MUADI
א [Alefe]*
1 Ke mudiye mpindieu mudisombele nkayende nunku, tshimenga tshivua tshiuwule tente ne bantu!+
Ke mudiye mulue bu mukaji mukamba nunku, yeye uvua ne bantu bungi tshianana munkatshi mua bisamba!+
Yeye uvua mukalenge mukaji munkatshi mua provense,* ke mudibu bamuenzeje mudimu mukole ku bukole nunku!+
ב [Bete]
2 Udi udila bikole butuku,+ ne binsonji biende bidi bibuikila matama ende.
Kakuena muntu nansha umue wa mu bananga bende udiku bua kumusamba.+
Bena diende bonso mbamutungile tshitungu;+ mbalue bena lukuna bende.
ג [Gimele]
3 Yuda mmukuata muya nende ku babende+ mu dikenga ne mu bupika bukole.+
Udi ne bua kusombela munkatshi mua bisamba;+ kena upeta muaba wa kuikishila.
Bamukengeshi bende bonso mbamukuatshile mu dikenga diende.
ד [Dalete]
4 Njila ya Siona idi idila, bualu muntu nansha umue kena ulua mu tshibilu.+
Biibi bionso bidi munda mutupu;+ bakuidi bende badi batua mikemu.
Nsongakaji yende itshidi tumama idi inyingalala, ne yeye udi mu kanyinganyinga kakole.
ה [He]
5 Baluishi bende badi mpindieu mfumuende;* bena lukuna bende kabena basamisha mutu.+
Bualu Yehowa mmumutumine kanyinganyinga bua dishipa diende dia mikenji dia bungi.+
Bana bende mbakuatshibue batungunuja kumpala kua muluishi.+
ו [Waw]
6 Bulenga buonso mbumbuke kudi muana wa bakaji wa Siona.+
Bakokeshi bende badi bu ngulungu idi kayiyi mipete mpata wa kudiila,
Ne idi yenda mizengele kumpala kua udi uyipata.
ז [Zayine]
7 Mu matuku a dikenga diende ne dipangila diende dia muaba wa kusombela, Yelushalema udi uvuluka
Bintu bionso bitambe buimpe bivuaye nabi mu matuku a kale.+
Pavua bantu bende bakuluke mu tshianza tshia muluishi ne pavuaye kayi ne wa kumuambuluisha,+
ח [Hete]
8 Yelushalema mmuenze mpekatu bibi bitambe.+
Ke bualu kayi mmulue tshintu tshia muengu.
Bantu bonso bavua bamutumbisha badi mpindieu bamumona bu tshintu tshia kupetula, bualu mbamone butaka buende.+
Yeye muine udi utua mikemu+ ne udi utangila kua tshianana bua bundu.
ט [Tete]
9 Bukoya buende budi mu muntumpu wende.
Kavua mutume meji ku matuku ende atshilualua.+
Dikuluka diende divua dikemesha; kena ne muntu wa kumusamba to.
Yehowa wanyi, tangila dikenga dianyi, bualu muena lukuna mmuditumbishe.+
י [Yode]
10 Muluishi mmuteke bianza biende pa biuma biende bionso.+
Bualu Yelushalema mmumone bisamba bibuela muaba wende munsantu,+
Bantu bauvua muelele mukenji ne: kabena ne bua kubuela mu tshisumbu tshiebe.
כ [Kafe]
11 Bantu bende bonso badi batua mikemu; badi bakeba biakudia.+
Mbafile bintu biabu bia mushinga bua tshintu tshia kudia, anu bua kushala ne muoyo.*
Tangila, Yehowa wanyi, ne mona mundi mulue bu mukaji* udi kayi ne mushinga.
ל [Lamede]
12 Kabienaku binuambila bualu, nuenu bonso badi bapita mu njila anyi?
Tangilayi, numone!
Kudiku dikenga didi bu dikenga divuabu bantumine,
Divua Yehowa munkengeshe nadi mu dituku dia tshiji tshiende tshikole anyi?+
מ [Meme]
13 Kumbukila muulu, yeye mmutume kapia mu mifuba yanyi,+ ne udi utekesha mufuba ne mufuba wonso.
Mmuadijile makasa anyi bukondo; mmungenzeje bua kukudimuka, kupingana.
