AMOSA
1 Mêyi a Amosa,* uvua munkatshi mua bamunyi ba mikoko ba ku Tekoa,+ avuaye mupete mu tshikena kumona a bualu bua Isalele mu matuku a Uziya+ mukalenge wa Yuda ne mu matuku a Yalobama+ muana wa Yoasha,+ mukalenge wa Isalele, bidimu bibidi kumpala kua buloba kukankabu.+ 2 Yeye wakamba ne:
“Yehowa neakungule kumbukila mu Siona,
Ne yeye neabandishe dîyi diende difumina mu Yelushalema.
Mpata ya kudishila nyama ya balami ba mikoko neyidile,
Ne lusongo lua Kâmele nelume.”+
3 “Mona tshidi Yehowa wamba:
‘“Bua bienzedi bia ditomboka* bisatu bia Damaseke, ne bua binayi, tshiakushintulula bualu ebu to,
Bualu bavua bashipule Gilada ne bintu bia kushipula nabi bia tshiamu tshifiike.+
5 Nentshibule milonda ya Damaseke;+
Nembutule bantu badi basombele mu Bikata-awena
Ne muntu udi ukokesha* mu Bete-edene;
Ne bantu ba mu Sulia nebakuatshibue, nebaye nabu ku Kî,”+ ke mudi Yehowa wamba.’
6 Mona tshidi Yehowa wamba:
‘“Bua bienzedi bia ditomboka bisatu bia Gaza,+ ne bua binayi, tshiakushintulula bualu ebu to,
Bualu bavua bangate tshisumbu tshijima tshia bantu bavuabu bakuate baye nabu ku babende+ bua kubafila mu bianza bia Edome.
7 Nunku nentume kapia pa tshimanu tshia Gaza,+
Ne nekoshe bibumba biende bikolesha.
8 Nembutule bantu badi basombele mu Ashedodo,+
Ne muntu udi ukokesha* mu Ashekelona;+
Nenkudimune tshianza tshianyi bua kuluisha Ekelona,+
Ne bena Peleshete badi bashale nebafue,”+ ke mudi Mukalenge Mutambe Bunene Yehowa wamba.’
9 Mona tshidi Yehowa wamba:
‘Bua bienzedi bia ditomboka bisatu bia Tulo,+ ne bua binayi, tshiakushintulula bualu ebu to,
Bualu bavua bafile tshisumbu tshijima tshia bantu bavuabu bakuate baye nabu ku babende kudi Edome,
Ne bualu kabavua bavuluke tshipungidi tshia bana babu to.+
10 Nunku nentume kapia pa tshimanu tshia Tulo,
Ne nekoshe bibumba biende bikolesha.’+
11 Mona tshidi Yehowa wamba:
‘Bua bienzedi bia ditomboka bisatu bia Edome,+ ne bua binayi, tshiakushintulula bualu ebu to,
Bualu yeye wakalondakaja muanabu mene ne muele wa mvita,+
Ne bualu wakabenga bua kulejangana luse;
Mu tshiji tshiende, udi utungunuka anu ne kubapanda bipese bipese,
Ne udi ushala mubafiikile munda kashidi.+
13 Mona tshidi Yehowa wamba:
‘“Bua bienzedi bia ditomboka bisatu bia bena Amona,+ ne bua binayi, tshiakushintulula bualu ebu to,
Bualu bobu bavua batayishe mafu a bakaji bavua ne mafu ba mu Gilada bua kudiundisha buloba buabu.+
14 Nunku nentue tshimanu tshia Laba+ kapia,
Ne nekoshe bibumba biende bikolesha,
Kuikale lubila lua mvita mu dituku dia mvita,
Ne mvunde mu dituku dia tshipepele tshikole.
15 Nebakuate mukalenge wabu, nebaye nende ku babende pamue ne bakokeshi bende,”+ ke mudi Yehowa wamba.’
2 “Mona tshidi Yehowa wamba:
‘“Bua bienzedi bia ditomboka* bisatu bia Moaba,+ ne bua binayi, tshiakushintulula bualu ebu to,
Bualu yeye uvua muoshe mifuba ya mukalenge wa Edome bua kupeta lupemba.
2 Nunku, nentume kapia mu Moaba,
Ne nekoshe bibumba bikolesha bia Keliyota;+
Moaba neafue mu diyoyo,
Ne lubila lua mvita, ne muadi wa mpungi.+
3 Nengumbushe mfumu* munkatshi muende
Ne nenshipe bakokeshi bende bonso pamue nende,”+ ke mudi Yehowa wamba.’
