NEHEMIYA

1 Aa mmêyi a Nehemiya*+ muana wa Hakaleya: Mpindieu mu ngondo wa Kiseleu,* mu tshidimu tshia 20, mvua mu Shushana*+ nzubu mukolesha.* 2 Dîba adi Hanani,+ umue wa ku bana betu, wakafika ne bantu bakuabu bumbukila ku Yuda, ke meme kubebeja bua bashadile ba ku bena Yuda bavuabu bakuate baye nabu kadi bapingane,+ meme kubebeja kabidi bua Yelushalema. 3 Bakandamuna ne: “Bantu badi bashale kuntu aku mu provense* bavuabu bakuate baye nabu kadi bapingane badi mu nsombelu mubi mutambe ne mu bundu.+ Bimanu bia Yelushalema mbiupuke,+ ne biibi biende mbiosha ne kapia.”+

4 Diakamue pangakumvua mêyi au, ngakasomba panshi, meme kutuadija kudila, kubuela mu madilu matuku a bungi, ne meme kutungunuka ne kujila biakudia+ ne kusambila kumpala kua Nzambi wa mu diulu. 5 Meme kuamba ne: “Wewe Yehowa Nzambi wa mu diulu, Nzambi munene udi ukemesha, udi ulama tshipungidi tshiende ne uleja dinanga diende dia lulamatu kudi badi bamunange ne balama mêyi ende,+ 6 ditshi diebe ditelejaku ne mêsu ebe ikalaku matabale bua kuteleja disambila dia muena mudimu webe dindi nkusambila lelu, munya ne butuku,+ bua bena mudimu bebe bena Isalele, pandi eku ngenda ntonda mpekatu idi tshisamba tshia Isalele tshikuenzele. Tudi benze mpekatu, meme ne nzubu wa tatuanyi.+ 7 Bushuwa tudi bakuenzele malu mabi+ patudi katuyi balame mêyi, mikenji, ne mapangadika biuvua mupeshe Mose muena mudimu webe.+

8 “Vuluka koku dîyi diuvua muambile* muena mudimu webe Mose dia ne: ‘Nuenu bapange lulamatu, nennutangalaje munkatshi mua bukua bisamba.+ 9 Kadi nuenu bapingane kundi, balame mêyi anyi ne baatumikile, nansha bantu ba mu tshisamba tshienu badi batangalaja bikale ku ditengu dia diulu, nembasangishe+ kuntu aku ne nendue nabu muaba undi musungule bua dîna dianyi disombele.’+ 10 Bobu mbena mudimu bebe ne ntshisamba tshiebe tshiuvua mupikule ku bukole buebe bua bungi ne ku tshianza tshiebe tshia bukole.+ 11 Yehowa wanyi, ditshi diebe ditelejaku disambila dia muena mudimu webe ne disambila dia bena mudimu bebe badi basanka mu ditshina dia dîna diebe, ne enzaku bua malu a muena mudimu webe ende bimpe lelu, ne muntu eu angumvuilaku luse.”+

Dîba adi meme mvua mufidi wa maluvu wa mukalenge.+

2 Mu ngondo wa Nisana,* mu tshidimu tshia 20+ tshia mukalenge Atashasete,+ bakateka mvinyo kumpala kuende, ne anu bu pa tshibidilu meme kuangata mvinyo kumupesha mukalenge.+ Kadi tshivua muanji kumueneka mubungame ku mêsu kuende musangu nansha umue to. 2 Ke mukalenge kungambila ne: “Bua tshinyi udi umueneka mubungame nunku, pebe kuyi usama? Etshi katshiena mua kuikala dibungama dikuabu to, anu dia mu muoyo.” Pangakumvua nanku ngakumvua buôwa bua bungi.

3 Ke meme kuambila mukalenge ne: “Mukalenge ikale ne muoyo matuku a bungi! Mmunyi mundi tshiyi mua kubungama padi tshimenga, muaba udibu bajiike bankambua banyi, mushale munyanguke ne biibi biatshi bibutuke ne kapia?”+ 4 Nunku mukalenge wakangebeja ne: “Udi ukeba tshinyi?” Diakamue meme kusambila Nzambi wa mu diulu.+ 5 Pashishe meme kuambila mukalenge ne: “Biobi bisankishe mukalenge ne muena mudimu webe yeye mukulengelele, ntuma ku Yuda, mu tshimenga mudibu bajiikile bankambua banyi, bua mmone mua kutshibakulula.”+ 6 Nunku mukalenge, muikale ne mukajende* musombe ku luseke luende, wakangebeja ne: “Luendu luebe neluikale lua matuku bungi kayi? Neupingane dîba kayi?” Nunku biakasankisha mukalenge bua kuntuma,+ ne ngakamuambila dîba dimvua ne bua kupingana.+

7 Pashishe ngakambila mukalenge ne: “Biobi bisankishe mukalenge, bampeshe mikanda bua banguvena ba buloba bua Dia muamua dia Musulu*+ idi impesha mushindu wa meme kupita kakuyi bualu too ne pandi mfika mu Yuda, 8 kabidi ne mukanda wa kupesha Asafa mulami wa Lupangu lua mitshi lua Mukalenge,* bua ampeshe mabaya bua mikamba ya biibi bia Muaba mukolesha+ wa Nzubu* ne bua bimanu bia tshimenga+ ne bua nzubu ungikala.” Nunku mukalenge wakayimpesha,+ bualu tshianza tshimpe tshia Nzambi wanyi tshivua nanyi.+

9 Ndekelu wa bionso ngakafika kudi banguvena ba buloba bua Dia muamua dia Musulu, meme kubapesha mikanda ya mukalenge. Mukalenge uvua muntume kabidi ne bamfumu ba tshiluilu ne bendeshi ba tubalu. 10 Pavua Sanebalata+ muena Holona ne Tobiya+ muena mudimu muena Amona+ bumvue bualu abu, biakabatonda bikole bua muvua muntu mulue bua kuenzela tshisamba tshia Isalele bualu buimpe.

11 Ndekelu wa bionso ngakafika ku Yelushalema, meme kushalaku matuku asatu. 12 Ngakajuka butuku butuku, meme ne ndambu wa bantu bamvua nabu, ne tshivua muambile muntu nansha umue tshivua Nzambi wanyi muele mu muoyo wanyi bua kuenzela Yelushalema, ne tshivua ne nyama mukuabu pa kumbusha umvua mubande. 13 Ngakapatukila ku Tshiibi tshia mu Tshibandabanda+ butuku, meme kupitshila kumpala kua Mushimi wa mâyi wa Nyoka Munene,+ kuya ku Tshiibi tshia Mishiki ya Butu,* meme kukenketa bimanu bia Yelushalema bivua biupuke ne biibi biende bivua bibutuke ne kapia.+ 14 Ngakapita meme kuya ku Tshiibi tshia Mushimi wa mâyi+ ne ku Dijiba dia mâyi dia Mukalenge, ne kakuvua muaba mukumbane bua nyama umvua mubande kupitshila to. 15 Kadi ngakatungunuka too ne ku tshibandabanda*+ butuku abu, ne mvua anu ngenda nkenketa tshimanu, pashishe ngakalukila, meme kubuelela ku Tshiibi tshia mu Tshibandabanda, nunku meme kupingana.

16 Balombodi bindondi+ kabavua bamanye kumvua muye ne tshimvua ngenza to, bualu tshivua muanji kuambila bena Yuda, bakuidi, bantu banene, bakokeshi bindondi, ne bantu bakuabu bavua benza mudimu bualu nansha bumue. 17 Ndekelu wa bionso ngakabambila ne: “Nudi bamone nsombelu mubi menemene utudi nende, mudi Yelushalema munyanguke ne mudi biibi biende bioshike ne kapia. Luayi, tuibakulule bimanu bia Yelushalema, bua bundu ebu kabutungunuki to.” 18 Pashishe ngakabaleja muvua tshianza tshimpe tshia Nzambi wanyi tshikale nanyi,+ meme kubambila kabidi mêyi avua mukalenge mungambile.+ Ke bobu kuamba ne: “Tujukayi ne tuibake.” Nunku bakadikolesha* bua mudimu muimpe.+

19 Mpindieu pavua Sanebalata muena Holona, Tobiya+ muena mudimu muena Amona,+ ne Gesheme muena Arabe+ bumvue bualu abu, bakabanga kutuseka,+ batupetula bamba ne: “Tshinudi nuenza ntshinyi? Nudi nutombokela mukalenge anyi?”+ 20 Kadi ngakandamuna ne: “Nzambi wa mu diulu ke wenza bua malu etu ende bimpe,+ ne tuetu bena mudimu bende netujuke ne netuibake; kadi nuenu kanuena ne tshitupa anyi bukenji anyi tshivulukilu* mu Yelushalema to.”+

3 Muakuidi munene Eleyashiba+ ne bana babu bakuidi bakajuka bua kuibaka Tshiibi tshia Mikoko.+ Bakatshijidila*+ ne kuelabu biibi biatshi; bakatshijidila too ne ku Tshibumba tshia Mea,+ kuya too ne ku Tshibumba tshia Hananele.+ 2 Bantu ba mu Yeliko+ bavua bibaka ku luseke luabu; ne Zakû muana wa Imeli uvua wibaka pende ku luseke luabu.

3 Bana ba Hasena bakibaka Tshiibi tshia Mishipa;+ bakatshiela mikamba,+ pashishe bobu kuela biibi biatshi, bintu bia kutshikanga nabi, ne milonda yatshi. 4 Ku luseke luabu Melemota+ muana wa Uliya muana wa Hakosa wakenza mudimu wa kulongolola tshimanu, ne ku luseke luabu Meshulama+ muana wa Belekiya muana wa Meshezabela wakenza mudimu wa kulongolola tshimanu, ne ku luseke luabu Sadoka muana wa Bâna wakenza mudimu wa kulongolola tshimanu. 5 Ku luseke luabu bena Tekoa+ bakenza mudimu wa dilongolola tshimanu, kadi bantu babu bende lumu bakabenga bua kudipuekesha bua kuenza* mudimu wa bamfumu babu.

6 Yoyada muana wa Pasea ne Meshulama muana wa Besodaya bakalongolola Tshiibi tshia Tshimenga tshia Kale;+ bakatshiela mikamba, pashishe kuelabu biibi biatshi, bintu bia kutshikanga nabi, ne milonda yatshi. 7 Ku luseke luabu Melataya muena Gibeona+ ne Yadona muena Melonita bakenza mudimu wa kulongolola tshimanu, bantu ba ku Gibeona ne ku Misepa+ bavua ku bukokeshi bua* nguvena wa buloba bua Dia muamua dia Musulu.*+ 8 Ku luseke luabu Uziele muana wa Hâhaya, umue wa ku bansenda ba tshiamu tshia or, wakenza mudimu wa kulongolola tshimanu, ne ku luseke luende Hananiya, umue wa ku benji ba mafuta,* wakenza mudimu wa kulongolola tshimanu; ne bakalamika mabue manene panshi mu Yelushalema too ne ku Tshimanu Tshinene.+ 9 Ku luseke luabu Lefaya muana wa Hû, mukokeshi wa tshitupa tshia distrike dia Yelushalema, wakenza mudimu wa kulongolola tshimanu. 10 Ku luseke luabu Yedaya muana wa Halumafa wakenza mudimu wa kulongolola tshimanu kumpala kua nzubu wende, ne ku luseke luende Hatusha muana wa Hashabaneya wakenza mudimu wa kulongolola tshimanu.

