MUKANDA MUIBIDI MUTUMINA BENA KOLINTO

1 Meme Paulo, mupostolo wa Kristo Yezu ku disua dia Nzambi, ne muanetu Timote,+ kudi tshisumbu tshia Nzambi tshidi mu Kolinto, kusangisha ne bansantu bonso badi mu Akaya mujima:+

2 Ngasa ne ditalala bia kudi Nzambi Tatu wetu ne kudi Mukalenge Yezu Kristo bikale nenu.

3 Nzambi, Tatu wa Mukalenge wetu Yezu Kristo,+ Tatu wa luse lua bungi+ ne Nzambi wa busambi buonso,+ atumbishibue, 4 yeye udi utusamba* mu mateta* etu onso+ bua tumone mua kusamba bakuabu+ mu mateta* a mishindu yonso ne busambi butudi tupetela kudi Nzambi.+ 5 Bualu anu bu mudi makenga bua Kristo avulangana kutudi,+ ke mudi kabidi busambi butudi tupeta ku butuangaji bua Kristo buvulangana pabu. 6 Mpindieu tuetu tutuilangana ne mateta,* mbua busambi buenu ne lupandu luenu; ne bikalabu batusamba, mbua busambi buenu budi buenza bua kunuambuluisha bua nuenu kunanukila mu makenga a muomumue ne atudi tukenga petu. 7 Ditekemena dietu bua bualu buenu kadiena ditenkankana, bu mutudi bamanye ne: anu bu munudi penu nukenga makenga amue netu, ke munuasambibua kabidi pamue netu.+

8 Bualu, bana betu, katuena basue nupange kumanya bua makenga atuvua bapete mu provense wa Asia to.+ Tuvua bapete lutatu lukole menemene lutupite makanda, kuenzabi bua ne: katuikadi kabidi nansha ne ditekemena dia kushala ne muoyo to.+ 9 Bushuwa, tuvua badiumvue bu ne: tuvua bapete tshibawu tshia lufu. Biakenzeka nanku bua katudieyemenyi nkayetu to, kadi tueyemene Nzambi+ udi ujula bafue. 10 Yeye wakatusungila ku njiwu minene nunku ya lufu, ne neatusungile kabidi; tudi batekemene kudiye ne: neatungunuke ne kutusungila kabidi.+ 11 Nuenu penu nudi mua kutuambuluisha panudi nusengelela bua bualu buetu,+ bua bantu ba bungi bamone mua kuela Nzambi tuasakidila bua bualu buetu bua dianyishibua ditudi bapete ku diandamuna dia masambila a bantu ba bungi.*+

12 Bualu butudi tuditumbishila mbuobu ebu: kondo ketu ka muoyo kadi kajadika mutudi bende ne bunsantu ne muoyo mutoke wa kudi Nzambi panu apa, ne nangananga kumpala kuenu; katuvua bende mu meji a mubidi,+ kadi mu ngasa wa Nzambi. 13 Bualu mu bulelela, katuena tunufundila malu makuabu, anu anudi mua kubala* ne kujingulula, ne ndi mutekemene ne: nenutungunuke ne kujingulula malu aa bimpe menemene,* 14 anu bu mudi bamue ba kunudi bajingulule kabidi ne: tuetu tudi tshintu tshia nuenu kuditumbishila, anu munuikala penu kutudi mu dituku dia Mukalenge wetu Yezu.

15 Nunku bu mumvua ne dishindika edi, mvua njinga kulua kunudi kumpala, bua nupete mushindu wa kusanka tshiakabidi;* 16 bualu mvua njinga kulua kunumona pamvua mu njila mutangile ku Makedonia, bua kupingana kunudi mfumina ku Makedonia, ne pashishe bua nuenu nunshindikije nye ku Yudaya.+ 17 Pamvua ne lungenyi elu, mvua mulengulule bualu ebu anyi? Peshi ndi mpangadija malu ne lungenyi lua mubidi bua ngambe ne: “Eyowa, eyowa,” kadi mutantshi ne: “Tòo, tòo” anyi? 18 Kadi Nzambi udi mua kueyemenyibua bua mudi tshitudi tunuambila katshiyi “eyowa” kadi mutantshi ne: “tòo” nansha. 19 Bualu Muana wa Nzambi, Yezu Kristo, utuvua banuyishe, mbuena kuamba ne: meme ne Siluano* ne Timote,+ kavua mulue “eyowa” kadi mutantshi ne: “tòo” nansha, kadi “eyowa” mmulue “eyowa” mu bualu buende. 20 Bualu nansha milayi ya Nzambi mikale bungi kayi, mmilue “eyowa” ku diambuluisha diende.+ Ke bualu kayi, ku butuangaji buende kabidi tudi tuamba “Amen” kudi Nzambi,+ “Amen” udi umutumbishisha ku butuangaji buetu. 21 Kadi muntu udi ujadika ne: tuetu nenu tudi bantu ba Kristo ne udi mutuele manyi nNzambi.+ 22 Mmututue kabidi tshitampi+ ne mmutupeshe tshimanyinu tshia bualu budi ne bua kulua,* mmumue ne: nyuma,+ mu mioyo yetu.

23 Mpindieu ndi mbila Nzambi bua ikale ntemu bua kuntuisha* ne: ndi mubenge bua kuanji kulua ku Kolinto bua kunuengeleka. 24 Ki mbua ne: tudi ne bukokeshi pa ditabuja dienu,+ kadi tudi benzejanganyi nenu ba mudimu bua disanka dienu, bualu mbua ditabuja dienu ke panudi bimane.

2 Bualu ndi muangate dipangadika dia kubenga kulua kunudi kabidi ne dibungama. 2 Bualu meme munubungamije, nnganyi wansanguluja pa kumbusha muntu umvua mubungamije? 3 Mvua mufunde bualu bumvua mufunde abu bua pandi ndua tshibungamijibu kudi bantu bena bualu bumvua ne bua kusankila nansha, bualu ndi mushindike ne: bualu budi bunsankisha budi bunusankisha penu nuenu bonso. 4 Bualu mvua munufundile mu dikenga dia bungi ne kanyinganyinga ku muoyo muikale ne binsonji bia bungi, ki mbua kunubungamija,+ kadi mbua numanye bukole bua dinanga dindi nadi bua bualu buenu.