Mmumvuije mukaji udi mushale bianza bitupu.
Ndi nsama dituku dijima.
נ [Nune]
14 Matomboka anyi mmasuika bu mutshi wa tshikokedi, mmasuikakaja pamue bikole kudi tshianza tshiende.
Mmateka pa nshingu wanyi, ne bukole buanyi mbushikile.
Yehowa mmumfile mu tshianza tshia bantu bandi tshiyi mua kutua tshiadi.+
ס [Sameke]
15 Yehowa mmumbushe balume bonso ba bukole munkatshi muanyi.+
Mmumbikidile tshisumbu tshia bantu bua kunduisha, bua kuzaza bansongalume banyi.+
Yehowa mmudiatakaje muana wa bakaji wa Yuda utshidi kamama mu tshikaminu tshia mvinyo.+
ע [Ayine]
16 Ndi ndila bua malu aa;+ mêsu anyi adi apuekesha binsonji.
Bualu muntu uvua mua kunsamba peshi kunkolesha* udi kule nanyi.
Bana banyi badi bianza bitupu, bualu muena lukuna wabu mmubatshimune.
פ [Pe]
17 Siona mmuolole bianza biende;+ kena ne muntu wa kumusamba to.
Yehowa mmutumine baluishi ba Yakoba bonso badi bamunyunguluke dîyi bua kumuluisha.+
Yelushalema mmulue kudibu bu tshintu tshia muengu.+
צ [Tesade]
18 Yehowa mmuakane,+ bualu mêyi ende matuma ke andi* mutombokele.+
Telejayi, nuenu bukua bantu buonso, ne tangilayi dikenga dianyi.
Nsongakaji yanyi itshidi tumama ne nsongalume yanyi mmikuata miya nayi.+
ק [Kofe]
19 Ndi mubikile bananga banyi, kadi mbangele mâyi ku makasa.+
ר [Leshe]
20 Tangila, Yehowa wanyi, bualu ndi mu dikenga dikole.
Bia munda* bianyi bidi bivunduluka.
Muoyo wanyi mmukudimuke munda muanyi, bualu ndi mukutombokele bikole.+
Pambelu muele wa mvita udi ushipa bantu;+ munda mua nzubu mudi bu lufu.
ש [Shine]
21 Bantu mbumvue mikemu yanyi; kakuena muntu wa kunsamba.
Bena lukuna banyi bonso mbumvue lumu lua dikenga dianyi.
Badi ne disanka, bualu wewe uvua muditume.+
Kadi wewe neutume dituku diuvua mumanyishe,+ pikalabu mua kulua bu meme.+
ת [Taw]
22 Mibi yabu yonso ilue kumpala kuebe, ne ubenzele malu makole,+
Anu bu muuvua mungenzele malu makole bua matomboka anyi onso.
Bualu mikemu yanyi idi ya bungi, ne muoyo wanyi udi usama.
א [Alefe]
2 Ke mudi Yehowa mubuikile muana wa bakaji wa Siona mu ditutu dia tshiji tshiende nunku!
Mmumbushe bulengele bua Isalele mu diulu mubuimanshe pa buloba.+
Ki mmuvuluke tshitekelu tshiende tshia makasa+ mu dituku dia tshiji tshiende.
ב [Bete]
2 Yehowa mmumine miaba yonso ya kusombela ya Yakoba kakuyi luse.
Bua tshiji tshiende mmupule miaba mikolesha ya muana wa bakaji wa Yuda.+
Mmupuekeshe panshi ne mmunyange bukalenge+ ne bakokeshi bende.+
ג [Gimele]
3 Bua bukole bua tshiji mmukose bukole buonso bua* Isalele.
Uvua mumbushe tshianza tshiende tshia balume pavua muena lukuna musemene,+
Ne wakatungunuka ne kutema mu Yakoba bu kapia kavua koshe bintu bionso bivua kumpenga kuaku.+
ד [Dalete]
4 Mmunane* buta buende bua mikete bu muena lukuna; tshianza tshiende tshia balume ntshiteka bimpe anu bu muluishi;+
Udi utungunuka ne kushipa bonso badi basankisha mêsu.+
Ne udi witshikija tshiji tshiende bu kapia+ mu ntenta wa muana wa bakaji wa Siona.+
ה [He]
5 Yehowa mmulue bu muena lukuna;+
Yeye mmumine Isalele.
