Yeshaya
17 Dîyi diamba bua bualu bua Damaseke didi ne:+
“Mona! Damaseke kakuikala kabidi tshimenga to,
Nealue mushiki wa bintu bibumbula.+
2 Bimenga bia Aloê+ nebabilekelele;
Nebilue miaba ya kuladila ya bisumbu bia nyama
Kakuyi muntu wa kubitshinyisha.
3 Bimenga bikolesha nebijimine mu Efelayima,+
Ne bukalenge mu Damaseke;+
Ne bantu badi bashala ba mu Sulia
Nebikale bu butumbi bua bena Isalele,”* ke mudi Yehowa wa biluilu wamba.
4 “Mu dituku adi butumbi bua Yakoba nebukepele,
Ne mubidi wende wa bukole newunyane.*
5 Nebikale anu bu padi munowi usangisha ntete idi mimane
Ne diboko diende dinowa miepu ya ntete,
Bu padi muntu upumbulula ntete mu Tshibandabanda* tshia bena Lefa.+
6 Anu bintu bia kupumbulula ke biashiyabu,
Bu padibu banyukula mutshi wa olive:
Anu tumuma tua olive tubobe tubidi anyi tusatu ke tudi tushala ku ditamba didi muulu mule,
Anu tunayi anyi tutanu ku matamba adi akuama tumuma,”+ ke mudi Yehowa Nzambi wa Isalele wamba.
7 Mu dituku adi muntu neatangile kudi Mufuki wende, ne mêsu ende neatangile kudi Wa Tshijila wa Isalele. 8 Yeye kakutangila ku bioshelu,+ mudimu wa bianza biende to;+ ne kakutangila ku bintu bivua minu yende mienze: nansha makunji a tshijila* anyi bioshelu bia musenga wa manananshi to.
9 Mu dituku adi bimenga biende bikolesha nebilue bu muaba mulekelela muitu,+
Bu ditamba dia mutshi divua dilekelela kumpala kua bena Isalele;
Newulue buloba buatuke.
10 Bualu udi mupue Nzambi wa lupandu luebe muoyo;+
Udi mupangile bua kuvuluka Dibue+ dia muaba webe mukolesha.
11 Mu munya udi wenzela budimi buebe lupangu bimpe,
Mu dinda udi utoluesha mamiinu ebe,
Kadi bintu binowa nebijimine mu dituku dia disama ne dia bintu bidi bisama bidi kabiyi bijika.+
12 Telejayi! Kudi tshimvundu tshia bantu ba bungi,
Badi basaba bu mbuu!
Kudi diyoyo dia bisamba,
Bidi mutoyi wabi muikale bu mukungulu wa mâyi a bukole!
13 Bisamba nebienze mutoyi bu wa mukungulu wa mâyi a bungi.
Neabikanyine, ne nebinyeme kule,
Bipatshibue bu bisote bia ku mikuna kumpala kua lupepele,
Bu tshisonsa tshia mêba tshinyunguluka kumpala kua tshipepele tshikole.
14 Dilolo kudi buôwa bukole.
Kumpala kua kutshiabu mu dinda kabienaku kabidi to.
Etshi ke tshiapeta badi batupawula
Ne ke difutu dia badi batunyenga bintu.