MIKA
1 Dîyi dia Yehowa diakalua kudi Mika*+ wa ku Molesheta, mu matuku a Yotama,+ Ahaza,+ ne Hezikiya,+ bakalenge ba Yuda,+ divuaye mupete mu tshikena kumona tshia bualu bua Samalea ne Yelushalema:
2 “Telejayi, nuenu bukua bantu buonso!
Teya ntema, wewe buloba ne bionso bidi bikuwuje,
Ne Mukalenge Mutambe Bunene Yehowa ikale bu ntemu udi ukutuisha,+
Yehowa kumbukila mu ntempelo wende wa tshijila.
3 Bualu mona! Yehowa udi upatuka mu muaba wende;
Yeye neapueke ne neadiate miaba mitumbuke ya buloba.
4 Mikuna neyenguluke muinshi muende,+
Ne bibandabanda* nebipandike
Bu dipula* kumpala kua kapia,
Bu mâyi mapongolola pa mpulumuku.
5 Bionso ebi mbua ditomboka dia Yakoba,
Mbua mpekatu ya nzubu wa Isalele.+
Kutomboka kua Yakoba ntshinyi?
Ki n’Samalea+ anyi?
Ne miaba mitumbuke ya Yuda ntshinyi?+
Ki n’Yelushalema anyi?
6 Nemvuije Samalea mushiki wa bikulu bia mu mpata,
Muaba wa kudima madimi a tumuma tua mvinyo;
Nengimanshe* mabue ende mu tshibandabanda,
Ne nenshiye bishimikidi biende patoke.
Nembutule mpingu yende yonso.
Bualu yeye uvua muyipetele ku mafutu ende a bundumba,
Ne neyilue kabidi mafutu a bandumba.”
Kabobo kanyi ka muadi nekikale bu ka mibuabua,
Ne muadi wanyi bu wa nyunyi ya mfiondo.
Tshipupu ntshitangalake ku tshiibi tshia bantu banyi, ku Yelushalema.+
10 “Kanumanyishi bualu ebu mu Gata to;
Kanuena ne bua kudila nansha.
Bungulukayi mu lupuishi mu Betele-afela.*
11 Pitayi butaka, bikale ne bundu, nuenu bantu badi basombele* mu Shafila.
Bantu badi basombele* mu Sânana ki mbapatuke to.
Kabobo ka muadi nekikale mu Bete-esele, ne nekumbushe dikuatshisha diaku kunudi.
12 Bualu bantu badi basombele* mu Malota mbindile bualu buimpe,
Kadi bualu bubi mbutuluke ku tshiibi tshia Yelushalema bufumine kudi Yehowa.
13 Suikayi ditempu ku tshisumbu tshia tubalu, nuenu bantu badi basombele* mu Lakisha.+
Wewe uvua ntuadijilu wa mpekatu wa muana wa bakaji wa Siona,
Bualu mbasangane matomboka a Isalele munda muebe.+
14 Nunku neupeshe Molesheta-gata mapa a dilayangana* nawu.
Nzubu ya Akeziba+ ivua tshintu tshia dishima kudi bakalenge ba Isalele.
15 Nendue kabidi kunudi ne mutshimunyi,*+ nuenu badi basombele* mu Malesha.+
Butumbi bua Isalele nebufike too ne ku Adulama.+
16 Dishiyayi mu mitu mutupu ne kosayi nsuki bua bana benu bananga.
Dishiyayi mu mitu mutupu bu nyunyi wa mukanku,
Bualu mbanunyengabu baye nabu ku babende.”+
2 “Diakabi dikale kudi badi belangana meji a malu mabi,
Badi bapangadija malu mabi pa malalu abu!
Padi butoke bua mu dinda bulua, badi baakumbaja,
Bualu adi ku bukokeshi bua tshianza tshiabu.+
2 Badi balakana madimi ne baanyenga;+
Badi balakana kabidi nzubu, badi bayangata;
Badi bashimakaja muntu bua kuangata nzubu wende,+
Bashimakaja muntu bua kuangata bumpianyi buende.