Mmumine bibumba biende bionso;
Mmubutule miaba yende mikolesha yonso.
Ne udi uvudija madilu ne muadi kudi muana wa bakaji wa Yuda.
ו [Waw]
6 Udi wenzela katanda kende malu ne tshikisu+ bu mutanda mu budimi.
Mmuimanyike* tshibilu tshiende.+
Yehowa mmuenze bua bapue tshibilu ne nsabatu muoyo mu Siona,
Ne bua tshiji tshiende tshikole kena wangata mukalenge ne muakuidi ne mushinga to.+
ז [Zayine]
7 Yehowa mmulekele tshioshelu tshiende;
Mmubenge muaba wende munsantu.+
Mmufile bimanu bia bibumba bikolesha bia Siona mu tshianza tshia muena lukuna.+
Mbabandishe mêyi abu mu nzubu wa Yehowa+ bu mu dituku dia tshibilu.
ח [Hete]
8 Yehowa mmupangadije bua kubutula tshimanu tshia muana wa bakaji wa Siona.+
Mmuolole nshinga wa kupima nende.+
Ki mmukande tshianza tshiende bua kutuma kabutu.*
Ne udi udidisha tshibumba
tshikole ne tshimanu muadi.
Buonso buabi mbitekesha.
ט [Tete]
9 Biibi biende mbibuele mu buloba.+
Yeye mmubutule ne mmutshibule milonda yende.
Mukalenge wende ne bakokeshi bende badi munkatshi mua bisamba.+
Kakuena mukenji nansha umue;* nansha baprofete bende kabena bapeta tshikena kumona nansha tshimue tshia kudi Yehowa.+
י [Yode]
10 Bakulu ba muana wa bakaji wa Siona mbasombe panshi bapuwe talalaa.+
Badi bela lupuishi mu mitu yabu ne mbavuale bilamba bikayabale.+
Nsongakaji itshidi tumama ya Yelushalema mminyike mitu yayi mitue panshi.
כ [Kafe]
11 Mêsu anyi mmatshioke ne dipuekesha dia binsonji.+
Bia munda* muanyi bidi bivunduluka.
Mutshima wanyi mmupongoloke panshi bua dikuluka dia muana wa bakaji* wa tshisamba tshietu,+
Bua bana ne bana ba mu maboko badi bafua tshipuka mu miaba ya tshinsangansanga ya mu tshimenga.+
ל [Lamede]
12 Badi batungunuka ne kukonka bamamuabu ne: “Ntete ne mvinyo bidi penyi?”+
Padibu bafua tshipuka bu muntu mutapa mputa mu miaba ya tshinsangansanga ya mu tshimenga,
Padibu bakuula muoyo* mu maboko a bamamuabu.
מ [Meme]
13 Ntshinyi tshindi mua kuangata bu ntemu,
Anyi ndi mua kukufuanyikija ne tshinyi, wewe muana wa bakaji wa Yelushalema?
Ntshinyi tshindi mua kukufuanyikija natshi bua kukusamba, wewe muana wa bakaji wa Siona utshidi kamama?
Bualu ditshibuka diebe ndinene anu bu mbuu.+ Nnganyi udi mua kukuondopa?+
נ [Nun]
14 Bikena kumona bivua baprofete bebe bakumuenene bivua bia dishima ne bia patupu,+
Kabavua bele tshilema tshiebe patoke bua kumona mua kutshingulula dikuatshibua diebe,+
Kadi bakatungunuka ne kukumuenena malu a dishima ne adi apambuisha.+
ס [Samekh]
15 Bantu bonso badi bapita ne njila badi batuta bianza biabu ne dipetu.+
Badi bela muonzo bakema+ ne bakupa mitu bua bualu bua muana wa bakaji wa Yelushalema, bamba ne:
“Etshi ke tshimenga tshivuabu bamba bua bualu buatshi ne: ‘Ntshilengele tshishiki, disanka dia buloba buonso’ anyi?”+
פ [Pe]
