HABAKUKA
1 Dîyi divua muprofete Habakuka* mupete mu tshikena kumona didi ne:
2 Yehowa wanyi, too ne dîba kayi dindi ne bua kudila ndomba diambuluisha, kadi wewe kuyi uteleja?+
Too ne dîba kayi dindi ne bua kulomba diambuluisha bua malu a tshikisu, kadi wewe kuyi wenza bualu?*+
3 Bua tshinyi udi ummueneshisha malu mabi?
Ne bua tshinyi udi ulekela dikengeshangana?
Bua tshinyi kabutu ne malu a tshikisu bidi kumpala kuanyi?
Ne bua tshinyi matandu ne diluishangana bidi bivula?
4 Kabidi, mbatekeshe bukole bua mukenji,
Ne kabena bakumbaja kulumbuluisha kuakane nansha.
Bualu muntu mubi udi unyunguluka muntu muakane;
Ke bualu kayi mbakonyangaje kulumbuluisha kuakane.+
5 “Tangilayi munkatshi mua bisamba ne teyayi ntema!
Tangilayi nukema ne katshilayi;
Bualu, bualu nebuenzeke mu matuku enu
Bunuabenga kuitaba nansha bikalabu banuambilabu.+
6 Bualu, mona ndi njula bena Kasada,+
Tshisamba tshidi katshiyi ne luse, tshidi tshienza malu lukasa lukasa.
Badi babutula bitupa binene bialabale bia buloba
Bua kunyenga nzubu idi kayiyi yabu.+
7 Badi batshinyishangana ne bakuatshishangana buôwa.
Badi baditekela kuabu kulumbuluisha ne buabu bukokeshi.*+
8 Tubalu tuabu tudi ne lubilu kupita nkashama,
Ne badi ne luonji lukole kupita mbua ya ditu butuku.+
Tubalu tuabu tua mvita tudi tudiela kumpala;
Tubalu tuabu tudi tufumina kule.
Tudi tupueka lubilu bu nyunyi wa mukanku udi uya lubilu bua kudia.+
9 Buonso buabu badi balua ne lungenyi lutuma anu ku malu a tshikisu.+
Disangisha dia mpala yabu didi bu lupepele lua ku est,+
Ne badi babakula badi bakuatshibue bu lusenga.
10 Badi bapetula bakalenge
Ne baseka bakokeshi banene.+
Badi baseka muaba mukolesha wonso;+
Badi bimanyika dibula dia buloba ne bawukuata.
11 Pashishe, badi baya kumpala bu lupepele ne bapita ne njila,
Kadi nebalue bena tshibawu,+
Bualu badi bamba mudi bukole buabu bufumina kudi nzambi wabu.”*+
12 Yehowa wanyi, wewe kuenaku katshia ku bikondo bia tshiendelele anyi?+
Nzambi wanyi, Wa Tshijila wanyi, wewe kutu ufua*+ to.
13 Mêsu ebe mmakezuke kezukezu kaayi mua kutangila bualu bubi,+
Ne wewe kuena mua kuitaba malu mabi.+
Kadi bua tshinyi udi ulekela bena tshitungu
Ne ushala mupuwe padi muntu mubi umina muntu udi muakane kumupita?+
14 Bua tshinyi udi uvuija muntu bu mishipa ya mu mbuu,
Bu bintu bidi bidikoka panshi bidi kabiyi ne mfumu?
15 Yeye* udi ubajudila buonso buabu ku ndobo.
Udi ubakuata mu kapamba kende,
Ne udi ubasangisha mu bukondo buende bua mishipa.
Ke bualu kayi udi usanka bikole.+
16 Ke bualu kayi udi upesha kapamba kende milambu
Ne ulambula bukondo buende bua mishipa milambu;*
Bualu ku diambuluisha diayi tshitupa tshiende ntshilengele,*
Ne biakudia biende mbitambe buimpe.
17 Nunku, yeye neatungunuke ne kupatula bintu bia mu kapamba kende anyi?*
Yeye neatungunuke ne kushipa bisamba kakuyi luse anyi?+
2 Nenshale muimane pa muaba wanyi wa bulami,+
Nengimane pa tshibumba tshikole.
Nentungunuke ne kutangila bua kumona tshiambaye ku butuangaji buanyi
Ne tshingandamuna padibu bambela.
2 Pashishe Yehowa wakangandamuna ne:
“Funda tshikena kumona etshi, ne tshifunda tshimueneka bimpe pa tubaya,+
Bua muntu udi utshibala ne dîyi dikole amone mua kubala bipepele.*+
3 Bualu, tshikena kumona etshi tshitshidi bua tshikondo tshiatshi tshisungula,
Ne tshidi tshiya lubilu ku ndekelu kuatshi,* ne katshiakushima to.