3 Nunku, mona tshidi Yehowa wamba:
‘Monayi, ndi mpangadijila dîku edi dikenga+ dinuikala kanuyi mua kupanduka.*+
Kanuakuenda kabidi ne didibandisha nansha,+ bualu ntshikondo tshia dikenga.+
4 Dituku adi bantu nebele lusumuinu lua bualu buenu,
Ne nebadile ne kanyinganyinga kakole bua bualu buenu.+
Nebambe ne: “Tudi babutudibue butubutu!+
Yeye uvua muenze bua bumpianyi bua bantu banyi buye mu bianza bia bantu bakuabu, ke mudiye ubumbusha kundi nunku!+
Udi upesha muntu udi kayi ne lulamatu madimi etu.”
5 Nunku, kuakuikala ne muntu nansha umue bua kuolola nshinga wa kupima nende,
Bua kuabanya buloba mu
tshisumbu tshia Yehowa to.
6 Badi bayisha ne: “Lekelayi kuyisha,
Kabena ne bua kuyisha malu aa to;
Dipuekeshibua milongo kadiakutukuata to!”
7 Wewe nzubu wa Yakoba, badiku bamba ne:
“Nyuma wa Yehowa katshiena ne lutulu anyi?
Ebi ke bienzedi biende anyi?”
Mêyi anyi meme kaena apetesha bantu badi benda mu bululame malu mimpe anyi?
8 Kadi matuku adi panshi aa, bantu banyi mbajuke bu muena lukuna.
Nudi nukopola patoke tshilengejilu tshitambe buimpe ne* tshilamba
Bia bantu badi bapita ne njila talalaa, bu bantu badi bafuma ku mvita.
9 Nudi nuipata bakaji ba bantu banyi mu nzubu yabu milengele;
Nudi numbusha bulengele buanyi kudi bana babu bua kashidi.
10 Jukayi, ndayi, bualu eu ki mmuaba wa kuikishila to.
Bua bukoya,+ kudi kabutu, kabutu kabi menemene.+
11 Muntu yeye ulonda lupepele ne dishima, wamba bualu bua dishima ebu:
“Nennuyishe bua mvinyo ne bua maluvu makole,”
Nunku, yeye neikale anu muyishi bua bantu aba!+
12 Bushuwa, meme nensangishe bantu bebe bonso, wewe Yakoba;
Bushuwa, meme nenkunguije bashadile ba Isalele pamue.+
Nembateke mu buobumue, bu mikoko mu tshikumbi,
Bu tshisumbu tshia mikoko mu mpata wayi wa kudiila;+
Nemuikale mutoyi bua bantu.’+
13 Muntu udi utubula neaye kumpala kuabu;
Nebatubule ne nebapitshile mu tshiibi, ne nebapatukilaku.+
Mukalenge neapite kumpala kuabu,
Ne Yehowa muikale ku mutu kuabu.”+
3 Ngakamba ne: “Telejayi koku, nuenu bamfumu ba Yakoba
Ne nuenu balombodi ba nzubu wa Isalele.+
Kanuena ne bua kumanya tshidi tshiakane anyi?
2 Kadi nudi bakine tshidi tshimpe+ ne banange tshidi tshibi;+
Nudi nupulula bantu banyi dikoba, ne misunyi ku mifuba yabu.+
3 Nudi kabidi nudia misunyi ya bantu banyi+
Ne numbusha dikoba diabu,
Nutayisha mifuba yabu, nuyizaza,+
Bu tshintu tshidibu balambile mu luesu,* bu munyinyi mu luesu.
4 Tshikondo atshi nebabikile Yehowa bua abambuluishe,
Kadi yeye kakubandamuna to.