5 Mpindieu bikala muntu mubungamijangane,+ ki mmumbungamije meme to, kadi nnuenu bonso mu mushindu kampanda, bua tshikadi muena malu makole menemene mu bindi ngamba to. 6 Dinyoka didi ba bungi ba kunudi bapeshe muntu wa nunku edi ndikumbane; 7 kadi bua mpindieu, nudi ne bua kumufuila luse ne bulenga buonso ne kumukolesha,+ bua dibungama dipite bukole kadilu kumuzengeja.*+ 8 Nunku ndi nnusengelela bua numujadikile dinanga dienu.+ 9 Ke bualu kayi mvua munufundile kabidi bua kujadika binuikala nuleja ditumikila dienu mu malu onso. 10 Nuenu bafuile muntu luse bua bualu kampanda, ndi mmufuila panyi luse. Mu bulelela, bualu buonso bundi mfuilangana luse (meme mufuile muntu luse bua bualu kampanda) mbua bualu buenu ku mêsu kua Kristo, 11 bua Satana kamonyi mua kutupita bukole,*+ bualu katuena bapange mayele ende* to.+

12 Mpindieu pamvua mufike ku Toa+ bua kuamba lumu luimpe lua Kristo ne bankanguile tshiibi mu Mukalenge, 13 tshivua mupete dikisha mu lungenyi luanyi, bualu tshivua musangane muanetu Tito to.+ Ke meme kulayangana nabu, meme kuya ku Makedonia.+

14 Kadi tudi tuela Nzambi tuasakidila, yeye udi utulombola misangu yonso mu luendu lua ditshimuna pamue ne Kristo, ne udi wenza bua dipembu dia dimanya diende ditangalake* miaba yonso ku butuangaji buetu! 15 Bualu kudi Nzambi, tudi dipembu dimpe dia Kristo munkatshi mua bantu badi benda bapandishibua ne munkatshi mua bantu badi benda bajimina; 16 kudi badi bajimina, tudi mupuya* wa lufu udi ufikisha ku lufu,+ kadi kudi bantu badi bapandishibua, tudi dipembu dia muoyo didi difikisha ku muoyo. Nnganyi udi mukumbanyine malu aa menemene? 17 Tuetu tudi baakumbanyine, bualu katuena bangenda mushinga ba* dîyi dia Nzambi+ bu mudi bantu ba bungi bikale to, kadi tudi tuakula ne muoyo mutoke bu bantu batuma kudi Nzambi, eyowa, ku mêsu kua Nzambi ne bikale pamue ne Kristo.

3 Tudi tutuadija kudianyisha kabidi tuetu nkayetu anyi? Peshi bu bantu bakuabu, tudi dijinga ne mikanda ya kudianyisha nayi kunudi anyi idi ifumina kunudi anyi? 2 Nuenu bine nudi mukanda wetu+ mufunda mu mioyo yetu, mumanyike kudi bantu bonso ne udibu babala kudi bantu bonso. 3 Bualu bidi bimueneka patoke munudi mukanda wa Kristo utudi tuetu bena mudimu bafunde,+ ki mmufunda ne mâyi a mukanda, kadi ne nyuma wa Nzambi wa muoyo; ki mpa mabue,+ kadi mpa musunyi, mbuena kuamba ne: mu mioyo.+

4 Tudi ne dishindika dia mushindu eu kudi Nzambi ku butuangaji bua Kristo. 5 Katuena tuamba ne: tudi bakumbane menemene bua kumona ne: bintu bionso bidi bifumina kutudi, kadi dikala dietu bakumbane menemene didi difumina kudi Nzambi+ 6 udi muenze bushuwa bua tukumbane menemene bua kuikala bena mudimu ba tshipungidi tshipiatshipia,+ ki ntshia mikenji mifunda,+ kadi ntshia nyuma; bualu mikenji mifunda idi ikosela bantu tshibawu tshia lufu,+ kadi nyuma udi upesha bantu muoyo.+

7 Mpindieu bikala mikenji idi ifikisha ku lufu ne ivuabu bafunde ne maleta bondole pa mabue+ milue ne butumbi bua mushindu eu bienze bua bana ba Isalele kabamonyi mua kutangila mpala wa Mose bua butumbi bua mpala wende,+ butumbi buvuabu ne bua kujimija, 8 bua tshinyi kufila kua nyuma+ kakuena mua kuikala ne butumbi bupite bungi?+ 9 Bualu bikala mikenji ivua ipisha+ mikale ne butumbi,+ mudimu wa kufila buakane udi ne bua kuikala ne butumbi bupite bungi!+ 10 Mu bulelela, nansha tshintu tshivuabu bapeshe butumbi kale ntshiumbusha butumbi bua bualu bua butumbi budi bubutambe.+ 11 Bualu bikala tshivuabu ne bua kujimija tshilue ne butumbi,+ tshidi tshishala tshidi ne bua kuikala ne butumbi bupite bungi!+

12 Bu mutudi ne ditekemena edi,+ tudi tuakula ne dikima dikole, 13 katuyi tuenza tshivua Mose muenze pavuaye ubuikila mpala wende tshilamba+ bua bana ba Isalele kabashadi batangile ku ndekelu kua tshivuabu ne bua kujimija to. 14 Kadi lungenyi luabu luvua lutshipale.+ Bualu too ne lelu, tshilamba atshi ntshishale katshiyi tshiumbusha padibu babala tshipungidi tshia kale,+ bualu tshidi tshiumbushibua anu ku diambuluisha dia Kristo.+ 15 Mu bulelela, too ne lelu eu, dîba dionso didibu babala mifundu ya Mose,+ tshilamba ntshibuikile mioyo yabu.+ 16 Kadi padi muntu uya kudi Yehowa,* tshilamba tshidi tshiumbushibua.+ 17 Mpindieu Yehowa* udi Nyuma,+ ne muaba udi nyuma wa Yehowa* udi budikadidi.+ 18 Tuetu bonso, patudi ne mpala kayiyi mibuikila tumuenesha butumbi bua Yehowa* bu mmuenu, tudi tukudimuka mu tshimfuanyi tshimue tshimue atshi ku butumbi kampanda tuya ku bukuabu,* anu mudi Yehowa* udi Nyuma* wenzeja menemene.+

4 Ke bualu kayi, bu mutudi ne mudimu eu ku diambuluisha dia luse luvuabu batuleje, katuena tuwulekela to. 2 Kadi tudi balekele malu a bundu a muinshi muinshi, katuyi tuenda ne budimu anyi tunyanga dîyi dia Nzambi to;+ kadi tudi tudianyisha tuetu bine kudi kondo ka muoyo ka muntu yonso kumpala kua Nzambi pa kuleja bulelela patoke.+ 3 Mu bulelela, bikala lumu luimpe lutudi tumanyisha luikale lubuikila, ndubuikila munkatshi mua bantu badi benda bajimina 4 mudi nzambi wa ndongoluelu wa malu eu*+ mufofomije meji a badi kabayi bena kuitabuja,+ bua bukenke* bua lumu luimpe lua butumbi lua Kristo udi tshimfuanyi tshia Nzambi+ kabukenkeshi munkatshi muabu to.+ 5 Bualu katuena tuyisha malu etu to, kadi tudi tuyisha malu a Kristo Yezu bu Mukalenge, ne etu tuetu bu bapika benu bua bualu bua Yezu. 6 Bualu Nzambi ke uvua muambe ne: “Butoke butokeshe mu mîdima,”+ ne mmutokeshe mu mioyo yetu bua kuyikenkesha+ ne dimanya dia butumbi dia Nzambi ku butuangaji bua mpala wa Kristo.