4 Mona tshidi Yehowa wamba:
‘Bua bienzedi bia ditomboka bisatu bia Yuda,+ ne bua binayi, tshiakushintulula bualu ebu to,
Bualu bobu bavua babenge mukenji wa* Yehowa,
Ne bualu kabavua balame mêyi ne mikandu bianyi to;+
Kadi mashimi a muomumue avua bankambua babu balonde mmabapambuishe.+
5 Nunku, nentume kapia mu Yuda,
Ne nekoshe bibumba bikolesha bia Yelushalema.’+
6 Mona tshidi Yehowa wamba:
‘Bua bienzedi bia ditomboka bisatu bia Isalele,+ ne bua binayi, tshiakushintulula bualu ebu to,
Bualu bobu badi bapanyisha muntu muakane ku arjan,
Ne mupele ku mukolo wa sandala.+
7 Badi badiatakaja mitu ya bapuekele mu lupuishi lua buloba,+
Ne badi bajika njila wa bena bupuekele.+
Muntu ne tatuende badi balala ne muana wa bakaji umue,
Banyanga dîna dianyi dia tshijila.
8 Badi badiolola pabuipi ne tshioshelu tshionso+ pa bilamba bivuabu bakuate bu tshieya tshia tshintu tshisomba;+
Ne mvinyo udibu banua mu nzubu* wa nzambi yabu mmupetela kudi bantu bavuabu bakosele bibawu.’
9 ‘Kadi meme ke uvua mubutule muena Amole kumpala kuabu,+
Uvua mule bu mitshi ya sedre ne uvua ne bukole bu mitshi ya nsanga;
Mvua mubutule bimuma biende kuulu ne miji yende kuinshi.+
10 Mvua munupatule mu buloba bua Ejipitu,+
Ne munuendeshe mu tshipela bidimu 40,+
Bua kuangata buloba bua muena Amole.
11 Ngakajula bamue ba ku bana benu ba balume bu baprofete+
Ne bamue ba ku bansongalume benu bu Banazi.+
Kabiena nanku anyi, nuenu bantu ba Isalele?’ ke mudi Yehowa wamba.
12 ‘Kadi nuvua batungunuke ne kupesha Banazi mvinyo bua kunua,+
Ne nuvua batumine baprofete dîyi ne: “Kanuena ne bua kuamba dîyi dia buprofete to.”+
13 Nunku nennuzaze mu muaba wenu,
Anu bu mudi ditempu didi diuwuja ne ntete mikosa dizaza bintu bidi muinshi muadi.
14 Muena lubilu lukole kakuikala ne muaba wa kunyemena,+
Muena bukole kakulama bukole buende,
Ne muena mvita nansha umue kakupandisha muoyo* wende.
15 Muedi wa mikete kakutua makasa ende panshi,
Muntu udi ne lubilu ku makasa kakupanduka,
Ne mubandi wa pa kabalu kakupandisha muoyo* wende.
16 Too ne muena dikima dikole* munkatshi mua bena mvita
Neanyeme butaka dituku adi,’+ ke mudi Yehowa wamba.”
3 “Telejayi dîyi edi didi Yehowa muambe bua bualu buenu, nuenu bantu ba Isalele, bua bualu bua dîku dijima dimvua mupatule mu buloba bua Ejipitu:
2 ‘Nuenu nkayenu ke bandi mumanye ku mêku onso a pa buloba.+
Ke bualu kayi nennunyoke bua bilema bienu bionso.+
3 Bantu babidi badiku mua kuenda pamue bikalabu kabayi bumvuangane bua kutuilangana* anyi?
4 Ntambue neakungule muitu padiye kayi mukuate tshiakudia anyi?
Muana wa ntambue* neadile ku buina buende padiye kayi mukuate tshintu anyi?
5 Nyunyi neakuluke mu buteyi panshi padiku kakuyi buteyi bumuelela* anyi?
Buteyi budiku mua kupawuka panshi padibu kabuyi bukuate tshintu anyi?
6 Padibu bela mpungi mu tshimenga, bantu kabena bakanka anyi?
Dikenga diodi dikuate tshimenga, ki n’Yehowa udi muenze anyi?
7 Bualu Mukalenge Mutambe Bunene Yehowa kakuenza bualu
Pikalaye kayi muanji kusokolola bualu buende busokoka kudi bena mudimu bende baprofete+ to.
8 Ntambue mmukungule!+ Nnganyi wabenga kutshina?
Mukalenge Mutambe Bunene Yehowa mmuakule! Nnganyi wabenga kuamba dîyi dia buprofete?’+
9 ‘Manyishayi bualu ebu pa bibumba bikolesha bia Ashedodo
Ne pa bibumba bikolesha bia mu buloba bua Ejipitu.
Ambayi ne: “Disangishayi pamue bua kuluisha mikuna ya Samalea;+
Monayi kayumbayumba munkatshi muende
Ne didiangana bintu ku mashimi munda muende.+
10 Bualu ki mbamanye mua kuenza tshidi tshiakane,” ke mudi Yehowa wamba,
“Bobu badi babuta tshikisu ne kabutu mu bibumba biabu bikolesha.”’
