MALAKI

1 Dîyi dia kudi Nzambi:

Dîyi dia Yehowa kudi Isalele ku butuangaji bua Malaki:*

2 “Ndi munuleje nuenu dinanga,”+ ke mudi Yehowa wamba.

Kadi nudi nuebeja ne: “Mmunyi muudi mutuleje dinanga?”

“Esau kavua muanabu ne Yakoba+ anyi?” ke mudi Yehowa webeja. “Kadi mvua munange Yakoba, 3 ne mvua mukine Esau;+ mvua muvuije mikuna yende muaba wa munda mutupu+ ne mushile mibuabua ya mu tshipela bumpianyi buende.”+

4 “Nansha mudi Edome wamba ne: ‘Mbatutayishe, kadi netupingane, netuibakulule bikulu,’ mona tshidi Yehowa wa biluilu wamba: ‘Nebibake, kadi meme nengupule, ne nebababikile ne: “buloba bua malu mabi,” kabidi ne: “bantu badi Yehowa mupishe bua kashidi.”+ 5 Mêsu enu neamone bualu ebu, ne nenuambe ne: “Yehowa atumbishibue ku mutu kua buloba bua Isalele.”’”

6 “‘Muana udi unemeka tatuende,+ ne muena mudimu udi unemeka mfumuende. Nunku bingikala tatu,+ kanemu kadi kankumbanyine kepi?+ Bingikala mfumu,* ditshina* didi dinkumbanyine diepi? Ke mudi Yehowa wa biluilu unuebeja nuenu bakuidi badi bapetula dîna dianyi.+

“‘Kadi nudi nuebeja ne: “Mmunyi mutudi bapetule dîna diebe?”’

7 “‘Nudi nufila biakudia binyanguke* pa tshioshelu tshianyi.’

“‘Nudi nuebeja ne: “Mmunyi mutudi bakunyange?”’

“‘Mpanudi nuamba ne: “Mêsa a Yehowa+ ntshintu tshia kupetula.” 8 Panudi nufila nyama mufofu bu mulambu, nudi nuamba ne: “Ki mbualu bubi to.” Ne panudi nufila nyama mulema anyi nyama udi usama nudi nuamba ne: “Ki mbualu bubi to.”’”+

“Teta koku kuyifila kudi nguvena webe. Yeye neikale nebe disanka peshi neakuakidile ne dianyisha anyi?” ke mudi Yehowa wa biluilu webeja.

9 “Kadi mpindieu, sengelelayi koku* Nzambi bua amone mua kutuleja luse. Yeye neakidile muntu kayi yonso wa kunudi bimpe ne milambu ya buena eyi ya ku tshianza tshienu anyi?” ke mudi Yehowa wa biluilu webeja.

10 “Nnganyi wa munkatshi muenu udi mudiakaje bua kukanga biibi?*+ Bualu kanuena nunanga bua kutemesha nansha kapia pa tshioshelu tshianyi kakuyi difutu.+ Tshiena nsanka bua bualu buenu to,” ke mudi Yehowa wa biluilu wamba, “ne tshiena nsanka bua mulambu wa kupa wonso wa ku tshianza tshienu to.”+

11 “Bualu, kumbukila ku dipatuka dia dîba too ne ku dibuela diadi,* dîna dianyi nedikale dinene munkatshi mua bisamba.+ Mu miaba yonso nebafuimishe milambu, ne nebalambule milambu mu dîna dianyi, bu dipa dikezuke; bualu dîna dianyi nedikale dinene munkatshi mua bisamba,”+ ke mudi Yehowa wa biluilu wamba.

12 “Kadi nudi nudinyanga*+ panudi nuamba ne: ‘Mêsa a Yehowa mmanyanguke, ne bimuma biawu, biakudia biawu, mbia kupetula.’+ 13 Nudi nuamba kabidi ne: ‘Monayi! Bidi bitshiokesha be! nudi nukoka mu diulu ne dipetu bua bualu buawu,” ke mudi Yehowa wa biluilu wamba. “Nudi nulua ne nyama miba, milema ne idi isama. Eyowa, nudi nulua ne bintu bia nunku bu dipa! Ndi ne bua kuitaba tshidi tshifuma ku tshianza tshienu anyi?”+ ke mudi Yehowa webeja.

