ZEKÂYA
1 Mu ngondo wa muanda mukulu, mu tshidimu tshibidi tshia Dayawesha,+ dîyi dia Yehowa diakalua kudi muprofete Zekâya*+ muana wa Belekiya muana wa Ido, diamba ne: 2 “Yehowa wakafiikila batatuenu munda bikole.+
3 “Ubambile ne: ‘Monayi tshidi Yehowa wa biluilu wamba: “‘Pinganayi kundi,’ ke mudi Yehowa wa biluilu wamba, ‘ne meme nempingane kunudi,’+ ke mudi Yehowa wa biluilu wamba.”’
4 “‘Kanulu bu batatuenu bavua baprofete ba kale bamanyishe ne: “Monayi tshidi Yehowa wa biluilu wamba: ‘Nuenu mua kusua, umbukayi* ku njila yenu mibi ne ku bienzedi bienu bibi.’”’+
“‘Kadi kabavua bateleje ne kabavua bateye ntema kundi nansha,’+ ke mudi Yehowa wamba.
5 “‘Batatuenu badi penyi mpindieu? Baprofete bavuaku bashale ne muoyo kashidi anyi? 6 Kadi, mêyi anyi ne mikenji yanyi bimvua muambile bena mudimu banyi baprofete, biakakumbanyina batatuenu, ki mmuomu anyi?’+ Nunku bakapingana kundi, kuambabu ne: ‘Yehowa wa biluilu mmutuenzele malu bilondeshile njila yetu ne bienzedi bietu anu bu muvuaye mupangadije bua kuenza.’”+
7 Mu dituku dia 24 dia ngondo wa 11, mmumue ne: ngondo wa Shebata,* mu tshidimu tshibidi tshia Dayawesha,+ dîyi dia Yehowa diakalua kudi muprofete Zekâya muana wa Belekiya muana wa Ido, diamba ne: 8 “Ngakamona tshikena kumona butuku. Kuvua muntu mubande pa kabalu kakunze, ne wakimana munkatshi mua mitshi ya mirte mu lupongo; ne panyima pende pavua tubalu tukunze, tukunzubile ne tutoke.”
9 Nunku, ngakakonka ne: “Mukalenge wanyi, aba mbanganyi?”
Muanjelu uvua uyukila nanyi kuandamunaye ne: “Nenkuleje ne: mbanganyi aba.”
10 Pashishe, muntu uvua muimane munkatshi mua mitshi ya mirte wakamba ne: “Aba mbadi Yehowa mutume bua kuendakana mu buloba.” 11 Bakambila muanjelu wa Yehowa uvua muimane munkatshi mua mitshi ya mirte ne: “Tudi bendakane mu buloba, ne mona! buloba bujima budi talalaa, kabuyi butatshishibua.”+
12 Nunku muanjelu wa Yehowa wakakonka ne: “Yehowa wa biluilu, neupale Yelushalema ne bimenga bia Yuda+ biudi mufiikile munda bidimu ebi 70+ luse luebe too ne dîba kayi?”
13 Ke Yehowa kuandamuna muanjelu uvua uyukila nanyi ne mêyi mimpe adi akolesha. 14 Pashishe, muanjelu uvua uyukila nanyi wakangambila ne: “Ela dîyi ne: ‘Mona tshidi Yehowa wa biluilu wamba: “Tshisumi tshindi natshi bua Yelushalema ne bua Siona ntshisumi tshikole.+ 15 Ndi mufiikile bisamba bidi bisombe talalaa munda ne difiika dia munda dikole,+ bualu mvua mufiike munda anu kakese,+ kadi biobi biakavudija dikenga.”’+
16 “Nunku, mona tshidi Yehowa wamba: ‘“Nempingane kudi Yelushalema ne luse,+ ne nzubu wanyi neibakibue munda muende,”+ ke mudi Yehowa wa biluilu wamba, “ne nebolole nshinga wa kupima nende bule pa mutu pa Yelushalema.”’+
17 “Ela kabidi dîyi ne amba ne: ‘Mona tshidi Yehowa wa biluilu wamba: “Bimenga bianyi nebiuwule kabidi tente ne buimpe; ne Yehowa neasambe kabidi Siona+ ne neasungule Yelushalema kabidi.”’”+
18 Pashishe, ngakabandisha mêsu, meme kumona nsengu inayi.+ 19 Nunku ngakebeja muanjelu uvua uyukila nanyi ne: “Ebi mbinganyi?” Yeye kuandamuna ne: “Eyi nnsengu ivua mitangalaje Yuda,+ Isalele+ ne Yelushalema.”+
20 Pashishe, Yehowa wakandeja bansenda banayi. 21 Ngakebeja ne: “Aba badi balua kuenza tshinyi?”
Yeye kungambila ne: “Eyi nnsengu ivua mitangalaje Yuda mu mushindu wa ne: kakuvua muntu nansha umue uvua mua kujula mutu wende to. Mikuabu eyi neyilue bua kuyitshinyisha, bua kuela panshi nsengu ya bisamba bivua bijudile buloba bua Yuda nsengu yabi bua kumutangalaja.”
2 Ngakabandisha mêsu, meme kumona muntu muikale ne nshinga wa kupima nende bule+ mu tshianza tshiende. 2 Ke meme kukonka ne: “Udi uya penyi?”
Yeye kuandamuna ne: “Ndi nya kupima Yelushalema bua kumona bunene budiye ne bule budiye.”+
3 Monayi! Muanjelu uvua uyukila nanyi wakapatuka, ne muanjelu mukuabu wakalua bua kusambakena nende. 4 Pashishe, yeye wakamuambila ne: “Ndaku lubilu muaba wawa, wambile nsongalume wawa ne: ‘“Yelushalema neikale ne bantu basombelamu+ bu ditunga dikale buashi dia ku butshika,* bua bantu bonso ne bimuna bionso bidi munda muende.+ 5 Nunku, nendue kudiye,” ke mudi Yehowa wamba, “tshimanu tshia kapia ku nseke yonso,+ ne nendue butumbi munkatshi muende.”’”+
6 “Luayi! Luayi! Nyemayi mu buloba bua ku nord,”+ ke mudi Yehowa wamba.
“Bualu ndi munutangalaje ku mpepele inayi ya mu diulu,”+ ke mudi Yehowa wamba.
7 “Luaku, Siona! Nyema, wewe udi musombe ne muana wa bakaji wa Babilona.+ 8 Mona tshidi Yehowa wa biluilu, yeye uvua panyima pa mumane kutumbishibua* muntume kudi bisamba bivua bikupawula,+ wamba: ‘Muntu yonso udi ukulenga udi ulenga kamonyi ka dîsu dianyi.*+ 9 Bualu mpindieu, nenkupe tshianza tshianyi bua kubaluisha, ne nebalue tshintu tshia kupawula kudi bapika babu.’+ Nunku, bushuwa nenufike ku dimanya ne: Yehowa wa biluilu mmuntume.
