Yeshaya

20 Mu tshidimu tshivua Sâgona mukalenge wa Ashû mutume Tâtana* ku Ashedodo,+ wakaluangana ne Ashedodo, kumukuataye.+ 2 Tshikondo atshi Yehowa wakakula ku butuangaji bua Yeshaya+ muana wa Amoza, wamba ne: “Ndaku, umbushe tshilamba tshikayabale mu tshimono tshiebe, ne ukopole sandala ku makasa ebe.” Yeye kuenza nanku, wenda wendakana butaka,* ku makasa kutupu.

3 Pashishe Yehowa kuamba ne: “Anu mudi Yeshaya muena mudimu wanyi muendakane butaka, ku makasa kutupu bidimu bisatu bu tshimanyinu+ ne didimuija dia bualu buenzekela Ejipitu+ ne Etshiopi,+ 4 nunku mukalenge wa Ashû neaye ne bakuatshibue ba mu Ejipitu+ ne bantu badibu bumbusha ba mu Etshiopi, bansongalume ne bakulumpe butaka, ku makasa kutupu, ku mataku kutupu, butaka* bua Ejipitu. 5 Nebakuatshike buôwa ne nebumvue bundu bua bualu bua Etshiopi ditekemena diabu ne bua Ejipitu lutambishi luabu.* 6 Bantu badi basombele ku muelelu kua mbuu eku nebambe mu dituku adi ne: ‘Monayi tshidi tshifikile ditekemena dietu, kutuvua tunyemena bua kupeta diambuluisha ne bua kupanduka mukalenge wa Ashû! Mmunyi mutuapanduka mpindieu?’”