11 Malakiya muana wa Halima+ ne Hashuba muana wa Pahata-moaba+ bakalongolola tshitupa tshikuabu,* kabidi ne Tshibumba tshia Mfulu.+ 12 Ku luseke luabu Shaluma muana wa Halohesha, mukokeshi wa tshitupa tshia distrike dia Yelushalema, wakenza mudimu wa kulongolola tshimanu pamue ne bana bende ba bakaji.

13 Hanuna ne bantu ba ku Zanoa+ bakalongolola Tshiibi tshia mu Tshibandabanda;+ bakatshibaka, pashishe kuelabu biibi biatshi, bintu bia kutshikanga nabi, ne milonda, ne bakalongolola tshimanu bule bua nkubita tshinunu* kuyabu too ne ku Tshiibi tshia Mishiki ya Butu.*+ 14 Malakiya muana wa Lekaba, mukokeshi wa distrike dia Bete-hakeleme,+ wakalongolola Tshiibi tshia Mishiki ya Butu; wakatshibaka, kuelaye biibi biatshi, bintu bia kutshikanga nabi, ne milonda yatshi.

15 Shaluna muana wa Kolehose, mukokeshi wa distrike dia Misepa,+ wakalongolola Tshiibi tshia Mushimi wa mâyi;+ wakatshibaka, kuibaka ne musaka watshi, kuelaye biibi biatshi, bintu bia kutshikanga nabi, ne milonda, ne wakalongolola kabidi tshimanu tshia ku Dijiba dia mâyi+ dia Munkoloji* didi pabuipi ne Lupangu lua mitshi ne bilongo lua Mukalenge,+ kuya too ne ku Tshibandilu+ tshidi tshipueka tshifumina ku Tshimenga tshia Davidi.+

16 Bavua bamulondela kudi Nehemiya muana wa Azabuka, mukokeshi wa tshitupa tshia distrike dia Bete-sû;+ yeye wakenza mudimu wa kulongolola tshimanu kumbukila kumpala kua Miaba ya Kujiikilangana ya Davidi+ too ne ku dijiba dia mâyi+ divuabu benze, kuya too ne ku Nzubu wa Bilobo.

17 Bavua bamulondela kudi bena Lewi bavua benze mudimu wa kulongolola tshimanu: Lehuma muana wa Bani; ku luseke luende Hashabeya, mukokeshi wa tshitupa tshia distrike dia Keila,+ wakenza mudimu wa kulongolola tshimanu bua distrike diende. 18 Bavua bamulondela kudi bana babu, ne bobu bakenza mudimu wa kulongolola tshimanu: Bawai muana wa Henedada, mukokeshi wa tshitupa tshia distrike dia Keila.

19 Bavua bamulondela kudi Ezê muana wa Yeshua,+ mukokeshi wa Misepa; yeye uvua ulongolola tshitupa tshikuabu kumpala kua njila udi mubande Muaba wa kulamina bia mvita ku Dikunji divua dikuata tshimanu.+

20 Bavua bamulondela kudi Baluka muana wa Zabai;+ yeye wakenza mudimu ne disuminyina ne wakalongolola tshitupa tshikuabu, kumbukila ku Dikunji divua dikuata tshimanu kuya too ne ku tshibuelelu tshia nzubu wa muakuidi munene Eleyashiba.+

21 Bavua bamulondela kudi Melemota+ muana wa Uliya muana wa Hakosa; yeye wakalongolola tshitupa tshikuabu, kumbukila ku tshibuelelu tshia nzubu wa Eleyashiba kuya too ne ku ndekelu kua nzubu wa Eleyashiba.

22 Bavua bamulondela kudi bakuidi, bantu ba mu tshitupa tshia buloba tshia Yadene,*+ ne bobu bakenza mudimu wa kulongolola tshimanu. 23 Bavua babalondela kudi Benyamina ne Hashuba; bobu bakenza mudimu wa kulongolola tshimanu kumpala kua nzubu wabu. Bavua babalondela kudi Azaya muana wa Maaseya muana wa Ananiya, ne yeye wakenza mudimu wa kulongolola tshimanu pabuipi ne nzubu wende. 24 Bavua bamulondela kudi Binui muana wa Henedada, ne yeye wakalongolola tshitupa tshikuabu, kumbukila ku nzubu wa Azaya too ne ku Dikunji divua dikuata tshimanu,+ kuya too ne mu ditumba.

25 Bavua bamulondela kudi Palala muana wa Uzai; yeye wakenza mudimu wa kulongolola tshimanu kumpala kua Dikunji divua dikuata tshimanu ne tshibumba tshidi tshipatukila ku Nzubu* wa Mukalenge,+ tshibumba tshia kuulu tshia ku Lubanza lua Balami.+ Bakamulondela kudi Pedaya muana wa Palosha.+

26 Bena mudimu ba ku ntempelo*+ bavua basombele mu Ofele+ bakalongolola tshimanu too ne kumpala kua Tshiibi tshia Mâyi+ ku est ne tshibumba tshivua tshipatukilaku.

27 Bavua babalondela kudi bena Tekoa,+ ne bobu bakalongolola tshitupa tshikuabu, kumbukila ku tshibumba tshinene tshivua tshipatuke too ne ku tshimanu tshia Ofele.

28 Bakuidi bakalongolola tshimanu kuulu kua Tshiibi tshia Tubalu,+ muakuidi yonso kumpala kua nzubu wende.

29 Bavua babalondela kudi Sadoka+ muana wa Imê; yeye wakalongolola tshimanu kumpala kua nzubu wende.

Bavua bamulondela kudi Shemaya muana wa Shekaniya, mulami wa ku Tshiibi tshia ku Est;+ yeye wakalongolola tshimanu.

30 Bavua bamulondela kudi Hananiya muana wa Shelemeya ne Hanuna muana muisambombo wa Salafa; bobu bakalongolola tshitupa tshikuabu.

Bavua bamulondela kudi Meshulama+ muana wa Belekiya; yeye wakalongolola tshimanu kumpala kua nzubu wende.

31 Bavua bamulondela kudi Malakiya, umue wa ku bantu ba mu kasumbu ka bansenda ba tshiamu tshia or; yeye wakalongolola tshimanu too ne ku nzubu wa bena mudimu ba ku ntempelo*+ ne bangenda mushinga, kumpala kua Tshiibi tshia Dikonkonona,* kuya too ne ku nzubu wa kuulu wa mu ditumba.

32 Bansenda ba tshiamu tshia or ne bangenda mushinga bakalongolola tshimanu tshia pankatshi pa nzubu wa kuulu wa mu ditumba ne Tshiibi tshia Mikoko.+

4 Mpindieu diakamue pakumvua Sanebalata+ ne: tuvua tuibakulula tshimanu, wakafiika munda ne biakamutonda bikole,* ne wakatungunuka ne kuseka bena Yuda. 2 Wakamba mu mêsu a bana babu ne a tshiluilu tshia Samalea ne: “Ntshinyi tshidi bena Yuda badi kabayi ne bukole aba benza? Nebadienzele bualu ebu bobu nkayabu anyi? Nebafile milambu anyi? Nebajikije mu dituku dimue anyi? Nebajululule mabue adi muoshike mu mishiki ya mabuwa a lupuishi eyi anyi?”+

3 Mpindieu Tobiya+ muena Amona+ uvua muimane ku luseke luende wakamba ne: “Nansha mukenge wowu mubande pa bidibu bibaka ebi, newupule tshimanu tshiabu tshia mabue etshi.”

4 Wewe Nzambi wetu, telejaku, bualu badi batupetula,+ ne enzaku bua bipendu biabu bibapinganyine pa mitu yabu,+ ne ubafile bu tshintu tshia kupawula mu buloba budibu babakuata baya nabu. 5 Kubuikidi dipila diabu anyi kulekedi mpekatu wabu ukupudibua kumpala kuebe,+ bualu mbapende bibaki.

6 Nunku tuakatungunuka ne kuibaka tshimanu, ne tuakatuangaja tshimanu tshionso, tuetu kutshibakulula nkatshinkatshi wa bule buatshi, ne bantu bakatungunuka ne kudifila ku mudimu ne muoyo wabu mujima.

7 Mpindieu diakamue pavua Sanebalata, Tobiya,+ bena Arabe,+ bena Amona, ne bena Ashedodo+ bumvue ne: mudimu wa diakajilula bimanu bia Yelushalema uvua uya kumpala ne kabidi ne: bavua benda bakanga ntanta ivua pankatshi pa bimanu, bakafiika munda bikole. 8 Bakela tshifufu pamue bua kulua kuluisha Yelushalema ne bua kukebeshamu tshimvundu. 9 Kadi tuakasambila Nzambi, tuetu kuteka balami munya ne butuku bua kudikuba kudibu.

10 Kadi bantu ba mu Yuda bavua bamba ne: “Bukole bua bantu badi benza mudimu* mbukepele, ne kudi mabuwa mapite bungi; katuakukumbana bua kuibaka tshimanu to.”

11 Bena lukuna bavua anu bamba ne: “Kumpala kua bobu kumanya bualu anyi kutumona, netubapatukile munkatshi muabu, netubashipe ne netuimanyike mudimu wabu.”

12 Dîba dionso divua bena Yuda bavua basombela pabuipi nabu balua, bavua batuambila ku musangu ne ku musangu* ne: “Nebatupatukile nseke yonso.”

13 Nunku ngakateka bantu bitupa bia kuinshi bia muaba uvua panyima pa tshimanu, miaba ivuabu mua kubuelela bipepele, ne ngakabateka ku dîku ku dîku bikale ne miele yabu ya mvita, mafuma abu, ne mata abu a mikete. 14 Pamvua mumone buôwa buvuabu nabu, ngakajuka diakamue, meme kuambila bantu banene,+ bakokeshi bindondi ne bantu bakuabu bonso ne: “Kanubatshinyi to.+ Vulukayi Yehowa udi Nzambi munene udi ukemesha;+ ne luanganayi bua bana benu, bua bana benu balela ba balume ne ba bakaji, bua bakaji benu ne bua nzubu yenu.”

15 Mpindieu pakumvua bena lukuna betu ne: tuvua bamanye tshivuabu benza ne kabidi ne: Nzambi mulelela uvua munyangakaje malu avuabu balongolole, tuetu bonso tuakapingana bua kuibaka tshimanu. 16 Kumbukila anu ku dituku adi, tshitupa tshia bantu banyi tshivua tshienza mudimu,+ ne tshitupa tshiabu tshikuabu tshivua tshikuata mafuma, ngabu, mata a mikete, ne tuzaku tua mvita tua tuamu. Bakokeshi+ bavua bimane panyima pa nzubu mujima wa Yuda 17 uvua wibaka tshimanu. Bantu bavua bambula majitu bavua benza mudimu ne tshianza tshimue eku bakuate tshia mvita* mu tshianza tshikuabu. 18 Muibaki yonso uvua ne muele wa mvita musuikila mu tshimono pavuaye wenda wibaka, ne muntu uvua ne bua kuela mpungi+ uvua muimane ku luseke luanyi.