10 “Ela mbila ya disanka, wewe muana wa bakaji wa Siona;+ bualu ndi ndua,+ ne nensombe munkatshi muebe,”+ ke mudi Yehowa wamba. 11 “Bisamba bia bungi nebidisange kudi Yehowa dituku adi,+ ne bobu nebalue bantu banyi; ne nensombe munkatshi muebe.” Nunku, wewe neufike ku dimanya ne: Yehowa wa biluilu mmuntume kuudi. 12 Yehowa neangate Yuda bu tshiende tshitupa mu buloba bua tshijila, ne yeye neasungule kabidi Yelushalema.+ 13 Puwayi kumpala kua Yehowa, nuenu bukua bantu buonso,* bualu yeye udi wenza bualu kumbukila mu tshisombelu tshiende tshia tshijila.
3 Pashishe, wakandeja muakuidi munene Yoshua+ muimane kumpala kua muanjelu wa Yehowa, ne Satana+ uvua muimane ku tshianza tshiende tshia balume bua kumuluisha. 2 Pashishe muanjelu wa Yehowa wakambila Satana ne: “Yehowa akutandishe, wewe Satana,+ eyowa, Yehowa udi musungule Yelushalema+ akutandishe! Yeye eu ki ndukunyi lua kapia lupatula mu kapia anyi?”
3 Mpindieu, Yoshua uvua muvuale bilamba bia manyanu ne uvua muimane kumpala kua muanjelu. 4 Muanjelu wakambila bavua bimane kumpala kuende ne: “Umbushayi bilamba biende bia manyanu.” Pashishe wakamuambila ne: “Mona, ndi muenze bua tshilema tshiebe tshiumbuke* kuudi, ne nebakuvuadike bilamba bimpe.”*+
5 Nunku ngakamba ne: “Muvuadikayi tshilamba tshia kujingila ku mutu tshikezuke ku mutu wende.”+ Ke bobu kumuvuadika tshilamba tshia kujingila ku mutu tshikezuke ku mutu wende, kumuvuadikabu ne bilamba bikuabu; ne muanjelu wa Yehowa uvua muimane pabuipi apu. 6 Pashishe, muanjelu wa Yehowa wakambila Yoshua ne: 7 “Mona tshidi Yehowa wa biluilu wamba: ‘Wewe muendele mu njila yanyi ne mukumbaje midimu yebe kumpala kuanyi, nunku newenze mudimu bu mulumbuluishi mu nzubu wanyi+ ne neutabalele* mbanza yanyi; nenkuanyishile bua wewe kubuela munkatshi mua badi bimane muaba eu.’
8 “‘Telejayi koku, wewe Muakuidi munene Yoshua ne bena diebe badi basombe kumpala kuebe, bualu bantu aba badi tshimanyinu; monayi! ndi ndua ne muena mudimu wanyi+ Lutonga!+ 9 Monayi dibue dindi muteke kumpala kua Yoshua! Pa dibue dimue edi padi mêsu muanda mutekete; ne nengondolapu mufundu,’ ke mudi Yehowa wa biluilu wamba, ‘ne nengumbushe dipila dia buloba abu mu dituku dimue.’+
10 “‘Mu dituku adi,’ ke mudi Yehowa wa biluilu wamba, ‘muntu yonso wa kunudi neabikile muinende bua kulua muinshi mua muonji wende wa tumuma tua mvinyo ne muinshi mua mutshi wende wa mfigi.’”+
4 Muanjelu uvua uyukila nanyi wakalukila, kunjulaye bu mudibu bajula muntu ku tulu. 2 Pashishe wakangambila ne: “Udi umona tshinyi?”
Ke meme kuamba ne: “Ndi mmona, ne tangila! tshitekelu tshia miendu tshionso tshijima tshia or,+ ne tshibakudi ku mutu kuatshi. Kudi miendu muanda mutekete pa mutu patshi,+ eyowa, miendu muanda mutekete, ne miendu idi ku mutu kuatshi idi ne tulonda muanda mutekete. 3 Mitshi ya olive ibidi idi pabuipi natshi,+ umue ku dia balume dia tshibakudi ne mukuabu ku dia bakaji.”
4 Pashishe ngakebeja muanjelu uvua uyukila nanyi ne: “Mukalenge wanyi, bintu ebi bidi biumvuija tshinyi?” 5 Ke muanjelu uvua uyukila nanyi kuebeja ne: “Kuena mumanye tshidi bintu ebi biumvuija anyi?”
Meme kuandamuna ne: “Tòo, mukalenge wanyi.”
6 Pashishe yeye wakangambila ne: “Edi ndîyi didi Yehowa wambila Zelubabela: ‘“Ki nku tshiluilu tshia basalayi, anyi ku bukole,+ kadi nku nyuma wanyi,”+ ke mudi Yehowa wa biluilu wamba. 7 Udi nganyi, wewe mukuna munene? Newulue buloba bulandakane*+ kumpala kua Zelubabela.+ Yeye neapatule dibue dia mu musonga* munkatshi mua mbila ya ne: “Bilenga bia dikema! Bilenga bia dikema!”’”
8 Dîyi dia Yehowa diakalua kabidi kundi, diamba ne: 9 “Bianza bia Zelubabela mbiase tshishimikidi tshia nzubu eu,+ ne bianza biende yeye ke biamujikija.+ Nunku, nenumanye ne: Yehowa wa biluilu mmuntume kunudi. 10 Bualu nnganyi udi mupetule dituku dia ntuadijilu mikese?*+ Bualu bobu nebasanke ne nebamone nshinga wa tshiamu tshia plomb* mu tshianza tshia Zelubabela. Mêsu muanda mutekete aa mmêsu a Yehowa adi atambakana pa buloba buonso.”+
11 Pashishe ngakamuebeja ne: “Mitshi ya olive ibidi idi eu ku dia balume ne eu ku dia bakaji dia tshitekelu tshia miendu idi yumvuija tshinyi?”+ 12 Ngakamuebeja musangu muibidi ne: “Tusumbu tubidi tua bisalasala* bia mitshi ya olive tudi tupatuila mâyi a or mu tulonda tubidi tua or tudi tumvuija tshinyi?”
13 Ke yeye kungebeja ne: “Kuena mumanye tshidi bintu ebi biumvuija anyi?”
Meme kuandamuna ne: “Tòo, mukalenge wanyi.”
14 Yeye kuamba ne: “Aba mbela manyi babidi badi bimane ku luseke kua Mukalenge wa buloba bujima.”+
5 Ngakabandisha kabidi mêsu, meme kumona muvungu ubuuka. 2 Yeye wakangebeja ne: “Udi umona tshinyi?”
Meme kuandamuna ne: “Ndi mmona muvungu ubuuka, muikale nkubita* 20 mu bule ne nkubita dikumi mu butshiama.”
