LUTA

1 Mpindieu mu matuku avua balumbuluishi+ balumbuluisha, tshiyole tshia nzala tshiakabuela mu buloba; muntu kampanda wakumbuka mu Beteleheme+ mu Yuda bua kuya kusombela mu mpata* ya Moaba+ bu muntu wa ku babende, wakaya pamue ne mukajende ne bana bende ba balume babidi. 2 Dîna dia muntu au divua Elimeleke,* dîna dia mukajende divua Naomi,* ne mêna a bana bende babidi avua Malona* ne Kiliona.* Bavua bena Efelata ba mu Beteleheme mu Yuda. Bakafika mu mpata ya Moaba, bobu kusombelamu.

3 Panyima pa matuku, Elimeleke bayende wa Naomi wakafua, kumushiyaye ne bana bende ba balume babidi. 4 Pashishe bana ba balume abu bakasela bakaji bena Moaba; umue diende uvua Ôpa, ne mukuabu Luta.+ Bakashala kuntu aku bidimu bitue ku dikumi. 5 Pashishe bana ba balume abu, Malona ne Kiliona, bakafua pabu, ne mamu au kushala kayi bana bende babidi, kayi mulume. 6 Nunku wakumbuka mu mpata ya Moaba, kumataye mu njila ne bakaji ba bana bende bua kupingana, bualu uvua mumvue lumu mu Moaba ne: Yehowa uvua muvuluke tshisamba tshiende, mubapeshe biakudia.*

7 Wakumbuka muaba uvuaye usombela ne bakaji ba bana bende bonso babidi. Pavuabu mu njila bapingana mu buloba bua Yuda, 8 Naomi wakambila bakaji ba bana bende bonso babidi ne: “Ndayi, pinganayi muntu yonso ku nzubu kua mamuende. Yehowa anuleje koku dinanga dia lulamatu,+ anu bu munuvua badileje balume badi bafue ne meme kabidi. 9 Yehowa enze* koku bua yonso wa kunudi asombe mu ditalala* mu nzubu mua bayende.”+ Pashishe wakabatua mishiku, bobu kudila ne dîyi dikole. 10 Bakatungunuka ne kumuambila ne: “Tòo, tuetu netuye nebe mu tshisamba tshienu.” 11 Kadi Naomi wakamba ne: “Pinganayi, bana banyi ba bakaji. Bua tshinyi nudi ne bua kuya nanyi? Ndi mua kulela kabidi bana ba balume badi mua kulua babayenu anyi?+ 12 Pinganayi, bana banyi ba bakaji. Ndayi, bualu nkadi mukulakaje bikole bua kunselabu. Nansha bu meme mua kutekemena bua kupeta mulume butuku ebu ne kulela kabidi bana ba balume, 13 nenutungunuke ne kubindila too ne pakolabu anyi? Nenubenge kusedibua kabidi bua bualu buabu anyi? Tòo, bana banyi ba bakaji, ndi ngumvua bibi menemene bua bualu buenu, bualu tshianza tshia Yehowa ntshinkudimukile.”+

14 Bakadila kabidi ne dîyi dikole, pashishe Ôpa wakatua mamuende muenu mishiku, yeye kuya. Kadi Luta yeye wakamulamata. 15 Nunku Naomi wakamba ne: “Tangila! Mukenebe udi mufuishe pende bayende mmupingane mu tshisamba tshiabu ne kudi nzambi yende. Pingana ne mukenebe.”

16 Kadi Luta wakamba ne: “Kungenzeji bua meme kukulekela, bua mpingane nkushiya to; bualu nenye muaba uwaya, ne nendale muaba uwalala. Tshisamba tshienu netshikale tshisamba tshietu, ne Nzambi webe neikale Nzambi wanyi.+ 17 Nemfuile muaba uwafuila, ne muaba au ke wanjiikilabu. Yehowa angenzele nunku ne apitshishe apu bikala tshintu tshikuabu pa kumbusha lufu ne bua kuntapulula nebe.”