19 Pashishe ngakambila bantu banene, bakokeshi bindondi ne bantu bakuabu bonso ne: “Mudimu mmunene ne ngua bungi be, ne tudi batangalake pa tshimanu bikale muntu kule ne mukuabu. 20 Nuenu bumvue muadi wa mpungi, nudisangishe muaba utudi. Nzambi wetu neatuluile mvita.”+

21 Nunku tuakatungunuka ne kuenza mudimu pavua eku tshitupa tshikuabu tshikuata mafuma, kumbukila patshiatshia too ne pavua mitoto ipatuka. 22 Tshikondo atshi ngakambila bantu ne: “Bantu balume bonso, yonso muikale ne muambuluishi wende, balale munda mua Yelushalema, ne nebatulame butuku ne nebenze mudimu mu munya.” 23 Nunku ni mmeme, ni mbana betu ba balume, ni mbambuluishi banyi,+ ni mbalami bavua bandonde, katuvua bakopole bilamba bietu musangu nansha umue to, ne yonso wa kutudi uvua anu ne tshia mvita tshiende mu tshianza tshia balume.

5 Kadi kuvua didilakana dikole dia bantu ne bakaji babu bua bana babu bena Yuda.+ 2 Bamue bavua bamba ne: “Tudi ba bungi tuetu ne bana betu ba balume ne bana betu ba bakaji. Tudi ne bua kupeta ntete bua tuetu kudia ne kushala ne muoyo.” 3 Bakuabu bavua bamba ne: “Tudi tueyeka madimi etu ne madimi etu a tumuma tua mvinyo ne nzubu yetu bua kupeta ntete tshikondo tshia nzala.” 4 Banga pabu bavua bamba ne: “Tudi basombe makuta beyeke madimi etu ne madimi etu a tumuma tua mvinyo bua kufila mulambu wa mukalenge.+ 5 Mpindieu tudi mubidi umue ne mashi amue ne bana betu,* ne bana betu balela badi anu bu bana babu balela; tshidibi tuetu tudi ne bua kufila betu bana ba balume ne ba bakaji ku bupika, ne bana betu ba bakaji bakuabu bakadi mu bupika.+ Kadi katuena ne mushindu wa kuimanyika bualu ebu to, bualu madimi etu ne madimi etu a tumuma tua mvinyo mbia bantu bakuabu.”

6 Ngakafiika munda bikole pamvua mumvue didilakana diabu ne mêyi aa. 7 Nunku ngakelangana meji mu muoyo wanyi bua malu aa, ne ngakabenga tshivua bantu banene ne bakokeshi bindondi benze, meme kubambila ne: “Yonso wa kunudi udi ulomba muanabu tshia kasombela.”*+

Pashishe, ngakalongolola bua kuikale disangisha dinene bua bualu buabu. 8 Ngakabambila ne: “Tudi benze tshionso tshituvua mua kuenza bua kupikula bana betu bena Yuda bavuabu bapanyishe mu bisamba bikuabu; kadi mpindieu nenusumbishe bana benu,+ ne badi ne bua kutupanyishabu kabidi anyi?” Pakumvuabu nanku bakashala bapuwe, kabayi bapeta tshia kuamba. 9 Pashishe ngakamba ne: “Tshinudi nuenza ki ntshimpe to. Kanuena ne bua kuenda mu ditshina dia Nzambi wetu+ bua bisamba bikuabu, bena lukuna betu, kabitupendi anyi? 10 Bualu bukuabu, meme, bana betu, ne bambuluishi banyi tudi tubasombesha makuta ne ntete. Tulekelayi koku disombeshangana ne tshia kasombela edi.+ 11 Bapingajilayiku anu lelu eu madimi abu,+ madimi abu a tumuma tua mvinyo, madimi abu a mitshi ya olive, ne nzubu yabu, pamue ne tshia pa lukama* tshia makuta, tshia ntete, tshia mvinyo mupiamupia, ne tshia mafuta binudi nuenzeja bua banupeshe bu tshia kasombela.”

12 Ke bobu kuamba ne: “Netubapingajile bintu ebi ne katuakubalomba tshintu to. Netuenze anu muudi muambe amu.” Nunku ngakabikila bakuidi, meme kutshipishisha bantu abu bua bakumbaje tshivuabu balaye. 13 Ngakatutula kabidi tshilamba tshianyi,* meme kuamba ne: “Nzambi mulelela atutulaku muntu yonso udi kayi ukumbaja dilaya edi, amututule mu nzubu wende ne mu maloba ende mushindu eu, atutudibue ne ashale munda mutupu mushindu eu.” Ke tshisumbu tshijima kuambatshi ne: “Amen!”* Pashishe bakatumbisha Yehowa, ne bantu bakenza anu muvuabu balaye.

14 Bualu bukuabu, katshia ku dituku divuaye munteke bua kuikala nguvena wabu+ mu buloba bua Yuda, katshia ku tshidimu tshia 20+ tshia mukalenge Atashasete+ too ne ku tshidimu tshiende tshia 32,+ mmumue ne: bidimu 12, ni mmeme ni mbana betu katuvua badie biakudia bitubu bapesha banguvena to.+ 15 Kadi banguvena ba kale bavua kumpala kuanyi bavua batekele bantu bujitu ne bavua bangata nshekele* 40 ya arjan bua biakudia ne mvinyo kudibu dituku dionso. Bambuluishi babu bavua pabu bakengeshe bantu. Kadi meme tshivua muenze nanku+ bua ditshina dia Nzambi.+

16 Bualu bukuabu kabidi, mvua muele tshianza mu mudimu wa tshimanu etshi, ne katuvua bapete budimi nansha bumue to;+ bambuluishi banyi bonso bavua badisangishe muaba au bua kuenza mudimu. 17 Kuvua bena Yuda ne bakokeshi bindondi, bantu 150, bavua badia ku mêsa anyi, kusangisha ne bantu bonso bavua balua kutudi bafumina mu bisamba bikuabu. 18 Dituku dionso bavua bandambila* ngombe umue, mikoko isambombo mimpe menemene, ne nyunyi, ne musangu umue mu matuku dikumi tuvua ne mvinyo ya mishindu yonso ya bungi menemene. Nansha nanku tshivua mulombe biakudia bitubu bapesha banguvena, bualu bantu bakavua bambule bujitu bua mudimu uvuabu bakuata. 19 Nzambi wanyi, umvuluke koku mu mushindu muimpe* bua malu onso andi muenzele tshisamba etshi.+

6 Mpindieu diakamue pavuabu bambile Sanebalata, Tobiya,+ Gesheme muena Arabe,+ ne bena lukuna betu bakuabu bonso ne: mvua muibakulule tshimanu+ ne kabidi ne: kakutshivua ntanta mishale mu tshimanu (nansha mumvua tshiyi muanji kuela biibi mu biibi binene dîba adi),+ 2 Sanebalata ne Gesheme bakantumina diakamue mukenji eu ne: “Luaku, tukose dîba dia tuetu kutuilangana mu misoko ya mu Tshibandabanda tshia Onoho.”+ Pabi bavua balukakaja mayele bua kungenzela bibi. 3 Nunku ngakabatumina bantu ne mukenji ngamba ne: “Ndi munkatshi mua dienza mudimu munene, ne tshiena ne mushindu wa kupueka to. Ndekele mudimu wimane bua kulua kunudi anyi?” 4 Bakantumina mukenji wa muomumue au misangu inayi, ne ngakabapesha diandamuna dia muomumue misangu yonso ayi.

5 Pashishe Sanebalata wakantumina muambuluishi wende ne mukenji wa muomumue musangu muitanu, muikale ne mukanda mubulula mu tshianza tshiende. 6 Bavua bafundamu ne: “Badi bamba munkatshi mua bisamba, ne Gesheme+ pende udi wamba bualu bua muomumue abu, ne: wewe ne bena Yuda nudi nuela meji a kutomboka.+ Ke bualu kayi nudi nuibaka tshimanu; ne bilondeshile ngumu eyi wewe ke walua mukalenge wabu. 7 Udi muteke kabidi baprofete bua kumanyisha bualu buebe mu Yelushalema mujima ne: ‘Kudi mukalenge mu Yuda!’ Mpindieu nebambile mukalenge malu aa. Nanku luaku, tuyukile bualu ebu pamue.”

8 Kadi ngakamutumina diandamuna edi: “Bualu nansha bumue bua ku malu audi wamba au ki mbuenzeke to; udi udifuanyikijilawu mu lungenyi luebe wewe.”* 9 Bualu bobu bonso bavua bakeba kutukuatshisha buôwa bamba ne: “Maboko abu neatekete mu mudimu, ne mudimu kawakuenzeka to.”+ Meme kusambila ne: mpindieu nkolesha mu maboko.+

10 Pashishe meme kuya ku nzubu kua Shemaya muana wa Delaya muana wa Mahetabela pavuaye mudikangilamu. Wakangambila ne: “Tumvuangane dîba dia tuetu kupetangana ku nzubu wa Nzambi mulelela, munda mua ntempelo, ne tukange biibi bia ntempelo, bualu badi balua bua kukushipa. Badi balua bua kukushipa butuku.” 11 Kadi ngakamba ne: “Muntu bu meme udi mua kunyema anyi? Muntu bu meme udi mua kubuela mu ntempelo ne kushala ne muoyo anyi?+ Tshiakubuelamu to!” 12 Pashishe ngakajingulula ne: Nzambi kavua mumutume to, kadi ne: Tobiya ne Sanebalata+ ke bavua bafute muprofete eu bua kungambila bualu ebu. 13 Bavua bamufute bua kuntshinyisha ne bua kunsaka bua kuenza mpekatu, bua bamone mua kunyanga lumu luanyi bua bobu kuakula bibi bua bualu buanyi.

14 Wewe Nzambi wanyi vuluka koku Tobiya+ ne Sanebalata ne bienzedi ebi, kabidi ne muprofete mukaji Noadaya ne baprofete bakuabu bonso bavua bateta bua kuntshinyisha misangu yonso.