16 Bena lukuna bebe bonso mbakukanguile mukana muabu.
Badi bela muonzo ne badia mênu abu, bamba ne: “Tudi bamumine.+
Edi ke dituku dituvua bindile!+ Diafiki, ne tudi badimone!”+
ע [Ayine]
17 Yehowa mmuenze tshivuaye muelele meji;+ mmukumbaje dîyi diende,+
Bualu buvuaye mutumine dîyi katshia ku kale.+
Mmubumbule kakuyi luse.+
Mmulekele muena lukuna usanka bua bualu buebe; mmubandishe bukole bua* baluishi bebe.
צ [Tesade]
18 Mioyo yabu idi ididila Yehowa ne: Wewe tshimanu tshia muana wa bakaji wa Siona.
Binsonji bipueke bu mâyi a nkuaka mukole munya ne butuku.
Kuikishi nansha kakese, kupeshi dîsu* diebe dikisha to.
ק [Kofe]
19 Juka! Dila butuku, ku ntuadijilu kua bilu.
Pumuna muoyo webe bu mâyi kumpala kua mpala wa Yehowa.
Ela bianza biebe muulu kudiye bua mioyo* ya bana bebe,
Badi bafua tshipuka mu disangu dionso dia musesu* bua tshiyole tshia nzala.+
ר [Leshe]
20 Yehowa wanyi, tangila umone yeye uudi muenzele malu makole.
Bakaji badi ne bua kutungunuka ne kudia ndelanganyi yabu,* bana babu balela anyi?+
Peshi bakuidi ne baprofete badi ne bua kushipibua mu muaba munsantu wa Yehowa anyi?+
ש [Shine]
21 Muana wa balume ne muntu mukulumpe mbalale panshi bafue mu misesu.+
Bansongakaji banyi batshidi tumama ne bansongalume banyi mbakuluke ku muele wa mvita.+
Wewe udi mushipe mu dituku dia tshiji tshiebe; udi mutape kakuyi luse.+
ת [Taw]
22 Udi ubikidisha buôwa bukole ku nseke yonso bienze bu mu dituku dia tshibilu.+
Mu dituku dia tshiji tshikole tshia Yehowa, muntu nansha umue kavua munyeme anyi mupanduke;+
Muena lukuna wanyi uvua mubutule bantu bamvua mulele* ne mukoleshe.+
א [Alefe]
3 Ndi muntu udi mumone dikenga bua mulangala wa tshiji tshiende.
2 Yeye mmungipate ne udi ungendesha mu mîdima, ki mmu butoke nansha.+
3 Bushuwa, misangu ne misangu yeye udi unduisha ne tshianza tshiende dituku dijima.+
ב [Bete]
4 Mmunyanyishe mubidi wanyi ne dikoba dianyi;
Mmutshibule mifuba yanyi.
5 Mmuntshintshimike; mmunnyunguluke ne mulungu mubi+ ne ntatu.
6 Mmunsombeshe mu miaba ya mîdima ku bukole, bu bantu bavua bafue kale.
ג [Gimele]
7 Mmunnyungulule ne tshimanu, bua tshinyemi to;
Mmunsuike ne nkanu ya bujitu ya tshiamu tshia mitaku.+
8 Kabidi, pandi ngela lubila bua kulomba diambuluisha ne dishikila, yeye udi ubenga* disambila dianyi.+
9 Mmujike njila yanyi ne mabue masonga;
Mmuvuije bibeba bianyi bikonyangale.+
ד [Dalete]
10 Udi ungalamina bu nyama wa urse, bu ntambue udi mubutame.+
12 Mmunane* buta buende bua mikete, ne udi ungimanyika bu tshintu tshia kuasa mukete.
ה [He]
13 Mmutubule tuonyi tuanyi ne mikete ya* mu nsapu wende wa mikete.
14 Ndi mulue tshintu tshia kusekabu kudi bukua bantu buonso, tshia kuimbabu mu musambu wabu dituku dijima.
15 Mmunguwuje tente ne bintu bia bululu ne mmungukutshishe ne mutshi wa bululu.+
ו [Waw]