3 Pashishe, yeye wakangambila ne: “Eu mmulawu udi uya pa mutu pa buloba buonso, bualu muntu yonso udi wiba,+ anu mudibu bafunde mu luseke luawu lumue, ki mmunyokibue to; ne muntu yonso udi uditshipa mutshipu,+ anu mudibu bafunde mu luseke luawu lukuabu, ki mmunyokibue to. 4 ‘Ndi muwutume,’ ke mudi Yehowa wa biluilu wamba, ‘ne wowu newubuele mu nzubu wa muivi ne mu nzubu wa muntu udi uditshipa mutshipu wa dishima mu dîna dianyi; newushale munda mua nzubu au, newoshe nzubu au ne mabaya ende ne mabue ende.’”
5 Pashishe muanjelu uvua uyukila nanyi wakalua, kungambilaye ne: “Bandisha koku mêsu, mona tshidi tshipatuka.”
6 Ke meme kuebeja ne: “Ntshinyi etshi?”
Yeye kuandamuna ne: “Etshi ntshipiminu tshia efa* tshidi tshipatuka.” Yeye kutungunuka ne: “Etshi ke tshimuenekelu tshiabu pa buloba buonso.” 7 Ngakamona ne: tshibuikidiji tshia tshijengu tshia tshiamu tshia ntende tshivua tshiambulula muulu, ne kuvua mukaji musombe munda mua tshipiminu atshi. 8 Nunku, yeye wakamba ne: “Ebu ke Bubi.” Pashishe wakamusakila mu tshipiminu tshia efa, pashishe yeye kupusa tshiamu tshia ntende tshia bujitu pa mushiku wa tshipiminu.
9 Pashishe meme kubandisha mêsu, meme kumona bakaji babidi balua, ne bavua bapapala mu lupepele. Bavua ne mapuapua bu mapuapua a kasonga nyunyi. Bakabandisha tshipiminu atshi pankatshi pa buloba ne diulu. 10 Ke meme kuebeja muanjelu uvua uyukila nanyi ne: “Badi baya ne tshipiminu tshia efa penyi?”
11 Yeye kuandamuna ne: “Mu buloba bua Shinâ*+ bua kumuibakila nzubu; padibu bamulongolola, nebamutekamu pa muaba wende menemene.”
6 Pashishe ngakabandisha kabidi mêsu, meme kumona matempu anayi afumina pankatshi pa mikuna ibidi, ne mikuna ayi ivua ya tshiamu tshia mitaku. 2 Ditempu dia kumpala divua ne tubalu tukunze, ne ditempu dibidi divua ne tubalu tufiike.+ 3 Ditempu disatu divua ne tubalu tutoke, ne ditempu dinayi divua ne tubalu tua matoba matoba ne makeji makeji.+
4 Ngakebeja muanjelu uvua uyukila nanyi ne: “Ebi mbinganyi, mukalenge wanyi?”
5 Muanjelu wakangandamuna ne: “Eyi nnyuma inayi+ ya mu diulu idi ipatuka panyima pa yoyi mimane kuimana kumpala kua Mukalenge wa buloba bujima.+ 6 Didi* ne tubalu tufiike didi diya mu buloba bua ku nord;+ tua tutoke tudi tuya dia muamua dia mbuu; ne tua matoba matoba tudi tuya mu buloba bua ku sud. 7 Tua makeji makeji tuvua tujinga bikole bua kuya kutambakana pa buloba.” Pashishe yeye wakamba ne: “Ndayi, nutambakane pa buloba.” Tuotu tuakabanga kutambakana pa buloba.
8 Pashishe, yeye wakangela dîyi, kuambaye ne: “Tangila, tudi tuya mu buloba bua ku nord ntuenze bua nyuma wa Yehowa ikishe mu buloba bua ku nord.”
9 Dîyi dia Yehowa diakalua kabidi kundi, diamba ne: 10 “Angata bintu kudi Heledai, Tobiya, ne Yedaya bivuabu bafume nabi kudi bantu badibu bakuate ku babende; ne dituku adi, wewe udi ne bua kuya ku nzubu wa Yoshiya muana wa Sefanya pamue ne aba badi bafumine ku Babilona. 11 Udi ne bua kuangata arjan ne or, kuenza tshifulu tshia butumbi* ne kutshiasa ku mutu kua Yoshua+ muana wa Yehosadaka, muakuidi munene. 12 Muambila ne:
“‘Mona tshidi Yehowa wa biluilu wamba: “Eu ke muntu udi ne dîna ne: Lutonga.+ Yeye neatolokele muaba wende, ne neibake ntempelo wa Yehowa.+ 13 Yeye ke muntu wibaka ntempelo wa Yehowa, ne yeye ke muntu wangata bunême. Yeye neasombe mu nkuasa wende wa bukalenge ne neakokeshe, ne yeye neikale kabidi muakuidi mu nkuasa wende wa bukalenge,+ ne nekuikale diumvuangana dia ditalala pankatshi pa bibidi ebi.* 14 Tshifulu tshia butumbi* netshikale bu tshivulukilu* mu ntempelo wa Yehowa kudi Heleme,* Tobiya, Yedaya,+ ne Hene* muana wa Sefanya. 15 Bantu badi kule nebalue ne nebibake pabu ntempelo wa Yehowa.” Nunku nenumanye ne: Yehowa wa biluilu mmuntume kunudi. Bualu ebu nebuenzeke, anu nuenu batungunuke ne kuteleja dîyi dia Yehowa Nzambi wenu.’”
7 Mu tshidimu tshinayi tshia mukalenge Dayawesha, dîyi dia Yehowa diakalua kudi Zekâya+ mu dituku dinayi dia ngondo wa tshitema, mmumue ne: mu ngondo wa Kiseleu.* 2 Bantu ba ku Betele bakatuma Shalesê ne Legeme-meleke ne bantu bende bua kulomba dianyishibua kudi* Yehowa, 3 bambila bakuidi ba mu nzubu* wa Yehowa wa biluilu ne baprofete ne: “Ndi ne bua kudila mu ngondo muitanu+ ne kujila biakudia bu mundi muenze mu bidimu bungi nunku anyi?”
4 Dîyi dia Yehowa wa biluilu diakalua kabidi kundi, diamba ne: 5 “Ambila bantu bonso ba mu buloba ne bakuidi ne: ‘Panuvua babuele mu tshijila tshia biakudia ne bele kabobo ka muadi mu ngondo muitanu ne mu ngondo wa muanda mutekete+ mu bidimu 70,+ nuvuaku bushuwa bajile biakudia bua bualu buanyi meme anyi? 6 Panuvua nudia ne nunua, kanuvua nudia buenu nuenu ne nunua buenu nuenu anyi? 7 Kanuvua ne bua kutumikila mêyi avua Yehowa mumanyishe ku butuangaji bua baprofete kale,+ pavua Yelushalema ne bimenga bidi bimunyunguluke bikale ne bantu basombelamu ne bikale mu ditalala, ne pavua Negebe ne Shefela bikale ne bantu basombelamu anyi?’”