15 Nunku tshimanu tshiakajika mu dituku dia 25 dia ngondo wa Elula,* mu matuku 52.

16 Diakamue pavua bena lukuna betu bumvue bualu abu ne bisamba bionso bivua bitunyunguluke bibumone, bakumvua bundu bua bungi,*+ ne bakajingulula ne: mudimu eu uvua muenzeke ku diambuluisha dia Nzambi wetu. 17 Mu matuku au bantu banene+ ba mu Yuda bavua batumina Tobiya mikanda ya bungi, ne Tobiya pende uvua ubandamuna. 18 Bantu ba bungi mu Yuda bavua baditshipe kudiye bua kumulamata bualu uvua muku wa Shekaniya muana wa Alaha,+ ne muanende Yehohanana uvua musele muana wa Meshulama+ muana wa Belekiya. 19 Bavua kabidi bangambila malu mimpe buende yeye misangu yonso ne pashishe baya bamuambila bimvua ngamba. Pashishe Tobiya uvua untumina mikanda bua kunkuatshisha buôwa.+

7 Diakamue pakajika dibakulula dia tshimanu,+ ngakela biibi;+ pashishe ngakateka balami ba ku biibi,+ bimbi ba misambu+ ne bena Lewi.+ 2 Pashishe ngakateka muanetu Hanani+ bua kutangila Yelushalema, pamue ne Hananiya mfumu wa Muaba mukolesha,+ bualu uvua muntu wa kueyemena bikole menemene ne uvua utshina Nzambi mulelela+ kupita bantu bakuabu ba bungi. 3 Nunku ngakabambila ne: “Kabena ne bua kukangula biibi bia Yelushalema too ne padi munya ukola, ne patshidi balami ba ku biibi bimane balama, badi ne bua kuinjila biibi ne kubikanga. Sungulayi kabidi bantu ba mu Yelushalema bua bikale balami, muntu yonso muaba wende wa bulami udibu bamupeshe ne muntu yonso kumpala kua nzubu wende.” 4 Mpindieu tshimenga tshivua tshialabale ne tshinene; kuvua bantu bakese munda muatshi,+ ne kabavua banji kuibakululamu nzubu to.

5 Kadi Nzambi wanyi wakela bualu mu muoyo wanyi bua kusangisha bantu banene, bakokeshi bindondi ne bantu bonso bua kufunda mêna abu bilondeshile dilondangana dia mêku abu.+ Pashishe ngakapeta mukanda uvuabu bafunde mêna a dilondangana dia mêku a bantu bavua babande ba kumpala, ne ngakasangana bafundamu ne:

6 Aba mbantu ba mu provense* bavua babande ba ku bantu bavuabu bakuate baye nabu, aba bavua Nebukadenesâ+ mukalenge wa Babilona mukuate muye nabu+ ne bakalua kupingana pashishe mu Yelushalema ne mu Yuda, muntu yonso mu tshimenga tshiabu,+ 7 bantu bavua balue ne Zelubabela,+ Yeshua,+ Nehemiya, Azaya, Lâmeya, Nahamani, Môdekai, Bileshana, Misepelete, Bigewai, Nehuma, ne Bânaha.

Mu bungi bua bantu balume bena Isalele muvua:+ 8 bana ba Palosha, 2 172; 9 bana ba Shefataya, 372; 10 bana ba Alaha,+ 652; 11 bana ba Pahata-moaba,+ ba mu bana ba Yeshua ne Yoaba,+ 2 818; 12 bana ba Elama,+ 1 254; 13 bana ba Zatu, 845; 14 bana ba Zakai, 760; 15 bana ba Binui, 648; 16 bana ba Bebai, 628; 17 bana ba Azagada, 2 322; 18 bana ba Adonikama, 667; 19 bana ba Bigewai, 2 067; 20 bana ba Adine, 655; 21 bana ba Atê, ba Hezikiya, 98; 22 bana ba Hashuma, 328; 23 bana ba Bezai, 324; 24 bana ba Halifa, 112; 25 bana ba Gibeona,+ 95; 26 bantu ba ku Beteleheme ne ku Netofa, 188; 27 bantu ba ku Anatota,+ 128; 28 bantu ba ku Bete-azamaweta, 42; 29 bantu ba ku Kîyata-yalima,+ ku Kefila, ne ku Bêlota,+ 743; 30 bantu ba ku Lama ne ku Geba,+ 621; 31 bantu ba ku Mikemasa,+ 122; 32 bantu ba ku Betele+ ne ku Ai,+ 123; 33 bantu ba ku Nebo mukuabu, 52; 34 bana ba Elama mukuabu, 1 254; 35 bana ba Halima, 320; 36 bana ba Yeliko, 345; 37 bana ba Lodo, Hadidi, ne Onoho,+ 721; 38 bana ba Sena, 3 930.

39 Bakuidi:+ bana ba Yedaya ba mu nzubu wa Yeshua, 973; 40 bana ba Imê, 1 052; 41 bana ba Pashû,+ 1 247; 42 bana ba Halima,+ 1 017.

43 Bena Lewi:+ bana ba Yeshua, ba Kadamiele,+ ba mu bana ba Hodewa, 74. 44 Bimbi ba misambu:+ bana ba Asafa,+ 148. 45 Balami ba ku biibi:+ bana ba Shaluma, bana ba Atê, bana ba Talemona, bana ba Akuba,+ bana ba Hatita, bana ba Shobai, 138.

46 Bena mudimu ba ku ntempelo:*+ bana ba Ziha, bana ba Hasufa, bana ba Tabaota, 47 bana ba Kelosa, bana ba Sia, bana ba Padona, 48 bana ba Lebana, bana ba Hagabaha, bana ba Shamelai, 49 bana ba Hanana, bana ba Gidela, bana ba Gahâ, 50 bana ba Leaya, bana ba Lesine, bana ba Nekoda, 51 bana ba Gasama, bana ba Uza, bana ba Pasea, 52 bana ba Besai, bana ba Meunima, bana ba Nefushesima, 53 bana ba Bakabuka, bana ba Hakufa, bana ba Hâhu, 54 bana ba Baselita, bana ba Mehida, bana ba Hâsha, 55 bana ba Bâkosa, bana ba Sisela, bana ba Temaha, 56 bana ba Nesiya, bana ba Hatifa.

57 Bana ba bena mudimu ba Solomo:+ bana ba Sotai, bana ba Sofeleta, bana ba Pelida, 58 bana ba Yâla, bana ba Dâkona, bana ba Gidela, 59 bana ba Shefataya, bana ba Hatila, bana ba Pokeleta-hasebayima, bana ba Amona. 60 Bena mudimu ba ku ntempelo*+ ne bana ba bena mudimu ba Solomo bavua bonso 392.

61 Bantu aba bakabanda bumbukila ku Tele-mela, ku Tele-halesha, ku Kelube, ku Adona, ne ku Imê, kadi kabavua mua kujadika nzubu wa batatuabu anyi kuvuabu bafumine, bua kumanya ni bavua bena Isalele:+ 62 bana ba Delaya, bana ba Tobiya, bana ba Nekoda, 642. 63 Mu bakuidi: bana ba Habaya, bana ba Hakosa,+ bana ba Bâzilai uvua musele mukaji mu bana ba bakaji ba Bâzilai+ muena Gilada ne uvuabu babikila ku dîna diabu. 64 Bantu aba bakakeba mikanda ivuabu bafunde mêna abu bua kumanya mulongo wa bankambua babu, kadi kabakayipeta to, kuenzabi bua ne: kabikadi bakumbane bua mudimu wa buakuidi.*+ 65 Nguvena*+ wakabambila ne: kabavua mua kudia bintu bitambe tshijila+ too ne pavuaku mua kumueneka muakuidi uvua mua kuebeja malu ku diambuluisha dia Ulima ne Tumima.+

66 Bungi busanga bua tshisumbu tshijima buvua bua bantu 42 360,+ 67 pa kumbusha bapika babu ba balume ne ba bakaji+ bavua 7 337; bavua kabidi ne bimbi ba misambu ba balume ne ba bakaji 245.+ 68 Tubalu tuabu tuvua 736, mpunda yabu ya mushindu mukuabu ivua 245, 69 tumelu tuabu tuvua 435, mpunda yabu ivua 6 720.

70 Bamfumu bakuabu ba nzubu ya batatu bakambuluisha bua mudimu.+ Bua tshibutshilu, nguvena* wakafila drakma* tshinunu ya or, bibakudi 50, ne mizabi 530 ya bakuidi.+ 71 Bamfumu bakuabu ba nzubu ya batatu bakafila drakma binunu 20 ya or ne mina* 2 200 ya arjan mu tshibutshilu tshia mudimu. 72 Bantu bakuabu bonso bakafila drakma binunu 20 ya or, mina 2 000 ya arjan, ne mizabi 67 ya bakuidi.

73 Bakuidi, bena Lewi, balami ba ku biibi, bimbi ba misambu,+ bantu bakuabu, bena mudimu ba ku ntempelo,* ne bena Isalele bakuabu bonso* bakasomba mu bimenga biabu.+ Pakakumbana ngondo wa muanda mutekete,+ bena Isalele bakavua basombe mu bimenga biabu.+

8 Pashishe bantu bonso bakadisangisha ne dîyi dimue muaba wa tshinsangansanga kumpala kua Tshiibi tshia Mâyi,+ bobu kuambila Ezela+ mutentudi wa mikanda* bua kulua ne mukanda wa Mikenji ya Mose+ ivua Yehowa mutumine bena Isalele dîyi bua kulonda.+ 2 Nunku dituku dia kumpala dia ngondo wa muanda mutekete, muakuidi Ezela wakalua ne Mikenji ayi kumpala kua tshisumbu+ tshia bantu balume, bantu bakaji, ne bonso bavua mua kuteleja ne kumvua.+ 3 Pashishe wakawubala ne dîyi dikole+ kumpala kua muaba wa tshinsangansanga kumpala kua Tshiibi tshia Mâyi, kumbukila patshiatshia too ne munda munya, uwubadila bantu balume, bantu bakaji, ne bonso bavua mua kumvua; ne bantu bakateleja dibala dia mukanda wa Mikenji ne ntema yonso.+ 4 Ezela mutentudi wa mikanda* uvua muimanyine pa tshintu tshia kuimanyina tshia mabaya tshivuabu benze bua bualu abu; ne ku luseke luende ku dia balume bavua bimane kudi Matitiya, Shema, Anaya, Uliya, Hilekiya, ne Maaseya; ne ku dia bakaji diende kuvua Pedaya, Mishaele, Malakiya,+ Hashuma, Hashebadana, Zekâya, ne Meshulama.