7 Kadi tudi ne tshiuma etshi+ mu bivuadi bienza ne buloba,*+ bua bukole budi bupite bua pa tshibidilu buikale bua Nzambi kadi kabuikadi bufumina kutudi.+ 8 Badi batutshintshimika bikole mu mishindu yonso, kadi katuena bafimpakane tupangila mua kunyunga to; tudi tupampakana, kadi katuena bapangile kua kupatukila nansha kakese;*+ 9 badi batukengesha, kadi katuena balekelela;+ badi batukuma panshi, kadi kabena batubutula to.+ 10 Misangu yonso mu mubidi wetu tudi tunanukila dikengeshibua dia lufu divuabu bakengeshe nadi Yezu,+ bua muoyo wa Yezu umueneshibue kabidi mu mubidi wetu. 11 Bualu tuetu badi ne muoyo tudi tutuilangana ne lufu mpala ne mpala misangu yonso+ bua bualu bua Yezu, bua muoyo wa Yezu umueneshibue kabidi mu mubidi wetu udi ufua. 12 Nunku lufu ludi luenza mudimu munda muetu, kadi muoyo pawu munda muenu.

13 Mpindieu bu mutudi ne nyuma wa ditabuja umue umue au bu udibu bafunde bualu buende ne: “Mvua muleje ditabuja, ke bualu kayi mvua muakule”;+ tuetu petu tudi tuleja ditabuja, ke bualu kayi tudi tuakula, 14 bamanye ne: Yeye uvua mujule Yezu neatujule petu popamue ne Yezu ne neatuleje nenu kumpala kuende.+ 15 Bualu malu onso aa adiku bua bualu buenu, bua divulangana dia ngasa divule kabidi bikole bualu bantu ba bungi menemene badi bela tuasakidila bua butumbi bua Nzambi.+

16 Ke bualu kayi katuena tulekela, kadi nansha bumuntu buetu bua pambelu buenda bunyanguka, bulelela, bumuntu buetu bua munda budi buobu buenda buvuijibua bupiabupia ku dituku ku dituku. 17 Bualu nansha mudi dikenga* dikale dia tshitupa tshîpi ne dipepele, didi ditupatuila butumbi budi bupite bunene* kule ne kule ne budi bua tshiendelele;+ 18 patudi eku batuishile mêsu etu, ki mpa bintu bidi bimueneka, kadi mpa bintu bidi kabiyi bimueneka.+ Bualu bintu bidi bimueneka mbia tshitupa tshîpi, kadi bintu bidi kabiyi bimueneka mbia tshiendelele.

5 Bualu tudi bamanye ne: bikala nzubu wetu wa pa buloba, ntenta eu, ne bua kupuka,*+ tudi ne bua kupeta nzubu wa kudi Nzambi, nzubu udi kayi muibaka ne bianza,+ wa tshiendelele mu diulu. 2 Bualu mu nzubu eu* tudi bushuwa tutuamu mikemu, tujinga ne muoyo mujima bua kuvuala nzubu wetu wa* mu diulu,*+ 3 bua patudi tumuvuala, kabatusanganyi butaka. 4 Mu bulelela, tuetu badi mu ntenta eu tudi tutua mikemu, bazengeja, bualu katuena basue kuvula utudi nende, kadi tudi basue kuvuala mukuabu au,+ bua tshidi tshifua batshimine kudi muoyo.+ 5 Mpindieu udi mutulongolole bua bualu buine ebu nNzambi+ uvua mutupeshe nyuma bu tshimanyinu tshia bualu budi ne bua kulua.*+

6 Nunku tudi ne dikima dikole misangu yonso ne tudi bamanye ne: patutshidi basombe mu mubidi, katuena kudi Mukalenge to,+ 7 bualu tudi tuenda bua ditabuja, ki mbua malu adi amueneka to. 8 Kadi tudi ne dikima dikole ne katuena basue kuikala mu mubidi to, kadi tudi basue kusomba ne Mukalenge.+ 9 Nunku nansha tuetu basombe nende anyi katuyi kudiye, tshipatshila tshietu ntshia kuanyishibua kudiye. 10 Bualu tuetu bonso tudi ne bua kumueneka* kumpala kua nkuasa wa tshilumbuluidi wa Kristo, bua muntu yonso afutshibue bilondeshile malu avuaye muenze pavuaye mu mubidi, nansha owu mimpe anyi mabi.*+

11 Ke bualu kayi, bu mutudi bamanye ditshina dia Mukalenge, tudi tutungunuka ne kuitabijija bantu, kadi tudi bamanyike bimpe* kudi Nzambi. Tshidibi, ndi mutekemene ne: tudi kabidi bamanyike bimpe* mu tondo tuenu tua muoyo. 12 Katuena tudianyisha kunudi kabidi kadi tudi tunupesha mpunga wa nuenu kuditumbisha bua bualu buetu, bua nuikale bakumbane bua kuandamuna bantu badi baditumbisha bua tshimuenekelu tshia ku mêsu,+ kadi kabayi baditumbisha bua tshidi mu muoyo. 13 Bualu bituikala tuvua bajimije lungenyi,+ bivua bua Nzambi; bituikala ne lungenyi luetu lujima, mbuenu nuenu. 14 Bualu dinanga didi nadi Kristo didi dituenzeja, bualu tudi bafike ku dimona ne: muntu umue wakafuila bantu bonso,+ bualu bantu bonso bakavua bafue. 15 Wakafuila bantu bonso bua badi ne muoyo kabikadi ne muoyo buabu nkayabu to,+ kadi bikale nawu bua yeye uvua mubafuile ne bamujule ku lufu.

16 Nunku kutuadijila ku mpindieu, katuena bamanye muntu bilondeshile mubidi.+ Nansha bituikala tuvua bamanye Kristo kale bilondeshile mubidi, bushuwa katutshiena bamumanye kabidi mu mushindu au to.+ 17 Ke bualu kayi, bikala muntu mu buobumue ne Kristo, yeye udi tshifukibua tshipiatshipia;+ malu a kale akadi mapite; tangilayi, malu mapiamapia akadi malue. 18 Kadi malu onso mmafume kudi Nzambi uvua mutufikishe ku dilengejangana nende ku butuangaji bua Kristo+ ne mutupeshe mudimu wa kufikisha bantu ku dilengejangana nende,+ 19 mbuena kuamba ne: Nzambi, ku diambuluisha dia Kristo, uvua ufikisha ba pa buloba ku dilengejangana nende,+ kayi ubabadila bilema biabu,+ ne uvua mutupeshe mukenji wa dilengejangana adi.+

20 Nunku tuetu tudi baleji mpala+ pa muaba wa Kristo,+ bienze anu bu ne: Nzambi uvua usengelela bantu ku butuangaji buetu. Bu mutudi bantu badi pa muaba wa Kristo, tudi tusengelela bantu ne: “Lengejanganayi ne Nzambi.” 21 Muntu uvua kayi mumanye mpekatu,+ wakamuvuija mpekatu* bua bualu buetu, bua tulue buakane bua Nzambi+ ku butuangaji buende.

