Yehezekele
29 Mu tshidimu tshia dikumi, mu ngondo wa dikumi, mu dituku dia 12 dia ngondo, dîyi dia Yehowa diakalua kundi diamba ne: 2 “Muana wa muntu, tangija mpala webe kudi Palô mukalenge wa Ejipitu, ne amba mêyi a buprofete amufikila ne afikila Ejipitu mujima.+ 3 Amba mêyi aa: ‘Mona tshidi Mukalenge Mutambe Bunene Yehowa wamba:
“Mona, ndi nebe tshilumbu, wewe Palô mukalenge wa Ejipitu,+
Nyama munene wa mu mbuu udi mulale munkatshi mua tusulu tua musulu wende wa Nile,*+
Udi muambe ne: ‘Musulu wanyi wa Nile nguanyi meme.
Mvua muwenze buanyi meme.’+
4 Kadi nengele ndobo mu mbanga yebe ne nengenze bua mishipa ya mu musulu webe wa Nile ilamate ku mabamba ebe.
Nenkupatule mu musulu webe wa Nile pamue ne mishipa yonso ya mu musulu wa Nile idi milamate ku mabamba ebe.
5 Nenkulekele mu tshipela, wewe ne mishipa yonso ya mu musulu webe wa Nile.
Neukuluke mu mpata mualabale, ne kabakukukunguija peshi kukusangisha kaba kamue to.+
Nenkufile bu biakudia kudi nyama ya tshisuku ya pa buloba ne kudi nyunyi ya muulu.+
6 Pashishe bantu bonso badi basombele mu Ejipitu nebafike ku dimanya ne: meme ndi Yehowa,
Bualu bobu kabavua kabidi ne diambuluisha kudi nzubu wa Isalele kupita tshikolakola*+ to.
7 Pakakukuatabu ku tshianza, wakazajika,
Ne wakenza bua bapande dikaya diabu.
8 “‘Nunku mona tshidi Mukalenge Mutambe Bunene Yehowa wamba: “Mona, ndi ndua ne muele wa mvita kuudi,+ ne nengumbushe munkatshi muebe muntu ne nyama. 9 Buloba bua Ejipitu nebulue muaba wa munda mutupu ne mubutula;+ ne nebafike ku dimanya ne: meme ndi Yehowa, bualu wewe udi muambe* ne: ‘Musulu wa Nile nguanyi meme; meme ke uvua muwenze.’+ 10 Nunku ndi nenu tshilumbu, wewe ne musulu webe wa Nile, ne nemvuije buloba bua Ejipitu buloba bubutula, buatuke budi munda mutupu,+ kubangila ku Migedola+ too ne ku Siyene+ too ne ku mukalu wa Etshiopi. 11 Muntu nansha tshimuna kabiakupitshilamu ku makasa,+ ne kabakusombelamu munkatshi mua bidimu 40. 12 Nemvuije buloba bua Ejipitu buloba bua munda mutupu menemene ku maloba onso, ne nemvuije bimenga biende bimenga bia munda mutupu menemene ku bimenga bionso munkatshi mua bidimu 40;+ nentangalaje bena Ejipitu munkatshi mua bukua bisamba ne nembamuangalaje munkatshi mua matunga.”+
13 “‘Nunku mona tshidi Mukalenge Mutambe Bunene Yehowa wamba: “Panyima pa bidimu 40, nempingaje bena Ejipitu bumbukila mu bisamba muvuabu batangalaja;+ 14 Nempingaje bakuatshibue ba mu Ejipitu mu buloba bua Patelosa,+ mu buloba buvuabu batuadijile, ne muomu amu nebalue bukalenge bukese. 15 Ejipitu nealue mupuekele kupita makalenge makuabu ne kakukokesha kabidi bisamba bikuabu,+ ne nembavuije batambe bukese kabayi mua kukumbana bua kukokesha bisamba bikuabu to.+ 16 Yeye kakuikala kabidi tshieyemenu kudi nzubu wa Isalele nansha,+ kadi neabavuluije anu tshilema tshiabu tshia kuya kukeba diambuluisha kudi bena Ejipitu. Nunku nebafike ku dimanya ne: meme ndi Mukalenge Mutambe Bunene Yehowa.”’”
17 Mu tshidimu tshia 27, mu ngondo wa kumpala, mu dituku dia kumpala dia ngondo, dîyi dia Yehowa diakalua kundi diamba ne: 18 “Muana wa muntu, Nebukadenesâ*+ mukalenge wa Babilona wakenzeja tshiluilu tshiende mudimu mukole bua kuluisha Tulo.+ Mutu wonso wakatuka dibala ne dikaya dionso diakapuluka. Kadi yeye ne tshiluilu tshiende kabakapeta difutu bua mudimu mukole uvuabu benze mu Tulo to.
19 “Nunku mona tshidi Mukalenge Mutambe Bunene Yehowa wamba: ‘Mona, ndi mpesha Nebukadenesâ* mukalenge wa Babilona+ buloba bua Ejipitu, yeye neaye ne biuma bia mu buloba ebu ne neanyengamu ne neapawulamu bintu bia bungi; ne buobu nebulue difutu bua tshiluilu tshiende.’
20 “‘Bu difutu dia mudimu wende mukole udiye muenze bua kumuluisha,* nemmupeshe buloba bua Ejipitu bualu bavua bangenzele meme mudimu au,’+ ke mudi Mukalenge Mutambe Bunene Yehowa wamba.
21 “Mu dituku adi nengenze bua lusengu lutoloke bua nzubu wa Isalele,*+ ne nenkupeteshe mpunga wa kuakula munkatshi muabu; nunku nebafike ku dimanya ne: meme ndi Yehowa.”