5 Ezela wakabulula mukanda ku mêsu kua bantu bonso, bualu uvua kuulu kua bantu bonso. Pavuaye muwubulule, bantu bonso bakimana kuulu. 6 Pashishe Ezela wakatumbisha Yehowa Nzambi mulelela, Nzambi munene, ke bantu bonso kuandamuna ne: “Amen!* Amen!”+ ne kuelabu bianza muulu. Pashishe bakatua binu, kutuilabu Yehowa mpala panshi. 7 Yeshua, Bani, Shelebaya,+ Yamina, Akuba, Shabetai, Hodiya, Maaseya, Kelita, Azaya, Yozabada,+ Hanana, ne Pelaya, bavua bena Lewi, bavua bumvuija bantu Mikenji,+ pavua eku bantu bashale anu bimane. 8 Bakatungunuka ne kubala mukanda ne dîyi dikole, babala Mikenji ya Nzambi mulelela, bayumvuija bimpe menemene ne bayijinguluila bantu; nunku bakambuluisha bantu bua kumvua malu avuabu babala.*+

9 Nunku Nehemiya, uvua nguvena* dîba adi, ne Ezela+ muakuidi ne mutentudi wa mikanda,* ne bena Lewi bavua balongesha bantu bakambila bantu bonso ne: “Dituku edi ndia tshijila kudi Yehowa Nzambi wenu.+ Kanubuedi mu madilu anyi kanudidi to.” Bualu bantu bonso bavua badila pavuabu bumvue mêyi a mu Mikenji. 10 Wakabambila ne: “Ndayi, nudie bintu bimpe bitambe,* nunue bintu bishême, ne nutumine bantu badi kabayi ne tshintu biakudia;+ bualu dituku edi ndia tshijila kudi Mukalenge wetu, ne kanubungami to, bualu disanka dia Yehowa mmuaba wenu mukolesha wa kusokomena.”* 11 Bena Lewi bavua bapuwisha bantu bonso bamba ne: “Puwayi, bualu dituku edi ndia tshijila, ne kanubungami to!” 12 Nunku bantu bonso bakaya bua kudia, kunua, kutuminangana biakudia ne bua kusanka bikole,+ bualu bavua bumvue mêyi avuabu babambile.+

13 Pashishe dituku dibidi, bamfumu ba nzubu ya batatu ya tshisamba tshijima, bakuidi ne bena Lewi bakakunguila Ezela mutentudi wa mikanda* bua kupeta bujinguludi bukuabu mu mêyi a mu Mikenji. 14 Nunku bakasangana bafunde mu Mikenji ivua Yehowa muele ku butuangaji bua Mose ne: bena Isalele bavua ne bua kusombela mu bitanda* mu tshibilu mu ngondo wa muanda mutekete,+ 15 ne kabidi ne: bavua ne bua kuela lubila+ ne kumanyisha mu bimenga biabu bionso ne mu Yelushalema mujima bamba ne: “Ndayi mu buloba bua mikuna, nulue ne bisalasala bia mitshi ya olive, bia mitshi ya sapen, bia mitshi ya mirte ne malala a mabue ne bisalasala bia mitshi mikuabu bua kuenza bitanda bilondeshile tshidibu bafunde.”

16 Nunku bantu bakaya, kuluabu nabi bua kudienzela bitanda, muntu yonso pa mutu pa nzubu wende, too ne mu mbanza yabu, mu mbanza ya ku nzubu wa Nzambi mulelela,+ muaba wa tshinsangansanga wa ku Tshiibi tshia Mâyi,+ ne muaba wa tshinsangansanga wa ku Tshiibi tshia Efelayima.+ 17 Nunku bantu bonso ba mu tshisumbu bavua bapingane bafume kuvuabu babakuate baye nabu bakenza bitanda ne bakasombela mu bitanda abi, bualu bena Isalele kabavua benze bualu ebu mushindu eu katshia ku matuku a Yoshua+ muana wa Nuna too ne dituku adi, kuenzabi bua kuikale disanka dinene menemene.+ 18 Bavua babala mukanda wa Mikenji ya Nzambi mulelela ku dituku ku dituku,+ kutuadijila ku dituku dia kumpala too ne ku dituku dia ndekelu. Bakenza tshibilu matuku muanda mutekete, ne dituku dia muanda mukulu bakenza disangisha dia pa buadi, anu muvuabi bilombibue.+

9 Mu dituku dia 24 dia ngondo eu bena Isalele bakadisangisha; bavua bajila biakudia bavuale bilamba bikayabale ne badiele buloba.+ 2 Nunku bantu bavua ne mashi a bena Isalele bakaditapulula kudi bantu bonso ba ku babende,+ ne bakimana kuulu, bobu kutonda mpekatu yabu ne bilema bia batatuabu.+ 3 Pashishe bakimana pa miaba yabu, bobu kubala mukanda wa Mikenji+ ya Yehowa Nzambi wabu ne dîyi dikole munkatshi mua tshia binayi tshia dituku;* ne munkatshi mua tshia binayi tshikuabu bavua batonda mpekatu ne binamina Yehowa Nzambi wabu.

4 Yeshua, Bani, Kadamiele, Shebanya, Buni, Shelebaya,+ Bani, ne Kenani bakimana pa tshintu tshia kuimanyina+ tshia bena Lewi, bobu kudila kudi Yehowa Nzambi wabu ne dîyi dikole. 5 Yeshua, Kadamiele, Bani, Hashabaneya, Shelebaya, Hodiya, Shebanya, ne Petahiya bena Lewi bakamba ne: “Imanayi kuulu ne nutumbishe Yehowa Nzambi wenu bua kashidi ne tshiendelele.*+ Batumbishe dîna diebe dia butumbi didi dibandishibue ku mutu kua dibenesha dionso ne butumbi buonso.

6 “Wewe nkayebe udi Yehowa;+ uvua muenze diulu, eyowa, diulu dia mu diulu ne musumba wa bintu bia muomu bionso, buloba ne bionso bidipu, mbuu ne bionso bidimu. Udi kabidi mubilame bionso ne muoyo, ne musumba wa bintu bia mu diulu udi winama kumpala kuebe. 7 Udi Yehowa Nzambi mulelela uvua musungule Abalama,+ mumumbushe mu Ula+ wa bena Kasada ne mumupeshe dîna dia Abalahama.+ 8 Uvua mumone muoyo wende muikale ne lulamatu kumpala kuebe,+ ke wewe kudia nende tshipungidi bua kumupesha buloba bua bena Kanâna, bena Hiti, bena Amole, bena Pelizi, bena Yebuse, ne bena Gîgashi, bua kubupesha bana* bende;+ ne uvua mukumbaje malu auvua mulaye, bualu udi muakane.

9 “Nunku uvua mumone dikenga dia bankambua betu mu Ejipitu,+ ne uvua mumvue muadi wabu ku Mbuu Mukunze. 10 Ke wewe kuenzela Palô ne bena mudimu bende bonso ne bantu bonso ba mu buloba buende bimanyinu ne bishima,+ bualu uvua mumanye ne: bavua benzele bantu bebe malu ne dikamakama.+ Wewe kudienzela dîna didi dishalaku too ne lelu.+ 11 Uvua mupandulule mbuu kumpala kuabu bua bapitshile mu mbuu pa buloba bume,+ ne uvua muele bantu bavua babalonda mu ndondo anu bu dibue didibu bakupe mu mâyi adi ne mavuala makole.+ 12 Uvua ubalombola mu munya ne dikunji dia ditutu, butuku ne dikunji dia kapia bua kubatokeshela njila uvuabu ne bua kuyila.+ 13 Uvua mupueke pa mukuna wa Sinai,+ wewe kuakula nabu kumbukila mu diulu+ ne kubapesha mêyi a dilumbuluisha makane, mikenji ya bulelela,* mêyi ne mikandu bimpe ne mêyi matuma.+ 14 Uvua mubamanyishe Nsabatu webe wa tshijila,+ wewe kubapesha mêyi matuma, mêyi ne mikandu ne mukenji ku butuangaji bua Mose muena mudimu webe. 15 Uvua mubapeshe biakudia bia mu diulu pavuabu ne nzala,+ wewe kupatula mâyi mu mukuna wa dibue pavuabu ne nyota,+ ne wewe kubambila bua kubuela ne kuangata buloba buuvua muditshipe* bua kubapesha.

16 “Kadi bankambua betu bobu bakenza malu ne dikamakama,+ kuluabu bena tshitunu,*+ ne bakabenga kuteleja mêyi ebe. 17 Bakabenga kuteleja,+ ne kabakavuluka bienzedi biebe bia dikema biuvua muenze munkatshi muabu, kadi bakalua bena tshitunu,* bobu kuteka mfumu bua kupingana ku bupika buabu mu Ejipitu.+ Kadi wewe udi Nzambi udi mudiakaje bua kubuikidilangana,* udi uditeka pa muaba wa bakuabu* ne muikale ne luse, udi kayi ukuata tshiji lubilu ne muwule tente ne dinanga dia lulamatu,*+ ne kuvua mubalekele to.+ 18 Nansha pavuabu badienzele lupingu lua tshiamu* lua kana ka ngombe ne benda bamba ne: ‘Eu ke Nzambi webe uvua mukupatule mu Ejipitu,’+ ne benze malu manene a dipanga kanemu, 19 nansha dîba adi wewe, mu luse luebe lunene, kuvua mubalekele mu tshipela to.+ Dikunji dia ditutu kadivua diumbuke pa mutu pabu mu munya bua kubalombola mu njila, anyi dikunji dia kapia kadivua diumbuke butuku bua kubatokeshela njila uvuabu ne bua kuyila.+ 20 Uvua mubapeshe nyuma webe muimpe bua bapete busunguluji,+ ne kuvua mubenge kupesha mukana muabu mana to,+ ne uvua mubapeshe mâyi pavuabu ne nyota.+ 21 Mu bidimu 40 uvua mubapeshe biakudia mu tshipela.+ Kabavua bapangile tshintu nansha tshimue to. Bilamba biabu kabivua bisunsuke,+ ne makasa abu kaavua muwule to.

22 “Uvua mubapeshe makalenge ne bukua bisamba, ubikosolola bitupa bitupa,+ kuenzabi bua bangate buloba bua Sihona,+ mmumue ne: buloba bua mukalenge wa Heshebona,+ too ne buloba bua Oga+ mukalenge wa Bashana. 23 Wakavuija bana babu bungi bu mitoto ya mu diulu.+ Pashishe wewe kubabueja mu buloba buuvua mulaye bankambua babu ne: bavua ne bua kubuelamu ne kubuangata.+ 24 Nunku bana babu bakabuela mu buloba, bobu kubuangata,+ ne uvua mutshimune kumpala kuabu bena Kanâna+ bavua bena mu buloba abu, ne wakafila bakalenge babu ne bisamba bia mu maloba au mu tshianza tshiabu bua benze nabu tshivuabu basue. 25 Bakakuata bimenga bikolesha+ ne maloba a bufuke,*+ bobu kuangata nzubu miuwule tente ne bintu bimpe bia mishindu yonso, bina bia kulamina mâyi bimana kumbula, madimi a tumuma tua mvinyo, madimi a mitshi ya olive,+ ne mitshi ya bimuma bungi tshianana. Nunku bakadia, bobu kukuta ne kudiunda, ne bakatshionkomoka mu buimpe buebe bunene.