6 Bu mutudi tuenza mudimu pamue nende,+ tudi kabidi tunusengelela bua kanuitabi ngasa wa Nzambi bua kupangila tshipatshila tshiende nansha.+ 2 Bualu udi wamba ne: “Mvua mukuteleje mu tshikondo tshianyishibue, ne mvua mukuambuluishe mu dituku dia lupandu.”+ Monayi! Mpindieu ke tshikondo menemene tshidi tshianyishibue. Monayi! Mpindieu ke dituku dia lupandu.

3 Mu mushindu nansha umue katuena tulenduisha muntu mu bualu nansha bumue, bua kabakudi bibi bua mudimu wetu;+ 4 kadi mu malu onso tudi tudianyishisha bu bena mudimu ba Nzambi+ mu dinanukila malu a bungi, mu makenga, mu bikondo bia dipangila dia bintu, mu ntatu,+ 5 mu ditutshibua, mu diedibua mu maloko,+ kumpala kua bimvundu, mu dienza mudimu mukole, mu dipangila tulu butuku, mu bikondo bia dipangila biakudia;+ 6 mu bukezuke, mu dimanya, mu lutulu,+ mu bulenga,+ mu nyuma muimpe,* mu dinanga didi kadiyi ne lubombo,+ 7 mu diamba mêyi malelela, mu bukole bua Nzambi;+ ku diambuluisha dia bia mvita bia buakane+ mu tshianza tshia balume* ne mu tshianza tshia bakaji,* 8 ku ditumbishibua ne dipuekeshibua milongo, ku dituendeshila lumu lubi ne dituendeshila lumu luimpe. Badi batuangata bu bena dishima petu tuamba bulelela, 9 bu badi kabayi bamanyike petu bamanyike, bu badi benda bafua* kadi tangilayi, tudi ne muoyo,+ bu bapeshibue dinyoka* kadi kabayi batufile ku lufu,+ 10 bu badi babungame petu tusanka misangu yonso, bu bapele petu tuvuija ba bungi babanji, bu badi kabayi ne tshintu petu bikale ne bintu bionso.+

11 Tudi babulule mukana muetu bua kuakula nenu,* nuenu bena Kolinto, ne tudi bunzulule mioyo yetu bikole. 12 Katuena badielele mikalu* mu mushindu utudi banunange to,+ kadi nuenu nudi badielele mikalu mu mushindu unudi batunange mu mioyo yenu. 13 Nunku meme panyi ndi ngamba (bu udi wambila bana banyi) ne: nuenu penu kangulayi mioyo yenu bikole.*+

14 Lekelayi kudibueja mu tshikokedi tshimue* ne bantu badi kabayi bena kuitabuja,+ bualu kabiena bipetangana to. Bualu mmalanda kayi adi pankatshi pa buakane ne dishipa dia mikenji?+ Anyi ndipetangana kayi didi pankatshi pa butoke ne mîdima?+ 15 Bualu bukuabu, ndiumvuangana kayi didi pankatshi pa Kristo ne Beliyala?*+ Anyi muena kuitabuja* udi mua kusangila tshinyi ne* udi kayi muena kuitabuja?+ 16 Kabidi, ndiumvuangana kayi didi pankatshi pa ntempelo wa Nzambi ne mpingu?+ Bualu tuetu tudi ntempelo wa Nzambi wa muoyo;+ anu bu muvua Nzambi muambe ne: “Nensombe munkatshi muabu,+ nengende munkatshi muabu, nengikale Nzambi wabu ne bobu nebikale bantu banyi.”+ 17 “‘Ke bualu kayi, patukayi munkatshi muabu, nuditapulule kudibu,’ ke mudi Yehowa* wamba, ‘ne lekelayi kulenga tshintu tshia bukoya’”;+ “‘nunku meme nennuakidile.’”+ 18 “‘Nendue tatu kunudi,+ ne nuenu nenulue bana ba balume ne bana ba bakaji kundi,’+ ke mudi Yehowa* Wa Bukole Buonso wamba.”

7 Ke bualu kayi, bana betu bananga, bu mutudi ne milayi eyi,+ tudilengeje ku dinyanguka dionso dia mubidi ne dia nyuma,+ tuvuija dikala dietu ba tshijila dipuangane mu ditshina dia Nzambi.

2 Enzayi bua tuikale ne muaba mu mioyo yenu.+ Katuena benzele muntu nansha umue bibi, katuena banyange muntu nansha umue, katuena badie tshintu tshia muntu nansha umue.+ 3 Tshiena ngamba bualu ebu bua kunupisha to. Bualu nkadi muambe ne: nudi mu mioyo yetu bua tuetu kufua pamue ne kuikala ne muoyo pamue. 4 Ndi nnuambila malu onso patoke menemene. Ndi nditumbisha bikole bua bualu buenu. Ndi muwujibue ne busambi; ndi ne disanka diyila too ne panshi mu dikenga dietu dionso.+

5 Mu bulelela, patuvua bafike ku Makedonia,+ mibidi* yetu kayivua mipete dikisha to, kadi tuakatungunuka ne kukengeshibua mu mishindu yonso, kuvua mvita pambelu, ditshina munda. 6 Kadi Nzambi utu usamba bantu badi batekete ku muoyo+ wakatusamba ne dikala dia Tito netu; 7 ki nganu bua dikalaku diende nkayadi to, kadi kabidi bua busambi buvuaye mupete bua bualu buenu, pavuaye mupingane mulue kutuambila munuvua nunjinga ne muoyo mujima, munuvua babungame bikole ne nuditatshisha bikole* bua bualu buanyi; nunku ngakasanka kabidi bikole.

8 Bualu nansha mumvua munubungamije ne mukanda wanyi,+ tshiena nnyingalala bua bualu abu to. Nansha mumvua munyingalale kumpala, (bu muvua mukanda au munubungamije, nansha muvuabi bua mutantshi mukese), 9 mpindieu ndi ne disanka, ki nganu bualu nuvua babungame to, kadi bualu dibungama dienu ndinufikishe ku dinyingalala bua mpekatu. Bualu nuvua babungame mu mushindu uvua Nzambi muanyishe, bienze bua ne: bualu bubi nansha bumue kabunufikidi bua bualu buetu. 10 Bualu dibungama mu mushindu udi Nzambi wanyisha didi difikisha ku dinyingalala bua mpekatu didi difikisha ku lupandu, muntu ushala kayi udipisha;+ kadi dibungama dia panu didi dikebesha lufu. 11 Bualu monayi mudi dibungama dienu mu mushindu udi Nzambi wanyisha dipatule disuminyina dikole munda muenu; bushuwa, dileja munudi kanuyi ne bualu, bushuwa, kanyinganyinga, bushuwa, ditshina, bushuwa, dijinga dikole, bushuwa, tshisumi, bushuwa, dilongolola dia tshilema!+ Nuvua baleje mu malu onso munuvua bakezuke* mu bualu ebu. 12 Nansha mumvua munufundile, tshivua mufunde bua muntu uvua muenze bualu bubi+ anyi bua muntu uvuabu benzele bibi to, kadi mbua disuminyina dienu bua bualu buetu dimueneshibue patoke munkatshi muenu ku mêsu kua Nzambi. 13 Ke bualu kayi tudi basambibue.