5 Mona tshidi Yehowa wamba bua baprofete badi bapambuisha bantu banyi,+
Badi bamanyisha ‘Ditalala!’+ eku benda basuma* ne mênu abu+
Kadi muntu udi kayi wela tshintu mukana muabu badi bamuela mvita:*
6 ‘Nenuikale butuku;+ kakuakuikala tshikena kumona+ to;
Nekuikale anu mîdima buenu nuenu, kakuakuikala dibuka.
Dîba nedibuelele baprofete,
Ne munya newulue mîdima buabu bobu.+
7 Bamonyi ba bikena kumona nebafuishibue bundu,+
Ne bena lubuku nebedibue mâyi ku makasa.
Buonso buabu nebabuikile miedi ya pa mpala pa mushiku,*
Bualu kakuena diandamuna dia kudi Nzambi.’”
8 Kadi meme, ndi muwujibue ne bukole ku nyuma wa Yehowa,
Kabidi ne kulumbuluisha kuakane ne bukole,
Bua kuambila Yakoba ditomboka diende ne Isalele mpekatu wende.
9 Telejayi koku bualu ebu, nuenu bamfumu ba nzubu wa Yakoba
Ne nuenu balombodi ba nzubu wa Isalele,+
Badi bapetula kulumbuluisha kuakane ne badi bakonyangaja tshionso tshidi tshiololoke,+
10 Badi bibaka Siona ne diela dia mashi panshi ne Yelushalema ne malu adi kaayi makane.+
11 Balombodi* bende badi balumbuluisha bua mbuejilu,+
Bakuidi bende badi balongesha anu bua kupeta difutu,+
Kadi badi beyemena Yehowa,* bamba ne:
“Yehowa kena netu anyi?+
Dikenga kadiakutukuata to.”+
4 Ku ndekelu kua matuku,*
Mukuna wa nzubu wa Yehowa+
Newujadikibue bikole ku mutu kua nsongo ya mikuna minene,
Ne newubandishibue ku mutu kua mikuna mikese,
Ne bukua bantu nebupuilaku.+
2 Bisamba bia bungi nebiyaku ne nebiambe ne:
“Luayi, tubande ku mukuna wa Yehowa
Ne ku nzubu wa Nzambi wa Yakoba.+
Yeye neatulongeshe njila yende,
Ne tuetu netuendele mu njila yende.”
Bualu mukenji* newupatuke mu Siona,
Ne dîyi dia Yehowa nedipatuke mu Yelushalema.
3 Yeye neakose bilumbu munkatshi mua bukua bantu buvule+
Ne nealulamije malu* adi atangila bisamba bia bukole bia kule.
Nebafule miele yabu ya mvita kuyivuija nkasu ya kudima nayi
Ne mafuma abu kuavuija miele ya kusonza nayi mitshi.+
Tshisamba katshiakujudila tshisamba tshikuabu muele wa mvita,
Kabakulonga kabidi mvita nansha.+
4 Nebasombe,* muntu ne muntu muinshi mua muonji wende wa tumuma tua mvinyo ne muinshi mua mutshi wende wa mfigi,+
Ne muntu kakubatshinyisha,+
Bualu mukana mua Yehowa wa biluilu mmuakule.
5 Bualu bisamba bionso nebiende, tshisamba ne tshisamba mu dîna dia nzambi watshi,
Kadi tuetu netuende mu dîna dia Yehowa Nzambi wetu+ kashidi ne tshiendelele.
6 “Mu dituku adi,” ke mudi Yehowa wamba,
“Nensangishe eu* uvua utebuka,
Ne nenkunguije pamue eu uvuabu batangalaje,+
Pamue ne bantu bamvua muenzele malu makole.
7 Nemvuije eu* uvua utebuka bashadile,+
Ne muntu uvuabu batume kule tshisamba tshia bukole;+
Ne Yehowa neakokeshe bu mukalenge ku mutu kuabu mu mukuna wa Siona,
Kutuadijila ku mpindieu too ne kashidi.