26 “Kadi bakatuadija kubenga kutumikila, bobu kukutombokela+ ne kuelabu Mikenji yebe nyima.* Bakashipa baprofete bebe bavua babadimuija bua kubapingaja kuudi, ne bakenza malu a dipanga kanemu dikole.+ 27 Bua bualu ebu, uvua mubafile mu tshianza tshia baluishi babu bavua anu babakengesha.+ Kadi bavua badila kuudi mu dikenga diabu,+ ne wewe uvua umvua kumbukila mu diulu; ne bua luse luebe lunene, uvua ubapesha basungidi bua kubasungila mu tshianza tshia baluishi babu.+

28 “Kadi diakamue pavuabu bapeta disulakana, bavua kabidi benza malu mabi ku mêsu kuebe,+ ne uvua ubalekela mu tshianza tshia bena lukuna babu bavua babakokesha.*+ Pashishe bavua bapingana, bakubikila bua kubambuluisha,+ ne uvua umvua kumbukila mu diulu ne ubasungila misangu ne misangu bua luse luebe lunene.+ 29 Nansha muuvua ubadimuija bua kubapingaja ku Mikenji yebe, bavua benza malu ne dikamakama, babenga kuteleja mêyi ebe;+ bavua benzela mêyi ne mikandu yebe mpekatu, idi muntu yeye muyilonde ushala ne muoyo.+ Kadi bakela nyima ne mutu mukole, bobu kumisha nshingu yabu ne kubengabu kuteleja. 30 Wakabaleja lutulu+ bidimu bia bungi ne uvua anu ubadimuija ne nyuma webe ku butuangaji bua baprofete bebe, kadi bakabenga kuteleja. Ndekelu wa bionso wakabafila mu tshianza tshia bisamba bia mu maloba avua mabanyunguluke.+ 31 Mu luse luebe lunene, kuvua mubajimije+ anyi mubalekele, bualu udi Nzambi udi uditeka pa muaba wa bakuabu* ne udi ne luse.+

32 “Mpindieu, wewe Nzambi wetu, Nzambi munene, wa bukole, udi ukemesha, Nzambi udi mulame tshipungidi tshiende ne muleje dinanga dia lulamatu,+ kupepeji makenga onso adi matukuate tuetu, bakalenge betu, bakokeshi betu,+ bakuidi betu,+ baprofete betu,+ bankambua betu, ne tshisamba tshiebe tshijima kumbukila ku matuku a bakalenge ba Ashû+ too ne lelu. 33 Wewe udi muleje muudi muakane mu malu onso adi matufikile, bualu udi muenze malu ne lulamatu; kadi tuetu ke badi benze bibi.+ 34 Kadi bua bakalenge betu, bakokeshi betu, bakuidi betu, ne bankambua betu, bobu ki mbatumikile Mikenji yebe anyi bateye ntema ku mêyi ebe ne mavuluija* ebe biuvua ubadimuija nabi. 35 Nansha pavuabu mu bukalenge buabu, bikale bamona buimpe buebe bua bungi buuvua mubapeshe ne bikale mu buloba bualabale ne bua bufuke* buuvua mubapeshe, kabavua bakuenzele mudimu+ ne kabavua balekele bilele biabu bibi. 36 Nunku ntuetu aba lelu, bapika,+ eyowa, bapika mu buloba buuvua mupeshe bankambua betu bua badie bintu bidi bipatukamu ne bintu bilenga bidimu. 37 Bua mpekatu yetu, bintu bidi bipatukamu bia bungi mbia bakalenge baudi muteke ku mutu kuetu.+ Badi bakokesha mibidi yetu ne bimuna bietu mudibu bamone, ne tuetu tudi mu lutatu lukole.

38 “Bua malu onso aa, tudi tusuika dîyi+ ditudi tufunda didi dienza bua tuenze tshitudi badisuike, ne ndijadika ne tshitampi tshia bakokeshi betu ne bena Lewi betu ne bakuidi betu.”+

10 Bantu bavua bajadike dîyi adi, batuapu tshitampi tshiabu+ bavua:

9 Kabidi ne bena Lewi: Yeshua muana wa Azanaya, Binui wa mu bana ba Henedada, Kadamiele,+ 10 ne bana babu Shebanya, Hodiya, Kelita, Pelaya, Hanana, 11 Mika, Lehoba, Hashabeya, 12 Zakû, Shelebaya,+ Shebanya, 13 Hodiya, Bani, ne Beninu.

14 Bamfumu ba bantu: Palosha, Pahata-moaba,+ Elama, Zatu, Bani, 15 Buni, Azagada, Bebai, 16 Adoniya, Bigewai, Adine, 17 Atê, Hezikiya, Azû, 18 Hodiya, Hashuma, Bezai, 19 Halifa, Anatota, Nobai, 20 Magapiasha, Meshulama, Hezî, 21 Meshezabela, Sadoka, Yadua, 22 Pelatiya, Hanana, Anaya, 23 Hoshea, Hananiya, Hashuba, 24 Halohesha, Pileha, Shobeka, 25 Lehuma, Hashabena, Maaseya, 26 Ahiya, Hanana, Anana, 27 Maluke, Halima, ne Bânaha.

28 Bantu bakuabu bonso (bakuidi, bena Lewi, balami ba ku biibi, bimbi ba misambu, bena mudimu ba ku ntempelo,* ne bantu bonso bavua baditapulule ku bisamba bia mu maloba avua mabanyunguluke bua kulonda Mikenji ya Nzambi mulelela,+ pamue ne bakaji babu, bana babu ba balume ne ba bakaji, bonso bavua ne dimanya ne dijingulula dia malu*) 29 bakadisanga kudi bana babu, bantu babu bende lumu, kudisuikabu ne mulawu ne mutshipu, bua kuendela mu Mikenji ya Nzambi mulelela ivuabu bafile ku butuangaji bua Mose muena mudimu wa Nzambi mulelela, ne bua kutumikila mêyi onso a Yehowa Mukalenge wetu, mêyi ende a dilumbuluisha, ne mêyi ne mikandu biende ne muoyo umue. 30 Katuakufila bana betu ba bakaji kudi bisamba bia mu buloba, ne katuakuangatshila bana betu ba balume bana babu ba bakaji to.+

31 Bena mu bisamba bia mu maloba adi matunyunguluke bobu balue ne bintu biabu bia kupana ne mishindu yonso ya ntete bua kupana dituku dia Nsabatu, katuakubasumba tshintu nansha tshimue dia Nsabatu+ anyi dituku dinsantu to.+ Netulekele kabidi bintu bia pa madimi bia mu tshidimu tshia muanda mutekete+ ne dibanza dionso didibu kabayi bafute.+

32 Tudi kabidi badielele mukenji bua yonso wa kutudi afile tshia bisatu tshia nshekele* ku tshidimu bua mudimu wa nzubu* wa Nzambi wetu,+ 33 bua milongo ya mampa,*+ mulambu wa ntete wa pa tshibidilu,+ mulambu wa kuosha wa pa tshibidilu bua matuku a Nsabatu+ ne padi ngondo ubala,+ ne bua bibilu bidibu basungule,+ bua bintu bia tshijila, bua milambu ya mpekatu+ bua kubuikidila Isalele mpekatu, ne bua mudimu wonso wa nzubu wa Nzambi wetu.

34 Tudi bele kabidi nshobo bua nkunyi idi bakuidi, bena Lewi, ne bena mu tshisamba ne bua kulua nayi ku nzubu wa Nzambi wetu bilondeshile nzubu ya batatuetu, mu bikondo bisungula, ku tshidimu ku tshidimu, bua kutemesha nayi kapia pa tshioshelu tshia Yehowa Nzambi wetu bilondeshile tshidibu bafunde mu Mikenji.+ 35 Netulue kabidi ne bintu bidi bikola bia kumpala bia mu buloba buetu ne bimuma bidi bikola bia kumpala bia ku mitshi ya bimuma ya mishindu yonso ku nzubu wa Yehowa, ku tshidimu ku tshidimu,+ 36 kabidi ne banabute ba bana betu ba balume ne ba bimuna bietu,+ bilondeshile tshidibu bafunde mu Mikenji, ne banabute ba ngombe yetu ne ba mikoko yetu. Netulue nabu ku nzubu wa Nzambi wetu, kudi bakuidi badi benza mudimu ku nzubu wa Nzambi wetu.+ 37 Netulue kabidi ne bukula bua nsekenseke bua kumpala bua ku bintu bietu bia kumpala bia pa madimi,+ mapa etu, bimuma bia mitshi ya mishindu yonso,+ mvinyo mupiamupia, ne mafuta+ bua kupesha bakuidi ku nzubu ya dilamina bintu* ya ku nzubu wa Nzambi wetu,+ pamue ne tshia dikumi* tshia bintu bia mu buloba buetu bua kupesha bena Lewi,+ bualu bena Lewi ke badi basangisha bia dikumi mu bimenga bietu bionso bia madimi.

38 Muakuidi, muana wa Alona, udi pende ne bua kuikala ne bena Lewi padi bena Lewi basangisha tshia dikumi; ne bena Lewi badi ne bua kufila tshia dikumi tshia tshia dikumi ku nzubu wa Nzambi wetu,+ ku bibambalu* bia nzubu wa dilamina bintu. 39 Bualu bena Isalele ne bana ba bena Lewi badi ne bua kulua ne mulambu+ wa ntete, mvinyo mupiamupia, ne mafuta+ ku nzubu ya dilamina bintu,* ne kuoku aku ke kudi bintu bia kuenza nabi mudimu bia muaba munsantu, pamue ne bakuidi badi benza mudimu, balami ba ku biibi, ne bimbi ba misambu. Katuakulengulula nzubu wa Nzambi wetu to.+

11 Mpindieu bakokeshi ba bantu bavua basombela mu Yelushalema;+ kadi bantu bakuabu bonso bakela nshobo+ bua kuangata muntu umue mu bantu dikumi bua kusombelaye mu Yelushalema, tshimenga tshia tshijila, pavua eku bantu bakuabu tshitema bashala mu bimenga bikuabu. 2 Bualu bukuabu, bena mu tshisamba bakabenesha bantu bonso bavua baditabile nkayabu bua kusombela mu Yelushalema.

3 Aba mbamfumu ba provense* bavua basombele mu Yelushalema. (Bena Isalele bakuabu bonso, bakuidi, bena Lewi, bena mudimu ba ku ntempelo,*+ ne bana ba bena mudimu ba Solomo,+ bavua bobu basombele mu bimenga bikuabu bia mu Yuda, muntu yonso mu tshitupa tshiende tshia buloba mu tshimenga tshiabu.+

4 Kuvua kabidi bantu bakuabu ba mu Yuda ne mu Benyamina bavua basombele mu Yelushalema.) Mu bantu ba mu Yuda kuvua Ataya muana wa Uziya muana wa Zekâya muana wa Amalia muana wa Shefataya muana wa Mahalalela wa mu bana ba Pelese,+ 5 ne Maaseya muana wa Baluka muana wa Kolehose muana wa Hazaya muana wa Adaya muana wa Yoyaliba muana wa Zekâya muana wa muena Shela. 6 Bana bonso ba Pelese bavua basombele mu Yelushalema bavua 468, bantu balume bakumbane.

7 Aba mbantu ba mu Benyamina: Salu+ muana wa Meshulama muana wa Yoede muana wa Pedaya muana wa Kolaya muana wa Maaseya muana wa Itiele muana wa Yeshayi, 8 ne bakamulondela kudi Gabai ne Salai, bantu 928; 9 ne Yoele muana wa Zikeli uvua mutangidi wabu, ne Yuda muana wa Hasenua uvua tshindondi mu ditangila tshimenga.