Kadi pa kumbusha disambibua dietu, tuvua basanke kabidi bikole menemene bua disanka dia Tito, bualu nuenu bonso nuvua bakoleshe nyuma wende. 14 Bualu bingikala muditumbishe kudiye bua bualu buenu, tshiena mufuishibue bundu to; kadi anu bu mudi malu onso atuvua banuambile mikale malelela, ke mudi kabidi diditumbisha dietu kudi Tito dilue dilelela. 15 Bualu bukuabu, dinanga diende dikole kunudi ndikole kabidi padiye uvuluka ditumikila dienu nuenu bonso,+ munuvua bamuakidile ne ditshina ne dizakala. 16 Ndi nsanka bualu mu malu onso ndi mua kunueyemena.*

8 Mpindieu bana betu, tudi basue numanye bua ngasa wa Nzambi udiye mupeshe bisumbu bia mu Makedonia.+ 2 Mu tshikondo tshia diteta dikole pavuabu mu dikenga, disanka diabu dia bungi ne bupele buabu bukole biakenza bua ne: bubanji bua lungenyi luabu lua kupeshangana bintu buvule.* 3 Bualu bakafila bilondeshile dimona diabu,+ eyowa, ndi njadika ne: bipite too ne pa dimona diabu,+ 4 pavuabu eku batungunuka ne kudilombela nkayabu kutudi ne disuminyina bua bapete pabu diakalenga dia kufila ne bulenga buonso, bua benze pabu mudimu wa diambuluisha bansantu.+ 5 Bakenza kupita mutuvua batekemene, bualu bakanji kudifila nkayabu kudi Mukalenge ne kutudi ku diambuluisha dia disua dia Nzambi. 6 Ke tuetu kukankamija Tito+ bua ne: anu bu muvuaye mutuadije mudimu eu munkatshi muenu, uvua kabidi ne bua kujikija mudimu wa muomumue wa difila unudi nuenza ne bulenga buonso. 7 Nansha nanku, anu bu munudi babanji mu malu onso, mu ditabuja ne mu dîyi ne mu dimanya ne mu disuminyina dionso ne mu dinanga dietu kunudi, nuikale kabidi babanji mu mudimu wa difila eu unudi nuenza ne bulenga buonso.+

8 Tshiena ngamba nunku bua kunutumina dîyi, kadi mbua kunumanyisha disuminyina dia bakuabu ne bua kuteta bua kumona bulelela bua dinanga dienu. 9 Bualu nudi bamanye ngasa wa Mukalenge wetu Yezu Kristo ne: nansha muvuaye mubanji, wakalua mupele bua bualu buenu,+ bua nulue babanji ku bupele buende.

10 Ndi mfila lungenyi luanyi mu bualu ebu nunku:+ Mbua diakalenga dienu, bualu kukadi tshidimu tshijima tshinuvua batuadije bualu ebu ne baleje kabidi dijinga dienu dia kubuenza. 11 Nunku mpindieu, jikijayi kabidi tshinuvua batuadije kuenza, bua dijinga dienu dia kuenza dikumbane bilondeshile bintu binudi nabi. 12 Bualu bikala dijinga didianjile kuikalaku, mbianyishibue nangananga bilondeshile bidi muntu nabi,+ kadi ki mbilondeshile bidi muntu kayi nabi to. 13 Bualu tshiena musue kuenza bua bikale bipepele bua bakuabu, kadi bikole buenu nuenu to; 14 kadi bua ne: ku diambuluisha dia dikumbajijangana, bintu bienu bidi bipite pa mutu mpindieu bikumbajije bidibu bapangile, bua bintu biabu bidi bipite pa mutu bilue pabi kukumbajija binudi bapangile, bua kuikale dikumbanangana. 15 Anu bu mudibu bafunde ne: “Muntu uvua nabi bia bungi kavua nabi bipite, ne muntu uvua nabi bikese kavua ne bikese menemene.”+

16 Mpindieu tudi tuela Nzambi tuasakidila bua mudiye muteke diditatshisha dikole dia muomumue bua bualu buenu mu muoyo wa Tito,+ 17 bualu mmuitabe dikankamija bushuwa, kadi bu mudiye ne tshisumi tshia bungi, udi udiluila kunudi mu yeye nkayende. 18 Kadi tudi tumutuma kabidi ne muanetu udi lumu ludiye nalu bua lumu luimpe lutangalake mu bisumbu bionso. 19 Ki nkujike to, kadi bisumbu bivua kabidi bimusungule bua kuenza netu ngendu patudi tuenda tufila dipa edi difila ne bulenga buonso bua butumbi bua Mukalenge ne bua kujadika dijinga dietu dia kuambuluishangana. 20 Nunku tudi tuepuka bua muntu katukuatshi tshilema mu bualu bua dipa dinene ditudi tutangila edi.+ 21 Bualu tudi ‘tuenza malu onso ne bulelela, ki nganu ku mêsu kua Yehowa* kadi ne ku mêsu kua bantu kabidi.’+

22 Bualu bukuabu, tudi tubatuma ne muanetu utudi batete misangu ya bungi ne basangane mudiye wenza malu ne muoyo mujima mu malu a bungi, kadi mpindieu udi wenza malu ne muoyo mujima bikole kupita kumpala bualu mmunueyemene bikole. 23 Kadi bikalaku lukonko lukuabu ludi lutangila Tito, yeye mmuena dianyi* ne muenzejanganyi nanyi wa mudimu bua diakalenga dienu; peshi bikalaku nkonko idi itangila bana betu, mbapostolo ba bisumbu ne butumbi bua Kristo. 24 Nunku lejayi munudi babanange,+ ne lejayi bisumbu bua tshinyi tuvua baditumbishe bua bualu buenu.

9 Mpindieu bua mudimu wa diambuluisha bansantu,+ kabiena ne mushinga menemene bua meme kunufundila to, 2 bualu ndi mumanye dijinga dienu dia kuambuluisha dindi nditumbishila kudi bena Makedonia ne: bena Akaya bakadi badilongolole kukadi tshidimu tshijima, ne tshisumi tshienu ntshisonsole ba bungi ba kudibu. 3 Kadi ndi ntuma bana betu bua diditumbisha dietu bua bualu buenu kadikadi patupu mu bualu ebu, kadi bua nuikale bushuwa bamane kudilongolola anu bu mumvua muambe ne: ke munuenza. 4 Tshianana, bikala bena Makedonia ne bua kulua nanyi ne kusangana kanuyi badilongolole, tuetu (nansha nuenu penu) netufuishibue bundu bua mushindu utudi banueyemene. 5 Nunku mvua muele meji ne: bivua bimpe kukankamija bana betu bua kulua kunudi kumpala kua dîba ne bua kudianjila kulongolola dipa dienu dinene dinuvua balaye, bua dikale dimana kulongolola bu dipa difila ne tshianza tshilekelela, kadiyi bu tshintu tshinyenga.

