Yeshaya
50 Mona tshidi Yehowa wamba:
“Mukanda wa dishipa nawu dibaka+ wa mamuenu umvua muipate udi penyi?
Peshi nkudi nganyi wa ku bamvua nabu dibanza kumvua munupane?
Monayi! Nuvua bapanyibue bua bilema bienu,+
Ne mamuenu uvua muipatshibue bua dishipa dienu dia mikenji.+
2 Kadi bua tshinyi muntu kavuaku pamvua mulue?
Bua tshinyi muntu kavua muandamune pamvua mubikile?+
Tshianza tshianyi ntshîpi bikole bua kukuula,
Peshi munda muanyi kamuena bukole bua kusungila nabu anyi?+
Mishipa yayi idi ibola bua dipangika dia mâyi,
Ne idi ifua bua nyota.
3 Ndi mvuadika diulu mifitu,+
Ne ndi mvuija tshilamba tshikayabale tshibuikidi tshiadi.”
4 Mukalenge Mutambe Bunene Yehowa mmumpeshe ludimi lua bantu balongesha,*+
Bua mmanye mua kuandamuna* muntu udi mutshioke ne dîyi diakane.*+
Yeye udi umbisha ku dinda ne ku dinda;
Yeye udi ubisha ditshi dianyi bua kuteleja bu bantu balongesha.+
5 Mukalenge Mutambe Bunene Yehowa mmukangule ditshi dianyi,
Tshivua mutomboke to.+
Tshivua mulonde njila mukuabu to.+
6 Ngakafila nyima wanyi kudi bavua bankuma
Ne matama anyi kudi bavua baashiye matupu.*
Tshivua musokoke mpala wanyi ku dipuekeshibua dia milongo ne ku mate nansha.+
7 Kadi Mukalenge Mutambe Bunene Yehowa neangambuluishe.+
Ke bualu kayi tshiakudiumvua mupuekeshibue milongo to.
Ke bualu kayi ndi muteke mpala wanyi bu dibue dikole,+
Ne ndi mumanye ne: tshiakufuishibua bundu to.
8 Yeye udi umbala ne: ndi muakane, udi pabuipi.
Tuimane diatshimue.*
Nnganyi udi nanyi tshilumbu?
Asemene pabuipi nanyi.
9 Monayi! Mukalenge Mutambe Bunene Yehowa neangambuluishe.
Nnganyi wampisha?
Monayi! Buonso buabu nebatekete bu tshilamba.
Ne tshishi tshia mbumbu netshibadie.
10 Nnganyi wa munkatshi muenu udi utshina Yehowa,
Udi uteleja dîyi dia muena mudimu wende?+
Nnganyi udi muendele mu mîdima mikole, kayi ne butoke nansha bukese?
Yeye eyemene dîna dia Yehowa ne akebe dikuatshisha kudi* Nzambi wende.
11 “Monayi! Nuenu bonso badi batemesha kapia,
Batudisha tupia muulu,
Endelayi mu butoke bua kapia kenu,
Munkatshi mua tupia tudi tutudike tunudi batemeshe.
Monayi tshinuapeta ku tshianza tshianyi:
Nenulale panshi mu dikengakana dia dikema.