YONA
1 Dîyi dia Yehowa diakalua kudi Yona*+ muana wa Amitayi diamba ne: 2 “Juka, ndaku ku Niniwe,+ tshimenga tshinene, utshimanyishe mêyi a dilumbuluisha, bualu malu mabi abu mmafike kundi.”
3 Kadi Yona wakajuka bua kunyema Yehowa mutangile ku Tâshishi; wakapueka ku Yopa, kupetaye mazuwa avua aya ku Tâshishi. Nunku wakafuta makuta a njila, kubandaye mu mazuwa bua kuya nabu ku Tâshishi, kule ne Yehowa.
4 Pashishe, Yehowa wakatuma tshipepele tshikole pa mbuu, ne kuvua tshipepele tshikole pa mbuu ne mazuwa amba kutshibuka. 5 Bendeshi ba mazuwa bavua ne buôwa bukole, nunku yonso wa kudibu wakabanga kubikila nzambi wende bua amuambuluishe. Bakabanga kukupa bintu bivua mu mazuwa mu mbuu bua kuapepeja.+ Kadi Yona uvua mupueke mu tshitupa tshia munda mua mazuwa* muvuaye mudiolole, mulale tulu tukole. 6 Kapitene ka mazuwa kakasemena kudiye, kumuambila ne: “Bua tshinyi udi mulale? Juka, bikila nzambi webe! Pamuapa Nzambi mulelela neatuelele meji, ne katuakufua+ to.”
7 Pashishe, bakambilangana ne: “Luayi, tuelayi nshobo+ bua kumanya muntu udi mukebeshe dikenga edi.” Nunku bakela nshobo, ne nshobo yakakuata Yona.+ 8 Bakamuebeja ne: “Tuambila koku, nnganyi utudi mua kuela dikenga didi ditukuate edi pambidi? Utu wenza mudimu kayi? Udi ufumina penyi? Udi wa mu ditunga kayi? Udi wa mu tshisamba kayi?”
9 Wakandamuna ne: “Ndi muena Ebelu, ndi ntshina* Yehowa Nzambi wa mu diulu, Yeye uvua muenze mbuu ne buloba bume.”
10 Bua bualu ebu, bantu abu bakumvua buôwa bukole, bobu kumuebeja ne: “Tshiudi muenze ntshinyi?” (Bantu abu bakamanya ne: yeye uvua unyema Yehowa, bualu wakabambila.) 11 Nunku, bakamuebeja ne: “Tukuenzele tshinyi bua kubatamija mbuu buetu tuetu?” Bualu mâyi a mbuu avua anu enda abandisha mavuala bikole menemene. 12 Wakandamuna ne: “Ngambulayi, nungele mu mbuu, ne mbuu neabatame buenu nuenu; bualu ndi mumanye ne: tshipepele tshikole etshi ntshinukuate bua bualu buanyi.” 13 Kadi, bantu abu bakita bikole* bua kupingaja mazuwa ku mukuna, kadi kabakakokesha to, bualu mbuu uvua anu wenda ubandisha mavuala bikole menemene ku nseke yabu yonso.
14 Pashishe, bakabikila Yehowa bamba ne: “Akaah Yehowa wetu, mpindieu, katufu koku bua muntu eu* to! Kutuedi tshilumbu tshia mashi adi kaayi ne bualu pambidi, bualu, wewe Yehowa, udi muenze muuvua musue.” 15 Pashishe, bakambula Yona, kumuelabu mu mbuu; ne mbuu wakabatama. 16 Nunku, ditshina dikole dia Yehowa diakakuata bantu abu,+ bobu kulambula Yehowa mulambu ne kuditshipabu mitshipu.