11 Nunku, mona tshidi Mukalenge Mutambe Bunene Yehowa wamba:
‘Muluishi neanyunguluke buloba ebu,+
Yeye neanumbushe bukole buenu,
Ne nebapawule bibumba bienu bikolesha.’+
12 Mona tshidi Yehowa wamba:
‘Anu mudi mulami wa mikoko udiapula mikolo ibidi anyi tshipese tshia ditshi mukana mua ntambue,
Ke muadiapulabu bantu ba Isalele,
Bobu badi basombe mpindieu mu Samalea pa malalu mimpe bikole ne pa bintu bimpe bia kulala.’*+
13 ‘Umvuayi ne dimuijayi* nzubu wa Yakoba,’ ke mudi Mukalenge Mutambe Bunene Yehowa, Nzambi wa biluilu wamba.
14 ‘Bualu dituku dindi nnyoka Isalele bua matomboka ende onso,*+
Nennyoke kabidi bioshelu bia Betele;+
Nebakose nsengu ya ku tshioshelu, ne neyikuluke panshi.+
15 Nenngupule nzubu wa mu muvu wa mashika makole* pamue ne nzubu wa mu muvu wa luya lukole.’*
4 “Umvuayi dîyi edi, nuenu ngombe ya mu Bashana,
Idi pa mukuna wa Samalea,+
Nuenu bakaji badi bashima bantu bapuekele+ bua kubadia bintu ne bazaza bapele,
Badi bambila babayabu* ne: ‘Tutuadilayi tshia kunua!’
2 Mukalenge Mutambe Bunene Yehowa mmuditshipe mu tshijila tshiende ne:
‘“Monayi! Matuku adi alua
anubandishaye muulu ne ndobo wa basayi ba minyinyi
Ne abandishaye bashadile ba kunudi ne ndobo ya mishipa.
3 Nenupatukile pa masoso a mu tshimanu, muntu ne muntu mutangile anu kumpala;
Ne nebanuimanshe mu Hâmona,” ke mudi Yehowa wamba.’
5 Oshayi mulambu wa kusakidila nawu wa diampa diela luevene;+
Manyishayi ne dîyi dikole bua milambu yenu ya budisuile!
Bualu ke tshinudi banange bua kuenza, nuenu bantu ba Isalele,’ ke mudi Mukalenge Mutambe Bunene Yehowa wamba.
6 ‘Kadi meme, ngakasukula biakudia ku mênu enu* mu bimenga bienu bionso
Ne ngakenza bua diampa dipangike mu nzubu yenu yonso;+
Kadi kanuvua bapingane kundi,’+ ke mudi Yehowa wamba.
7 ‘Ngakanupala kabidi mvula ngondo isatu kumpala kua dinowa;+
Ngakalokesha mvula mu tshimenga tshimue kadi tshiakamulokesha mu tshimenga tshikuabu.
Tshitupa tshimue tshia buloba tshivua tshipeta mvula,
Kadi tshitupa tshikuabu tshia buloba tshivua katshiyi ne mvula tshiakuma.
8 Bantu ba mu bimenga bibidi anyi bisatu bavua baye ku tshimenga tshimue batetuka bua kunua mâyi,+
Kadi kabakamana nyota;
Kadi kanuvua bapingane kundi,’+ ke mudi Yehowa wamba.
9 ‘Ngakanukuma ne luya lukole ne disama dia mitshi.+
Nuakavudija madimi enu ne madimi enu a tumuma tua mvinyo,
Kadi mpasu yakadia mitshi yenu ya mfigi ne mitshi yenu ya olive;+
Kadi kanuvua anu bapingane kundi,’+ ke mudi Yehowa wamba.
10 ‘Ngakatuma tshipupu munkatshi muenu bu tshia mu Ejipitu.+
Ngakashipa bansongalume benu ne muele wa mvita+ ne ngakakuata tubalu tuenu.+
Ngakabandisha mupuya mubole wa mu bitudilu bienu mu mimpempe yenu;+
Kadi kanuvua bapingane kundi,’ ke mudi Yehowa wamba.
11 ‘Ngakakebesha kabutu munkatshi muenu
Bu kabutu ka kudi Nzambi ka Sodoma ne Amola.+
Nuvua bu lukunyi lupatula mu kapia;
Kadi kanuvua bapingane kundi,’+ ke mudi Yehowa wamba.
12 Nanku, atshi ke tshingakuenzela, wewe Isalele.
Bu mudi tshingakuenzela tshikale nunku,
Dilongolola bua kutuilangana ne Nzambi webe, wewe Isalele.
13 Bualu mona! yeye ke uvua muenze mikuna+ ne mufuke lupepele;+
Yeye udi wambila muntu tshidi ngenyi Yende,
Udi ukudimuna dinda dilua mîdima,+
Ne udi wendela miaba mitumbuke ya pa buloba;+
Yehowa Nzambi wa biluilu ke dîna diende.”