8 Kadi wewe, tshibumba tshia tshisumbu tshia mikoko,
Kakunakuna ka muana wa bakaji wa Siona,+
Kuudi wewe nebulue, eyowa, bukokeshi bua kumpala* nebulue,+
Bukalenge bua muana wa bakaji wa Yelushalema.+
9 Mpindieu bua tshinyi udi wela mbila mikole?
Kuena ne mukalenge,
Peshi mufidi webe wa mibelu mmufue,
Bua didinyenga dikukuate bu mukaji pa lulelu+ anyi?
10 Dinyenga ne tuaku mikemu, wewe muana wa bakaji wa Siona,
Bu mukaji pa lulelu,
Bualu mpindieu wewe neumbuke mu tshimenga ne neusombele mu mpata.
Neuye kule ku Babilona,+
Ne kuoku aku neusungidibue;+
Kuoku aku Yehowa neakupikule mu tshianza tshia bena lukuna bebe.+
11 Mpindieu bisamba bia bungi nebidisangishe bua kukuluisha;
Nebiambe ne: ‘Yeye anyangibue,
Ne mêsu etu amone bualu ebu buenzekela Siona.’
12 Kadi bobu ki mbamanye meji a Yehowa,
Kabena bajingulula disua diende;*
Bualu yeye neabasangishe muaba wa tshishipuidi bu mulongo wa ntete idibu bafuma ku dikosa.
13 Juka, ushipule, wewe muana wa bakaji wa Siona;+
Bualu nemvuije nsengu yebe tshiamu tshifiike,
Ne nemvuije bikono biebe tshiamu tshia mitaku,
Ne wewe neuvingutule bisamba bia bantu bia bungi.+
Neufile bintu biabu bipetela mu njila mubi kudi Yehowa,
Ne neufile mpetu yabu kudi Mukalenge mulelela wa buloba bujima.”+
Badi bakuma mulumbuluishi wa Isalele ne mulangala ku ditama.+
2 Kadi wewe, Beteleheme Efelata,+
Yeye udi mutambe bukese munkatshi mua binunu* bia mu Yuda,
Kuudi nekupatuke bua bualu buanyi muntu wikala mfumu mu Isalele,+
Udi ne mbangilu wende katshia ku bikondo bia kale, katshia ku matuku a kale kale.
3 Nunku, yeye neabalekele
Too ne ku tshikondo tshidi yeye uvua ne bua kulela ulela.
Ne bana babu badi bashale nebapingane kudi bantu ba Isalele.
4 Yeye neajuke ne nealame mikoko mu bukole bua Yehowa,+
Mu bunene bua dîna dia Yehowa Nzambi wende.
5 Yeye neafile ditalala.+
Muena Ashû yeye ne bua kubuela mu buloba buetu ne kudiatakaja bibumba bietu bikolesha,+
Netumujudile balami muanda mutekete, eyowa, bakokeshi* muanda mukulu munkatshi mua bantu bua kumuluisha.
Ne yeye neatusungile kudi muena Ashû,+
Padiye ubuela mu ditunga dietu ne udiatakaja buloba buetu.
7 Bashadile ba Yakoba nebikale munkatshi mua bisamba bia bantu bia bungi
Bu lumuma lua kudi Yehowa,
Bu kumata kua mvula pa bisonsa,
Bidi kabiyi bitekemena muntu
Anyi bindila bana ba bantu.
8 Bashadile ba Yakoba nebikale munkatshi mua bisamba,
Munkatshi mua bisamba bia bungi bia bantu,
Bu ntambue munkatshi mua nyama ya muitu,
Bu muana wa ntambue* munkatshi mua bisumbu bia mikoko,
Udi upita munkatshi, udiela ne usunsulula;
Ne kakuena muntu wa kuyisungila.
9 Tshianza tshiebe netshiedibue muulu pa mutu pa baluishi bebe,
Ne bena lukuna bebe bonso nebabutudibue.”
10 “Mu dituku adi,” ke mudi Yehowa wamba,
“Nenshipe tubalu tuebe munkatshi muebe ne nembutule matempu ebe.