18 Pakamona Naomi ne: Luta uvua musuminyine bua kuya nende, wakalekela kuteta bua kumuitabijija. 19 Nunku bubidi buabu bakatungunuka ne njila too ne pakafikabu ku Beteleheme.+ Diakamue pakafikabu ku Beteleheme, tshimenga tshijima tshiakajukila kuulu bua bualu buabu, ne bantu bakaji bavua bamba ne: “Eu n’Naomi anyi?” 20 Uvua wambila bantu bakaji abu ne: “Kanumbikidi ne: Naomi* to. Mbikilayi ne: Mala,* bualu Wa Bukole Buonso mmumvuijile nsombelu bululu menemene.+ 21 Mvua muwule tente pamvua muye, kadi Yehowa mmumpingaje bianza bitupu. Bua tshinyi nudi ne bua kumbikila Naomi, padi Yehowa munduishe, ne Wa Bukole Buonso munkebele dikenga?”+

22 Eu ke mushindu uvua Naomi mupingane, ufumina mu mpata ya Moaba,+ pamue ne Luta muena Moaba mukaji wa muanende. Bakafika ku Beteleheme ku ntuadijilu kua dinowa dia orje.+

2 Mpindieu Naomi uvua ne mulela wa ku luseke lua ba bayende uvua ne bubanji bua bungi menemene; dîna diende divua Boaza,+ ne uvua wa mu dîku dia ba Elimeleke.

2 Luta muena Moaba wakambila Naomi ne: “Anyisha nye koku mu madimi bua kupumbulula+ miepu ya ntete panyima pa muntu yonso wantangila ne dianyisha.” Ke Naomi kumuambila ne: “Ndaku, muananyi wa bakaji.” 3 Nunku wakaya, kutuadijaye kupumbulula mu budimi panyima pa banowi. Wakafika mu tshitupa tshia buloba tshia Boaza+ wa mu dîku dia ba Elimeleke+ ku mpukapuka. 4 Dîba adi Boaza wakafika, ufuma ku Beteleheme, kuambilaye banowi ne: “Yehowa ikale nenu.” Bobu kumuandamuna ne: “Yehowa akubeneshe.”

5 Ke Boaza kuebeja nsongalume uvua utangila banowi ne: “Nsongakaji eu ngua nganyi?” 6 Nsongalume uvua utangila banowi wakandamuna ne: “Nsongakaji eu mmuena Moaba+ uvua mulue ne Naomi pavuaye mualukile ufuma mu mpata ya Moaba.+ 7 Uvua mulombe ne: ‘Ndi mua kupumbulula+ koku mu miepu* ya ntete idi mikosa idi banowi bashiya panyima ne kuyisangisha anyi?’ Uvua anu kuulu katshia walua mu dinda too ne mpindieu udiye musombe bua kuikisha katupa mu mutanda.”

8 Nunku Boaza wakambila Luta ne: “Teleja, muananyi wa bakaji: kuyi mu budimi bukuabu bua kupumbulula to, ne kuyi muaba mukuabu to; shala pabuipi ne bansongakaji badi bangenzela mudimu.+ 9 Mêsu ebe ikale mu budimi budibu banowa, ne uye nabu. Ndi mutumine bansongalume dîyi bua kabakulengi* to. Wewe mumvue nyota, uye muaba udi milondo ya mâyi, unue mâyi adi bansongalume basune.”

10 Pakumvuaye nanku, wakatua mpala wende panshi, kumuinaminaye, kumuambilaye ne: “Mmunyi mundi mukulengelele, ne bua tshinyi udi muntuishile mêsu, panyi meme muikale muntu wa ku babende?”+ 11 Boaza wakamuandamuna ne: “Mbangambile bionso biudi muenzele mamuebe muenu katshia bayebe wafua, ne muudi mushiye tatuebe ne mamuebe ne buloba bua balela bebe bua kulua mu tshisamba tshiuvua kuyi mumanye kumpala.+ 12 Yehowa akufutaku bua biudi muenze,+ ne upetaku difutu dikumbane* dia kudi Yehowa Nzambi wa Isalele, uudi mulue kusokoma muinshi mua mapuapua ende.”+ 13 Ke yeye kuamba ne: “Nkulengelele koku mukalenge wanyi, bualu udi munsambe ne mukoleshe muena mudimu webe ku muoyo,* nansha mundi tshiyi umue wa ku bena mudimu bebe.”