10 Mu bakuidi: Yedaya muana wa Yoyaliba, Yakina,+ 11 Selaya muana wa Hilekiya muana wa Meshulama muana wa Sadoka muana wa Melayota muana wa Ahituba,+ umue wa ku balombodi ba nzubu* wa Nzambi mulelela, 12 ne bana babu bavua benze mudimu wa nzubu, bantu 822; ne Adaya muana wa Yelohama muana wa Pelalaya muana wa Amasi muana wa Zekâya muana wa Pashû+ muana wa Malakiya, 13 ne bana babu, bamfumu ba nzubu ya batatu, bantu 242; ne Amashai muana wa Azalele muana wa Azai muana wa Meshilemota muana wa Imê, 14 ne bana babu bavua bantu ba bukole, ba dikima, bantu 128; ne mutangidi wabu uvua Zabediele wa mu dîku dia bantu banene.

15 Mu bena Lewi: Shemaya+ muana wa Hashuba muana wa Azelikama muana wa Hashabeya muana wa Buni, 16 ne Shabetai+ ne Yozabada,+ ba mu bamfumu ba bena Lewi, bavua batangila midimu ivua yenzeka pambelu pa nzubu wa Nzambi mulelela; 17 ne Matanaya,+ muana wa Mika muana wa Zabedi muana wa Asafa,+ mulombodi wa dimba dia misambu, uvua utuma misambu ya kutumbisha nayi Nzambi pavuabu basambila,+ ne Bakabukiya, tshindondi mu bana babu, ne Abeda muana wa Shamua muana wa Galala muana wa Yedutuna.+ 18 Bena Lewi bonso bavua mu tshimenga tshia tshijila bavua 284.

19 Balami ba ku biibi bavua: Akuba, Talemona,+ ne bana babu bavua balama mu biibi, bantu 172.

20 Bena Isalele bakuabu bonso, bakuidi, ne bena Lewi bavua mu bimenga bikuabu bionso bia mu Yuda, muntu yonso mu buloba buende buvuaye mupiane.* 21 Bena mudimu ba ku ntempelo*+ bavua basombele mu Ofele,+ ne Ziha ne Gishepa bavua batangila bena mudimu ba ku ntempelo.*

22 Mutangidi wa bena Lewi mu Yelushalema uvua Uzi muana wa Bani muana wa Hashabeya muana wa Matanaya+ muana wa Mika, wa mu bana ba Asafa, bimbi ba misambu; yeye uvua utangila mudimu wa nzubu wa Nzambi mulelela. 23 Bualu kuvua mukenji wa kudi mukalenge bua bualu buabu,+ ne kuvua bungi kampanda bua bintu buvuabu bakose bivuabu ne bua kupesha bimbi ba misambu bilondeshile majinga a dituku ne dituku. 24 Petahiya muana wa Meshezabela wa mu bana ba Zela muana wa Yuda uvua mufidi wa mibelu wa mukalenge* bua bualu buonso buvua butangila tshisamba.

25 Bua miaba ya kusombela ne mpata yayi, bantu bakuabu ba mu Yuda bavua basombele mu Kîyata-âba+ ne misoko ya kumpenga kuende,* mu Dibona ne misoko ya kumpenga kuende, mu Yekabesele+ ne miaba yende mikuabu ya kusombela, 26 mu Yeshua, mu Molada,+ mu Bete-pelete,+ 27 mu Hasâ-shuala,+ mu Bê-sheba ne misoko ya kumpenga kuende,* 28 mu Sikelaga,+ mu Mekona ne misoko ya kumpenga kuende,* 29 mu Ene-limona,+ mu Solea,+ ne mu Yâmuta, 30 mu Zanoa,+ mu Adulama ne miaba yabi mikuabu ya kusombela, mu Lakisha+ ne mpata yende, ne mu Azeka+ ne misoko ya kumpenga kuende.* Bavua basombele* kumbukila ku Bê-sheba too ne ku Tshibandabanda tshia Hinoma.+

31 Bantu ba mu Benyamina bavua mu Geba,+ mu Mikemasha, mu Aya, mu Betele+ ne misoko ya kumpenga kuende,* 32 mu Anatota,+ mu Nobo,+ mu Ananiya, 33 mu Hasô, mu Lama,+ mu Gitayima, 34 mu Hadidi, mu Seboima, mu Nebalata, 35 mu Lodo, ne mu Onoho,+ tshibandabanda tshia bansenda. 36 Bakapesha bimue bisumbu bia bena Lewi bia mu Yuda miaba mu Benyamina.

12 Aba mbakuidi ne bena Lewi bavua babande ne Zelubabela+ muana wa Shalatiele,+ ne Yeshua:+ Selaya, Yelemiya, Ezela, 2 Amalia, Maluke, Hatusha, 3 Shekaniya, Lehuma, Melemota, 4 Ido, Ginetoi, Abiya, 5 Miyamina, Mâdaya, Bilega, 6 Shemaya, Yoyaliba, Yedaya, 7 Salu, Amoka, Hilekiya, ne Yedaya. Aba bavua bamfumu ba bakuidi ne bana babu mu matuku a Yeshua.

8 Bena Lewi bavua Yeshua, Binui, Kadamiele,+ Shelebaya, Yuda, ne Matanaya+ uvua ulombola misambu ya diela nayi Nzambi tuasakidila pamue ne bana babu. 9 Bana babu Bakabukiya ne Uni bavua bimana batangilangane nabu bua midimu ya bulami.* 10 Yeshua wakalela Yoyakima, ne Yoyakima wakalela Eleyashiba,+ ne Eleyashiba wakalela Yoyada.+ 11 Yoyada wakalela Yonatana, ne Yonatana wakalela Yadua.

12 Mu matuku a Yoyakima, aba ke bavua bakuidi, bamfumu ba nzubu ya batatu: bua Selaya,+ Melaya; bua Yelemiya, Hananiya; 13 bua Ezela,+ Meshulama; bua Amalia, Yehohanana; 14 bua Maluki, Yonatana; bua Shebanya, Jozefe; 15 bua Halima,+ Adena; bua Melayota, Helekai; 16 bua Ido, Zekâya; bua Ginetona, Meshulama; 17 bua Abiya,+ Zikeli; bua Minyamina, . . .;* bua Moadiya, Piletai; 18 bua Bilega,+ Shamua; bua Shemaya, Yehonatana; 19 bua Yoyaliba, Matenai; bua Yedaya,+ Uzi; 20 bua Salai, Kalai; bua Amoka, Ebê; 21 bua Hilekiya, Hashabeya; bua Yedaya, Netanele.

22 Bavua bafunde mêna a bamfumu ba nzubu ya batatu ya bena Lewi mu matuku a Eleyashiba, Yoyada, Yohanana, ne Yadua+ anu muvuabu bafunde a bakuidi, too ne ku bukalenge bua Dayawesha muena Pelasa.

23 Bavua bafunde mêna a bena Lewi bavua bamfumu ba nzubu ya batatu mu mukanda wa malu a bikondo abi, too ne ku matuku a Yohanana muana wa Eleyashiba. 24 Bamfumu ba bena Lewi bavua Hashabeya, Shelebaya, ne Yeshua+ muana wa Kadamiele,+ ne bana babu bavua bimana batangilangane nabu bua kutumbisha Nzambi ne kumuela tuasakidila bilondeshile mêyi a Davidi+ muntu wa Nzambi mulelela, tshisumbu tshia balami tshipetangana ne tshisumbu tshia balami. 25 Matanaya,+ Bakabukiya, Obadaya, Meshulama, Talemona, ne Akuba+ bavua balami ba ku biibi,+ balama nzubu ya dilamina bintu ivua ku biibi. 26 Bantu aba bavua benze mudimu mu matuku a Yoyakima muana wa Yeshua+ muana wa Yozadaka ne mu matuku a Nehemiya nguvena ne Ezela+ muakuidi ne mutentudi wa mikanda.*

27 Pavuabu bakeba kubanjija bimanu bia Yelushalema, bakakeba bena Lewi miaba yonso ivuabu basombele, kuluabu nabu ku Yelushalema bua kuenza dibanjija ne disanka, ne misambu ya kuela nayi Nzambi tuasakidila,+ ne bintu bia kukumakaja, biombelu bia nshinga, ne nzenze. 28 Bana ba bimbi ba misambu* bakadisangisha bumbukila mu distrike,* ku nseke yonso ya Yelushalema, mu miaba ya kusombela ya bena Netofa,+ 29 ku bete-gilegala,+ ne mu mpata ya Geba+ ne Azamaweta,+ bualu bimbi ba misambu bavua badienzele miaba ya kusombela kumpenga kuonso kua Yelushalema. 30 Bakuidi ne bena Lewi bakadikezula, ne bakakezula bantu,+ biibi+ ne tshimanu.+

31 Pashishe ngakabandisha bakokeshi ba mu Yuda pa mutu pa tshimanu. Meme kusungula kabidi bisumbu bibidi binene bia bantu bavua bimba misambu ya kuela nayi Nzambi tuasakidila ne bantu bavua benda babalonda mu milongo, ne tshisumbu tshimue tshivua tshienda ku dia balume pa tshimanu tshitangile ku Tshiibi tshia Mishiki ya Butu.+ 32 Hoshaya ne tshia bibidi tshia bakokeshi ba mu Yuda bavua benda babalonda mu nyima, 33 pamue ne Azaya, Ezela, Meshulama, 34 Yuda, Benyamina, Shemaya, ne Yelemiya. 35 Bavua ne ndambu wa bana ba bakuidi bikale ne mpungi:+ Zekâya muana wa Yonatana muana wa Shemaya muana wa Matanaya muana wa Mikaya muana wa Zakû muana wa Asafa,+ 36 ne bana babu Shemaya, Azalele, Milalai, Gilalai, Mâi, Netanele, Yuda, ne Hanani, bikale ne biombelu bia misambu bia Davidi+ muntu wa Nzambi mulelela; ne Ezela+ mutentudi wa mikanda* uvua wenda kumpala kuabu. 37 Pakafikabu ku Tshiibi tshia ku Mpokolo wa mâyi+ bakaya buludiludi ku tshibandilu+ tshia Tshimenga tshia Davidi,+ kupitshilabu mu kajila kadi kabande ku tshimanu tshia pa mutu pa Nzubu wa Davidi, kuyabu too ne ku Tshiibi tshia Mâyi+ ku est.

38 Tshisumbu tshikuabu tshia bimbi ba misambu ya diela nayi Nzambi tuasakidila tshiakayila luseke lukuabu,* ne mvua ntshilonda ne tshia bibidi tshia bantu; bakayila pa mutu pa tshimanu, kupitshilabu pa Tshibumba tshia Mfulu,+ kuya too ne ku Tshimanu Tshinene+ 39 ne pa mutu pa Tshiibi tshia Efelayima+ kuya too ne ku Tshiibi tshia Tshimenga tshia Kale+ too ne ku Tshiibi tshia Mishipa,+ Tshibumba tshia Hananele,+ Tshibumba tshia Mea, too ne ku Tshiibi tshia Mikoko;+ ne bakimana ku Tshiibi tshia Balami.