11 Nembutule bimenga bia mu buloba buebe
Ne nengupule miaba mikolesha yebe yonso.
12 Nentuishe malu a mupongo audi wenza* ku ndekelu,
Ne muntu nansha umue udi wenza malu a majimbu kakushala munkatshi muebe.+
13 Nembutule mpingu yebe misonga ne makunji ebe munkatshi muebe,
Ne kuakuinamina kabidi mudimu wa bianza biebe nansha.+
15 Nendisombuele ne tshiji, ne tshiji tshikole
Kudi bisamba bidi kabiyi bitumikile.”
6 Umvuayi koku tshidi Yehowa wamba.
Juka, ulumbulule kumpala kua mikuna minene,
Ne mikuna mikese yumvue dîyi diebe.+
2 Umvuayi tshilumbu tshia Yehowa, nuenu mikuna,
Nuenu bishimikidi bishindame bia buloba,+
Bualu Yehowa udi tshilumbu ne bantu bende;
Yeye nealumbulule ne Isalele:+
3 “Bantu banyi, ntshinyi tshindi munuenze?
Mmunyi mundi munutshiokeshe?+
Ntuishayi.
4 Bualu ngakanupatula mu buloba bua Ejipitu,+
Ngakanukuula mu nzubu wa bupika;+
Ngakatuma Mose, Alona ne Mîyama kumpala kuenu.+
5 Bantu banyi, vulukayi koku tshivua Balaka mukalenge wa Moaba muambe,+
Ne tshivua Balâma muana wa Beô mumuandamune,+
Tshivua tshienzeke kumbukila ku Shitima+ too ne ku Gilegala,+
Bua numanye bienzedi bia buakane bia Yehowa.”
6 Nendue ne tshinyi kumpala kua Yehowa?
Nenginame ne tshinyi kumpala kua Nzambi pa muaba mutumbuke?
Nendue kumpala kuende ne milambu ya kuosha mijima,
Ne bana ba ngombe ba tshidimu tshimue anyi?+
7 Yehowa neasanke bua binunu bia bimpanga bia mikoko,
Bua makumi a binunu bia misulu ya mafuta anyi?+
8 Wewe muntu, yeye mmukuambile tshidi tshimpe.
Nanku, ntshinyi tshidi Yehowa ukulomba?
9 Dîyi dia Yehowa didi diela tshimenga lubila;
Bantu badi ne meji adi amuenekela mu tshienzedi nebatshine dîna diebe.
Teyayi ntema ku mulangala ne kudi eu uvua muwusungule.+
10 Mu nzubu wa muntu mubi mutshidiku bubanji bua bubi
Ne tshipiminu tshia efa* tshibi tshidi katshiyi tshijima anyi?
11 Ndiku mua kuikala ne bienzedi bikezuke* meme muikale ne bipiminu bibi,
Muikale ne tshibombi tshia mabue a kupima nawu a kuibila nawu+ anyi?
12 Bualu babanji bende mbuwule tente ne tshikisu,
Ne bantu badi basombele munda muende badi bakula malu a mafi;+
Ludimi luabu ludi ne dishima mukana muabu.+
13 “Nunku, nenkutape ne dikukuma,+
Nkushiya patupu bua mpekatu yebe.
14 Neudie, kadi kuakukuta to;
Newikale munda mutupu.+
Tshiudi umbusha, kuakuya natshi bimpe,
Ne tshiudi uya natshi, nentshifile ku muele wa mvita.
15 Neukune ntete, kadi kuakupuola tshintu.
Neudiate tumuma tua olive, kadi kuakuenza mudimu ne mafuta;
Ne newenze mvinyo mupiamupia, kadi kuakunua mvinyo nansha.+
16 Bualu nudi nutumikila mêyi mafunda a Omeli ne mudimu wonso wa nzubu wa Ahaba,+
Ne nudi nuenda bilondeshile lungenyi luabu.