6 Kadi mu bualu ebu, yonso udi ukuna bikese neapuole bikese; kadi yonso udi ukuna bia bungi, neapuole bia bungi.+ 7 Muntu ne muntu enze anu bu mudiye mupangadije mu muoyo wende, kenji ne muoyo mukuatshidile* anyi bu muenzeja ku bukole,+ bualu Nzambi mmunange muntu udi ufila ne disanka.+

8 Bualu bukuabu, Nzambi udi ne bukole bua kuenza bua ngasa wende yonso avulangane kunudi, bua nuikale misangu yonso ne bionso binudi nukengela, bikale kabidi ne bintu bia bungi bua mudimu wonso muimpe.+ 9 (Anu bu mudibu bafunde ne: “Mmuabanyinangane bintu ne tshianza tshilekelela;* mmupeshe bapele bintu. Buakane buende budi butungunuka bua kashidi.”+ 10 Mpindieu Yeye utu upesha mukunyi mamiinu a bungi ne diampa dia kudia neanupeshe mamiinu ne neaavudije bua nuenu kuakuna ne neavudije dinowa dia buakane buenu.) 11 Nudi nuvuijibua babanji mu malu onso bua kupangana kua bintu kua mishindu yonso kudi kupatuisha mêyi a kusakidila nawu Nzambi ku butuangaji buetu; 12 bualu mudimu wa diambuluishangana eu kawena anu bua kupesha bansantu bidibu nabi dijinga to,+ kadi mbua kuikala kabidi babanji mu mêyi a bungi a kuela nawu Nzambi tuasakidila. 13 Bua tshijadiki tshidi mudimu wa diambuluishangana eu ufila, badi batumbisha Nzambi bualu nudi nukokela lumu luimpe lua Kristo, anu munuvua bambe patoke, ne bualu nudi nufila bintu bienu ne tshianza tshilekelela kudibu ne kudi bantu bonso.+ 14 Badi baleja kabidi mudibu banunange bikole, bikale basengelela bua bualu buenu, bualu ngasa mupite bungi wa Nzambi udi nenu.

15 Tudi tuela Nzambi tuasakidila bua dipa diende difila tshianana didi kadiyi kuamba.

10 Mpindieu meme Paulo, ndi nnusengelela bilondeshile bupole bua Kristo ne bulenga buende,+ nansha mundi mupuekele munkatshi muenu patudi nenu mpala ne mpala,+ kadi muikale ne dikima kunudi pandi tshiyi nenu.+ 2 Ndi ndomba ne: pangikala nenu, tshikadi mua kudileja ne dikima ne kuangata mapangadika makole andi mutekemene bua kuangatshila bamue bantu badi batumona tuetu bu badi benda bilondeshile mubidi. 3 Bualu nansha tuetu tuenda bilondeshile mubidi, katuena tuluangana mvita bilondeshile tshitudi mu mubidi to. 4 Bualu bia mvita bietu ki mbia mubidi,+ kadi mbikolesha kudi Nzambi+ bua kutonkola bintu bidi biele miji bikole menemene. 5 Bualu tudi tutonkola ngelelu ya meji ne tshintu tshionso tshitumbuke tshidibu bajula bua kuluisha dimanya dia Nzambi,+ ne tudi tukuata meji onso bua atumikile Kristo; 6 ne tudi badilongolole bua kufila dinyoka kudi muntu yonso udi ubenga kutumikila+ diakamue padi ditumikila dienu dikumbana dionso.

7 Nudi nutangila malu mudiwu amueneka ku mêsu. Bikala muntu mushindike munda muende ne: udi wa Kristo, elele kabidi bualu ebu meji: Anu bu mudiye wa Kristo, ke mutudi petu ba Kristo. 8 Bualu nansha bu meme ne bua kuditumbisha ndambu bua bukokeshi budi Mukalenge mutupeshe bua kunukolesha pamutu pa kunutekesha,+ tshiakufuishibua bundu to. 9 Bualu tshiena musue kumueneka bu udi ukeba kunutshinyisha ne mikanda yanyi to. 10 Bualu badi bamba ne: “Mikanda yende idi ne bujitu ne bukole, kadi yeye muine padiyiku ki mmuntu wa nsongo ne mêyi ende nga kupetula.” 11 Muntu wa nunku amanye ne: malu atudi tuamba* mu mikanda patudi katuyiku, ke atuikala kabidi ne bua kuenza* patuikalaku.+ 12 Bualu katuena tuteta bua kuditeka tuetu nkayetu mu mulongo umue ne bamue bantu badi badianyisha nkayabu anyi kudifuanyikija nabu to.+ Kadi padibu badipimina anu pa bobu nkayabu ne badifuanyikija anu ne bobu nkayabu, kabena ne lungenyi to.+

13 Kadi tuetu katuakuditumbishila dia muamua dia mikalu idibu batuelele to, kadi anu mu mikalu ya muaba udi Nzambi mutukosele,* muyifikishe too ne kunudi.+ 14 Bulelela, katuena tudinana tupitshisha bienze bu ne: katuvua bafike kunudi, bualu tuvua ba kumpala ku difika too ne kunudi ne lumu luimpe lua Kristo.+ 15 Tòo, katuena tuditumbishila dia muamua dia mikalu idibu batuelele bua midimu mikole ya muntu mukuabu to, kadi tudi tutekemena ne: bu mudi ditabuja dienu ditungunuka ne kuvula, malu atudi benze avudijibue muaba wetu wa mudimu. Dîba adi, netuenze kabidi binene kupita apu, 16 bua tumone mua kuamba lumu luimpe kusambuka nalu ne ditunga dienu, bua katuditumbishi bua malu akadibu benze muaba wa mudimu wa muntu mukuabu to. 17 “Kadi muntu udi uditumbisha, aditumbishile mu Yehowa.”*+ 18 Bualu muntu udi udianyisha nkayende ki ngudi muanyishibue,+ kadi anu muntu udi Yehowa* wanyisha.+

11 Ndi musue bua nundejaku lutulu bua ndambu wa butshimbakane buanyi. Kadi mu bulelela, nukadi nundeja lutulu! 2 Bualu ndi nenu mukawu, mukawu wa Nzambi,* bualu meme nkayanyi mvua mulaye bua kunuselesha kudi mulume umue, bua nnufile kudi Kristo bu mukaji utshidi kamama udi mukezuke.*+ 3 Kadi ndi ntshina mu mushindu kampanda anyi kansanga ne: anu bu muvua nyoka mupambuishe Eva ne budimu buende bubi,+ meji enu kaalu kunyanguka, aya kule ne muoyo mutoke ne bukezuke* bidi bikumbanyine Kristo.+ 4 Bualu anu mudibi, muntu yeye mulue ne muyishe Yezu mukuabu mushilangane ne utuvua bayishe, anyi nuenu bapete nyuma mukuabu mushilangane ne unuvua bapete, peshi lumu luimpe lukuabu lushilangane ne lunuvua bitabe,+ nudi numuleja lutulu bipepele. 5 Bualu ndi ngela meji ne: tshiena mudileje mushadile kudi bapostolo benu badi bapite bunene mu bualu nansha bumue to.+ 6 Kadi nansha mundi tshiyi ne tshipedi tshia kuakula,+ bulelela tshiena mupangile dimanya to; bushuwa tuvua banuleje bualu ebu patoke mu mishindu yonso ne mu malu onso.