8 Dîyi dia Yehowa diakalua kabidi kudi Zekâya, diamba ne: 9 “Monayi tshidi Yehowa wa biluilu wamba: ‘Lumbuluishayi ne kulumbuluisha kuakane kua bushuwa,+ ne enzelanganayi malu ne dinanga dia lulamatu+ ne luse. 10 Kanushimakaji mukaji mukamba anyi muana udi kayi ne tatuende,*+ muntu wa ku babende+ anyi mupele+ bua kumudia bintu; ne kanueledianganyi meji mabi mu mioyo yenu to.’+ 11 Kadi bakatungunuka ne kubenga kuteya ntema,+ bakakoma nyima yabu ne mutu mukole,+ ne bakajika matshi abu bua kabateleji.+ 12 Bakavuija muoyo wabu bu dibue dia mbongo*+ ne kabakatumikila mukenji* ne mêyi bivua Yehowa wa biluilu mutume ku nyuma wende ku butuangaji bua baprofete ba kale to.+ Nunku kuakalua tshiji tshikole tshia kudi Yehowa wa biluilu.”+
13 “‘Anu muvuabu kabayi bateleje pamvua* mubikile,+ ke mumvua tshiyi muteleje pakabikilabu,’+ ke mudi Yehowa wa biluilu wamba. 14 ‘Nunku, ngakabatangalaja ne tshipepele tshikole mu bisamba bionso bivuabu kabayi bamanye,+ ne buloba buakashala munda mutupu panyima pabu, kakuyi muntu upitshilamu anyi upinganyinamu to;+ bualu bavua bavuije buloba bulengele tshintu tshidi tshikuatshisha buôwa.’”
8 Dîyi dia Yehowa wa biluilu diakalua kabidi, diamba ne: 2 “Mona tshidi Yehowa wa biluilu wamba, ‘Tshisumi tshingikala natshi bua Siona ntshisumi tshikole,+ ne nengikale ne tshisumi buende yeye ne tshiji tshikole.’”
3 “Mona tshidi Yehowa wamba: ‘Nempingane kudi Siona+ ne nensombe mu Yelushalema;+ ne Yelushalema neabikidibue ne: tshimenga tshia bulelela,*+ ne mukuna wa Yehowa wa biluilu ne: mukuna wa tshijila.’”+
4 “Mona tshidi Yehowa wa biluilu wamba: ‘Bakulakaje balume ne bakaji nebasombe kabidi mu miaba ya tshinsangansanga ya Yelushalema, muntu yonso ne dikombo diende mu tshianza tshiende bua bungi bua bidimu biende.*+ 5 Miaba ya tshinsangansanga ya tshimenga neyuwule tente ne bana ba balume ne bana ba bakaji banayilamu.’”+
6 “Mona tshidi Yehowa wa biluilu wamba: ‘Nansha mudi bualu ebu mua kumueneka bukole menemene kudi bashadile ba bantu aba mu matuku au, budiku kabidi ne bua kumueneka bukole menemene kundi meme anyi?’ ke mudi Yehowa wa biluilu webeja.”
7 “Mona tshidi Yehowa wa biluilu wamba: ‘Mona, ndi mpandisha bantu banyi mu maloba a ku est ne a ku ouest.*+ 8 Nendue nabu, ne nebasombe mu Yelushalema;+ ne bobu nebalue bantu banyi, ne meme nendue Nzambi wabu+ mu bulelela* ne mu buakane.’”
9 “Monayi tshidi Yehowa wa biluilu wamba: ‘Bianza bienu bikale ne bukole,*+ nuenu badi bumvua mpindieu mêyi aa adi apatuka mukana mua baprofete,+ mêyi a muomumue avuabu bambe dituku divua tshishimikidi tshia nzubu wa Yehowa wa biluilu tshiashibue bua kuibakabu ntempelo. 10 Bualu kumpala kua tshikondo atshi, kakuvua difutu divua difutshibua bua muntu peshi bua nyama;+ ne kulua ne kuya kuvua ne njiwu bua bualu bua muluishi, bualu mvua musake bantu bonso bua kuluishanganabu.’
11 “‘Bualu mpindieu, tshiakuenzela bashadile ba bantu aba malu bu mu matuku a kale to,’+ ke mudi Yehowa wa biluilu wamba. 12 ‘Bualu nebakune ntete ya ditalala; ne muonji wa tumuma tua mvinyo newupatule tumuma tuawu ne buloba nebupatule mamuma abu,+ diulu nedifile lumuma luadi; ne nengenze bua bashadile ba bantu aba bapiane bintu bionso ebi.+ 13 Anu bu munuvua balue tshintu tshiela mulawu munkatshi mua bisamba,+ wewe nzubu wa Yuda ne nzubu wa Isalele, ke munganupandisha, ne nenulue dibenesha.+ Kanuikadi ne buôwa to!+ Bianza bienu bikale ne bukole.’*+
14 “Bualu monayi tshidi Yehowa wa biluilu wamba: ‘“Anu mumvua mupangadije bua kunutumina dikenga bua muvua bankambua benu bamfiikishe munda,” ke mudi Yehowa wa biluilu wamba, “ne mumvua tshiyi mumvue kanyinganyinga,+ 15 nunku musangu eu ndi mupangadije bua kuenzela Yelushalema ne nzubu wa Yuda bualu buimpe.+ Kanuikadi ne buôwa to!”’+
16 “‘Malu anudi ne bua kuenza ngowu aa: Ambilanganayi bulelela,+ ne kulumbuluisha mu biibi bienu kudi ne bua kutungunuja bulelela ne ditalala.+ 17 Kanueledianganyi meji a dikenga mu mioyo yenu,+ ne kanunangi mutshipu kayi wonso wa dishima;+ bualu aa mmalu onso andi mukine,’+ ke mudi Yehowa wamba.”
18 Dîyi dia Yehowa wa biluilu diakalua kabidi kundi, diamba ne: 19 “Mona tshidi Yehowa wa biluilu wamba: ‘Tshijila tshia biakudia tshia mu ngondo muinayi,+ tshijila tshia biakudia tshia mu ngondo muitanu,+ tshijila tshia biakudia tshia mu ngondo wa muanda mutekete,+ ne tshijila tshia biakudia tshia mu ngondo wa dikumi,+ nebikale bikondo bia disanka dikole ne masanka bua nzubu wa Yuda, bibilu bia masanka.+ Nunku nangayi bulelela ne ditalala.’
20 “Mona tshidi Yehowa wa biluilu wamba: ‘Bushuwa, nebienzeke ne: bukua bantu ne bantu badi basombele mu bimenga bia bungi nebalue; 21 ne bantu badi basombele mu tshimenga tshimue nebaye kudi ba mu tshikuabu, bamba ne: “Tuyayi bushuwa kulomba dianyishibua kudi* Yehowa ne kukeba Yehowa wa biluilu. Meme panyi ndi nya.”+ 22 Bukua bantu bua bungi ne bisamba bia bukole nebilue kukeba Yehowa wa biluilu mu Yelushalema+ ne kulomba dianyishibua kudi* Yehowa.’