17 Nunku, Yehowa wakatuma mushipa munene bua kumina Yona, nunku Yona wakashala munda mua mushipa au matuku asatu, munya ne butuku.+
2 Pashishe, Yona wakasambila Yehowa Nzambi wende munda mua mushipa,+ 2 yeye wakamba ne:
“Mu dikenga dianyi ngakabikila Yehowa, yeye wakangandamuna.+
Mu ndondo ya* Lukita* ngakela lubila ndomba diambuluisha.+
Wewe wakumvua dîyi dianyi.
3 Pauvua mungele mu ndondo, mu muoyo wa mbuu mualabale,
Nunku, muenji wa mâyi wakammina.+
Mambuanka ebe onso ne mavuala biakapita pa mutu panyi.+
4 Ngakamba ne: ‘Ndi muipatshibue ku mêsu kuebe!
Mmunyi mungabandila kabidi ntempelo webe wa tshijila?’
Bisonsa bivua bijingile mutu wanyi.
6 Ngakadiina too ne ku bitaku bia mikuna.
Milonda ya buloba ivua mikanga pa mutu panyi kashidi.
Kadi, wewe Yehowa Nzambi wanyi, wakapatula muoyo wanyi mu dijimba.+
7 Pavua muoyo* wanyi wenda upungila, Yehowa ke umvua muvuluke.+
Pashishe, disambila dianyi diakafika kuudi, mu ntempelo webe wa tshijila.+
8 Badi badifile kudi mpingu ya patupu mbalekele mpokolo wabu wa dinanga dia lulamatu.*
9 Kadi meme, nemfile mulambu kuudi ne dîyi dia kusakidila nadi.
Tshindi muditshipe, nentshifute.+
Lupandu ludi lufumina kudi Yehowa.”+
10 Panyima pa matuku Yehowa wakatumina mushipa au dîyi, ne wowu wakaluka Yona ku mukuna.
3 Pashishe dîyi dia Yehowa diakalua kudi Yona musangu muibidi, diamba ne:+ 2 “Juka, ndaku ku Niniwe,+ tshimenga tshinene, utshimanyishe mukenji undi nkuambila.”
3 Nunku Yona wakajuka, kuyaye ku Niniwe+ bua kutumikila dîyi dia Yehowa.+ Kadi Niniwe uvua tshimenga tshinene menemene,* ntanta wa luendu lua matuku asatu. 4 Pashishe Yona wakabuela mu tshimenga atshi, kuendaye dituku dijima, uvua umanyisha ne: “Nkushale matuku 40 tshianana, Niniwe neabutudibue.”
5 Kadi bantu ba mu Niniwe bakitabuja Nzambi,+ ne bakamanyisha bua kubuela mu tshijila tshia biakudia, kuvualabu bilamba bikayabale kubangila ku udi mutambe bunene too ne ku udi mutambe bukese wa kudibu. 6 Pakafika mukenji eu kudi mukalenge wa Niniwe, yeye wakajuka mu nkuasa wende wa bukalenge, kuvulaye bilamba biende bia bumfumu, kudijingilaye tshilamba tshikayabale ne kusombaye mu butu. 7 Kabidi, wakatuma dîyi mu Niniwe mujima ne:
“Ku mukenji wa mukalenge ne bantu bende banene: Muntu nansha umue anyi nyama, nyama minene anyi nyama mikese, kabiena ne bua kudia tshintu nansha tshimue to. Kabiena ne bua kudia tshiakudia ne kabiena ne bua kunua mâyi nansha. 8 Bantu ne nyama bavuale bilamba bikayabale; babikile Nzambi ne muoyo umue ne bumbuke ku njila yabu mibi ne ku malu a tshikisu adibu benza. 9 Nnganyi udi mumanye bikala Nzambi mulelela mua kuelulula meji a* bualu budiye ukeba kuenza ne kumbuka ku tshiji tshiende tshikole bua tuetu katufu?”
10 Pakamona Nzambi mulelela tshivuabu benze, muvuabu bumbuke ku njila yabu mibi,+ yeye wakelulula meji a* dikenga divuaye muambe ne: uvua mua kubatumina, yeye kakadituma+ to.