40 Ndekelu wa bionso, bisumbu bibidi bia bimbi ba misambu ya kuela nayi Nzambi tuasakidila biakimana kumpala kua nzubu wa Nzambi mulelela; meme panyi ne tshia bibidi tshia balombodi bindondi bamvua nabu tuakimana, 41 ne bakuidi Eleyakima, Maaseya, Minyamina, Mikaya, Eleyehoenai, Zekâya, ne Hananiya, bikale ne mpungi, 42 ne Maaseya, Shemaya, Eleazâ, Uzi, Yehohanana, Malakiya, Elama, ne Ezê. Bimbi ba misambu bakimba ne dîyi dikole ku bulombodi bua Yizelaya.

43 Dituku adi bakafila milambu ya bungi ne bakasanka,+ bualu Nzambi mulelela uvua mubasankishe ne disanka dia bungi. Bantu bakaji ne bana bakasanka pabu,+ kuenzabi ne: disanka dia mu Yelushalema diumvuike too ne kule menemene.+

44 Dituku adi bakateka bantu balume bua kutangila nzubu ya dilamina bintu+ bua mapa,+ bua bintu bia kumpala bia pa madimi,+ ne bua bia dikumi.+ Bavua ne bua kusangishilamu bintu bia mu madimi a mu bimenga bivua Mikenji yilomba+ bua bakuidi ne bena Lewi,+ bualu kuvua disanka mu Yuda bua bakuidi ne bena Lewi bavua benza mudimu. 45 Bakatuadija kukumbaja malu avuabu ne bua kuenza bua Nzambi wabu ne malu avuabu ne bua kukumbaja bua dilengejibua, anu muvua bimbi ba misambu ne balami ba ku biibi benze, bilondeshile mêyi a Davidi ne a muanende Solomo. 46 Bualu ku kale mu matuku a Davidi ne Asafa, kuvua balombodi* bua bimbi ba misambu ne bua misambu ya kutumbisha nayi Nzambi ne ya kumuela nayi tuasakidila.+ 47 Kabidi mu matuku a Zelubabela+ ne mu matuku a Nehemiya, Isalele mujima uvua upesha bimbi ba misambu+ ne balami ba ku biibi+ bintu bilondeshile majinga a ku dituku ne ku dituku. Bavua kabidi bateka bintu ku luseke bua bena Lewi,+ ne bena Lewi bavua bateka bintu ku luseke bua ndelanganyi ya Alona.

13 Dituku adi bakabala mukanda wa Mose mu matshi a bantu,+ ne bakasangana bafundamu ne: muena Amona nansha umue anyi muena Moaba+ kavua ne bua kubuela mu tshisumbu tshia Nzambi mulelela musangu nansha umue to,+ 2 bualu kabavua balue ne mampa ne mâyi bua kusambakena ne bena Isalele, kadi pamutu pa nanku bakafuta Balâma bua kubela mulawu.+ Kadi Nzambi wetu uvua mukudimune mulawu mulue dibenesha.+ 3 Diakamue pavuabu bumvue Mikenji, bakatuadija kumbusha bantu bonso bavua ne mashi a bantu ba ku babende* mu Isalele.+

4 Mpindieu kumpala kua bualu ebu, muakuidi uvua utangila nzubu ya kulamina bintu* ya ku nzubu* wa Nzambi wetu+ uvua Eleyashiba+ uvua ne malanda ne Tobiya.+ 5 Uvua mumushile nzubu wa kulamina bintu* munene uvuabu batekela mulambu wa ntete kumpala, budimbu bua mupuya muimpe, ne bintu bia kuenza nabi mudimu ne tshia dikumi tshia ntete, mvinyo mupiamupia, ne mafuta,+ bivuabu ne bua kupesha bena Lewi,+ bimbi ba misambu, ne balami ba ku biibi, pamue ne mapa a kupesha bakuidi.+

6 Tshikondo tshionso atshi meme tshivua mu Yelushalema to, bualu mvua muye kudi mukalenge mu tshidimu tshia 32+ tshia Atashasete+ mukalenge wa Babilona; ne pashishe ngakalua kulomba mukalenge bua kuanji kumbuka. 7 Nunku ngakafika ku Yelushalema ne meme kumona bualu bubi menemene buvua Eleyashiba+ muenze bua Tobiya,+ mumushile nzubu wa kulamina bintu mu lubanza lua nzubu wa Nzambi mulelela. 8 Bualu ebu kabuvua bunsankishe nansha kakese to, ke meme kuimansha bintu bionso bia Tobiya bia mu nzubu pambelu pa nzubu wa kulamina bintu* au. 9 Panyima pa bualu ebu, ngakatuma dîyi, bobu kulengeja nzubu ya kulamina bintu;* ne meme kupingajamu bintu bia kuenza nabi mudimu bia nzubu wa Nzambi mulelela,+ pamue ne mulambu wa ntete ne budimbu bua mupuya muimpe.+

10 Ngakasangana kabidi ne: kabavua bapeshe bena Lewi bintu bivuabu ne bua kubapesha to;+ ke bualu kayi bena Lewi ne bimbi ba misambu bavua benza mudimu bakavua baye, muntu yonso ku budimi buende.+ 11 Ke meme kutandisha balombodi bindondi,+ meme kubambila ne: “Bua tshinyi nzubu wa Nzambi mulelela mmulengulula nunku?”+ Pashishe meme kubasangisha bonso ne kubapingaja miaba yabu ya mudimu. 12 Yuda mujima wakalua ne tshia dikumi+ tshia ntete, mvinyo mupiamupia ne mafuta ku nzubu ya kulamina bintu.+ 13 Pashishe ngakateka muakuidi Shelemeya, Sadoka mutentudi wa mikanda,* ne Pedaya wa mu bena Lewi bua kutangila nzubu ya kulamina bintu, ne Hanana muana wa Zakû muana wa Matanaya uvua ubambuluisha, bualu bavua bangata bantu aba bu bantu ba kueyemena. Bobu ke bavua ne mudimu wa kuabanyina bana babu bintu.

14 Umvuluke koku,+ wewe Nzambi wanyi, bua bualu ebu, ne kukupudi bienzedi bianyi bia dinanga dia lulamatu bindi muenze bua nzubu wa Nzambi wanyi ne midimu ya nzubu eu.*+

15 Mu matuku au ngakamona bantu mu Yuda badiatakaja tumuma tua mvinyo mu bikaminu bia mvinyo dituku dia Nsabatu,+ balua ne mishiki ya ntete, bayiteka pa mpunda, ne balua ne mvinyo, tumuma tua mvinyo, mfigi, ne majitu a mishindu yonso mu Yelushalema dituku dia Nsabatu.+ Nunku ngakabadimuija bua kabikadi bapanyisha bintu dituku adi to.* 16 Bena Tulo bavua basombele mu tshimenga bavua balua ne mishipa ne bintu bia kupanyisha bia mishindu yonso, babipanyisha bantu ba mu Yuda ne mu Yelushalema dituku dia Nsabatu.+ 17 Ke meme kutandisha bantu banene ba mu Yuda, meme kubambila ne: “Mbualu bubi kayi ebu bunudi nuenza, nunyanga too ne dituku dia Nsabatu? 18 Ebu ki mbualu buvua bankambua benu benze, kuenzabi ne: Nzambi wetu atume dikenga dionso edi kutudi ne kudi tshimenga etshi anyi? Mpindieu nudi nukumbajija tshiji ku tshiji tshikole tshikuatshila Isalele pa kunyanga Nsabatu.”+

19 Nunku diakamue pavua ku mêsu kubangishe difiika ku biibi bia Yelushalema kumpala kua Nsabatu, ngakatuma dîyi bua bakange biibi. Ngakamba kabidi bua ne: kabavua ne bua kubikangula too ne pavua Nsabatu ujika, ne ngakimanyika bamue ba ku bambuluishi banyi meme muine ku biibi bua muntu kabuedi ne bujitu nansha bumue dituku dia Nsabatu to. 20 Nunku bangenda mushinga ne bapanyi ba bintu bia mishindu yonso bakatshishila pambelu pa Yelushalema musangu umue anyi ibidi. 21 Pashishe ngakabadimuija, meme kubambila ne: “Bua tshinyi nudi nutshishila kumpala kua tshimanu? Nuenu benze kabidi nunku, nennuipate ku bukole.” Kubangishila anu ku dîba adi kabakalua kabidi dituku dia Nsabatu to.

22 Meme kuambila kabidi bena Lewi ne: bavua ne bua kuikala ne tshibidilu tshia kudikezula, kulua ne kulama ku biibi bua kulama dituku dia Nsabatu dinsantu.+ Wewe Nzambi wanyi, umvuluke koku kabidi bua bualu ebu, ne undejaku luse bilondeshile dinanga diebe dia lulamatu dia bungi.+

23 Mu matuku au ngakamona kabidi bena Yuda bavua basele* bakaji+ bena Ashedodo,+ bena Amona, ne bena Moaba.+ 24 Tshia bibidi tshia bana babu balela tshivua tshiakula tshiena Ashedodo ne tshia bibidi tshikuabu tshiakula muakulu wa bisamba bishilashilangane, kadi nansha umue wa kudibu kavua mumanye mua kuakula muakulu wa bena Yuda to. 25 Nunku ngakabatandisha, meme kubela mulawu, kututa bamue ba ku bantu balume abu,+ kubatula nsuki ne meme kubatshipisha mu dîna dia Nzambi ne: “Kanuena ne bua kufila bana benu ba bakaji kudi bana babu ba balume, ne kanuena ne bua kuitaba muana wa bakaji nansha umue wa kudibu bua bana benu ba balume anyi buenu nuenu to.+ 26 Solomo mukalenge wa Isalele kavua muenze mpekatu bua bualu bua bakaji aba anyi? Munkatshi mua bisamba bia bungi kamuvua mukalenge bu yeye to;+ ne Nzambi uvua mumunange,+ ke Nzambi kumuteka mukalenge wa Isalele mujima. Kadi bakaji ba ku babende bakamufikisha too ne yeye ku dienza mpekatu.+ 27 Ki mbualu bubi menemene bua nuenu kuenza bubi bunene ebu pa kupanga lulamatu kudi Nzambi wetu ne kusela bakaji ba ku babende anyi?”+

28 Umue wa ku bana ba Yoyada+ muana wa muakuidi munene Eleyashiba+ uvua mulue muku wa Sanebalata+ muena Holona. Nunku ngakamuipata kumpala kuanyi.

29 Wewe Nzambi wanyi, ubavuluke koku, bualu mbanyange buakuidi ne tshipungidi tshia buakuidi+ ne bena Lewi.+

30 Pashishe ngakabakezula ku bukoya buonso bua kudi benyi, meme kuteka bakuidi ne bena Lewi mu midimu yabu, muntu yonso mu mudimu wende,+ 31 ne ngakalongolola bua bikale bafila nkunyi+ mu bikondo bisungula ne bua bintu bidi bikola bia kumpala.

Umvuluke koku mu mushindu muimpe* wewe Nzambi wanyi.+