23 “Mona tshidi Yehowa wa biluilu wamba: ‘Mu matuku au bantu dikumi ba miakulu yonso ya bisamba+ nebakuate, eyowa, nebakuate bikole ku muzabi wa* muena Yuda,* bamba ne: “Tudi basue kuya nenu,+ bualu tudi bumvue ne: Nzambi udi nenu.”’”+
9 Dîyi dia kudi Nzambi:
“Dîyi dia Yehowa didi dipisha buloba bua Hadalaka,
Ne Damaseke ke udidi dipatshila,*+
Bualu dîsu dia Yehowa didi pa bukua bantu+
Ne pa bisa bionso bia Isalele,
2 Bua kupisha Hamate+ udi mudie nende mukalu,
3 Tulo wakadibakila tshibumba tshikole.*
Wakakunguija mushiki wa arjan bu lupuishi
Ne or bu buloba bua mu misesu.+
4 Mona! Yehowa neumbushe bintu biende,
Ne neashipe tshiluilu tshiende mu mbuu;*+
Ne yeye neoshike mu kapia.+
5 Ashekelona neamone bualu ebu ne neikale ne buôwa;
Gaza neumvue kanyinganyinga kakole,
Kabidi ne Ekelona, bualu ditekemena diende ndifuishibue bundu.
Mukalenge neajimine mu Gaza,
Ne bantu kabakusombela kabidi mu Ashekelona to.+
6 Muana udi mulela ne muntu wa ku babende neasombele mu Ashedodo,
Ne nengumbushe lutambishi lua Peleshete.+
7 Nengumbushe bintu bidi ne mashi mukana muende
Ne bintu bia muendi ku mênu kuende,
Ne nebamushiye bua Nzambi wetu;
Ne yeye nealue bu mfumu wa tshisa* mu Yuda,+
Ne Ekelona nealue bu muena Yebuse.+
8 Nennyunguluke nzubu wanyi bu mulami,*+
Nunku kakuakuikala muntu upitshilamu anyi muntu upinganyinamu to;
Ne mufidi wa midimu mikole* nansha umue kakupitshilamu kabidi,+
Bualu mpindieu ndi mumone bualu ebu* ne mêsu
anyi.
9 Sanka bikole, wewe muana wa bakaji wa Siona.
Ela lubila lua ditshimuna, wewe muana wa bakaji wa Yelushalema.
Mona! Mukalenge webe udi ulua kuudi.+
10 Nengumbushe ditempu dia mvita ku Efelayima
Ne kabalu ku Yelushalema.
Buta bua mikete bua mvita nebumbushibue.
Ne yeye neamanyishe bisamba ditalala;+
Bukokeshi buende nebuikale kumbukila ku mbuu too ne ku mbuu mukuabu
11 Kadi wewe mukaji, ku mashi a tshipungidi tshiebe,
Nempatule bena buloko bebe mu tshina tshidi katshiyi ne mâyi.+
12 Pinganayi muaba wa kusokomena, nuenu bena buloko badi ne ditekemena.+
Ndi nkuambila lelu eu ne:
‘Nenkufute, wewe mukaji, misangu ibidi.+
13 Bualu nennane* Yuda bu buta bua mikete.
Nenguwuje buta bua mikete ne Efelayima,*
Ne nembishe bana bebe, wewe Siona,
Bua kuluanganabu ne bana bebe, wewe Grese,
Ne nenkuvuije bu muele wa mvita wa muena mvita.’
14 Yehowa neamueneke pa mutu pabu,
Ne mukete wende newupatuke bu mupenyi wa mvula.
Mukalenge Mutambe Bunene Yehowa neele mpungi,+
Ne neaye kumpala ne tshipepele tshikole tshia ku sud.
15 Yehowa wa biluilu neabaluile mvita,
Ne bobu nebadie ne nebikale ne bukokeshi pa mabue a kukupa ne ndundu.+
Nebanue ne nebasasakane, anu bu banue mvinyo;
Ne nebuwujibue anu bu tshibakudi,
Bu matumba a tshioshelu.+
16 Yehowa Nzambi wabu neabapandishe dituku adi
Bu tshisumbu tshia mikoko tshia bantu bende;+
Bualu nebikale bu mabue a mushinga mukole a tshifulu tshia butumbi* adi abalakana pa mutu pa buloba buende.+
17 Bualu, ke mudi buimpe buende bunene nunku,+
Ne ke mudi bulengele buende bunene nunku!
Ntete neyikoleshe nsongalume,
Ne mvinyo mupiamupia neakoleshe nsongakaji itshidi tumama.”+
10 “Lombayi Yehowa mvula mu tshikondo tshia mvula wa ndekelu.
Yehowa ke udi wenza matutu a mvula mukole,
Yeye ke udi ubalokeshila mvula,+
Ne yeye ke udi upesha muntu yonso bikunyibua mu budimi.
2 Bualu mpingu ya telafima* mmiambe malu a dishima;*
Ne bena lubuku mbamone tshikena kumona tshia mafi.
Badi bakula bua bilota bia patupu,
Ne badi bateta kusambangana mu tshianana.
Ke bualu kayi nebatambakane bu mikoko.
Nebakenge, bualu kakuena mulami wa mikoko.
3 Tshiji tshianyi netshitemene balami ba mikoko,
Ne nendumbuluishe balombodi* badi bakengeshangana;
Bualu Yehowa wa biluilu mmutume ntema yende kudi tshisumbu tshiende tshia mikoko,+ kudi nzubu wa Yuda,
Ne mmubavuije bu kabalu kende ka butumbi mu mvita.
4 Kudiye ke kudi muntu munene* ufumina,
Kudiye ke kudi mfumu muambuluishi* ufumina,
Kudiye ke kudi buta bua mikete bua mvita bufumina;
Kudiye ke kudi mutangidi* yonso upatukila, buonso buabu pamue.
5 Nebalue bu bena mvita,
Badiatakaja bitotshi bia mu misesu mu mvita.
6 Nemvuije nzubu wa Yuda mubandile,
Ne nempandishe nzubu wa Jozefe.+
Nembapingaje kabidi,
Bualu nembaleje luse;+
Ne nebikale anu bu ne: tshivua mubabenge to;+
Bualu, ndi Yehowa Nzambi wabu, ne nembandamune.
7 Ba mu Efelayima badi ne bua kulua bu tshilobo tshia mvita,
Ne muoyo wabu newusanke anu bu ne: mbanue mvinyo.+
Bana babu nebamone bualu ebu ne nebasanke;
Muoyo wabu newikale ne disanka mu Yehowa.+
8 ‘Nembele kashiba ne nembasangishe pamue;
Bualu nembapikule,+ ne nebalue ba bungi,
Ne nebatungunuke ne kuikala ba bungi.
9 Nansha meme mubatangalaje bu mamiinu munkatshi mua bukua bantu,
Nebamvuluke mu miaba ya kule;
Bobu ne bana babu nebapetulule bukole ne nebalukile.
10 Nembapingaje bafumina mu buloba bua Ejipitu
Ne nembasangishe bafumina mu Ashû;+
Nendue nabu mu buloba bua Gilada+ ne Lebanona,
Ne kuoku aku muaba kawakuikalaku kabidi buabu bobu to.+
11 Yeye udi ne bua kupitshila mu mbuu ne kanyinganyinga;
Ne neakume mavuala mu mbuu;+
Ndondo yonso ya musulu wa Nile neyume.