Nansha bianengakanatshi,* tungunuka ne kutshitekemena!*+
Bualu tshiotshi netshikumbane bulelela.
Katshiakufika panyima pa dîba nansha!
4 Tangila muntu udi ne lutambishi;*
Yeye ki mmuakane munda muende to.
Kadi muntu muakane neikale ne muoyo bua lulamatu luende.*+
5 Nunku, bu mudi mvinyo utungilangana,
Muena diambu kakukumbaja tshipatshila tshiende to.
Udi utungunuka ne kusangisha bisamba bionso
Ne kudikunguijila bukua bantu buonso.+
6 Bantu bonso aba kabakumuelela lusumuinu, kumuela nsenda, ne tusumu anyi?+
Bobu nebambe ne:
‘Ndiakabi diende yeye udi ukunguija bintu bidi kabiyi biende,
Too ne dîba kayi?
Ne udi mene udiundisha dibanza diende bikole!
7 Bakusombeshi ba bintu kabakujuka diakamue anyi?
Nebabike ne nebakunyukulule ne tshikisu tshionso,
Ne wewe neulue kudibu tshintu tshia kupawula.+
8 Bu muuvua mupawule bisamba bia bungi,
Bukua bantu buonso budi bushale nebukupawule,+
Bua diela diebe dia mashi a bantu panshi
Ne bua tshikisu tshiebe kudi buloba,
Kudi bimenga ne badi basombelamu.+
9 Diakabi dikale kudi eu udi upetela nzubu wende bintu bibi,
Bua kutekela disua diende pa muaba mutumbuke,
Bua kubenga kukuatshibua kudi dikenga!
10 Udi muelele nzubu webe tshifufu tshia bundu.
Paudi ubutula bukua bantu bua bungi udi udienzela nkayebe* mpekatu.+
11 Bualu dibue nedielele lubila mu tshimanu,
Ne mukamba wa ku musaka newudiandamune.
12 Diakabi dikale kudi eu udi wibaka tshimenga ku diela dia mashi panshi,
Ne udi ujadika tshimenga ku malu adi kaayi makane!
13 Monayi! Bualu ebu ki mbufume kudi Yehowa wa biluilu ne: bukua bantu nebuenze mudimu mukole bua kudiisha kapia anyi?
Kabidi ne: bisamba bidi biditshiokesha patupu anyi?+
14 Bualu buloba nebuwujibue tente ne dimanya dia butumbi bua Yehowa
Bu mudi mâyi a bungi abuikila mbuu.+
15 Diakabi dikale kudi eu udi upesha balunda bende tshintu tshia kunua,
Usakidilaku luonji ne tshiji bua kubafikisha ku dikuatshika,
Bua kutangila butaka buabu!
16 Neuwujibue tente ne bundu pamutu pa butumbi.
Wewe kabidi, nuaku ne leja patoke muudi kuyi mutengula.*
Dikopo didi mu tshianza tshia balume tshia Yehowa nedilue too ne kuudi,+
Ne bundu nebubuikile butumbi buebe;
17 Bualu malu a tshikisu auvua muenzele Lebanona neakubuikile,
Ne kabutu kavua kakuatshishe nyama buôwa nekakukuate,
Bua diela diebe dia mashi a bantu panshi
Ne bua tshikisu tshiebe kudi buloba,
Kudi bimenga ne badi basombelamu.+
18 Lupingu lusonga ludi ne dikuatshisha kayi
Padi muluenji mulusonge?
Lupingu lua tshiamu* ne mulongeshi wa mashimi bidi ne dikuatshisha kayi
Nansha mudi muluenji ulueyemena,
Wenza nzambi ya tshianana idi kayiyi yakula?+
19 Diakabi dikale kudi eu udi wambila tshitupa tshia mutshi ne: “Tabala!”
Anyi wambila dibue didi kadiyi diakula ne: “Bika! Tulongesha!”
20 Kadi Yehowa udi mu ntempelo wende wa tshijila.+
Puwayi kumpala kuende, buloba buonso!’”+
3 Disambila dia muprofete Habakuka, mu tusala tua miadi:*
2 Yehowa wanyi, ndi mumvue lumu lua bualu buebe.
Yehowa wanyi, ndi ne ditshina bua mudimu webe.
Uwupeshe muoyo munkatshi mua bidimu!*
Uwumanyishe munkatshi mua bidimu.*
Uvuluke bua kuleja luse mu tshikondo tshia diyumbakana.+
Bunême buende buvua bubuikile diulu;+
Buloba buvua buwule ne butumbi buende.
4 Bukenke buende buvua bu butoke.+
Nsese ibidi yakafuma mu tshianza tshiende,
Muvua bukole buende busokome.
5 Tshipupu tshiakaya kumpala kuende,+
Ne disama dia mubidi kapia dikole diakalonda ku makasa ende.
