Yehezekele
30 Dîyi dia Yehowa diakalua kabidi kundi diamba ne: 2 “Muana wa muntu, akula mêyi a buprofete ne amba ne: ‘Mona tshidi Mukalenge Mutambe Bunene Yehowa wamba:
“Elayi kabobo ka muadi ne: ‘Kaah, dituku didi dilua!’
3 Bualu dituku didi pabuipi, eyowa, dituku dia Yehowa didi pabuipi.+
Nedikale dituku dia matutu,+ tshikondo tshisungula tshia bisamba.+
4 Muele wa mvita newuluile Ejipitu, buôwa nebukuate Etshiopi pakuluka bantu bashipa mu Ejipitu;
Biuma biende mbiangata, ne bishimikidi biende mbiupula.+
5 Etshiopi,+ Puta,+ Luda ne bukua bantu buonso busambakane,*
Ne Kuba pamue ne bana ba mu buloba bua tshipungidi,*
Nebakuluke ku muele wa mvita.”’
6 Mona tshidi Yehowa wamba:
‘Bakuatshishi ba Ejipitu nebakuluke pabu,
Ne bukole buende bua diambu nebupuekeshibue.’+
“‘Nebakuluke ku muele wa mvita mu buloba kumbukila ku Migedola+ too ne ku Siyene,’+ ke mudi Mukalenge Mutambe Bunene Yehowa wamba. 7 ‘Nebavuijibue buloba bua munda mutupu menemene ku maloba onso, ne bimenga biende nebilue bimenga bibutula menemene ku bimenga bionso.+ 8 Nunku nebafike ku dimanya ne: meme ndi Yehowa pandi ntemesha kapia mu Ejipitu ne padi bamukuatshishi bende bonso bazajibua. 9 Mu dituku adi, nentume batuadi ba mukenji mu mazuwa bua kuzakeja Etshiopi udi mudieyemene; buôwa nebubakuate mu dituku didi diluila Ejipitu, bualu diodi nedilue bushuwa.’
10 “Mona tshidi Mukalenge Mutambe Bunene Yehowa wamba: ‘Nentuishe misumba ya bantu ya Ejipitu ku ndekelu ku tshianza tshia Nebukadenesâ* mukalenge wa Babilona.+ 11 Yeye ne bisumbu biende bia basalayi, tshisamba tshidi katshiyi ne luse tshia ku bisamba bikuabu,+ nebalue nabu bua kubutula buloba. Nebatudile Ejipitu miele yabu ya mvita ne nebuwuje buloba ne bantu bashipa.+ 12 Nemvuije minkoloji ya musulu wa Nile+ buloba bume, ne nempanyishe ditunga edi ku tshianza tshia bantu babi. Nemvuije ditunga edi ne bionso bidimu muaba mutupu ku tshianza tshia bantu ba ku babende.+ Meme Yehowa ke udi muakule.’
13 “Mona tshidi Mukalenge Mutambe Bunene Yehowa wamba: ‘Nembutule kabidi mpingu ya muendi* ne nentuishe nzambi ya patupu ya Nofa*+ ku ndekelu. Kakuakuikala kabidi mukokeshi* wa mu buloba bua Ejipitu, ne nenteke buôwa mu buloba bua Ejipitu.+ 14 Nenshiye Patelosa+ munda mutupu ne nentemeshe kapia mu Soana ne nenkumbaje dilumbuluisha pa No.*+ 15 Nempongoluele Sina, muaba wa kusokomena wa Ejipitu, tshiji tshianyi tshikole, ne bantu ba mu No nembabutule. 16 Nentemeshe kapia mu Ejipitu; Sina neakuatshike buôwa bukole, nebatubule No, ne Nofa* neatuilangane ne buluishi munda munya! 17 Bansongalume ba mu Ono* ne ba mu Pi-besete nebakuluke ku muele wa mvita, ne bimenga ebi nebikuatshibue. 18 Dituku nedilue mîdima mu Tapanehese pandi ntshibulamu mitshi ya tshikokedi ya Ejipitu.+ Bukole buende bua diambu nebutue ku ndekelu,+ matutu neamubuikile, ne bimenga biende nebikuatshibue.+ 19 Nenkumbaje dilumbuluisha pa Ejipitu, nunku nebafike ku dimanya ne: meme ndi Yehowa.’”
20 Mu tshidimu tshia 11, mu ngondo wa kumpala, mu dituku dia muanda mutekete dia ngondo, dîyi dia Yehowa diakalua kundi diamba ne: 21 “Muana wa muntu, ndi mutshibule diboko dia Palô mukalenge wa Ejipitu, kabakudisuika bua kudiondopa anyi kudijingila tshilamba bua kudivuija dikole dikumbane bua kuambula muele wa mvita to.”
22 “Nunku mona tshidi Mukalenge Mutambe Bunene Yehowa wamba: ‘Mona, ndi tshilumbu ne Palô mukalenge wa Ejipitu,+ ne nentshibule maboko ende, edi didi ne bukole ne edi didi ditshibuke,+ ne nengenze bua muele wa mvita udi mu tshianza tshiende umate.+ 23 Pashishe nentangalaje bena Ejipitu munkatshi mua bisamba, ne nembamuangalaje munkatshi mua matunga.+ 24 Nenkoleshe maboko a* mukalenge wa Babilona+ ne nenteke muele wanyi wa mvita mu tshianza tshiende,+ ne nentshibule maboko a Palô, yeye neatue mikemu ne dîyi dikole bu muntu upunga ne lufu kumpala kuende.* 25 Nenkoleshe maboko a mukalenge wa Babilona, kadi maboko a Palô nealembelele; nunku bobu nebafike ku dimanya ne: meme ndi Yehowa pandi nteka muele wanyi wa mvita mu tshianza tshia mukalenge wa Babilona, ne yeye udi uwutudila buloba bua Ejipitu.+ 26 Nentangalaje bena Ejipitu munkatshi mua bisamba, ne nembamuangalaje munkatshi mua matunga,+ nunku nebafike ku dimanya ne: meme ndi Yehowa.’”