Lutambishi lua Ashû nelupuekeshibue,
Ne dikombo dia Ejipitu nediumbuke.+
11 “Kangula biibi biebe, wewe Lebanona,
Bua kapia kamone mua kuosha mitshi yebe ya sedre.
2 Ela kabobo ka muadi, wewe mutshi wa jenevriye, bualu mutshi wa sedre mmupuke;
Mitshi minene mmibutudibue!
Elayi kabobo ka muadi, nuenu mitshi ya nsanga ya ku Bashana,
Bualu ditu dishitakane ndiye panshi!
3 Umvuayi! Kabobo ka muadi ka balami ba mikoko,
Bualu butumbi buabu mbubutudibue.
Umvuayi! Mukungulu wa bana ba ntambue,*
Bualu bipuka bishitakane bia ku muelelu kua Yadene mbibutudibue.
4 “Mona tshidi Yehowa Nzambi wanyi wamba: ‘Lama mikoko idi mifundila dishipibua,+ 5 idibu bashipa kudi badi bayisumba kadi kabayi babangata bu bapile.+ Badi bayipana+ badi bamba ne: “Yehowa atumbishibue, bualu nendue mubanji.” Balami bayi kabena bayumvuila luse nansha lukese.’+
6 “‘Bualu tshiakuleja kabidi bantu badi basombele mu buloba ebu luse nansha,’ ke mudi Yehowa wamba. ‘Nunku nenkuluishe muntu ne muntu mu tshianza tshia muinende ne tshia mukalenge wende; ne nebazaze buloba, ne tshiakubasungila mu tshianza tshiabu.’”
7 Nunku ngakatuadija kulama mikoko ivua mifundila dishipibua,+ bua bualu buenu, nuenu bakengeshibue ba mu tshisumbu tshia mikoko. Nanku ngakangata makombo abidi, meme kubikila dimue ne: Bulengele, ne dikuabu ne: Buobumue,+ ne ngakatuadija kulama mikoko. 8 Ngakipata balami ba mikoko basatu mu ngondo umue, bualu tshivua* kabidi nabu lutulu to, ne bobu* pabu bakankina. 9 Ngakamba ne: “Tshiakutungunuka ne kunulama to. Udi ufua, ufue, ne udi ujimina, ujimine. Kadi bua idi mishale, idiangane munyinyi.” 10 Nunku ngakangata dikombo dianyi: Bulengele,+ meme kudikosa, nshipa tshipungidi tshimvua mudie ne bukua bantu buonso. 11 Nunku tshiakashipibua dituku adi, ne bakengeshibue ba mu tshisumbu tshia mikoko bavua bantangila bakamanya ne: divua dîyi dia Yehowa.
12 Pashishe ngakabambila ne: “Nuenu bamone bikumbane, mpeshayi difutu dianyi; kadi biobi kabiyi bikumbane, sombayi nadi.” Bakafuta* difutu dianyi: bitupa bia arjan 30.+
13 Pashishe Yehowa wakangambila ne: “Biela mu tshibutshilu, mushinga mutambe buimpe uvuabu batue bua bualu buanyi.”+ Nunku ngakangata bitupa bia arjan 30, meme kubiela mu tshibutshilu mu nzubu wa Yehowa.+
14 Pashishe ngakakosa dikombo dianyi dibidi: Buobumue,+ nyanga malanda a buena muntu pankatshi pa Yuda ne Isalele.+
15 Pashishe Yehowa wakangambila ne: “Mpindieu, angata bintu bia mudimu bia mulami wa mikoko wa patupu.+ 16 Bualu ndi ndekela mulami wa mikoko ujuka mu buloba. Yeye kakutabalela mikoko idi ijimina;+ kakukeba utshidi muana anyi kuondopa udi mutapike+ anyi kudiisha idi mikokeshe bua kuimana kuulu to. Kadi yeye neadie munyinyi wa mukoko wa manyi+ ne neapande bikono bia mikoko.+
17 Diakabi dikale kudi mulami wanyi wa mikoko wa patupu,+ udi ulekela mikoko!+
Muele wa mvita newukume diboko diende ne dîsu diende dia balume.
Diboko diende nedifubidile menemene,
Ne dîsu diende dia balume nedifofome* kashidi.”
12 Dîyi dia kudi Nzambi:
“Dîyi dia Yehowa bua bualu bua Isalele,” ke mudi Yehowa wamba,
Yeye uvua mubalule diulu,+
Uvua muase tshishimikidi tshia buloba,+
Ne uvua muenze nyuma* wa muntu munda muende.
2 “Mona ndi mvuija Yelushalema dikopo* didi ditetuisha bukua bantu buonso budi bunyunguluke; ne ditshintshimika nedikalaku bua Yuda kabidi ne bua Yelushalema.+ 3 Mu dituku adi, nemvuije Yelushalema dibue dia bujitu kudi bukua bantu buonso. Bushuwa, bantu bonso badi badiambula nebatapike bibi bitambe;+ ne bisamba bionso bia pa buloba nebidisangishe bua kumuluisha.+ 4 Mu dituku adi,” ke mudi Yehowa wamba, “nentue kabalu konso buôwa bukole ne mukabandi dibuluka. Mêsu anyi neashale matangile nzubu wa Yuda, kadi nemfofomije kabalu konso ka bukua bantu. 5 Bamfumu* ba mu Yuda nebambe mu muoyo wabu ne: ‘Bantu badi basombele mu Yelushalema badi bukole kundi ku butuangaji bua Yehowa wa biluilu Nzambi wabu.’+ 6 Mu dituku adi, nemvuije bamfumu ba mu Yuda bu luesu lua kapia munkatshi mua nkunyi ne bu tshimunyi tshia kapia mu mulongo wa ntete mikosa,+ neboshe bukua bantu buonso budi bunyunguluke ku dia balume ne ku dia bakaji;+ ne bantu nebasombele kabidi mu Yelushalema mu muaba wende,* mu Yelushalema.+
7 “Nunku, Yehowa neapandishe ntenta ya Yuda kumpala, bua bulengele* bua nzubu wa Davidi ne bulengele* bua bantu badi basombele mu Yelushalema kabulu kuikala bunene bikole ku mutu kua Yuda to. 8 Mu dituku adi, Yehowa neikale bukubi bunyunguluke bantu badi basombele mu Yelushalema;+ mu dituku adi, muntu udi ulenduka* munkatshi muabu neikale bu Davidi, ne nzubu wa Davidi bu Nzambi, bu muanjelu wa Yehowa udi uya kumpala kuabu.+ 9 Dituku adi nembutule bushuwa bisamba bionso bidi bilua kuluisha Yelushalema.+
10 “Nempongolole nyuma wa dianyishibua ne wa disengelela pa nzubu wa Davidi ne pa bantu badi basombele mu Yelushalema, ne bobu nebatangile kudi muntu uvuabu batubule,+ ne nebamuelele kabobo ka muadi bu mudibu mua kuelela muana mulela umue kabobo ka muadi; ne nebanyingalale bikole menemene bua bualu buende bu mudibu mua kunyingalala bua muanabute. 11 Mu dituku adi, kabobo ka muadi kelabu mu Yelushalema nekikale kakole, bu kabobo ka muadi ka ku Hadadalimona mu mpata wa Megido.+ 12 Buloba nebuele kabobo ka muadi, dîku ne dîku pa nkayadi; dîku dia nzubu wa Davidi pa nkayadi, ne bantu bakaji babu pa nkayabu; dîku dia nzubu wa Natana+ pa nkayadi, ne bantu bakaji babu pa nkayabu; 13 dîku dia nzubu wa Lewi+ pa nkayadi, ne bantu bakaji babu pa nkayabu; dîku dia bena Shimeyi+ pa nkayadi, ne bantu bakaji babu pa nkayabu; 14 ne mêku onso adi mashale, dîku ne dîku pa nkayadi, ne bantu bakaji babu pa nkayabu.