7 Peshi mvua muenze mpekatu pamvua mudipuekeshe bua nuenu kubandishibua bua mumvua munuambile lumu luimpe lua Nzambi ne disanka kanuyi bafute tshintu anyi?+ 8 Mvua mushiye bisumbu bikuabu bianza bitupu* pamvua muangate bintu biabu* bua kunuambuluisha nuenu.+ 9 Kadi pamvua nenu ne nkengela bintu, tshivua mulue bujitu kudi muntu nansha umue to, bualu bana betu bavua bafumine ku Makedonia bakakumbaja majinga anyi bimpe menemene.+ Eyowa, mu mishindu yonso, mvua mbenga kuikala bujitu kunudi ne nentungunuke ne kuenza nanku.+ 10 Bushuwa anu bu mudi bulelela bua Kristo munda muanyi, tshiakulekela kuditumbisha mushindu eu+ mu bitupa bia maloba bia mu Akaya to. 11 Mbua bualu kayi? Bualu tshiena mununange anyi? Nzambi mmumanye mundi mununange.

12 Kadi nentungunuke ne kuenza tshindi ngenza+ bua kumbusha tshintu tshidibu bashiminyina kudi bantu badi bakeba tshintu* tshidi mua kubavuija muomumue netu mu malu* adibu baditumbishila. 13 Bualu bantu ba nunku mbapostolo ba dishima, bena mudimu ba mafi badi badivuija bu bapostolo ba Kristo.+ 14 Ki mbualu bua kukema to, bualu Satana muine utu udivuija bu muanjelu wa butoke.+ 15 Nunku ki mbualu bua kukema bikala bena mudimu bende batungunuka ne kudivuija pabu bu bena mudimu ba buakane. Kadi ndekelu wabu neikale bilondeshile malu adibu benza.+

16 Ndi ngamba kabidi ne: muntu kedi meji ne: ndi mutshimbakane to. Kadi nansha nuenu nuela meji nanku, ngitabayi bu muntu mutshimbakane bua meme panyi mmone mua kuditumbisha nansha kakese. 17 Malu andi ngamba mpindieu, tshiena nngamba ndonda tshilejilu tshia Mukalenge to, kadi ndi ngakula bu muntu mutshimbakane, muikale uditumbisha ne udieyemena. 18 Bu mudi bantu ba bungi baditumbishila mu malu a mubidi,* meme panyi nenditumbishe. 19 Bu munudi nuenu ne “meji” a bungi nunku, nudi nuleja bantu batshimbakane lutulu ne disanka dionso. 20 Mu kuamba kuimpe, nudi nuleja lutulu kudi muntu yonso udi unukuata ku bupika, kudi muntu yonso udi unudia bintu, kudi muntu yonso udi wangata bionso binudi nabi, kudi muntu yonso udi udibandisha ku mutu kuenu ne kudi muntu yonso udi unututa ku mêsu.

21 Ndi ngamba bualu ebu bua bundu butukuate, bualu bidi mua kumueneka bu ne: tudi benze malu ne butekete.

Kadi bikala bakuabu benza malu ne dikima (ndi ngakula bu mutshimbakane) meme panyi ndi ngenza malu ne dikima. 22 Mbena Ebelu anyi? Meme panyi ndi muena Ebelu.+ Mbena Isalele anyi? Meme panyi ndi muena Isalele. Mbana* ba Abalahama anyi? Meme panyi ndi muanende.+ 23 Mbena mudimu ba Kristo anyi? Ndi ngandamuna bu mupale ne: ndi muena mudimu wa Kristo udi mubapite bikole menemene: ndi muenze mudimu wa bungi,+ mubuele mu buloko misangu ne misangu,+ mututshibue misangu kayiyi kubala, muambe kufua misangu ya bungi.+ 24 Misangu itanu mvua mupete mikumu 40 kumbusha umue kudi bena Yuda,+ 25 misangu isatu bavua bankume ne milangala,+ bangase mabue musangu umue,+ mazuwa avua matutshibukile mu mâyi misangu isatu,+ mvua mupitshishile butuku bujima ne munya mujima pa mbuu; 26 mvua mu ngendu misangu ya bungi, mu njiwu pa misulu, mu njiwu ya kudi banyengianganyi ba bintu, mu njiwu ya kudi bantu ba tshisamba tshietu,+ mu njiwu ya kudi bantu ba bisamba bikuabu,+ mu njiwu mu tshimenga,+ mu njiwu mu tshipela, mu njiwu pa mbuu, mu njiwu munkatshi mua bana betu ba dishima, 27 mu mudimu mukole ne wa lutatu, mu dipangila tulu butuku misangu ne misangu,+ mu nzala ne nyota,+ mpangila biakudia misangu ya bungi,+ mu mashika ne dipangila bilamba.*

28 Pa kumbusha malu a pambelu au, kudi budi buntonda ku dituku ku dituku:* disamisha lungenyi bua bisumbu bionso.+ 29 Nnganyi udi mutekete tshiyi panyi mutekete? Nnganyi udi mulenduke meme tshiyi ngumvua tshiji?

30 Meme ne bua kuditumbisha, nenditumbishe bua malu adi aleja butekete buanyi. 31 Nzambi, Tatu wa Mukalenge Yezu, Yeye udibu ne bua kutumbisha bua kashidi, mmumanye ne: tshiena nshima to. 32 Ku Damaseke, nguvena wa mukalenge Aleta uvua mulame tshimenga tshia bena Damaseke bua kunkuata, 33 kadi bakampuekeshila mu tshisaka* pa dididishi divua ku tshimanu tshia tshimenga,+ meme kupanduka mu bianza biende.

12 Ndi ne bua kuditumbisha. Kabiena ne dikuatshisha to, kadi nengakule mpindieu bua bikena kumona bia dikema+ bia kudi Mukalenge ne malu adiye mumbuluile.+ 2 Ndi mumanye muntu kampanda mu buobumue ne Kristo (ni mmu mubidi ni ki mmu mubidi, tshiena mumanye; Nzambi mmumanye) uvua muambuibue too ne mu diulu disatu kukadi bidimu 14. 3 Eyowa, ndi mumanye muntu wa nunku (ni mmu mubidi, ni ki mmu mubidi, tshiena mumanye; Nzambi mmumanye) 4 uvua muambuibue too ne mu mparadizu, kumvuaye mêyi adibu kabayi mua kuakula ne adibu kabayi banyishile muntu bua kuamba. 5 Nenditumbishe bua muntu wa nunku, kadi tshiakuditumbisha bua bualu buanyi pa kumbusha bua matekete anyi. 6 Bualu nansha meme musue kuditumbisha, tshiakuikala mutshimbakane to, bualu nengikale ngamba bulelela. Kadi ndi ndikanda bua kuenza nunku, bua muntu nansha umue kampeshi lumu ludi lupite tshidiye umona kundi anyi umvua kundi 7 anu bualu mbambuluile malu a kukema aa.

