Yeshaya

18 Diakabi dikale kudi buloba bua masala a bishi adi adila

Mu tshitupa tshia buloba tshia misulu ya Etshiopi!+

 2 Budi butuma batumibue dia mbuu,

Pa mâyi mu matu a papirise, buamba ne:

“Ndayi, nuenu batuadi ba mukenji badi baya lubilu lukole,

Kudi tshisamba tshia bantu bale badi ne dikoba disenene,*

Kudi bantu badibu batshina miaba yonso,+

Kudi tshisamba tshia bukole tshidi tshitshimunangana,*

Bena buloba budibu bapuekeshe kudi misulu.”

 3 Nuenu bonso badi basombele mu ditunga ne nuenu badi basombele pa buloba,

Tshinudi numona netshikale bu tshimanyinu* tshimanyika pa mikuna,

Ne nenumvue muadi bu wa diela dia mpungi.

“Nenshale talalaa ne nentangile* muaba wanyi mujadika,

Bu luya ludi lufukuka pamue ne bukenke bua dîba,

Bu ditutu dia lumuma mu luya lua tshikondo tshia dinowa.

 5 Bualu kumpala kua dinowa,

Padi bilongo bitutuka ne tshilongo tshilua kamuma ka mvinyo kadi kaboba,

Nebakose ntonga ne muele wa kusonza nawu

Ne nebakose mionji itu idijingila ne nebayumbushe.

 6 Buonso buabi nebabishile nyunyi ya ku mikuna itu idia minyinyi

Ne nyama ya pa buloba.

Nyunyi itu idia minyinyi neyipitshishile muvu wa luya lukole* pambidi pabi,

Ne nyama yonso ya pa buloba neyipitshishile tshikondo tshia dinowa pambidi pabi.

 7 Tshikondo atshi nebatuadile Yehowa wa biluilu dipa,

Difumina kudi tshisamba tshia bantu bale badi ne dikoba disenene,*

Kudi bantu badibu batshina miaba yonso,

Kudi tshisamba tshia bukole tshidi tshitshimunangana,*

Bena buloba budibu bapuekeshe kudi misulu,

Diya muaba udi ne dîna dia Yehowa wa biluilu, mukuna wa Siona.”+