6 Yeye wakimana ne wakanyukula buloba.+
Wakasotueshisha bisamba ne mêsu ende.+
Mikuna minene ya tshiendelele yakatayishibua,
Ne mikuna mikese ya kale yakinama.+
Njila ya matuku a kale nyende yeye.
7 Ngakamona ntatu mu ntenta ya Kushana.
Bilamba bia ntenta bia mu buloba bua Midiyana biakazakala.+
8 Yehowa wanyi, mmisulu,
Mmisulu ke idi tshiji tshiebe tshitemena anyi?
Peshi tshiji tshiebe tshikole tshidi tshitemena mbuu?+
9 Buta buebe bua mikete budi buashi ne mbuakaja.
Milangala* mmipesha mudimu ne mutshipu.* (Sela)
Wewe uvua mupande buloba ne misulu.
10 Mikuna yakadinyenga pavuayi mikumone.+
Mâyi a mvula akakomba.
Ndondo wakakungula ne dîyi diende.+
Wakela bianza biende muulu.
11 Dîba ne ngondo bivua bimane muaba wabi mutumbuke wa kusombela.+
Mikete yebe yakapatuka bu bukenke.+
Ne mupenyi wa difuma diebe uvua ubalakana.
12 Wewe wakenda pa buloba mufiike munda.
Wakadiatakaja* bisamba mu tshiji.
13 Wewe wakapatuka bua lupandu lua bantu bebe, bua kupandisha muela manyi webe.
Wakazaza mulombodi* wa nzubu wa muntu mubi.
Uvua muedibue patoke kubangila ku tshishimikidi too ne ku mutu.* (Sela)
14 Wakatubula mutu wa bena mvita bende ne bia mvita biende* yeye
Pavuabu bapatuke bua kuntangalaja.
Bavua ne disanka dia bungi bua kudia mukengi mu musokoko.
15 Wakadiata mu mbuu ne tubalu tuebe,
Mu mâyi malabale a mavuala makole.
16 Ngakumvua ne ngakazakala munda muanyi;*
Bua tshiona, mishiku yanyi yakakanka.
Dibola diakabuela mu mifuba yanyi;+
Mikolo yanyi ivua izakala muinshi muanyi.
Kadi ndi ngindila dituku dia dikenga talalaa,+
Bualu didi dilua kudi bantu badi batubunda.
17 Nansha mutshi wa mfigi kawuyi muele bilongo,
Ne tumuma katuyi ku mionji ya tumuma tua mvinyo;
Nansha tumuma tua olive tupange kukuama,
Ne madimi* kaayi mapatule biakudia;
Nansha mikoko mijimine mu tshikumbi,
Ne ngombe kayiyi mu bipangu;
18 Kadi meme, nensankile mu Yehowa bikole;
Nengikale ne disanka mu Nzambi wa lupandu luanyi.+
19 Mukalenge Mutambe Bunene Yehowa udi bukole buanyi;+
Neavuije makasa anyi bu a ngulungu
Ne neangendeshe miaba mitumbuke.+
Kudi muludiki; wa kuimba ne biombelu bianyi bia nshinga.
Diumvuija pamuapa: “Dielangana tshitupa bikole.”
Anyi “upandisha.”
Anyi “bunême.”
Anyi pamuapa: “nzambi wabu muikale bukole buabu.”
Anyi pamuapa: “ tuetu katuakufua to.”
Anyi “bua kubela.”
Mmumue ne: muluishi muena Kasada.
Anyi “muishi wa mulambu.”
Ku mua.: “ntshia manyi.”
Anyi pamuapa: “neatungunuke ne kutula muele wende wa mvita anyi?”
Anyi “bimpe.”
Anyi “dikumbana diatshi.”
Anyi “tshiotshi tshimueneka bu tshidi tshinenga kana.”
Anyi “utshindile ne muoyo mujima!”
Anyi “Mona! Anyima wende mmuwule.”
Anyi pamuapa: “ditabuja; ditaba diende.”
Anyi “anyima wende.”
Anyi “Sheole,” mmumue ne: lukita lua bukua bantu buonso. Tang. Diumv.
Anyi “wenzela anyima webe.”
Anyi pamuapa: “ne utetuke.”
Anyi “lupingu lua tshiamu tshiengulula.”
Anyi “misambu ya madilu.”
Anyi pamuapa: “tshikondo tshietu etshi.”
Anyi pamuapa: “tshikondo tshietu etshi.”
Tang. Diumv.
Anyi “lupandu.”
Anyi pamuapa: “Mikete.”
Anyi pamuapa: “Mitshipu miela ya bisa mmiamba.”
Ku mua.: “Wakashipula.”
Ku mua.: “mutu.”
Ku mua.: “nshingu.”
Ku mua.: “milangala yende.”
Ku mua.: “ne difu dianyi diakazakala.”
Anyi “mabula.”