5 “Umvuayi dîyi edi dindi ngamba bua bualu buenu bu kasala ka muadi,* nuenu ba mu nzubu wa Isalele:
2 ‘Nsongakaji utshidi kamama, Isalele, mmukuluke;
Kena mua kujuka kabidi to.
Mmulekela mu buloba buende;
Kakuena muntu wa kumujula.’
3 “Bualu mona tshidi Mukalenge Mutambe Bunene Yehowa wamba:
‘Tshimenga tshidi tshipatuka ne bantu tshinunu netshishale ne bantu lukama;
Ne tshidi tshipatuka ne bantu lukama netshishale ne bantu dikumi, bua nzubu wa Isalele.’+
4 “Bualu mona tshidi Yehowa wambila nzubu wa Isalele:
‘Nkebayi, nushale ne muoyo.+
5 Kanukebi Betele,+
Kanuyi ku Gilegala+ anyi kanuyi ku Bê-sheba,+
Bualu nebakuate Gilegala bushuwa ne nebaye nende ku babende,+
Ne Betele nealue tshintu tshia tshianana.*
6 Kebayi Yehowa, nushale ne muoyo,+
Bua yeye kalu kutayika bu kapia pa nzubu wa Jozefe,
Kosha Betele, kakuyi muntu wa kukajima.
8 Yeye uvua muenze tshisumbu tshia mitoto tshia Kima* ne tshisumbu tshia mitoto tshia Kezila,*+
Yeye udi ukudimuna mîdima mikole ilua dinda,
Yeye udi uvuija munda munya mufiike anu bu butuku,+
Yeye udi ubikidisha mâyi a mbuu
Bua kuapongolola pa mutu pa buloba,+
Yehowa ndîna diende.
9 Yeye neatumine muntu wa bukole kabutu,
Ubutula miaba mikolesha.
10 Bobu badi bakina bantu badi babelangana ku tshiibi tshia tshimenga,
Ne badi bapetula bantu badi bamba bulelela.+
11 Bu munudi nuenzeja mupele bua kufila mulambu wa budimi*
Ne nuangata ntete yende bu mulambu,+
Kanuakutungunuka ne kusomba mu nzubu ya mabue masonga inudi bibake+
Anyi kunua mvinyo wa mu madimi matambe buimpe a tumuma tua mvinyo anudi badime to.+
12 Bualu ndi mumanye bungi bua matomboka enu*
Ne bunene bua mpekatu yenu,
Nudi nutatshisha bantu bakane,
Nuangata mbuejilu,*
Ne nuvila manême a bapele
mu tshiibi tshia tshimenga.+
13 Nunku, badi ne busunguluji nebashale bapuwe tshikondo atshi,
Bualu netshikale tshikondo tshia dikenga.+
Nunku, Yehowa Nzambi wa biluilu udi mua kuikala nenu,
Anu bu munudi nuamba ne: udi nenu.+
Bumue Yehowa Nzambi wa biluilu
Nealeje bashadile ba Jozefe luse.’+
16 “Nunku, mona tshidi Yehowa Nzambi wa biluilu, Yehowa, wamba:
‘Nekuikale diela kabobo ka muadi mu miaba yonso ya tshinsangansanga,
Ne mu njila yonso, bobu nebambe ne: “Aka, aka!”
Bobu nebabikile babidime bua kudila
Ne badidi ba muadi bapiluke bua kuela kabobo ka muadi.’
17 ‘Nekuikale diela kabobo ka muadi mu budimi buonso bua tumuma tua mvinyo;+
Bualu nempitshile munkatshi muebe,’ ke mudi Yehowa wamba.
18 ‘Diakabi dikale kudi badi bajinga dituku dia Yehowa bikole!+
Nunku, dituku dia Yehowa nedikale tshinyi buenu nuenu?+
Nedikale mîdima, kadiakuikala butoke+ to.
19 Nedikale bu muntu udi unyema ntambue kadi utuilangana ne nyama wa urse,
Ne padiye ubuela mu nzubu muende ne ushindikila tshianza tshiende ku tshimanu, nyoka udi umusuma.
20 Dituku dia Yehowa kadiakuikala mîdima kadiyi ne butoke anyi?
Kadiakuikala mifitu kadiyi ne bukenke anyi?
21 Ndi nkina, ndi mpetula bibilu bienu,+
Ne tshiena nsanka bua dipembu dia masangisha enu a tshijila nansha.
22 Nansha nuenu bandambule milambu ya kuosha mijima ne milambu ya dipa,
Tshiakusanka bua bintu ebi to;+
Ne tshiakuanyisha milambu yenu ya diumvuangana ya nyama ya manyi to.+
23 Umbushayi mutoyi wa misambu yenu kundi;
Ne tshiumvu mijiki ya biombelu bienu bia nshinga.+
24 Kulumbuluisha kuakane kupueke bu mâyi,+
Ne buakane bu kasulu kadi kapueka anu kupueka.