16 Udi utshibula mênu anyi ne nsoka;
Udi wenza bua nditunye mu butu.+
17 Udi umbusha ditalala kundi;* ndi mupue bualu buimpe muoyo.
18 Nunku ndi ngamba ne: “Bulengele buanyi mbujimine, kabidi ne ditekemena dianyi kudi Yehowa.”
ז [Zayine]
19 Uvuluke dikenga dianyi ne dipangila dianyi dia muaba wa kusombela,+ mutshi wa bululu ne mulungu mubi.+
20 Bushuwa wewe* neuvuluke ne newiname pa mutu panyi.+
21 Ndi mvuluka bualu ebu mu muoyo wanyi; ke bualu kayi nendeje lungenyi lua kuindila.+
ח [Hete]
22 Mbua dinanga dia lulamatu dia Yehowa butudi katuyi bafike ku nshikidilu wetu,+
Bualu luse luende kalutu lushikila.+
23 Ludi lulua lupialupia dinda dionso;+ lulamatu luebe nduvule.+
24 Ndi muambe ne:* “Yehowa udi tshianyi tshitupa,+ ke bualu kayi nendeje lungenyi lua kuindila.”+
ט [Tete]
25 Yehowa udi muimpe kudi muntu udi utekemena kudiye,+ kudi muntu* udi utungunuka ne kumukeba.+
26 Mbimpe kuindila lupandu lua Yehowa+ mupuwe.*+
27 Mbimpe bua muntu ambule mutshi wa tshikokedi mu bunsonga buende.+
י [Yode]
28 Asombe nkayende ne ashale mupuwe padiye umuambikawu.+
29 Ateke mukana muende mu lupuishi mene;+ ditekemena didi mua kuikala ditshidiku.+
30 Afile ditama diende kudi muntu udi umututa; yeye ukute bipendu.
כ [Kafe]
31 Bualu Yehowa kakutubenga kashidi to.+
32 Nansha mudiye mukebeshe kanyinganyinga, yeye nealeje kabidi luse bilondeshile dinanga diende dia lulamatu divule.+
33 Bualu, bualu ebu kabuena mu muoyo wende bua kukengesha bana ba bantu anyi kubanyingalaja.+
ל [Lamede]
34 Kuzaza bena buloko bonso ba pa buloba muinshi mua makasa,+
35 Kupangisha muntu kulumbulula kuakane kumpala kua Mutambe Bunene,+
36 Kunyangila muntu tshilumbu tshiende,
Yehowa katu witaba malu a nunku to.
מ [Meme]
37 Nunku, nnganyi udi mua kuamba bualu ne kuenza bua buenzeke bikala Yehowa kayi mubutumine dîyi?
38 Mukana mua Mutambe Bunene
Kamutu mupatuka malu mabi ne malu mimpe popamue to.
39 Bua tshinyi muntu wa muoyo udi ne bua kudiabakena bua bipeta bia mpekatu wende?+
נ [Nune]
40 Tukonkononayi njila yetu ne tuyikenkete bimpe,+ ne tupinganayi kudi Yehowa.+
41 Tubandishayi mioyo yetu pamue ne bianza bietu kudi Nzambi mu diulu,+ tuamba ne:
42 “Tudi bashipe mikenji ne batomboke,+ wewe kuena mutubuikidile.+
ס [Sameke]
44 Udi mukange njila wa kufika kuudi ne ditutu, nunku disambila dietu kadiena mua kupita to.+
45 Udi utuvuija tshintu tshia kuimansha ne tshintu tshia ku diyala* munkatshi mua bukua bantu.”
פ [Pe]
46 Bena lukuna betu bonso badi batukanguila mukana muabu.+
47 Buôwa ne majimba mbilue tshietu tshitupa,+ dibutuka ne ditshibuka.+
48 Tusulu tua mâyi tudi tupatuka mu mêsu anyi bua ditshibuka dia muana wa bakaji wa bantu banyi.+
ע [Ayine]
49 Mêsu anyi adi adila kaayi alekela, kaayi ikisha,+
50 Too ne padi Yehowa utangila panshi ne umona kumbukila mu diulu.+
51 Mêsu anyi mmankebele* kanyinganyinga bua bana ba bakaji bonso ba mu tshimenga tshianyi.+
צ [Tesade]