Ke bualu kayi nennuvuije tshintu tshidi tshikuatshisha buôwa
Ne nemvuije bantu badi basombele munda muende tshintu tshia kuelela muonzo;+
Ne nenuambule tshipendu tshia bukua bantu.”+
7 Diakabi dianyi! Ndi bu muntu udi,
Panyima pa disangisha dia bimuma bia mu muvu wa luya lukole*
Ne dipumbulula didi dilonda dipuola dia tumuma tua mvinyo,
Kayi upeta tshisumbu tshia tumuma tua mvinyo tua kudia,
Anyi mfigi ya ntuadijilu indi njinga bikole.*
2 Muena lulamatu mmujimine pa buloba;
Kakuena muntu muena bululame munkatshi mua bantu to.+
Buonso buabu badi baalamina bua kuela mashi panshi.+
Yonso wa kudibu udi ulemba muanabu ne bukondo.
3 Bianza biabu mbipiluke mu dienza malu mabi;+
Mukokeshi udi ulomba bintu,
Mulumbuluishi udi ulomba difutu,+
Muntu munene udi umanyisha bidiye ujinga,*+
Ne badi bakumbaja bualu ebu pamue.*
4 Udi mutambe buimpe munkatshi muabu udi bu mêba,
Udi mupite bakuabu ku bululame mmubi kupita lupangu lua mêba.
Dituku dia bansentedi bebe ne dia difutu diebe nedilue.+
Nunku bobu nebapampakane.+
5 Kuteki ditabuja diebe mu mulunda webe
Peshi kueyemenyi mulunda wa pa muoyo.+
Kanda tshiudi wambila muntu udi ulala mu tshiadi tshiebe.
6 Bualu muana wa balume udi upetula tatuende,
Muana wa bakaji udi utombokela mamuende,+
Mukaji wa muana udi uluisha mamuende muenu;+
Bena lukuna ba muntu mbantu ba mu nzubu muende.+
7 Kadi meme nenshale mutangile kudi Yehowa.+
Nendeje lungenyi lua kuindila* Nzambi wa lupandu luanyi.+
Nzambi wanyi neanteleje.+
8 Kusanki bua bualu buanyi, wewe muena lukuna wanyi.*
Nansha mundi mukuluke, nenjuke;
Nansha mundi musombe mu mîdima, Yehowa neikale butoke buanyi.
9 Nengitabe tshiji tshia Yehowa,
Bualu ndi mumuenzele mpekatu,+
Too ne padiye ulumbulula tshilumbu tshianyi ne ukosa tshilumbu tshianyi biakane.
Yeye neampatule ku butoke;
Meme nemmone buakane buende.
10 Muena lukuna wanyi neamone pende,
Ne bundu nebukuate yeye uvua mungambe ne:
“Yehowa Nzambi webe udi penyi?”+
Mêsu anyi neamumone.
Mpindieu, nebamudiatakaje bu bitotshi mu misesu.
11 Nedikale dituku dia kuibaka bimanu biebe bia mabue;
Dituku adi nebadiundishe mukalu.*
12 Dituku adi nebalue kuudi
Bafumina ku Ashû ne mu bimenga bia Ejipitu,
Bafumina mu Ejipitu too ne ku Musulu;*
Bafumina ku mbuu too ne ku mbuu mukuabu ne ku mukuna too ne ku mukuna mukuabu.+
13 Buloba nebushale munda mutupu bua bualu bua bantu bavua basombelamu,
Bu tshipeta tshia malu adibu benze.*
14 Lama bantu bebe ne dikombo diebe, tshisumbu tshia mikoko tshia bumpianyi buebe,+
Yeye uvua musombe nkayende muitu, munkatshi mua mitshi ya bimuma.
Badie mu Bashana ne mu Gilada+ bu mu matuku a kale.