25 Nuvuaku bantuadile milambu ne milambu ya dipa,
Nuenu nzubu wa Isalele, mu bidimu abi 40 mu tshipela anyi?+
26 Mpindieu nenuye ne mukalenge wenu Sakuta ne Kayiwana,*
Mpingu yenu, mutoto wa nzambi wenu, binuvua badienzele,
27 Ne nennutume ku babende bakuatshibue dia muamua dia Damaseke,’+ ke mudi yeye udi ne dîna ne: Yehowa Nzambi wa biluilu wamba.”+
6 “Diakabi dikale kudi bantu badi basombe talalaa* mu Siona,
Kudi badi badiumvua mu bukubi mu mukuna wa Samalea,+
Bantu banene ba mu bantu ba mushinga ba bisamba,
Kudibu ke kudi nzubu wa Isalele ulua!
2 Sambulukayi nuye ku Kalene, numone.
Umbukayi kuoku aku nuye ku Hamate munene,+
Ne puekayi ku Gata wa bena Peleshete.
Bimenga ebi bidiku bimpe kupita makalenge* aa anyi?
Peshi buloba buabu budiku bunene kupita buenu anyi?
4 Bobu badi balala pa malalu a mibanga+ ne badibaala pa bintu bia kulala,+
Badia bimpanga bia mu tshisumbu tshia mikoko ne bana ba ngombe* ba manyi;+
5 Badi basaka misambu ku tshiona tshia lunzenze,*+
Ne badi badienzela biombelu bia mijiki bu Davidi;+
6 Badi banuina mvinyo mu bitonga+
Ne badi badilaba mafuta matambe buimpe.
Kadi kabena baditatshisha bua* dikenga dia Jozefe to.+
7 Nunku, nebabakuate kuya nabu ku babende+ bikale kumpala kua bakuatshibue bakuabu,
Ne bisankasanka bia bavua badibaale nebitue ku ndekelu.
8 ‘Mukalenge Mutambe Bunene Yehowa mmuditshipe mu dîna diende,’*+ ke mudi Yehowa Nzambi wa biluilu wamba,
‘“Tshiena musue lutambishi lua Yakoba,+
Ndi nkina bibumba biende bikolesha,+
Ne nemfile tshimenga etshi ne bidi biuwulamu mu bianza bia baluishi batshi.+
9 “‘“Biashiyabu bantu dikumi mu nzubu umue, nebafue pabu. 10 Mulela wa muntu* nealue bua kubapatula ne kubosha umue ku umue. Yeye neapatule mifuba yabu mu nzubu; pashishe neambile muntu udi mu bibambalu bia munda mua nzubu ne: ‘Nudi ne muntu mukuabu muntu amu anyi?’ Yeye neambe ne: ‘Muntu kenamu!’ Pashishe yeye neambe ne: ‘Puwa! Bualu edi ki ndîba dia kutela dîna dia Yehowa nansha kakese.’”
11 Bualu Yehowa ke udi utuma dîyi,+
Ne yeye neupule nzubu munene, umuvuija tshibuwa,
Ne nzubu mukese, umuvuija mabuwa mabuwa.+
12 Tubalu tutu tunyemena pa mukuna wa dibue anyi?
Peshi muntu udi mua kudimapu ne ngombe anyi?
Bualu nudi bavuije kulumbuluisha kuakane mutshi wa mulungu,
13 Nudi nusanka bua bualu bua patupu,
Ne nudi nuamba ne: “Katuena balue bantu ba bukole* ku makanda etu tuetu anyi?”+
14 Nunku, nuenu ba mu nzubu wa Isalele, nennutumine tshisamba,’+ ke mudi Yehowa Nzambi wa biluilu wamba,
‘Nebanukengeshe kumbukila ku Lebo-hamate*+ too ne ku Kasulu ka tshilonda nkoka* ka ku Alabâ.’”
7 Mona tshivua Mukalenge Mutambe Bunene Yehowa mundeje: Tangila! Yeye wakenza tshisumbu tshia mpasu pavua bia pa madimi bia ndekelu* bituadije kutoloka. Ebi bivua bia pa madimi bia ndekelu panyima pa bamane kukosa bisonsa bia mukalenge. 2 Pakajikija tshisumbu tshia mpasu atshi kudia bisonsa bia mu buloba ebu, ngakamba ne: “Mukalenge Mutambe Bunene Yehowa bafuila koku luse!+ Mmunyi mudi Yakoba mua kushala ne muoyo?* Bualu yeye udi mutekete!”+
3 Nunku, Yehowa wakelulula meji a* bualu ebu.+ Yehowa wakamba ne: “Kabuakuenzeka to.”
4 Mona tshivua Mukalenge Mutambe Bunene Yehowa mundeje: Tangila! Mukalenge Mutambe Bunene Yehowa wakabikila dinyoka dia kapia. Kakosha mâyi manene male, ne kakosha tshitupa tshia buloba. 5 Pashishe ngakamba ne: “Mukalenge Mutambe Bunene Yehowa, kanda koku bualu ebu.+ Mmunyi mudi Yakoba mua kushala ne muoyo?* Bualu yeye udi mutekete!”+
6 Nunku, Yehowa wakelulula meji a* bualu ebu.+ Mukalenge Mutambe Bunene Yehowa wakamba ne: “Bualu ebu pabu kabuakuenzeka to.”
