SEFANYA
1 Dîyi dia Yehowa divua dilue kudi Sefanya* muana wa Kusha, muana wa Gedaliya, muana wa Amalia, muana wa Hezikiya, mu matuku a Yoshiya+ muana wa Amona+ mukalenge wa Yuda didi ne:
2 “Nenkombe bintu bionso bidi pa mutu pa buloba kakuyi kushala kantu,” ke mudi Yehowa wamba.+
3 “Nenkombe muntu ne nyama.
Nenkombe nyunyi ya muulu ne mishipa ya mu mbuu,+
Ne bilenduishi*+ pamue ne benji ba malu mabi;
Ne nengumbushe bukua bantu pa mutu pa buloba,” ke mudi Yehowa wamba.
4 “Nengolole tshianza tshianyi bua kuluisha Yuda
Ne bua kuluisha bonso badi basombele mu Yelushalema,
Ne nenkupule bishadila bionso bia* Bâla mu muaba eu,+
Dîna dia bakuidi ba nzambi ya ku babende pamue ne bakuidi,+
5 Ne bantu badi binamina tshiluilu tshia mu diulu pa mutu pa misaka ya nzubu,+
Ne badi binama ne balaya lulamatu kudi Yehowa+
Padibu eku balaya lulamatu kudi Malakama;+
6 Ne bantu badi balekela kulonda Yehowa+
Ne badi kabayi bakeba Yehowa anyi bamukonka bualu.”+
7 Puwa kumpala kua Mukalenge Mutambe Bunene Yehowa, bualu dituku dia Yehowa didi pabuipi.+
Yehowa mmulongolole mulambu; mmujidile bantu badiye mubikile.
8 “Mu dituku dia mulambu wa Yehowa nendumbuluishe bakokeshi,
Bana ba mukalenge,+ ne bonso badi bavuala bilamba bia ku babende.
9 Nendumbuluishe muntu yonso udi ubanda pa tshibumba* dituku adi,
Bantu badi buwuja nzubu wa mfumuabu ne tshikisu ne dishima.
10 Dituku adi,” ke mudi Yehowa wamba,
“Nekuikale mutoyi wa lubila lukole ufumina ku Tshiibi tshia Mishipa,+
Kabobo ka muadi kafumina mu Tshitupa Tshibidi tshia tshimenga,+
Ne mutoyi mukole menemene ufumina ku mikuna.
11 Elayi kabobo ka muadi, nuenu badi basombele mu Maketesha,*
Bualu mbajimije* bangenda mushinga bonso;
Bonso badi bapima bujitu bua arjan mbabutudibue.
12 Tshikondo atshi, nenkebulule mu Yelushalema bimpe bimpe ne miendu,
Ne nendumbuluishe bantu badi kabayi batshiuka bualu,* badi bamba mu mioyo yabu ne:
‘Yehowa kakuenza bualu buimpe, ne yeye kakuenza bualu bubi.’+
13 Nebapawule biuma biabu ne nebabutule nzubu yabu.+
Nebase nzubu, kadi kabakusombelamu;
Ne nebadime madimi a tumuma tua mvinyo, kadi kabakunua mvinyo wa ku madimi au to.+
14 Dituku dinene dia Yehowa didi pabuipi!+
Didi pabuipi ne didi disemena ne lubilu lukole!*+
Tshiona tshia dituku dia Yehowa tshidi bululu.+
Kuoku aku muena mvita udi wela lubila.+
15 Dituku adi ndituku dia tshiji tshikole,+
Dituku dia ntatu ne kanyinganyinga,+
Dituku dia tshipepele tshikole ne kabutu,
Dituku dia mîdima ne mifitu,+
Dituku dia matutu ne mifitu mikole,+
16 Dituku dia mpungi ne dia lubila lua mvita,+
Bua kuluisha bimenga bikolesha ne bibumba bitumbuke bia mu matumba.+
18 Nansha arjan yabu anyi or yabu kabiakukumbana bua kubapandisha mu dituku dia tshiji tshikole tshia Yehowa to;+
Bualu buloba bujima nebuoshike ku kapia ka tshisumi tshiende,+
Bualu yeye neabutule bonso badi basombele pa buloba, bushuwa dibutula dia dikema.”+
2 Disangishayi pamue, eyowa, disangishayi,+
Nuenu bena mu tshisamba tshidi katshiyi tshiumvua bundu.+
2 Kumpala kua mukenji kukumbanawu,
Kumpala kua dituku kupita bu bisote,
Kumpala kua tshiji tshikole tshia Yehowa kulua kunudi,+
Kumpala kua dituku dia tshiji tshia Yehowa kulua kunudi,
3 Kebayi Yehowa,+ nuenu bena bupuekele* bonso badi pa buloba,
Badi batumikila mikenji yende miakane.*
Kebayi buakane, kebayi bupuekele.*
Pamuapa* nebanusokoke mu dituku dia tshiji tshia Yehowa.+
4 Bualu Gaza neikale tshimenga tshilekela;
Ne Ashekelona neikale munda mutupu.+
5 “Diakabi dikale kudi badi basombele ku muelelu wa mbuu, tshisamba tshia bena Kelete!+
Dîyi dia Yehowa didi dinupisha.