52 Bena lukuna banyi mbandembe bu nyunyi kakuyi bualu.
53 Mbapuwishe muoyo wanyi mu dijimba; bavua batungunuke ne kungasa mabue.
54 Mâyi avua mapueke pa mutu wanyi, ne meme kuamba ne: “Kuanyi kuajiki!”
ק [Kofe]
55 Yehowa wanyi, mvua mubikidile dîna diebe mu ndondo wa dijimba.+
56 Umvua dîyi dianyi; kujiki ditshi diebe ku lubila luanyi lua dilomba diambuluisha, lua dilomba dikuatshisha.
57 Uvua musemene pabuipi dituku dimvua mukubikile. Uvua muambe ne: “Kutshinyi to.”
ר [Leshe]
58 Yehowa wanyi, wewe udi mundumbuluile tshilumbu tshianyi,* udi mukuule muoyo wanyi.+
59 Yehowa wanyi, wewe udi mumone bualu bubi budibu bangenzele; ukose koku tshilumbu tshianyi.+
60 Udi mumone disombuela diabu dionso, mayele abu onso adibu bandukila.
ש [Sine] anyi [Shine]
61 Yehowa wanyi, wewe udi mumvue bipendu biabu, mayele abu onso adibu bandukila,+
62 Mishiku ya baluishi banyi ne manunganyi abu bua bualu buanyi dituku dijima.
63 Ubatangile; padibu basomba anyi bimana, badi bangeluluila mu misambu yabu!
ת [Taw]
64 Yehowa wanyi, wewe neubafute bilondeshile bienzedi biabu.
65 Neubavuije bena mioyo mipape, bu mulawu uudi ubela.
66 Neubalondakaje mu tshiji tshiebe ne neubabutule muinshi mua diulu dia Yehowa.
א [Alefe]
4 Ke mudi or utu ubalakana mubuitshidile nunku, or mutambe buimpe!+
Ke mudibu batangalaje mabue a tshijila+ mu disangu dionso dia musesu nunku!*+
ב [Bete]
2 Bua bana ba balume ba Siona ba mushinga mukole, bavua ne bujitu bua* or mulengeja,
Mona mukadibu babangata bu milondo ya buloba,
Mudimu wa bianza bia mufumbi!
ג [Gimele]
3 Nansha mibuabua itu ipesha bana bayi dibele bua kubamusha,
Kadi muana wa bakaji wa bantu banyi mmulue muena tshikisu+ bu nyunyi ya mfiondo ya mu tshipela.+
ד [Dalete]
4 Ludimi lua muana wa ku dibele ludi lulamata mu tshilakalaka tshiende bua nyota.
Bana badi balomba diampa,+ kadi muntu nansha umue kena ubapesha tshintu.+
ה [He]
5 Bantu bavua ne tshibidilu tshia kudia biakudia bishême badi balala mu misesu bua nzala.*+
Bantu bavuabu bakoleshe bavuala bilamba bikunze+ mbupukile mishiki ya butu.
ו [Waw]
6 Dinyoka dia* muana wa bakaji wa bantu banyi ndinene kupita dinyoka bua mpekatu wa Sodoma,+
Uvuabu babutule mu katupa kakese, kakuyi tshianza tshivua mua kumuambuluisha.+
ז [Zayine]
7 Banazi bende+ bavua bakezuke kupita neje, batoke kupita mabele.
Bavua bakunzubile kupita mabue a koraye; bavua bu mabue a safire manona bimpe.
ח [Hete]
8 Tshimuenekelu tshiabu ntshilue tshifiike kupita mishila;*
Kabena bamanyika kabidi mu misesu.
Dikoba diabu ndifubidile pa mifuba yabu;+ ndilue bu lukunyi.
ט [Tete]
9 Bantu bashipa ku muele wa mvita badi bimpe kupita badi bashipa ku tshiyole tshia nzala,+
Badi banyana, badibu batubule kudi dipangila dia biakudia mu budimi.