7 Mona tshivuaye mundeje: Tangila! Yehowa uvua muimane pa tshimanu tshibaka ne nshinga wa tshiamu tshia plomb, ne mu tshianza tshiende muvua nshinga wa tshiamu tshia plomb. 8 Pashishe Yehowa wakangambila ne: “Amosa, udi mumone tshinyi?” Ke meme kuamba ne: “Nshinga wa tshiamu tshia plomb.” Pashishe Yehowa wakamba ne: “Mona ndi nteka nshinga wa tshiamu tshia plomb munkatshi mua bantu banyi bena Isalele. Tshiakubafuila kabidi luse to.+ 9 Miaba mitumbuke ya Izaka+ neyishale munda mutupu, ne miaba minsantu ya Isalele neyibutudibue;+ ne meme nendue kudi nzubu wa Yalobama ne muele wa mvita.”+
10 Amasaya muakuidi wa ku Betele+ wakatumina Yalobama+ mukalenge wa Isalele mukenji eu ne: “Amosa udi ukuelela tshifufu munkatshi mene mua nzubu wa Isalele.+ Ditunga kadiena mua kuanyisha mêyi ende onso+ to. 11 Bualu mona tshidi Amosa wamba: ‘Yalobama neafue ku muele wa mvita, ne bushuwa nebumbushe Isalele mu buloba buende baya nende ku babende.’”+
12 Pashishe Amasaya wakambila Amosa ne: “Wewe mumonyi wa bikena kumona, ndaku, unyemene mu buloba bua Yuda, upetele tshiakudia* tshiebe kuoku aku, ne udi mua kumanyisha mêyi a buprofete kuoku aku.+ 13 Kadi kuena ne bua kumanyisha kabidi mêyi a buprofete mu Betele+ to, bualu mmuaba munsantu wa mukalenge+ ne nzubu wa bukalenge.”
14 Pashishe Amosa wakandamuna Amasaya ne: “Meme tshivua muprofete anyi muana wa muprofete to; kadi mvua mulami wa bimuna+ ne mvua ntangila mitshi ya bikuyi.* 15 Kadi Yehowa wakangumbusha ku disaka dia mikoko, ne Yehowa wakangambila ne: ‘Ndaku, umanyishe bantu banyi bena Isalele mêyi a buprofete.’+ 16 Nunku mpindieu, umvua dîyi dia Yehowa: ‘Wewe udi wamba ne: “Kuambi mêyi a buprofete afikila Isalele,+ ne kuyishi+ malu afikila nzubu wa Izaka.” 17 Nunku mona tshidi Yehowa wamba: “Mukajebe nealue ndumba mu tshimenga etshi, ne bana bebe ba balume ne bana bebe ba bakaji nebakuluke ku muele wa mvita. Buloba buebe nebabukosolole ne nshinga wa kupima nende, ne wewe muine neufuile mu ditunga didi kadiyi dikezuke; ne bushuwa nebumbushe Isalele mu buloba buende nebaye nende ku babende.”’”+
8 Mona tshivua Mukalenge Mutambe Bunene Yehowa mundeje: Tangila! Kuvua tshibondo tshia bimuma bia mu muvu wa luya lukole.* 2 Pashishe, wakangebeja ne: “Amosa, udi mumone tshinyi?” Meme kuandamuna ne: “Tshibondo tshia bimuma bia mu muvu wa luya lukole.”* Ke Yehowa kungambila ne: “Nshikidilu mmufike bua bantu banyi bena Isalele. Tshiakubafuila kabidi luse to.+ 3 ‘Dituku adi, misambu ya mu ntempelo neyilue kabobo ka muadi,’+ ke mudi Mukalenge Mutambe Bunene Yehowa wamba. ‘Nekuikale bitalu bia bungi bimansha miaba yonso,+ shiii!’
4 Telejayi bualu ebu, nuenu badi badiata bapele
Ne badi batuisha bena bupuekele ba mu buloba ebu ku ndekelu,+
5 Badi bamba ne: ‘Tshibilu tshia dibala dia ngondo netshijike dîba kayi+ bua tuetu kupana ntete yetu,
Ne Nsabatu+ neajike dîba kayi bua tumone mua kuadija ntete yetu bua kupana?