14 Dîba dia kudia, Boaza wakamuambila ne: “Luaku udie koku diampa ne washile tshipese tshiebe tshia diampa mu mvinyo wa buanji.” Nunku wakasomba ku luseke lua banowi. Ke yeye kumupesha ntete mikanga, yeye kudia, kukuta, kushiyaye ne bikuabu. 15 Pakajukaye bua kupumbulula,+ Boaza wakatumina bansongalume bavua bamuenzela mudimu dîyi ne: “Mulekelayi apumbulule too ne mu miepu* ya ntete idi mikosa, kanumukengeshi to.+ 16 Nudi kabidi ne bua kumupuluila ndambu wa miepu ya ntete mu bisumbu binukadi basuike, kuyishiya panyima bua alue kuyipumbulula, ne kanuambi bualu bua kumukandika to.”

17 Nunku wakatungunuka ne kupumbulula mu budimi abu too ne ku dilolo.+ Pavuaye mushipule bivuaye mupumbulule, wakapeta orje bungi butue ku efa* mujima. 18 Pashishe wakangata ntete ayi, kuyaye mu tshimenga, ne mamuende muenu wakamona bivuaye mupumbulule. Luta wakapatula kabidi biakudia bivua bishale+ pavuaye mudie mukute, kubipeshaye mamuende muenu.

19 Pashishe mamuende muenu wakamuambila ne: “Lelu uvua mupumbulule kuepi? Uvua muenze mudimu kuepi? Muntu uvua mukutuishile mêsu abeneshibue.”+ Nunku wakambila mamuende muenu bua muena budimi muvuaye muenzele mudimu ne: “Dîna dia muena budimi mumvua muenzele mudimu lelu m’Boaza.” 20 Ke Naomi kuambila mukaji wa muanende ne: “Yehowa, udi kayi mupange kuleja dinanga diende dia lulamatu kudi badi ne muoyo ne badi bafue,+ amubeneshe.” Naomi wakamba kabidi ne: “Muntu au mmulela wetu.+ Yeye ngumue wa ku bantu badi mua kutukuula.”*+ 21 Pashishe Luta muena Moaba wakamba ne: “Yeye mmungambile kabidi ne: ‘Shala pabuipi ne bansonga badi bangenzela mudimu too ne padibu bajikija kunowa bintu bianyi bionso.’”+ 22 Naomi wakambila Luta mukaji wa muanende ne: “Muananyi wa bakaji, mbimpe bua uye ne bansongakaji badi bamuenzela mudimu pamutu pa bobu kukutatshisha mu budimi bukuabu.”

23 Nunku wakashala pabuipi ne bansongakaji bavua benzela Boaza mudimu, kupumbululaye too ne pakajika dinowa dia orje+ ne dinowa dia blé. Uvua anu musombele kua mamuende muenu.+

3 Mpindieu Naomi mamuende muenu wa Luta wakamuambila ne: “Muananyi wa bakaji, tshienaku ne bua kukukebela lubanza*+ bua malu ende bimpe buebe wewe anyi? 2 Boaza ki mmulela wetu anyi?+ Yeye ke muena bansongakaji bauvua nabu abu. Butuku ebu yeye udi upepula orje muaba wa tshishipuidi. 3 Nunku owa mâyi, udilabe mafuta a mupuya muimpe; pashishe uvuale bimpe* ne upueke muaba wa tshishipuidi. Enza bua muntu au kamanyi ne: udi muaba au too ne padiye ujikija kudia ne kunua. 4 Padiye ulala, utangile muaba udiye ulala; pashishe uye, ubulule tshilamba ku makasa kuende ne ulale. Yeye neakuambile tshiudi ne bua kuenza.”