י [Yode]
10 Bianza bia bakaji badi ne luse mbilambe bana babu bine.+
Mbalue tshiakudia tshiabu tshia madilu mu tshikondo tshia ditshibuka dia muana wa bakaji wa bantu banyi.+
כ [Kafe]
11 Yehowa mmuleje tshiji tshiende tshikole;
Mmupongolole difiika diende dia munda dikole.+
Ne udi utemesha kapia mu Siona kadi kosha bishimikidi biende.+
ל [Lamede]
12 Bakalenge ba pa buloba ne bantu bonso badi basombele mu buloba budi bumenesha biakudia kabavua bitabe
Ne: muluishi ne muena lukuna bavua mua kubuela mu biibi bia Yelushalema.+
מ [Meme]
13 Bivua bua mpekatu ya baprofete bende, bilema bia bakuidi bende,+
Bavua bele mashi a bantu bakane panshi munkatshi muende.+
נ [Nune]
14 Mbatambakane bu bampofu+ mu misesu.
Mbanyanguke ne mashi,+
Nunku muntu nansha umue kena mua kulenga bilamba biabu.
ס [Sameke]
15 Badi babela lubila bamba ne: “Umbukayi! Bakoya! Umbukayi! Umbukayi! Kanutulengi to!”
Bualu mbapange muaba wa kusombela ne badi batambakana.
Bantu mbambe munkatshi mua bisamba ne: “Kabena mua kushala netu apa to.*+
פ [Pe]
16 Mpala wa Yehowa mmubatangalaje;+
Yeye kakubatangila kabidi ne dianyisha to.
Bantu kabakunemeka bakuidi,+ kabakuanyisha bakulu to.”+
ע [Ayine]
17 Nansha mpindieu, mêsu etu mmatshioke ne dikeba diambuluisha mu tshianana.+
Tuakakeba, tuakakeba diambuluisha kudi tshisamba tshivua katshiyi mua kutupandisha.+
צ [Tesade]
18 Mbatulondakaje mu tshidia tshionso+ bua katumonyi mua kuenda mu miaba yetu ya tshinsangansanga.
Nshikidilu wetu mmusemene pabuipi; matuku etu mmajike, bualu nshikidilu wetu mmulue.
ק [Kofe]
19 Batulondakaji bavua banyema bikole kupita nyunyi ya mikanku ya muulu.+
Bavua batuipate pa mikuna; bavua batualamine mu tshipela.
ר [Leshe]
20 Mueyelu wa mu mimpempe yetu, muela manyi wa Yehowa,+ mmukuatshibue mu dijimba diabu dinene,+
Muena bualu butuvua bambe ne: “Mu mundidimbi wende netuikale ne muoyo munkatshi mua bisamba.”
ש [Sine]
21 Sanka bikole ne sangala, wewe muana wa bakaji wa Edome,+ musombe muudi musombe amu mu buloba bua Usa.
Kadi nansha wewe pebe nebakupeshe dikopo,+ ne neukuatshike ne neushiye butaka buebe patoke.+
ת [Taw]
22 Dinyoka dia tshilema tshiebe, wewe muana wa bakaji wa Siona, ndifike ku nshikidilu wadi.
Yeye kakukutuma kabidi ku babende to.+
Kadi neatume ntema yende
ku tshilema tshiebe, wewe muana wa bakaji wa Edome.