14 “Mulawu wikale kudi muntu muena budimu udi ne nyama mulume muimpe mu tshisumbu tshiende tshia mikoko, kadi udi wenza mutshipu ne ulambula Yehowa nyama udi ne tshilema.* Bualu ndi Mukalenge munene,”+ ke mudi Yehowa wa biluilu wamba, “ne dîna dianyi nedikale dîna didi dikuatshisha buôwa munkatshi mua bisamba.”+

2 “Nunku mpindieu, nuenu bakuidi, dîyi edi ndituma buenu nuenu.+ 2 Nuenu babenge kuteleja dîyi edi ne kudilama ku muoyo bua kutumbisha dîna dianyi,” ke mudi Yehowa wa biluilu wamba, “nennutumine mulawu,+ ne nenkudimune mabenesha enu alua milawu.+ Eyowa, ndi mukudimune mabenesha malue milawu bualu kanuena nulama dîyi edi ku muoyo to.”

3 “Monayi! Nennyange* mamiinu enu anudi bakune bua bualu buenu,+ ne nentangalaje tumvi tua nyama mu mpala yenu, tumvi tua bibilu bienu; ne nebaye nenu kudibu.* 4 Nunku nenumanye ne: ndi munutumine dîyi edi bua tshipungidi tshianyi ne Lewi tshimone mua kutungunuka,”+ ke mudi Yehowa wa biluilu wamba.

5 “Tshipungidi tshianyi nende tshivua tshipungidi tshia muoyo ne ditalala, bimvua mumupeshe, pamue ne ditshina.* Yeye wakantshina, eyowa, uvua ne ditshina dia dîna dianyi. 6 Mukenji* wa bulelela uvua mukana muende,+ ne kabakasangana dipanga buakane nansha dimue ku mishiku yende. Yeye wakenda nanyi mu ditalala ne mu bululame,+ ne wakumbusha bantu ba bungi ku tshilema. 7 Bualu mishiku ya muakuidi idi ne bua kulama dimanya, ne bantu badi ne bua kukeba mukenji* mukana muende,+ bualu yeye udi mutuadi wa mukenji wa Yehowa wa biluilu.

8 “Kadi nuenu nudi bapambuke mu njila. Nudi balenduishe bantu ba bungi bua bidi bitangila mukenji.*+ Nudi banyange tshipungidi tshia Lewi,”+ ke mudi Yehowa wa biluilu wamba. 9 “Nunku nennuvuije bapetula ne bapuekeshibue kumpala kua bantu bonso, bualu kanuvua balame njila yanyi kadi nuvua baleje kansungansunga mu dienza mudimu ne mukenji.”+

10 “Buonso buetu katuena ne tatu umue+ anyi? Nzambi umue ki nguvua mutufuke anyi? Nunku, bua tshinyi tudi tuenzelangana malu a tshitungu,+ tunyanga tshipungidi tshia bankambua betu? 11 Yuda mmuenze malu a tshitungu, ne mbenze bualu bubi mu Isalele ne mu Yelushalema; bualu Yuda mmunyange bunsantu* bua Yehowa+ budiye munange, ne yeye mmusele muana wa bakaji wa nzambi wa ku babende.+ 12 Yehowa neumbushe mu ntenta ya Yakoba muntu yonso udi wenza bualu ebu, nansha yeye muikale nganyi,* nansha yeye ufila mulambu wa kupa kudi Yehowa wa biluilu.”+