5 Ke yeye kuandamuna ne: “Nengenze malu onso audi mungambile.” 6 Nunku wakapueka muaba wa tshishipuidi, yeye kuenza malu onso avua mamuende muenu mumuambile bua kuenza. 7 Dîba adi Boaza uvua udia, unua ne umvua bimpe mu muoyo wende. Pashishe wakaya kulala kumpenga kua mushiki wa ntete. Panyima pa bualu ebu, Luta wakalua bitekete bitekete, yeye kumubulula tshilamba ku makasa, kulalaye. 8 Mundankulu, muntu au wakabanga kuzakala, yeye kuinama lua kumpala, kumonaye muntu mukaji mulale ku makasa ende. 9 Wakebeja ne: “Wewe udi nganyi?” Yeye kuandamuna ne: “Ndi Luta, muena mudimu webe. Balula tshilamba tshiebe,* ubuikile muena mudimu webe, bualu udi muntu udi mua kunkuula.”+ 10 Ke yeye kuamba ne: “Muananyi wa bakaji, Yehowa akubeneshe. Udi muleje dinanga diebe dia lulamatu musangu wa ndekelu eu kupita musangu wa kumpala,+ paudi mubenge kulonda bansongalume, nansha bikale bapele anyi babanji. 11 Mpindieu, muananyi wa bakaji, kutshinyi to. Nenkuenzele malu onso audi muambe,+ bualu muntu yonso mu tshimenga* etshi mmumanye ne: udi mukaji wa bikadilu bimpe menemene. 12 Nansha mudibi bushuwa ne: ndi mua kukukuula,+ kadi kudi muntu mukuabu udi mua kukukuula udi mulela wenu wa pabuipi menemene kumpita meme.+ 13 Shala muaba eu butuku ebu, nunku mu dinda yeye mukukuule, mbimpe! Akukuule.+ Kadi yeye kayi musue kukukuula, bushuwa bu mudi Yehowa ne muoyo, dîba adi meme nkayanyi nenkukuule. Lala muaba eu too ne mu dinda.”

14 Nunku wakalala ku makasa ende too ne mu dinda, pashishe wakabika panshi kapayi panji kutoka bimpe bua muntu kumanyikaye kudi mukuabu. Ke Boaza kuamba ne: “Kabimanyiki ne: muntu mukaji uvua mulue muaba wa tshishipuidi eu to.” 15 Wakamba kabidi ne: “Luaku ne tshilamba tshiudi mudijingile, utshibalule.” Nunku wakatshibalula, yeye kuelamu bipiminu* bisambombo bia orje, kumuambikaye, pashishe Boaza wakaya mu tshimenga.

16 Luta wakaya kudi mamuende muenu, ke yeye kumuebeja ne: “Muananyi wa bakaji, malu mmende bishi?”* Yeye kumuambila malu onso avua muntu au mumuenzele. 17 Yeye kuamba kabidi ne: “Mmumpeshe bipiminu 6 bia orje ebi, ne mmungambile ne: ‘Kuyi kudi mamuebe muenu bianza bitupu to.’” 18 Ke yeye kuamba ne: “Muananyi wa bakaji, somba muaba eu too ne paudi umanya mudi tshilumbu etshi tshipita, bualu muntu au kakuikisha too ne padiye ujikija tshilumbu etshi lelu.”

4 Mpindieu Boaza wakabanda, kuyaye ku tshiibi tshia tshimenga,+ yeye kusombaku. Mona! Mukuudianganyi uvua Boaza muambe au+ wakapitshila muaba au. Ke Boaza kuamba ne: “Wewe Kampanda, luaku, sombela muaba eu.” Nunku wakaya, yeye kusomba. 2 Pashishe Boaza wakangata bakulu dikumi ba mu tshimenga,+ kuambaye ne: “Sombelayi muaba eu.” Nunku bakasomba.