Bua tumone mua kukepesha tshipiminu tshia efa* bikole
Ne kubandisha bujitu bua nshekele,*
Bua kunyanga bipiminu bietu bia dishima;+
6 Bua tuetu kumona mua kusumba bakengi ku arjan
Ne mupele ku mukolo wa sandala,+
Ne kupana tutupa tua ntete tudi katuyi ne mushinga.’
7 Yehowa mmuditshipe mu Lutambishi lua Yakoba+ ne:
‘Tshiakupua bienzedi biabu bionso muoyo nansha kakese.+
8 Bua bualu ebu buloba ebu nebukanke,
Ne muntu yonso udi musombelamu neadile.+
Buobu kabuakubanda buonso bu musulu wa Nile anyi?
Kabuakubandisha mavuala ne kupueka bu musulu wa Nile wa mu Ejipitu anyi?’+
9 ‘Dituku adi,’ ke mudi Mukalenge Mutambe Bunene Yehowa wamba,
‘Nembueje dîba munda munya,
Ne nemfiikishe buloba mu munya.+
Nemvuadike bimono bionso bilamba bikayabale ne nemvuije mutu wonso dibala;
Nemvuije tshikondo atshi bu madilu a muana mulela umue,
Ne ndekelu watshi bu dituku dia kanyinganyinga kakole.’
11 ‘Monayi! Matuku adi alua,’ ke mudi Mukalenge Mutambe Bunene Yehowa wamba,
‘Angatuma tshiyole tshia nzala mu buloba,
Katshiyi tshiyole tshia nzala ya biakudia anyi nyota kayiyi nyota ya mâyi,
Kadi ya kumvua mêyi a Yehowa.+
12 Bobu nebatetuke kumbukila ku mbuu too ne ku mbuu mukuabu
Ne kumbukila ku nord too ne ku est.*
Nebatambakane benda bakeba dîyi dia Yehowa, kadi kabakudipeta to.
13 Dituku adi, nsongakaji mimpe kumona itshidi tumama neyifue tshipuka,
Ne bansongalume kabidi, bua nyota;
14 Bobu badi baditshipa mu dipila dia Samalea+ bamba ne:
“Bushuwa, bu mudi nzambi webe ne muoyo, wewe Dana!”+
“Bushuwa, bu mudi njila wa Bê-sheba+ mutshikalaku!”
Bobu nebakuluke, ne kabakujuka kabidi to.’”+
9 Ngakamona Yehowa+ muimane pa mutu pa tshioshelu, ne wakamba ne: “Tuta mutu wa dikunji, ne mishiku ya mbelu neyinyukuke. Akosela ku mutu, ne meme nenshipe dia ndekelu dia kudiwu ne muele wa mvita. Muntu nansha umue udi unyema kakupanduka, ne muntu nansha umue udi uteta bua kunyema kakukokesha+ to.
2 Bobu bumbule too ne mu Lukita,*
Tshianza tshianyi netshibakuatshile muomu amu;
Ne bobu babande mu diulu,
Muomu amu nembapuekeshe panshi.
3 Ne bobu basokome pa lusongo lua mukuna wa Kâmele,
Kuoku aku nembakebe ne nembapete.+
Bobu basokome ku mêsu kuanyi muinshi mua mbuu,
Muomu amu nentumine nyoka dîyi bua abasume.
4 Bobu bakuatshibue kumpala kua bena lukuna babu,
Kuoku aku nentumine muele wa mvita dîyi, ne wowu newubashipe;+
Nembatuishile mêsu anyi bua bualu bubi, kadi ki mbua bualu buimpe+ to.
5 Bualu Mukalenge Mutambe Bunene, Yehowa wa biluilu, Yeye ke udi ulenga buloba ebu,
Bua buenguluke,+ ne bonso badi basombelamu nebadile;+
Ne buonso bujima nebubande bu musulu wa Nile,
Ne nebupueke bu musulu wa Nile wa mu Ejipitu.+
6 ‘Yeye udi wibaka bibandilu biende mu diulu
Ne ujadika tshintu tshiende tshidiye muase* pa mutu pa buloba;
Yeye udi ubikidisha mâyi a mbuu,
Bua kuapongolola pa mutu pa buloba,+
Yehowa ndîna diende.’+
7 ‘Nuenu bantu ba Isalele, kanuena kundi bu bana ba bena Kushi anyi?’ ke mudi Yehowa wamba.
‘Meme tshivuaku mupatule bena Isalele mu buloba bua Ejipitu,+
8 ‘Monayi! Mêsu a Mukalenge Mutambe Bunene Yehowa adi pa bukalenge bua mpekatu,
Ne yeye neabubutule pa mutu pa buloba.+
Kadi tshiakubutula nzubu wa Yakoba butubutu to,’+ ke mudi Yehowa wamba.