13 “Kudi bualu bukuabu* bunudi nuenza, budi bufikisha ku dibuikila tshioshelu tshia Yehowa ne binsonji ne miadi ne mikemu, nunku yeye kena utuma kabidi ntema yende ku mulambu wenu wa kupa anyi utangila tshintu tshionso tshia ku tshianza tshienu ne dianyisha to.+ 14 Nunku nudi nuamba ne: ‘Mbua bualu kayi?’ Mbualu Yehowa mmulue ntemu pankatshi pebe wewe ne mukaji wa ku bunsongalume buebe uudi muele mâyi ku makasa nansha mudiye muena diebe ne mukajebe wa tshipungidi.*+ 15 Kadi kudi muntu uvua kayi muenze bualu ebu, bualu yeye uvua ne ndambu wa nyuma uvua mushale. Yeye au uvua ukeba tshinyi? Bana* ba Nzambi. Nunku dimukayi bua lungenyi luenu, ne kuedi mukaji wa ku bunsongalume buebe mâyi ku makasa to. 16 Bualu ndi nkina* dishipa dia dibaka,”+ ke mudi Yehowa Nzambi wa Isalele wamba, “ne ndi nkina muntu udi ubuikila tshilamba tshiende ne tshikisu,”* ke mudi Yehowa wa biluilu wamba. “Nudimuke bua lungenyi luenu, ne kanuena ne bua kutungilangana+ to.

17 “Nudi batshiokeshe Yehowa ne mêyi enu.+ Kadi nudi nuamba ne: ‘Mmunyi mutudi bamutshiokeshe?’ Mpanudi nuamba ne: ‘Muntu yonso udi wenza bualu bubi mmuimpe ku mêsu kua Yehowa, ne yeye udi usanka bua bualu buende,’+ anyi panudi nuamba ne: ‘Nzambi wa kulumbuluisha kuakane udi penyi?’”

3 “Monayi! Ndi ntuma mutuadi wanyi wa mukenji, ne yeye neatokeshe* njila kumpala kuanyi.+ Diakamue Mukalenge mulelela unudi nukeba nealue ku ntempelo wende;+ ne mutuadi wa mukenji wa tshipungidi nealue, unudi nusanka bua bualu buende. Monayi! Yeye nealue bushuwa,” ke mudi Yehowa wa biluilu wamba.

2 “Kadi nnganyi watua makasa panshi dituku dia dilua diende, ne nnganyi wakokesha bua kuimana padiye umueneka? Bualu yeye neikale bu kapia ka mulengeji wa biamu anyi bu nsabanga+ wa basukudi ba bilamba. 3 Nunku, yeye neasombe bu mulengeji ne mukezudi wa arjan+ ne neakezule bana ba Lewi; yeye neabatokeshe* bu or ne bu arjan, bushuwa, bobu nebalue kudi Yehowa bantu badi bafila mulambu wa kupa mu buakane. 4 Nunku mulambu wa kupa wa Yuda ne wa Yelushalema newusankishe* Yehowa bushuwa, bu mu matuku a kale ne bu mu bidimu bia kale kale.+

5 “Nendue pabuipi nebe bua dilumbuluisha, ne nengikale ntemu wa lukasa udi utuisha bena mupongo,+ bena masandi, bantu badi baditshipa mitshipu ya dishima,+ bantu badi bashimakaja muntu udibu bangate ku mudimu,+ mukaji mukamba, ne muana udi kayi ne tatuende*+ bua kubadia bintu, ne udi utuisha bantu badi babenga kuambuluisha* muntu wa ku babende.+ Bantu aba ki mbantshine to,” ke mudi Yehowa wa biluilu wamba.

6 “Bualu meme ndi Yehowa; tshiena nshintuluka*+ to. Nuenu nudi bana ba Yakoba; kanuena banji kufika ku ndekelu wenu to. 7 Katshia ku matuku a bankambua benu nudi bumbuke ku mêyi ne mikandu bianyi ne kanuena babilame to.+ Pinganayi kundi, ne meme nempingane kunudi,”+ ke mudi Yehowa wa biluilu wamba.

Kadi nudi nuebeja ne: “Mmunyi mutuapingana?”

8 “Muntu wetu eu neapawule Nzambi anyi? Kadi nuenu nudi numpawula.”

Nudi nuebeja ne: “Mmunyi mutudi bakupawule?”