4 Kadi bualu ebu buakatonda Yona bikole menemene, yeye wakafiika munda bikole. 2 Nunku yeye wakasambila Yehowa ne: “Akaah! Yehowa wetu, mpindieu, ki mbualu ebu bumvua ngelela meji pamvua mu buloba buetu anyi? Ke bualu kayi musangu wa kumpala, mvua mukebe kunyema bua kuya ku Tâshishi;+ bualu mvua mumanye ne: wewe udi Nzambi utu uditeka pa muaba wa bakuabu* ne udi ne luse, utu kayi ukuata tshiji lukasa ne udi muwule tente ne dinanga dia lulamatu,+ eu utu umvua bibi bua dikenga. 3 Mpindieu, Yehowa, umbusha koku muoyo* wanyi, bualu mbimpe meme kufua pamutu pa kushala ne muoyo.”+
4 Yehowa wakebeja ne: “Mbimpe wewe kufiika munda nunku anyi?”
5 Pashishe, Yona wakapatuka mu tshimenga, kusombaye ku est kua tshimenga. Kudienzelaye kaba ka kueyema muaba au, kusombaye mu dileji diaku bua kumona tshivua mua kufikila tshimenga.+ 6 Pashishe, Yehowa Nzambi wakamenesha muonji wa tshilowalowa* bua ulambe pa mutu pa Yona, bua kumupesha dileji bua mutu wende ne bua kupepeja lutatu luende. Nunku, Yona wakasanka bikole bua muonji wa tshilowalowa.
7 Kadi Nzambi mulelela wakatuma tshishi dituku diakalonda patshiatshia, tshiotshi kudia muonji wa tshilowalowa, ne muonji wakafubidila. 8 Pakatuadija munya kuosha, Nzambi wakatuma kabidi lupepele lua luya lukole lufumina ku est, ne munya wakuosha Yona mu mutu, yeye wakapungila. Wakatungunuka ne kulomba bua kufua,* ne wakatungunuka ne kuamba ne: “Mbimpe meme kufua pamutu pa kushala ne muoyo.”+
9 Nzambi wakebeja Yona ne: “Mbimpe wewe kufiika munda nunku bua muonji wa tshilowalowa anyi?”+
Ke yeye kuandamuna ne: “Mbikumbane bua meme kufiika munda, kufiika munda bikole nkeba ne kufua.” 10 Kadi Yehowa wakamba ne: “Udi unyingalala bua muonji wa tshilowalowa uuvua kuyi muenzele mudimu anyi mukoleshe; wowu uvua mukole mu butuku bumue ne mufue mu butuku bumue. 11 Tshiena panyi ne bua kunyingalala bua Niniwe, tshimenga tshinene,+ mudi bantu bapite pa binunu 120 badi kabayi bamanye nansha mua kutapulula tshidi tshimpe ne tshidi tshibi,* kabidi ne nyama yabu ya bungi+ anyi?”
Diumvuija: “Nkutshi.”
Anyi “mazuwa a tshisasa.”
Anyi “ntendelela.”
Anyi “bakaditatshisha.”
Anyi “bua anyima wa muntu eu.”
Ku mua.: “difu dia.”
Anyi “Sheole,” mmumue ne: lukita lua bukua bantu buonso. Tang. Diumv.
Anyi “Mâyi avua mannyunguluke too ne ku anyima.”
Anyi “anyima.”
Anyi pamuapa: “lulamatu luabu.”
Ku mua.: “tshimenga tshinene kudi Nzambi.”
Anyi “kunyingalala bua.”
Anyi “wakanyingalala bua.”
Anyi “ne muoyo muimpe.”
Anyi “anyima.”
Anyi pamuapa: “mudiantondo.”
Anyi “bua anyima wende afue.”
Anyi “kabayi bamanye kutapulula tshianza tshiabu tshia balume ne tshia bakaji.”