Mukanda wa Kumpala wa Kulondolola
19 Pashishe Nahasha mukalenge wa bena Amona wakafua, ne muanende wakalua mukalenge pa muaba wende.+ 2 Ke Davidi kuamba ne: “Nendeje Hanuna muana wa Nahasha dinanga dia lulamatu,+ bualu tatuende uvua mundeje dinanga dia lulamatu.” Nunku Davidi wakatuma bantu ne mukenji bua kumusamba bua muvuaye mujimije tatuende. Kadi pavua bena mudimu ba Davidi bafike mu buloba bua bena Amona+ bua kusamba Hanuna, 3 bakokeshi ba bena Amona bakambila Hanuna ne: “Udi wela meji ne: Davidi udi unemeka tatuebe padiye mukutumine bantu bua kukusamba anyi? Bena mudimu bende ki mbalue kuudi bua kukebakeba mu buloba, kukukulula, ne kutentekela buloba anyi?” 4 Nunku Hanuna wakangata bena mudimu ba Davidi, kubakungulaye,+ kupandaye bilamba biabu mu bitupa bibidi lua pa mataku ne kubapingajaye. 5 Pavuabu bambile Davidi bualu bua bantu abu, wakatuma bantu bakuabu diakamue bua kusambakena nabu, bualu bantu abu bavua bafuishibue bundu bikole; ne mukalenge wakabambila ne: “Shalayi mu Yeliko+ too ne padi miedi yenu isasa, pashishe nupingane.”
6 Pakapita matuku bena Amona bakamona ne: bavua balue tshintu tshidi tshinunka bibi kudi Davidi, nunku Hanuna ne bena Amona bakatuma ntalanta* tshinunu ya arjan bua kufuta bua matempu ne bua bendeshi ba tubalu ba ku Mezopotamia,* ku Alama-mâka, ne ku Soba.+ 7 Nunku bakafuta bua matempu binunu 32, kabidi ne bua mukalenge wa Mâka ne bantu bende. Pashishe bakalua, kuasabu tshitudilu kumpala kua Medeba.+ Bena Amona bakumbuka mu bimenga biabu, kudisangishabu ne kupatukabu bua kuya ku mvita.
8 Pakumvua Davidi bualu abu, wakatuma Yoaba+ ne tshiluilu tshijima, kusangisha ne bena mvita bende ba bukole bua bungi.+ 9 Bena Amona bakapatuka, bobu kuela mualu wa mvita ku tshibuelelu tshia tshimenga pavua eku bakalenge bavua balue bikale mu mpata pa nkayabu.
10 Pavua Yoaba mumone ne: basalayi bavua benda bamuluila kumpala ne panyima, wakasungula bamue ba ku basalayi bavua bamanye mvita bikole mu Isalele, yeye kubelesha mualu wa mvita bua baluangane ne bena Sulia.+ 11 Bantu bavua bashale, wakabateka ku bulombodi bua* muanabu Abishai+ bua abeleshe mualu wa mvita bua baluangane ne bena Amona. 12 Ke yeye kuamba ne: “Bena Sulia+ bobu bampite bukole, dîba adi udi ne bua kulua bua kunsungila; kadi bena Amona bobu bakupite bukole, nendue kukusungila. 13 Tudi ne bua kuikala ne bukole ne dikima+ bua tshisamba tshietu ne bua bimenga bia Nzambi wetu, ne Yehowa neenze tshidi tshimpe ku mêsu kuende.”
14 Pashishe Yoaba ne bantu bende bakaya bua kuluangana ne bena Sulia, bobu kunyema kumpala kuende.+ 15 Pavua bena Amona bamone ne: bena Sulia bavua banyeme, bobu pabu bakanyema Abishai, muanabu ne Yoaba, kubuelabu mu tshimenga. Panyima pa bualu ebu Yoaba wakalua ku Yelushalema.
16 Pavua bena Sulia bamone ne: Isalele uvua mubatshimune, bakatuma bantu ne mukenji bua kubikidisha bena Sulia ba mu tshitupa tshia buloba tshia Musulu,*+ Shofaka mfumu wa tshiluilu tshia Hadadezê muikale ubalombola.+
17 Pakambilabu Davidi bualu ebu, wakasangisha diakamue Isalele mujima, kusabukaye Yadene, kufikaye kudibu ne kuelaye mualu wa mvita bua kuluangana nabu. Davidi wakela mualu wa mvita bua kuluangana ne bena Sulia, bobu kuluangana nende.+ 18 Kadi bena Sulia bakanyema Isalele; Davidi wakashipa bena Sulia 7 000 bavua bendesha matempu ne basalayi babu bavua benda ku makasa binunu 40, ne wakashipa Shofaka mfumu wa tshiluilu. 19 Pavua bena mudimu ba Hadadezê bamone ne: Isalele uvua mubatshimune,+ diakamue bakalengejangana ne Davidi, bobu kutuadija kumukokela;+ nunku Sulia kakajinga bua kuambuluisha bena Amona kabidi to.