“Mmu bia dikumi ne mu mapa. 9 Bushuwa nudi bedibue mulawu,* bualu nudi numpawula, eyowa, tshisamba tshijima tshidi tshienza nunku. 10 Luayi ne tshia dikumi tshijima* mu nzubu wa dilamina bintu,+ bua biakudia bikale mu nzubu muanyi;+ ne ntetayi koku mu bualu ebu,” ke mudi Yehowa wa biluilu wamba, “bua kumona ni tshiakunukanguila biibi bia mu diulu+ ne kunulokeshila* dibenesha too ne padiku kakuyi kupangika tshintu nansha tshimue.”+

11 “Nunku nenkanyine mudi wa bintu* bua bualu buenu, ne yeye kakunyanga mamuma a buloba buenu, ne muonji wa tumuma tua mvinyo wa mu budimi buenu kawakubenga kukuama kabidi to,”+ ke mudi Yehowa wa biluilu wamba.

12 “Bisamba bionso nebikuambe ne: wa diakalenga,+ bualu neulue buloba bua disanka,” ke mudi Yehowa wa biluilu wamba.

13 “Mêyi anudi bangambe mmakole,” ke mudi Yehowa wamba.

Nudi nuebeja ne: “Mmunyi mutudi bakuambe munkatshi muetu?”+

14 “Nudi nuamba ne: ‘Kabiena ne mushinga bua kuenzela Nzambi mudimu.+ Ntshinyi tshitudi bapete patudi tukumbaja malu adiye mutulombe bua kuenza ne patudi tuenda babungame kumpala kua Yehowa wa biluilu? 15 Mpindieu tudi tuangata bantu bena dikamakama bu bantu ba diakalenga. Kabidi, bantu badi benza malu mabi badi balubuluka.+ Badi bapeta dikamakama dia kuteta Nzambi ne kabena bapeta dinyoka.’”

16 Tshikondo atshi, bantu badi batshina Yehowa bakayukidilangana, muntu yonso ne mukuende, ne Yehowa uvua uteya ntema ne uteleja. Ne mukanda wa tshivulukilu wakafundibua kumpala kuende+ bua aba badi batshina Yehowa ne bua aba badi belangana meji a dîna diende.*+

17 “Nunku nebikale bantu banyi,”+ ke mudi Yehowa wa biluilu wamba, “mu dituku dindi ngenza tshintu tshianyi tshia pa buatshi.*+ Nembaleje luse anu bu mudi muntu uleja muanende wa balume udi umuenzela mudimu luse.+ 18 Nunku nenumone kabidi dishilangana pankatshi pa muntu muakane ne muntu mubi,+ pankatshi pa muntu udi wenzela Nzambi mudimu ne udi kayi umuenzela mudimu.”

4 “Bualu mona! dituku didi dilua, didi ditema bu tshikutu tshia kapia,+ dikala bena dikamakama bonso ne bantu bonso badi benza malu mabi ne bua kulua bu bisonsa. Dituku didi dilua adi nedibabutule bushuwa,” ke mudi Yehowa wa biluilu wamba, “ne kadiakubashila muji anyi ditamba nansha. 2 Kadi nuenu badi banemeka* dîna dianyi, munya wa buakane newunutemene, muikale ne luondapu mu nsese yawu;* ne nenutumpike bu bana ba ngombe ba manyi.”

3 “Nenudiate bantu babi muinshi mua makasa, bualu nebikale bu lupuishi muinshi mua makasa enu mu dituku dindi ngenza bualu,” ke mudi Yehowa wa biluilu wamba.

4 “Vulukayi Mikenji ya muena mudimu wanyi Mose, mêyi ne mikandu ne mêyi a dilumbuluisha bimvua mutume dîyi bua bualu buabi ku Holeba bua Isalele mujima kutumikila.+

5 “Monayi! Ndi nnutumina muprofete Eliya+ kumpala kua dilua dia dituku dinene dia Yehowa didi dikuatshisha buôwa.+ 6 Yeye neapingaje mioyo ya batatu kudi bana,+ ne mioyo ya bana kudi batatu, bua tshilu kukuma buloba, kububutula.”