Yeye neasokolole mpekatu yebe.+
5 Yehowa wetu, vuluka bualu budi butukuate.
Tangila umone difuishibua dietu dia bundu.+
2 Bumpianyi buetu mbufidibue kudi benyi, nzubu yetu kudi bantu ba ku babende.+
3 Tudi balue bana ba nshiya katuyi ne tatu; bamamuetu badi bu bakaji bakamba.+
4 Tudi ne bua kufuta bua kunua mâyi etu tuetu,+ ne nkunyi yetu tuetu ikadi isumbibua ku makuta.
5 Badi batulondakaja badi ku nshingu yetu;
Tudi bapungile, kadi ki mbatupeshe dikisha to.+
6 Tudi tuoluela Ejipitu ne Ashû tshianza tshietu+ bua kupeta biakudia bidi bikumbane bua kudia.
7 Bankambua betu bavua benze mpekatu kabatshienaku, kadi tuetu tudi ne bua kuambula bilema biabu.
8 Bena mudimu ke badi batukokesha mpindieu; kakuena muntu wa kutudiapula mu tshianza tshiabu.
9 Tudi tulua ne biakudia bafuane kujimija muoyo* wetu+ bua muele wa mvita wa mu tshipela.
10 Dikoba dietu nditeme kapia anu bu tshikutu tshia kapia bua disuma dia nzala.+
11 Bobu mbapuekeshe bakaji ba mu Siona milongo,* nsongakaji itshidi tumama ya mu bimenga bia Yuda.+
12 Bavua balembelejile bakokeshi ku tshianza tshiabu,+ ne kabavua banemeka bakulu to.+
13 Bansongalume badi bambula mabue a mpelu a ku tshianza, ne bana ba balume badi batetuka muinshi mua majitu a nkunyi.
14 Bakulu kabatshiena kabidi ku tshiibi tshia tshimenga;+ bansongalume kabena bimba mijiki yabu.+
15 Disanka kaditshiena kabidi mu muoyo wetu, maja etu mmalue muadi.+
16 Tshifulu tshia butumbi ntshituke ku mutu kuetu. Diakabi dietu, bualu tudi benze mpekatu!
17 Bua bualu ebu muoyo wetu udi usama,+
Ne bua malu aa mêsu etu mmalue bitayitayi,+
18 Bua mukuna wa Siona udi mushale patupu;+ mpindieu mikenge idi itambakanapu.
19 Kadi wewe, Yehowa wetu, udi musombe mu nkuasa webe wa bukalenge bua kashidi.
Nkuasa webe wa bukalenge udiku ku tshipungu ne tshipungu tshia bantu.+
20 Bua tshinyi udi utupua muoyo kashidi ne utulekela mutantshi bule nunku?+
21 Utupingaje kuudi, Yehowa wetu, ne tuetu netualukile kuudi lukasa.+
Uvuije matuku etu mapiamapia bu muvua matuku a kale.+
22 Kadi wewe udi mutubenge mutubengelamu.
Udi mushale mutukuatshile tshiji tshikole.+
Nshapita 1-4 ntusala tua muadi tufunda bilondeshile dilondangana dia maleta a tshiena Ebelu.
Anyi “distrike.”
Ku mua.: “mutu wende.”
Anyi “bakasanka.”
Anyi “kupeshilula anyima bukole.”
Bakula bua Yelushalema bu badi bakula bua muntu.
Anyi “kukolesha anyima wanyi.”
Ku mua.: “mukana muende ke mundi.”
Anyi “kupeshilula anyima bukole.”
Ku mua.: “mala.”
Ku mua.: “lusengu luonso lua.”
Ku mua.: “Mmudiate.”
Anyi “Mmushipe.”
Ku mua.: “bua kumina.”
Anyi “dilongesha nansha dimue.”
Ku mua.: “mala.”
Ngakuilu wa kasala udibu bakula bua tshintu bu muntu, pamuapa bua kuleja luse.
Anyi “anyima.”
Ku mua.: “lusengu lua.”
Ku mua.: “muana wa bakaji wa dîsu diebe.”
Anyi “anyima.”
Ku mua.: “ku mutu kua misesu yonso.”
Anyi “mamuma abu.”
Anyi “mupatule ne makanda a mubidi.”
Anyi “upangisha; ukanga.”
Anyi pamuapa: “mmunshiye bu budimi bua tshilala.”
Ku mua.: “Mmudiate.”
Ku mua.: “bana ba.”
Anyi “kudi anyima wanyi.”
Anyi “anyima webe.”
Anyi “Anyima wanyi udi wamba ne.”
Anyi “anyima.”
Anyi “ne lutulu.”
Anyi “diala.”
Anyi “mmakebele anyima wanyi.”
Anyi “bilumbu bia anyima wanyi.”
Ku mua.: “ku mutu kua misesu yonso nunku!”
Anyi “bavua ne mushinga mukole bu.”
Ku mua.: “kabayi tshintu.”
Ku mua.: “tshilema tshia.”
Ku mua.: “bufiike.”
Anyi “kusombela apa bu bantu ba ku babende to.”
Anyi “anyima.”
Anyi “mbangate bakaji ba mu Siona ku bukole.”