Bua kumpangisha bua kudibandisha bikole, bakampesha dieba mu mubidi wanyi,+ muanjelu wa Satana, bua ikale untapa mapi,* bua tshimonyi mua kudibandisha bikole. 8 Ngakalomba Mukalenge misangu isatu bua bualu ebu, bua ne: diumbuke kundi. 9 Kadi wakangambila ne: “Ngasa wanyi mmukukumbane, bualu bukole buanyi budi buenda buvuijibua bupuangane mu butekete.”+ Nunku nenditumbishe ne disanka dionso bua matekete anyi, bua bukole bua Kristo bushale pa mutu panyi bu ntenta. 10 Nunku ndi nsankila mu matekete, mu bipendu, mu bikondo bia dipangila bintu, mu dikengeshibua ne mu ntatu, bua bualu bua Kristo. Bualu pandi ne butekete ke pandi ne bukole.+

11 Ndi mulue mutshimbakane. Nudi bansake bua kuenza nunku, bualu nuenu ke bavua ne bua kunganyisha. Tshivua mudileje mu bualu nansha bumue muikale kuinshi kua bapostolo benu bapite bunene, nansha mundi muntu tshianana.+ 12 Bulelela, bimanyinu bia bupostolo bivua bienjibue munkatshi muenu ne dinanukila dikole,+ ne ku diambuluisha dia bimanyinu ne malu a kukema* ne midimu ya bukole.+ 13 Bualu nku tshinyi kunuvua bashadile ku bisumbu bikuabu? Anu bualu meme muine tshivua mulue bujitu kunudi anyi?+ Mfuilayi koku luse bua tshilema etshi.

14 Monayi! Eu mmusangu muisatu undi mudilongolole bua kulua kunudi, ne tshiakuikala bujitu kunudi to. Bualu tshiena nkeba bintu binudi nabi,+ kadi ndi nnukeba nuenu bine; bualu ki mbana+ badi ne bua kulamina baledi babu bintu, kadi baledi ke badi ne bua kulamina bana babu bintu. 15 Buanyi meme, nensanke bikole bua kufila bintu bianyi bionso ne bua kufidibua meme mujima bua bualu buenu.*+ Bingikala meme mununange bikole menemene, meme ke unudi ne bua kunanga kakese anyi? 16 Nansha biobi bikale nanku, tshivua munutekele bujitu to.+ Nansha nanku, nudi nuamba ne: Mvua “muena budimu” ne mvua munukuate mu “mayele.” 17 Mvuaku mudie bintu bienu ku butuangaji bua bantu bamvua munutumine anyi? 18 Mvua musengelele Tito ne mumutume ne bana betu. Tito uvuaku mudie bintu bienu musangu nansha umue anyi?+ Katuvua bende mu lungenyi lua muomumue anyi? Katuvua balonde mu makasa amue amue au anyi?

19 Nuvua nuela meji dîba dionso edi ne: tuvua tukeba kudibingisha kunudi anyi? Tudi tuakula kumpala kua Nzambi mu buobumue ne Kristo. Kadi bana betu bananga, malu onso atudi tuenza mbua kunukolesha. 20 Ndi ntshina ne: mu mushindu kampanda anyi kansanga pandi mfika, tshinusanganyi bu mundi tshiyi musue ne tshikadi bu munudi nuenu kanuyi basue, kadi mufuane kusangana matandu, mukawu, biji bikole, matapuluka, bijanu bibi, manunganyi,* nudiuwuja ne lutambishi, ne bimvundu. 21 Pamuapa pandi ndua kabidi, Nzambi wanyi udi mua kumpuekesha milongo kumpala kuenu, ne ndi mufuane kulua kudila bua bantu ba bungi bavua benze mpekatu kale kabayi banyingalale bua dipanga diabu dia bukezuke, bua malu abu a masandi* ne bua tshikadilu tshia dikamakama* bivuabu nabi.

13 Eu mmusangu muisatu undi ndua kunudi. “Tshilumbu tshionso tshidi ne bua kujadikibua ku bujadiki* bua bantemu babidi anyi basatu.”+ 2 Nansha mundi tshiyiku mpindieu, mbienze anu bu ne: mvuaku bua musangu muibidi, ne ndi ndianjila kudimuija bantu bavua benze mpekatu kumpala ne bakuabu bonso ne: meme mua kulua kabidi tshiakubengeleka to, 3 bualu nudi nukeba tshijadiki tshia ne: Kristo udi kayi mutekete kunudi kadi muikale ne bukole munkatshi muenu, udi bushuwa wakuila mukana muanyi. 4 Bualu bavua bamushipele bulelela ku mutshi bua butekete, kadi udi ne muoyo bua bukole bua Nzambi.+ Bulelela, tuetu petu tudi batekete pamue nende, kadi netuikale ne muoyo pamue nende+ bua bukole bua Nzambi kunudi.+

5 Tungunukayi ne kuditeta bua kumanya ni nudi mu ditabuja; tungunukayi ne kupima tshinudi nuenu bine.+ Peshi kanuena bamanye ne: Yezu Kristo udi nenu mu buobumue anyi? Udi nenu mu buobumue binuikala kanuyi babengibue. 6 Ndi mutekemene ne muoyo mujima ne: nenujingulule ne: katuena babengibue to.

7 Mpindieu tudi tulomba Nzambi bua kanuenji bualu bubi, ki mbua tuetu tumueneke banyishibue, kadi mbua nuenu nuenze malu mimpe, nansha tuetu mua kumueneka bu babengibue. 8 Bualu katuena mua kuenza bualu nansha bumue bua kuluisha bulelela, kadi anu bua kukuatshisha bulelela. 9 Bushuwa, tudi tusanka misangu yonso itudi batekete kadi nuenu bikale bakole. Tudi tusambila bua bualu ebu: bua nupingane mu njila. 10 Ke bualu kayi ndi mfunda malu aa pandi tshiyiku, bua pangikalaku tshikadi ne dîsu dikole pandi ngenza mudimu ne bukokeshi buvua Mukalenge mumpeshe,+ bua kukoleshangana kadi ki mbua kutekeshangana to.

11 Ndekelu wa bionso, bana betu, tungunukayi ne kusanka, ne kupingajibua mu njila, ne kusambibua,+ ne kuikala ne lungenyi lumue,+ ne kuikala mu ditalala;+ nunku Nzambi wa dinanga ne ditalala+ neikale nenu. 12 Elanganayi muoyo ne dituangana dia mishiku dia tshijila. 13 Bansantu bonso badi banuela muoyo.

14 Ngasa wa Mukalenge Yezu Kristo ne dinanga dia Nzambi ne nyuma muimpe* utudi tupeta tuetu bonso bikale nenu bonso.