Wewe Kanâna, buloba bua bena Peleshete, nenkubutule,
Nunku kakuakuikala muntu nansha umue udi ushala.
6 Muelelu wa mbuu newulue maloba a kudishila nyama,
Mikale ne bina bia mâyi bua balami ba mikoko ne bikumbi bia mabue bua mikoko.
7 Newulue tshitupa tshia buloba tshia bashadile ba mu nzubu wa Yuda;+
Nebadiile muomu amu.
Nebalale mu nzubu ya Ashekelona ku dilolo.
8 “Ndi mumvue bulaku bua Moaba+ ne bipendu bia bena Amona,+
Badi bayobole bantu banyi ne bafunyine buloba buabu.+
9 Nunku, bu mundi ne muoyo,” ke mudi Yehowa wa biluilu, Nzambi wa Isalele wamba,
“Moaba nealue anu bu Sodoma,+
Ne bena Amona bu Amola,+
Muaba wa mpesa, tshina tshia mukele, ne buloba bua munda mutupu bua kashidi.+
Bantu banyi badi bashala nebabapawule,
Ne bashadile ba tshisamba tshianyi nebangate bintu biabu.
10 Ke tshiapetabu pamutu pa lutambishi luabu,+
Bualu bavua bayobole bantu ba Yehowa wa biluilu ne baditumbishe kumpala kuabu.
11 Yehowa neikale ubakuatshisha buôwa;*
Bualu neajimije* nzambi ya pa buloba yonso,
Ne bidiila* bionso bia bisamba nebimuinamine,*+
Tshionso muaba uditshi au.
12 Nuenu bena Etshiopi nenushipibue penu ku muele wanyi wa mvita.+
13 Neolole tshianza tshiende ku nord ne neabutule Ashû,
Neashiye Niniwe munda mutupu,+ mume anu bu tshipela.
14 Bisumbu bia nyama nebilale munda muende, nyama ya tshisuku ya mishindu yonso.*
Nyunyi wa mukuekue ne nyama wa nkese nebilale bionso munkatshi mua mitu ya makunji ende.
Dîyi nedimbe pa dididishi.
Nekuikale dibutuka mu mushiku wa mbelu;
Bualu yeye neashiye mabaya a mutshi wa sedre patoke.
15 Etshi ntshimenga tshia lutambishi tshivua tshisombe mu bukubi,
Tshivua tshiamba mu muoyo watshi ne: ‘Meme ke yeye, ne kakuena mukuabu.’
Mona muditshi tshilue tshintu tshidi tshikuatshisha buôwa,
Muaba wa nyama ya tshisuku kuladila!
Muntu yonso udi upitshila pabuipi natshi neele muonzo ne neanyukule mbata wende.”+
3 Diakabi dikale kudi tshimenga tshia buntomboji tshidi tshinyanguke, tshidi tshikengeshangana!+
2 Yeye ki mmutumikile dîyi nansha dimue;+ ki mmuitabe mubelu nansha umue.+
Ki mmueyemene Yehowa;+ ki mmusemene pabuipi ne Nzambi wende to.+
3 Bakokeshi bende badi munda muende badi ntambue idi ikungula.+
Balumbuluishi bende badi butuku mbua ya ditu;
Kabena bashiya nansha mufuba wa kukunya too ne mu dinda.
4 Baprofete bende mbapange malu, mbena tshitungu.+
5 Yehowa udi muakane munkatshi muende;+ yeye kena wenza bualu bubi.
Ku dinda ne ku dinda udi umanyisha mêyi ende a dilumbuluisha,+
Anu bu butoke, kaena apangila to.
Kadi muntu udi kayi muakane ki mmumanye bundu.+
6 “Ngakabutula bisamba; bibumba biabu bia mu matumba bivua bishale tshianana.
Ngakabutula njila yabu, nunku muntu nansha umue kavua upitshilamu.