13 “Mu dituku adi nebakangule tshina tshia mâyi bua nzubu wa Davidi ne bua bantu badi basombele mu Yelushalema bua kusukula mpekatu ne bukoya.+
2 “Mu dituku adi,” ke mudi Yehowa wa biluilu wamba, “nenkupule mêna a mpingu mu buloba ebu,+ ne kabakuyivuluka kabidi nansha; ne nengumbushe baprofete+ ne nyuma wa malu a bukoya mu buloba ebu. 3 Muntu yeye ne bua kuamba kabidi mêyi a buprofete, tatuende ne mamuende bavua bamulele nebamuambile ne: ‘Kuakuikala kabidi ne muoyo to, bualu udi muambe malu a dishima mu dîna dia Yehowa.’ Nunku, tatuende ne mamuende bavua bamulele nebamutubule bua mêyi ende a buprofete adiye muambe.+
4 “Mu dituku adi yonso wa mu baprofete neafuishibue bundu bua tshikena kumona tshiende padiye wamba mêyi a buprofete; ne kakuvuala tshilamba tshia mudimu tshia miosa+ bua kushimangana to. 5 Nunku yeye neambe ne: ‘Tshiena muprofete to. Ndi mudimi wa budimi, bualu muntu kampanda wakansumba pantshivua muana.’ 6 Muntu yeye mumukonke ne: ‘Mputa idi pankatshi pa makaya ebe* nya tshinyi?’ Yeye neandamune ne: ‘Mmputa imvua mutapike mu nzubu mua balunda banyi.’”*
7 “Wewe muele wa mvita, bika bua kutapa mulami wanyi wa mikoko,+
Bua kutapa muntu udi muena dianyi,” ke mudi Yehowa wa biluilu wamba.
“Kuma mulami wa mikoko,+ ne tshisumbu tshia mikoko* tshitangalake;+
Ne nenkudimune tshianza tshianyi bua kuluisha badi bakese.”
8 “Mu buloba buonso,” ke mudi Yehowa wamba,
“Nebumbushamu bitupa bibidi ne nebijimine;*
Ne nebashiyamu tshitupa tshisatu.
9 Nunku, nempitshishe tshitupa tshisatu mu kapia;
Ne nembalengeje bu mudibu balengeja tshiamu tshia arjan,
Ne nembatete bu mudibu bateta or.+
Bobu nebabikile dîna dianyi,
Ne meme nembandamune.
Nengambe ne: ‘Mbantu banyi,’+
Ne bobu nebambe ne: ‘Yehowa udi Nzambi wetu.’”
14 “Mona! Dituku didi dilua, dituku dia Yehowa, dikalabu ne bua kuabanya munkatshi muebe* bintu bivuabu bakunyenge. 2 Nensangishe bisamba bionso bua kuela Yelushalema mvita; ne nebakuate tshimenga, nebapawule nzubu ne nebalale ne bakaji ku bukole. Tshia bibidi tshia tshimenga nebaye natshi ku babende, kadi kabakumbusha bashadile ba bantu aba mu tshimenga to.
3 “Yehowa neapatuke ne neele bisamba abi mvita+ bu padiye uluangana mu dituku dia mvita.+ 4 Mu dituku adi, makasa ende neimane pa Mukuna wa Olive+ udi mutangilangane ne Yelushalema ku est; ne Mukuna wa Olive newupandike pankatshi ne pankatshi, kumbukila ku est* too ne ku ouest,* wenza tshibandabanda tshinene menemene; ne tshitupa tshia mukuna eu netshiye ku nord, ne tshitupa tshiawu tshikuabu netshiye ku sud. 5 Nenunyemene mu tshibandabanda tshia mikuna yanyi, bualu tshibandabanda tshia mikuna yanyi netshialabale too ne ku Asela. Nenuikale ne bua kunyema anu bu munuvua banyeme bua dikanka dia buloba mu matuku a Uziya mukalenge wa Yuda.+ Yehowa Nzambi wanyi nealue, ne bansantu bonso nebikale nende.+
6 “Mu dituku adi kakuakuikala butoke bua mushinga mukole,+ bintu nebikuatakane ne mashika.* 7 Nunku nedilue dituku dimue didi dimanyike bu dia Yehowa.+ Kadiakuikala munya, anyi kadiakuikala butuku; ne dîba dia dilolo butoke nebuikalaku. 8 Mu dituku adi mâyi a muoyo+ neapueke afumina mu Yelushalema,+ tshia bibidi tshiawu tshitangile mu mbuu wa ku est*+ ne tshia bibidi tshiawu tshikuabu mu mbuu wa ku ouest.*+ Bualu ebu nebuenzeke mu muvu wa luya lukole* ne mu muvu wa mashika makole.* 9 Nunku Yehowa neikale Mukalenge pa mutu pa buloba buonso.+ Mu dituku adi Yehowa neikale umue,+ ne dîna diende dimue.+
10 “Buloba bujima nebulue bu Alabâ,+ kumbukila ku Geba+ too ne ku Limona+ ku sud kua Yelushalema; yeye neajuke ne bantu nebasombelamu mu muaba wende,+ kumbukila ku Tshiibi tshia Benyamina+ too ne muaba wa Tshiibi tshia Kumpala, too ne ku Tshiibi tshia ku Ditumba, ne kumbukila ku Tshibumba tshia Hananele+ too ne ku bikaminu* bia mvinyo bia mukalenge. 11 Bantu nebasombele munda muende; ne kakuakuikala kabidi mulawu wa kabutu nansha,+ ne Yelushalema neasombe talalaa.+
12 “Etshi ntshipupu tshiakuma natshi Yehowa bukua bantu buonso budi buela Yelushalema mvita:+ Misunyi yabu neyibole padibu bimane ne makasa abu, mêsu abu neabole mu bipokopoko biabu, ne ndimi yabu neyibole mukana muabu.