3 Ke Boaza kuambila mukuudianganyi au ne:+ “Naomi udi mupingane ufumina mu mpata ya Moaba+ udi upana tshitupa tshia buloba tshia muanetu Elimeleke.+ 4 Nunku mvua muele meji ne: mvua ne bua kukumanyisha bualu ebu ne kukuambila ne: ‘Utshisumbe kumpala kua bantu badi basombele muaba eu ne bakulu ba mu tshisamba tshietu.+ Wewe musue kutshikuula, utshikuule. Kadi wewe kuyi musue kutshikuula, ungambile bua mmanye, bualu wewe ke udi ne bukenji bua kutshikuula, ne meme ndi mukulondele.’” Kuandamunaye ne: “Ndi musue kutshikuula.”+ 5 Pashishe Boaza wakamba ne: “Dituku diudi usumba budimi kudi Naomi, udi ne bua kubusumba kabidi kudi Luta muena Moaba, mukaji wa mufue, bua kupingaja dîna dia mufue mu bumpianyi buende.”+ 6 Ke mukuudianganyi au kuamba ne: “Tshiena nkumbana bua kubukuula to, bualu ndi mua kunyanga bumpianyi buanyi meme. Wewe bukuula ne bukenji buanyi bua kukuula nabu, bualu tshiena nkumbana bua kubukuula to.”

7 Mpindieu etshi ke tshivua tshilele mu bikondo bia kale mu Isalele bua bukenji bua kukuula ne bua kushintakaja bintu bua kujadika bualu bua mushindu wonso buvuabu benza: Muntu uvua ukopola sandala,+ umupesha mukuende, ne eu ke uvua mushindu wa kujadika diumvuangana bua* bualu kampanda mu Isalele. 8 Nunku pavua mukuudianganyi au muambile Boaza ne: “Busumba wewe,” wakakopola sandala wende. 9 Pashishe Boaza wakambila bakulu ne bantu bonso ne: “Lelu nudi bantemu+ ba mundi nsumba bintu bionso bia Elimeleke ne bintu bionso bia Kiliona ne Malona kudi Naomi. 10 Ndi ngangata kabidi Luta muena Moaba, mukaji wa Malona, bua ikale mukajanyi bua kupingaja dîna dia mufue mu bumpianyi buende,+ bua dîna dia mufue kadijiminyi munkatshi mua bana babu ne ku tshiibi tshia tshimenga tshia kuabu. Nudi bantemu ba bualu ebu lelu eu.”+

11 Ke bantu bonso bavua ku tshiibi tshia tshimenga ne bakulu kuambabu ne: “Tudi bantemu! Yehowa enze koku bua mukaji udi ubuela mu nzubu muebe ikale bu Lakele ne Lea bavua base bonso babidi nzubu wa Isalele.+ Utante mu Efelata+ ne wikale ne dîna dimpe* mu Beteleheme.+ 12 Ku diambuluisha dia bana bikala Yehowa ne bua kukupesha kupitshila kudi nsongakaji eu,+ nzubu webe alue koku bu nzubu wa Pelese+ uvua Tamâ mulelele Yuda.”

13 Nunku Boaza wakangata Luta bua ikale mukajende. Wakasangila nende, ne Yehowa wakenza bua imite difu, yeye kulela muana wa balume. 14 Pashishe bantu bakaji bakambila Naomi ne: “Yehowa udi kayi mukulekele kuyi muntu wa kukukuula atumbishibue lelu. Dîna diende dimanyishibue mu Isalele! 15 Yeye* mmusanguluje* muoyo* webe ne neakuambuluishe ku bukulakaja buebe, bualu mbamulele kudi mukaji wa muanebe udi mukunange+ ne udi mupite bana ba balume 7.” 16 Naomi wakangata muana, kumuambulaye mu tshiadi tshiende, yeye kutuadija kumulama.* 17 Nunku bantu bakaji bena mutumba bakinyika muana au dîna. Bakamba ne: “Mbalelele Naomi muana wa balume,” bobu kumuinyika ne: Obeda.+ Yeye ke tatuende wa Yishai,+ tatuende wa Davidi.

18 Edi ke dilondangana dia dîku dia* Pelese:+ Pelese wakalela Heselona;+ 19 Heselona wakalela Lama; Lama wakalela Aminadaba;+ 20 Aminadaba+ wakalela Nashona; Nashona wakalela Salamona; 21 Salamona wakalela Boaza; Boaza wakalela Obeda; 22 Obeda wakalela Yishai;+ ne Yishai wakalela Davidi.+