Bimenga biabu biakashala bikulu, kamuyi muntu, kakuyi muntu musombelamu.+
7 Ngakamba ne: ‘Bushuwa wewe neuntshine ne newitabe dinyoka,’*+
Kadi bakatamba kuzuka bua kuenza malu mabi.+
8 ‘Nunku tungunukayi ne kuntekemena,’*+ ke mudi Yehowa wamba,
‘Too ne dituku dindi njuka bua kupawula bintu,*
Bualu dipangadika dianyi ndia kukunguija bisamba ne kusangisha makalenge,
Kubapongoluela tshiji tshianyi, tshiji tshianyi tshionso tshikole;+
Bualu buloba bujima nebuoshike ku kapia ka tshisumi tshianyi.+
9 Bualu dîba adi nenkudimune muakulu wa bukua bantu ulua muakulu mukezuke,
Bua buonso buabu bamone mua kubila dîna dia Yehowa,
Bua bamuenzele mudimu dikaya dituangane ne dikaya dikuabu.’*+
10 Ku buloba bua misulu bua Etshiopi,
Bantu badi bansengelela, muana wa bakaji wa bantu banyi badibu batangalaje, nebantuadile dipa.+
11 Dituku adi kuakufuishibua bundu
Bua bienzedi biebe bionso
biuvua muntombokele nabi,+
Bualu nengumbushe bantu
badi baditumbisha ne didibandisha munkatshi muebe;
Ne kuakuikala kabidi ne didibandisha mu mukuna wanyi wa tshijila nansha.+
12 Nenganyishile bantu bena budipuekeshi badi bapuekele bua kushalabu munkatshi muenu,+
Nebanyemene mu dîna dia Yehowa.
13 Bashadile ba Isalele+ kabakuenza bualu nansha bumue budi kabuyi buakane;+
Kabakuamba bualu bua dishima, anyi kusangana ludimi ludi lushima mukana muabu nansha;
14 Ela mbila ne disanka, wewe muana wa bakaji wa Siona!
Ela mbila ya ditshimuna, wewe Isalele!+
Ikala ne disanka ne sangala ne muoyo webe wonso, wewe muana wa bakaji wa Yelushalema!+
15 Yehowa mmumbushe mêyi a dilumbuluisha kunudi.+
Yeye mmutshingulule muena lukuna webe.+
Mukalenge wa Isalele, Yehowa, udi munkatshi muebe.+
Kuakutshina kabidi dikenga nansha.+
16 Dituku adi nebambile Yelushalema ne:
“Kutshinyi, wewe Siona.+
Bianza biebe kabipueki.
17 Yehowa Nzambi webe udi munkatshi muebe.+
Bu Muena bukole, yeye neakupandishe.
Neasanke bikole bua bualu buebe ne disanka dinene.+
Neapuwe* mu dinanga diende.
Neasanke bua bualu buebe ne mbila ya disanka.
18 Nensangishe pamue bantu badi banyingalala bua dipumbisha diabu mu bibilu biebe;+
Kabavua nebe bualu bavua bambule tshipendu bua bualu buende.+
19 Mona! Tshikondo atshi nenduishe bonso badi bakukengesha;+
Ne nempandishe muntu udi utebuka,+
Ne nensangishe pamue bavuabu batangalaje.+
Nembavuije tshintu tshia butumbi ne lumu*
Mu buloba bujima bua bundu buabu.
20 Tshikondo atshi nennubueje munda,
Tshikondo atshi nennusangishe pamue.
Bualu nennuvuije tshintu tshia lumu* ne butumbi+ munkatshi mua bukua bantu buonso bua pa buloba,
Pandi mpingaja bakuatshibue bebe mu mêsu muebe,” ke mudi Yehowa wamba.+
Diumvuija: “Yehowa mmusokoke (mmubute).”
Bimueneka ne: mbintu anyi malu adi mu diumvuangana ne ditendelela dia mpingu.
Anyi “tshifundu tshionso tshia.”
Anyi “tshitamba; mushiku wa mbelu.” Pamuapa tshibumba tshia nkuasa wa bukalenge wa mukalenge.
Bimueneka ne: ntshitupa tshia Yelushalema tshidi pabuibi ne Tshiibi tshia Mishipa.
Ku mua.: “mbapuwishe.”
Ku mua.: “badi babatama pa bishikishiki biabu,” bu mu tshintu tshia kulamina mvinyo.
Anyi “diambuluja lukasa lukasa!”
Ku mua.: “mala abu.”
Anyi “bena budipuekeshi.”
Ku mua.: “dilumbuluisha diende.”
Anyi “budipuekeshi.”
Anyi “Bidi mua kuenzeka ne.”
Anyi “munda munya.”
Anyi “neabatabalele.”
Anyi “utshinyisha bikole.”
Anyi “neapelule.”
Anyi “bisanga.”
Anyi “nebimutendelele.”
Ku mua.: “nyama yonso wa mu tshisamba.”
Anyi “mubelu.”
Anyi “kumunyoka.”
Anyi “kungindila ne lutulu luonso.”
Anyi pamuapa: “njuka bu ntemu.”
Anyi “bamutendelele mu buobumue.”
Anyi “Nebadie bisonsa.”
Anyi “Neashale talalaa; Neikishe; Neukute.”
Ku mua.: “dîna.”
Ku mua.: “dîna.”