe, ne udi ne bua kukezula muaba munsantu ku mpekatu.+ 19 Muakuidi neangate ndambu wa mashi a mulambu wa mpekatu, neaele ku dibaya dia mu luseke dia ku mushiku wa mbelu wa ntempelo,+ ku matumba anayi a kabumba kadi kanyunguluke tshioshelu, ne ku dibaya dia mu luseke dia ku mushiku wa mbelu wa lubanza lua munda. 20 Ke tshiwenza mu dituku dia muanda mutekete dia ngondo bua muntu udi wenza mpekatu ku mpukapuka anyi bua ditupakana;+ ne nudi ne bua kubuikidila ntempelo mpekatu.+

21 “‘Mu ngondo wa kumpala, mu dituku dia 14 dia ngondo, nenusekelele tshibilu tshia Pasaka.+ Mu matuku muanda mutekete nudi ne bua kudia mampa kaayi mela luevene.+ 22 Dituku adi mfumu neafile muana mulume wa ngombe bu mulambu wa mpekatu buende yeye ne bua bantu bonso ba mu buloba.+ 23 Bua matuku muanda mutekete a tshibilu atshi, yeye neafile kudi Yehowa bana balume ba ngombe bimpe muanda mutekete ne bimpanga bia mikoko bimpe muanda mutekete bu mulambu wa kuosha mujima, dituku dionso dia ku matuku muanda mutekete au,+ kabidi ne mpumbu wa mbuji dituku dionso bu mulambu wa mpekatu. 24 Yeye udi ne bua kufila kabidi efa umue bu mulambu wa ntete bua muana mulume wa ngombe yonso, ne efa umue bua tshimpanga tshia mukoko tshionso, kabidi ne hine* umue wa mafuta bua efa yonso.

25 “‘Mu ngondo wa muanda mutekete, mu dituku dia 15 dia ngondo, yeye neafile mulambu wa mpekatu wa muomumue au, mulambu wa kuosha mujima wa muomumue au, mulambu wa ntete wa muomumue au ne mafuta a muomumue au munkatshi mua matuku muanda mutekete a tshibilu atshi.’”+