13 “Mu dituku adi tshimvundu tshia kudi Yehowa netshitangalake munkatshi muabu; ne muntu ne muntu neakuate ku tshianza tshia muinende bikole, ne tshianza tshiende netshiluishe tshianza tshia muinende.*+ 14 Yuda neabuele pende mu mvita ku Yelushalema; ne nebasangishe bubanji bua bisamba bionso bidi binyunguluke, or ne arjan ne bilamba bungi tshianana.+
15 “Tshipupu bu tshipupu atshi netshikuate kabidi tubalu, mpunda ya mushindu mukuabu, tumelu, mpunda, ne bimuna bionso bidi mu bitudilu abi.
16 “Muntu yonso udi ushala mu bisamba ebi bionso bidi bilue kuluisha Yelushalema neabande ku tshidimu ku tshidimu+ bua kuinamina* Mukalenge, Yehowa wa biluilu,+ ne bua kusekelela Tshibilu tshia Bitanda.*+ 17 Kadi muntu wa munkatshi mua mêku a mu buloba yeye kayi mubande ku Yelushalema bua kuinamina Mukalenge, Yehowa wa biluilu, mvula kakuloka bua bualu buabu to.+ 18 Kadi dîku dia mu Ejipitu diodi kadiyi dibande ne kadiyi dilue, kabakupeta mvula to. Kadi nebapete tshipupu tshivua Yehowa mutumine bisamba bivua kabiyi bibande bua kusekelela Tshibilu tshia Bitanda. 19 Edi nedikale dinyoka bua mpekatu wa Ejipitu ne bua mpekatu wa bisamba bionso bidi kabiyi bibanda bua kusekelela Tshibilu tshia Bitanda.
20 “Mu dituku adi, mêyi a ne: ‘Bunsantu mbua Yehowa!’+ neafundibue pa ngonga ya tubalu. Ngesu*+ ya mu nzubu wa Yehowa neyikale bu bibakudi+ kumpala kua tshioshelu. 21 Luesu* luonso mu Yelushalema ne mu Yuda neluikale lua tshijila ne neluikale lua Yehowa wa biluilu, ne bantu bonso badi bafila milambu nebabuele ne nebasabishile bintu mu bimue bia kudibi. Mu dituku adi kakuakuikala kabidi muena Kanâna* mu nzubu wa Yehowa wa biluilu to.”+
Diumvuija: “Yehowa mmuvuluke.”
Anyi “Alukilayi kumbukila.”
Tang. Tshis. B15.
Mmumue ne: kadiyi dinyunguluka kudi bimanu.
Ku mua.: “panyima pa butumbi.”
Anyi “ulenga dîsu dianyi.”
Ku mua.: “misunyi yonso.”
Anyi “dipila diebe diumbuke.”
Anyi “mizabi ya butumbi.”
Anyi “newimanyine; neulame.”
Anyi “mpata.”
Anyi “dibue dia mu lusongo.”
Anyi “malu makese?”
Ku mua.: “dibue, tshiamu tshia eten.”
Mmumue ne: matamba a mutshi adi ne bimuma bia bungi.
Nkubita uvua ne santimetre 44,5. Tang. Tshis. B14.
Ku mua.: “ng’efa,” muaba eu udi uleja tshieledi tshia bintu anyi tshibondo tshivuabu bapima natshi efa. Efa uvua ubuela litre 22. Tang. Tshis. B14.
Mmumue ne: Babilona.
Mmumue ne: ditempu.
Anyi “tshifulu tshinene tshia butumbi.”
Mmumue ne: pankatshi pa midimu yende ya kuikala mukokeshi ne muakuidi.
Anyi “Tshifulu tshinene tshia butumbi.”
Anyi “divuluija.”
Heledayi udi mu mvese wa 10.
Pamuapa n’Yoshiya udi mu mvese wa 10.
Tang. Tshis. B15.
Anyi “kutekesha mpala wa.”
Anyi “ntempelo.”
Anyi “muana wa nshiya.”
Anyi pamuapa: “dibue dikole,” bu mudi dibue dia emerode.
Anyi “dilongesha.”
Ku mua.: “pavuaye.”
Anyi “lulamatu.”
Ku mua.: “bua musumba wa matuku.”
Anyi “ku buloba bua kudi dîba dipatukila ne buloba bua kudi dîba dibuelela.”
Anyi “lulamatu.”
Anyi “Ikalayi ne dikima.”
Anyi “Ikalayi ne dikima.”
Anyi “kutekesha mpala wa.”
Anyi “kutekesha mpala wa.”
Anyi “luzembe lua tshilamba tshia.”
Ku mua.: “muntu muena Yuda.”
Ku mua.: “muaba wa kuikishila.”
Anyi “muaba mukolesha.”
Anyi pamuapa: “pa mbuu.”
Anyi “Sheike.” Sheike uvua mfumu wa tshisa.
Anyi “muaba wa balami.”
Anyi “mukengeshanganyi.”
Bimueneka ne: badi bakula bua dikenga dia bantu bende.
Anyi “ne mmutshimunyi; ne mmupandishibue.”
Anyi “mpunda mulume.”
Mmumue ne: musulu wa Pelata.
Ku mua.: “nendiate.”
Mmumue ne: bu mukete.
Anyi “tshikata tshia lumu.”
Anyi “nzambi ya mu dîku; mpingu.”
Anyi “malu makodiakane; malu adi kaayi umvuika.”
Ku mua.: “mbuji ya mpumbu.”
Ku mua.: “tshibumba tshia mu ditumba,” tshimfuanyi tshia muntu munene anyi wa mushinga; mfumu.
Ku mua.: “mpopo,” tshimfuanyi tshia muntu udi wambuluisha; mukokeshi.
Anyi “muenzejanganyi wa midimu ku bukole.”
Anyi “bana ba ntambue ba misalala.”
Anyi “anyima wanyi kavua.”
Anyi “anyima wabu.”
Ku mua.: “Bakapima bujitu bua.”
Ku mua.: “nedibuitshidile.”
Anyi “mueyelu.”
Anyi “tshibakudi.”
Ku mua.: “Basheike.” Sheike uvua mfumu wa tshisa.
Anyi “mu muaba wende udi mumukumbanyine.”
Anyi “butumbi.”
Anyi “butumbi.”
Anyi “mutambe butekete.”
Ku mua.: “pankatshi pa bianza biebe.” Mmumue ne: mu tshiadi anyi pa nyima.
Anyi “mua badi bannange.”
Anyi “mikoko.”
Anyi “nebifue.”
Mmumue ne: tshimenga tshidibu bakuila mu mvese muibidi.
Anyi “kudi dîba dipatukila.”
Ku mua.: “mbuu.”
Anyi “nebimane,” anu bu biumisha kudi mashika.
Mmumue ne: Mbuu Mufue.
Mmumue ne: Mbuu wa Mediterane.
Anyi “été.”
Anyi “hiver.”
Anyi “bipanza bia kukamina.”
Anyi “ne muntu umue neabunde mukuabu.”
Anyi “kutendelela.”
Anyi “Bisaasa bia kusombela bua matuku makese.”
Anyi “Ngesu minene ya kulambila.”
Anyi “luesu lunene lua kulambila.”
Anyi pamuapa: “ngenda mushinga.”