Misambu

37 Kufiiki munda* bua bantu babi

Anyi kualakanyi benji ba malu mabi to.+

 2 Nebafubidile ne lukasa bu tshisonsa,+

Nebuminyine bu tshisonsa tshibishi tshitshidi tshitolokelaku.

 3 Eyemena Yehowa ne enza malu adi mimpe;+

Somba mu buloba* ne enza malu ne lulamatu.+

 4 Ikala ne disanka dipite bungi* mu Yehowa,

Yeye neakukumbajile majinga a muoyo webe.

 5 Teka njila webe kudi* Yehowa;+

Mueyemena, ne yeye neenze tshienzedi bua bualu buebe.+

 6 Neenze bua buakane buebe bukenke bu pa kabundubundu,

Neavuije kulumbuluisha kuebe kuakane bu dîba dia munda munya.

 7 Shala mupuwe kumpala kua Yehowa,+

Umuindile ne muoyo kuulu kuulu.*

Kufiiki munda bua muntu

Udi ufika ku dikumbaja ngenyi idiye uluka.+

 8 Umbusha tshiji ne lekela luonji;+

Kufiiki munda ne kulu kuenza malu mabi.*

 9 Bualu bantu babi nebabutudibue,+

Kadi badi batekemena kudi Yehowa nebapiane buloba.+

10 Mu katupa kîpi patupu, bantu babi kabakuikalaku kabidi to;+

Neutangile muaba uvuabu,

Kabakuikalaku to.+

11 Kadi bena bupuekele nebapiane buloba,+

Nebikale ne disanka dipite bungi mu ditalala divule.+

12 Muntu mubi udi welela muntu muakane tshifufu;+

Udi umudiila mênu.

13 Kadi Yehowa neamuseke,

Bualu Yeye mmumanye ne: dituku diende nedilue.+

14 Bantu babi badi bapatula miele yabu ya mvita ne banana* mata abu a mikete

Bua kukulula bakengi ne bapele,

Bua kushipa badi njila wabu mululame.

15 Kadi muele wabu wa mvita newutubule muoyo wabu bobu bine;+

Mata abu a mikete neatshibuke.

16 Kakese ka muntu muakane nkimpe

Kapite divulangana dia bintu bia bantu babi ba bungi.+

17 Bualu nebatshibule maboko a bantu babi,

Kadi Yehowa neakuatshishe bantu bakane.

18 Yehowa mmumanye malu adi bantu badi kabayi mua kubandibua bapetangana nawu,*

Ne bumpianyi buabu nebushalaku kashidi.+

19 Kabakufuishibua bundu mu

tshikondo tshia tshipupu to;

Mu tshikondo tshia tshiyole tshia nzala, nebikale ne bintu bia bungi.

20 Kadi bantu babi nebajimine;+

Bena lukuna ba Yehowa nebajimine bu mpata milengele ya bisonsa;

Nebajimine anu bu muishi.

21 Muntu mubi udi usomba bintu ne kena ufuta,

Kadi muntu muakane mmuena tshipapayi* ne udi upeshangana bintu.+

22 Badiye mubeneshe nebapiane buloba,

Kadi badiye muele mulawu nebabutudibue.+

23 Yehowa udi uludika* bidia bia makasa a muntu+

Padi njila wa muntu au umusankisha.+

24 Nansha yeye mua kudishinda, kabakumukuma panshi nansha,+

Bualu Yehowa udi umukuata ku tshianza.*+

25 Mvua nsonga, mpindieu nkadi mukulakaje,

Kadi tshiena muanji kumona muntu muakane mulekelela,+

Peshi bana bende benda bakeba tshiakudia* to.+

26 Yeye udi usombeshangana bintu tshianana misangu yonso,+

Bana bende mbafuane kupeta dibenesha.

27 Umbuka ku malu mabi, enza malu adi mimpe,+

Neushalaku kashidi.

28 Bualu Yehowa mmunange kulumbuluisha kuakane,

Yeye kakulekela bena lulamatu bende nansha.+

Nebikale bakubibue misangu yonso;+

Kadi tunkanunuina tua bantu babi netubutudibue.+

29 Bantu bakane nebapiane buloba,+

Nebasombapu bua kashidi.+

30 Mukana mua muntu muakane mudi mupeteshangana meji,*

Ludimi luende ludi luakula

bua kulumbuluisha kuakane.+

31 Mukenji wa Nzambi wende udi mu muoyo wende;+

Makasa ende kaakutetuka to.+

32 Muntu mubi udi utentekela muntu muakane,

Ukeba bua kumushipa.

33 Kadi Yehowa kakumulekela mu tshianza tshia muntu au+

Anyi kumupisha padibu bamulumbuluisha to.+

34 Tekemena kudi Yehowa, londa njila wende,

Ne yeye neakubandishe bua wewe kupiana buloba.

35 Ndi mumone muntu mubi udi kayi ne luse

Udiunda bu mutshi udi musampile bikole mu buloba budiwu mutolokele.+

36 Kadi wakajimina diakamue ne kavuaku to;+

Ngakatungunuka ne kumukeba, kadi kavua mua kumueneka to.+

37 Tangila bimpe muntu udi kayi mua kubandibua,*

Shala mutangile muena bululame,+

Bualu matuku atshilualua a muntu au neikale a ditalala.+

38 Kadi bashipi ba mikenji bonso nebabutudibue;

Matuku atshilualua a bantu babi neakoshibue.+

39 Lupandu lua bantu bakane ludi lufumina kudi Yehowa;+

Yeye ke muaba wabu mukolesha mu tshikondo tshia dikenga.+

Yeye neabasungile kudi bantu babi ne neabapandishe,

Bualu badi banyemena kudiye.+