15 “Anu bu mu matuku anuvua bapatuke mu buloba bua Ejipitu,
Nemmuleje malu a kukema.+
16 Bisamba nebimone ne nebifuishibue bundu nansha mudibi ne bukole.+
Nebiteke tshianza ku mishiku yabi;
Matshi abi neapate.
17 Nebalake lupuishi bu nyoka;+
Bu bintu bia pa buloba bidi bidikoka panshi, bobu nebapatuke miaba yabu ya kusokomena benda bazakala.
Nebalue kudi Yehowa Nzambi wetu ne buôwa,
Ne nebikale ne buôwa bua bualu buenu.”+
18 Nnganyi udi Nzambi bu wewe,
Udi ulekelela tshilema ne ubuikidila dishipa dia mikenji+ dia bashadile ba bumpianyi buende?+
Yeye kakulama tshiji tshiende kashidi to,
Bualu udi usanka bua dinanga dia lulamatu.+
19 Yeye neatuleje kabidi luse;+ yeye neatshimune* bilema bietu.
Wewe neukupe mpekatu yabu yonso mu ndondo ya mbuu.+
20 Neuleje Yakoba lulamatu,
Ne Abalahama dinanga dia lulamatu,
Anu muuvua muditshipe kudi bankambua betu katshia ku matuku a kale.+
Tshikepeshilu tshia dîna Mikayele (diumvuija: “Nnganyi udi bu Nzambi?”) anyi Mikaya (diumvuija: “Nnganyi udi bu Yehowa?”).
Anyi “bibatabata.”
Anyi “dikatshi.”
Ku mua.: “Nempongolole.”
Anyi “mafutu onso a bundumba buende.”
Anyi “mu nzubu wa Afela.”
Ku mua.: “mukaji udi musombele.”
Ku mua.: “Mukaji udi musombele.”
Ku mua.: “mukaji udi musombele.”
Ku mua.: “mukaji udi musombele.”
Anyi “dishiyangana.”
Anyi “munyengianganyi.”
Ku mua.: “mukaji udi musombele.”
Ku mua.: “dinuikala kanuyi mua kumbusha nshingu yenu.”
Anyi pamuapa: “ku.”
Anyi “luesu lunene lua kulambila.”
Anyi pamuapa: “padibu ne tshintu tshia kutshiankunya.”
Ku mua.: “badi bajidila mvita idibu bamuela.”
Anyi “nebabuikile mukana muabu.”
Ku mua.: “Mitu.”
Anyi “arjan.”
Anyi “badi bamba mudibu beyemena Yehowa.”
Anyi “mukuna wa ntempelo.”
Anyi “bu kakunakuna ka mitshi.”
Anyi “Mu matuku a ku nshikidilu.”
Anyi “dilongesha.”
Anyi “neakaje malu.”
Anyi “Nebasombele.”
Ku mua.: “muntu mukaji.”
Ku mua.: “muntu mukaji.”
Anyi “bua kale.”
Anyi “mubelu wende.”
Anyi “biota.”
Anyi “balombodi.”
Anyi “muana wa ntambue wa musalala.”
Ku mua.: “a ku tshianza tshiebe.”
Tang. Diumv.
Anyi “bua mpekatu wa anyima wanyi.”
Anyi “kuikala muakane.”
Anyi “kuikala ne malu mimpe ne lulamatu mu dinanga diebe.” Ku mua.: “kunanga dinanga dia lulamatu.”
Tang. Tshis. B14.
Anyi “muoyo mutoke.”
Anyi “été.”
Anyi “idi anyima wanyi ujinga bikole.”
Anyi “dijinga dikole dia anyima wende.”
Ku mua.: “badi basuika bualu ebu pamue.”
Anyi “Nengindile ne lutulu.”
Mu tshiena Ebelu, muaku udibu bakudimune ne: “muena lukuna” udi ku bakaji.
Anyi pamuapa: “dîyi nedikale ntanta mule.”
Mmumue ne: musulu wa Pelata.
Ku mua.: “Bua mamuma a bienzedi biabu.”
Anyi “neadiate; neakokeshe.”