9 ‘Bualu, monayi! Ndi ntuma dîyi,
Ne nennyukule nzubu wa Isalele munkatshi mua bisamba bionso,+
Anu mutu muntu unyukula munyingu,
Ne kasoka nansha kamue kakayi kamata pa buloba.
10 Nebafue ku muele wa mvita, benji ba mpekatu bonso ba mu bantu banyi,
Bobu badi bamba ne: “Dikenga kadiakusemena pabuipi netu anyi kadiakutupeta.”’
11 ‘Dituku adi nenjule tshitanda* tshia Davidi+ tshidi tshiupuke,
Nendongolole masoso,*
Ne nengakaje bitupa biatshi bidi binyanguke;
Ne nentshibakulule bu mu matuku a kale,+
12 Bua bamone mua kuangata bintu bidi bishale bia Edome,+
Ne bisamba bionso bidibu babikila ku dîna dianyi,’ ke mudi Yehowa udi wenza bualu ebu, wamba.
13 Yehowa udi wamba ne: ‘Monayi! matuku adi alua
Ikala tshidime mua kupita munowi wa bintu,
Ne mudiatshi wa tumuma tua mvinyo, muntu udi muambule mamiinu;+
Ne mikuna minene neyimatshishe mvinyo mushême,+
14 Nempingaje bakuatshibue ba mu bantu banyi bena Isalele,+
Ne nebibakulule bimenga bivua bishiya munda mutupu ne nebasombelamu;+
Nebadime madimi a tumuma tua mvinyo ne nebanue mvinyo wayi,+
Ne nebadime madimi ne nebadie mamuma awu.’+
15 ‘Nembakune mu buloba buabu,
Ne kabakubajula kabidi
Mu buloba buabu bundi mubapeshe nansha,’+ ke mudi Yehowa Nzambi webe wamba.”
Diumvuija: “Muikale bujitu” anyi “Muambule bujitu.”
Anyi “tshibawu.”
Ku mua.: “muntu udi mukuate dikombo dia bukokeshi.”
Ku mua.: “muntu udi mukuate dikombo dia bukokeshi.”
Anyi “tshibawu.”
Ku mua.: “mulumbuluishi.”
Anyi “dilongesha dia.”
Anyi “ntempelo.”
Anyi “anyima.”
Anyi “anyima.”
Anyi “bena muoyo mukole.”
Anyi “batuilangane ku dîyi dipunga.”
Anyi “muana wa ntambue wa musalala.”
Anyi pamuapa: “padiku kakuyi tshilobeshi munda muabu.”
Anyi “bintu bia kulala bia mu Damaseke.”
Anyi “tuishayi.”
Anyi “bibawu biende bionso.”
Anyi “hiver.”
Anyi “été.”
Anyi pamuapa: “ya bungi.”
Anyi “bamfumuabu.”
Anyi “tombokayi.”
Anyi “tshiakanupesha tshintu tshia kudia.”
Anyi “musambu wa madilu.”
Anyi pamuapa: “nealue tshintu tshia majimbu.”
Anyi “bululu.”
Pamuapa mmitoto ya Tshidimina nzaji idi mu tshisumbu tshia mitoto tshia Taureau (Ngombe).
Pamuapa ntshisumbu tshia mitoto tshia Orion.
Anyi “tshitadi tshia buloba.”
Anyi “bibawu bienu.”
Anyi “makuta a nkosa mishiku.”
Nzambi ibidi eyi idi mua kuikala ileja dibulunge dia Saturne, divuabu batendelela bu nzambi.
Anyi “kabayi batshuka bualu.”
Bimueneka ne: badi bakula bua bukalenge bua Yuda ne bua Isalele.
Ku mua.: “tshisombedi tshia.”
Anyi “bana balume ba ngombe.”
Anyi “tshiombelu tshia nshinga.”
Ku mua.: “kabavua basame bua.”
Anyi “anyima wende.”
Ku mua.: “Muanabu ne tatuende.”
Anyi “bululu.”
Ku mua.: “badiangatshile nsengu.”
Anyi “tshibuelelu tshia Hamate.”
Tang. Diumv.
Mmumue ne: mu ngondo wa Tshiongo ne wa Luishi.
Ku mua.: “kujuka?”
Anyi “wakanyingalala bua.”
Ku mua.: “kujuka?”
Anyi “wakanyingalala bua.”
Ku mua.: “udile tshiakudia.”
Anyi “mukoshi wa mfigi ya sikomore.”
Anyi “été.”
Anyi “été.”
Tang. Tshis. B14.
Tang. Tshis. B14.
Anyi “misambu ya madilu.”
Anyi “kudi dîba dipatukila.”
Anyi “Sheole,” mmumue ne: lukita lua bukua bantu buonso. Tang. Diumv.
Anyi “musaka wende muvungamane, tshisasa tshiende tshia tshijengu.”
Anyi “ntenta.”
Anyi “masoso awu.”
Ku mua.: “neyenguluke.”