Nsumuinu

19 Mbimpe kuikala mupele ne kuenda ne muoyo mutoke+

Pamutu pa kuikala mutatakane ne kuakula malu a dishima.+

 2 Muntu* udi kayi ne dimanya ki mmuntu muimpe to,+

Ne muntu udi ulubakana ne malu* udi wenza mpekatu.

 3 Butshimbakane bua muntu ke budi bunyanga njila wende,

Ne muoyo wende udi ukuatshila Yehowa tshiji.

 4 Biuma bidi bikoka balunda ba bungi,

Kadi muntu mupele nebamulekele too ne kudi mulunda wende.+

 5 Ntemu wa dishima kakupanga kupeta dinyoka,+

Ne muntu udi ushima bu mudiye weyela kakupanduka to.+

 6 Bantu ba bungi badi bakeba kuanyishibua kudi muntu munene,*

Ne muntu yonso mmulunda wa muntu udi upeshangana bintu.

 7 Bana babu ne mupele bonso badi bamukina;+

Mona mudi balunda bende bamunyema anu kumunyema!+

 9 Ntemu wa dishima kakupanga kupeta dinyoka,

Ne muntu udi ushima bu mudiye weyela neajimine.+

10 Ki mbikumbane bua muntu mutshimbakane ikale mu nsombelu wa bubanji;

Kabiena bikumbana nansha kakese bua muena mudimu akokeshe bakokeshi!+

11 Bushuwa, busunguluji bua muntu budi butuyisha tshiji tshiende,+

Ne mbulengele kudiye bua kulengulula* tshilema.*+

12 Tshiji tshia mukalenge tshidi bu mukungulu wa ntambue,*+

Kadi dianyishibua kudiye didi bu lumuma pa bisonsa.

13 Muana mutatakane udi ukebela tatuende diakabi,+

Ne mukaji muena matandu* udi bu musaka wa nzubu udi kawuyi ulekela kumatshisha mâyi.+

14 Nzubu ne bubanji mbumpianyi budi bufuma kudi batatu,

Kadi mukaji wa meji udi ufuma kudi Yehowa.+

15 Lulengu ludi lukebesha tulu tukole,

Ne muntu* mufuba nealale ne nzala.+

16 Muntu udi utumikila mukenji udi ulama muoyo* wende;+

Muntu udi kayi utshiuka bualu bua njila yende neafue.+

17 Muntu udi uleja mupuekele luse udi usombesha Yehowa bintu,+

Ne Yeye neamufute bua malu adiye wenza.+

18 Nyoka muanebe patshidiku ditekemena,+

Ne kuambudi bujitu bua* lufu luende.+

19 Muntu muena tshiji tshia lukasa neafute tshibawu;

Wewe mutete kumuepula, newikale ne bua kuenza nanku misangu ne misangu.+

20 Teleja mubelu ne itaba dinyoka,+

Bua ulue muena meji mu matuku ebe atshilualua.+

21 Malu adi muntu upangadija mu muoyo wende nga bungi,

Kadi lungenyi lua* Yehowa ke luatshimuna.+

22 Tshintu tshilengele tshidi munda mua muntu ndinanga diende dia lulamatu;+

Ne mbimpe kuikala mupele pamutu pa kuikala muena dishima.

23 Ditshina dia Yehowa didi difikisha ku muoyo;+

Muntu udi nadi neapete dikisha dilenga, kakuyi tshidi mua kumuenzela bibi.+

24 Muena lulengu udi ujiika tshianza tshiende mu tshibakudi tshia didia dia disanka,

Kadi kena nansha uditatshisha bua kutshipingaja mukana muende.+

25 Kuma musekianganyi,+ nunku muntu udi kayi ne dimanya udi mua kulua mudimuke,+

Ne tandisha muntu udi ne lungenyi, nunku yeye neavudije dimanya.+

26 Muntu udi ukengesha tatuende ne wipata mamuende

Mmuana udi ufuishangana bundu ne upuekeshangana milongo.+

27 Muananyi, wewe mulekele kuteleja mubelu,

Neusesuke ku mêyi a dimanya.

28 Ntemu wa patupu udi useka kulumbuluisha kuakane,+

Ne mukana mua muntu mubi mudi musukumina malu mabi.+

29 Dilumbuluisha ndilamina basekianganyi,+

Ne mitutu mmilamina nyima wa batatakane.+