MUKANDA MUTUMINA BENA EFESO

1 Meme Paulo, mupostolo wa Kristo Yezu ku disua dia Nzambi, kudi bansantu badi mu Efeso+ badi ne lulamatu mu buobumue ne Kristo Yezu:

2 Ngasa ne ditalala bia kudi Nzambi Tatu wetu ne Mukalenge Yezu Kristo bikale nenu.

3 Nzambi, Tatu wa Mukalenge wetu Yezu Kristo, atumbishibue bualu mmutubeneshe ne mabenesha onso a mu nyuma mu miaba ya mu diulu mu buobumue ne Kristo,+ 4 bu muvuaye mutusungule bua tuetu kuikala mu buobumue nende* kumpala kua mbangilu wa ba pa buloba, bua tuikale ba tshijila, katuyi kalema+ kumpala kuende mu dinanga. 5 Bualu wakadianjila kutusungula+ bua kutuangata bu bana bende+ ku butuangaji bua Yezu Kristo, bilondeshile muvuabi bimusankishe ne bilondeshile disua diende,+ 6 bua kumutumbisha bua ngasa wende+ wa butumbi udiye mutupeshe ne bulenga buonso ku butuangaji bua muntu udiye munange.+ 7 Ku diambuluisha diende tudi tupikudibua ku butuangaji bua tshia kupikulangana natshi ku mashi a muntu au,+ eyowa, dibuikidibua dia bilema bietu+ bilondeshile bubanji bua ngasa wende.

8 Wakatuvudijila ngasa eu mu meji onso ne dijingulula dia malu* dionso 9 pa kutumanyisha bualu busokoka bua tshijila+ bua disua diende. Wakalongolola anu bu muvuabi bimusankisha 10 bua diludika dia malu* ku ndekelu menemene kua bikondo bisungula, bua kusangisha bintu bionso mu Kristo, bintu bidi mu diulu ne bintu bidi pa buloba.+ Eyowa, mu yeye 11 utudi nende mu buobumue ne uvuabu batusungule nende bu bapianyi+ bu muvuabu badianjile kutusungula bilondeshile dilongolola dia yeye udi ukumbaja malu onso bu mudiye upangadija bilondeshile disua diende, 12 bua tuetu bavua batekemene mu Kristo ba kumpala tumanyishe butumbi buende. 13 Kadi nuenu penu nuakamutekemena panyima pa nuenu bamane kumvua dîyi dia bulelela, lumu luimpe lua lupandu luenu. Nuenu bamane kuitabuja, bavua banutue tshitampi+ ku butuangaji buende ne nyuma muimpe* uvuabu balaye 14 udi tshimanyinu tshidianjila kufila* tshia bumpianyi buetu,+ bua kumona mua kupikula bantu ba Nzambi+ ku diambuluisha dia tshia kupikulangana natshi,+ bua butumbi buende bunene.

15 Ke bualu kayi meme panyi, katshia ngumvua lumu lua ditabuja dinudi nadi mu Mukalenge Yezu ne dinanga dinudi nuleja bansantu bonso, 16 tshiena ndekela kuela Nzambi tuasakidila bua bualu buenu to. Ndi ntungunuka ne kunutela mu masambila anyi 17 bua Nzambi wa Mukalenge wetu Yezu Kristo, Tatu wa butumbi, anupeshe nyuma wa meji ne wa dibuluibua mu dimumanya mu mushindu mujalame.+ 18 Mmutokeshe mêsu a muoyo wenu bua numanye ditekemena divuaye munubikidile, bua numanye bubanji bua butumbi budiye mulame bu bumpianyi bua bansantu,+ 19 ne bua numanye mudi bunene bua bukole buende bua dikema buikale kutudi tuetu bena kuitabuja.+ Mmuenze nunku bilondeshile malu adi bukole buende bunene buenza, 20 bukole buvuaye muleje bua Kristo pavuaye mumujule ku lufu ne mumusombeshe ku tshianza tshiende tshia balume+ mu miaba ya mu diulu, 21 ku mutu menemene kua mbulamatadi yonso ne bukokeshi buonso ne bukole buonso ne bumfumu buonso ne dîna dionso didibu batela,+ kabiyi anu mu ndongoluelu wa malu eu,* kadi kabidi ne mu udi ulua. 22 Wakateka kabidi bintu bionso muinshi mua makasa ende+ ne kumutekaye ku mutu kua malu onso adi atangila tshisumbu+ 23 tshidi mubidi wende,+ tshiuwidi tshiende yeye udi uwuja bintu bionso tente mu bionso.

2 Bualu bukuabu, Nzambi wakanuvuija ne muoyo nansha munuvua bafue mu bilema bienu ne mu mpekatu yenu,+ 2 munuvua kumpala nuendela bilondeshile ndongoluelu wa malu* wa bukua panu ebu,+ bilondeshile mukalenge wa bukokeshi bua kapepe,+ nyuma+ udi munkatshi mua dienza malu mu bana ba dibenga kutumikila. 3 Eyowa, kumpala tuetu bonso tuvua munkatshi muabu tuenza malu mu diumvuangana ne majinga a mubidi wetu,+ tukumbaja majinga a mubidi ne a ngenyi yetu,+ ne tuvua katshia ku tshilelelu bana ba tshiji+ anu bu mudi bakuabu bonso. 4 Kadi bu mudi Nzambi mubanji mu luse,+ bua dinanga diende dikole divuaye mutunange nadi,+ 5 wakatuvuija ne muoyo pamue ne Kristo nansha patuvua bafue mu bilema bietu;+ nudi bapandishibue ku ngasa. 6 Bualu bukuabu, wakatujula pamue, ne kutusombeshaye pamue mu miaba ya mu diulu mu buobumue ne Kristo Yezu,+ 7 bua mu ndongoluelu ya malu idi ilua* aleje bubanji bua dikema bua ngasa wende mu bulenga* buende kutudi mu buobumue ne Kristo Yezu.

8 Bua ngasa eu, nudi bapandishibue ku diambuluisha dia ditabuja;+ bualu ebu kabuena buenzeka ku bukole buenu; kadi ndipa dia Nzambi. 9 Tòo, lupandu elu kaluena lufumina ku bienzedi,+ bua muntu nansha umue kapetedi pa kuditumbishila. 10 Tudi mudimu wa bianza wa Nzambi* ne tuvua bafukibue+ mu buobumue ne Kristo Yezu+ bua midimu mimpe ivua Nzambi mudianjile kulongolola bua tuetu kukumbaja.

11 Nunku vulukayi ne: kumpala, nuenu bantu bavua baledibue mu bisamba bikuabu, nuvua bantu bavuabu babikila ne: “dibenga kutengudibua” kudi bavuabu babikila ne: “ditengudibua” didibu benza mu mubidi ku bianza bia bantu. 12 Tshikondo atshi kanuvua ne Kristo to, nuvua kule ne ditunga dia Isalele, benyi ku bipungidi bia mulayi;+ kanuvua ne ditekemena ne kanuvua ne Nzambi panu apa.+ 13 Kadi mpindieu mu buobumue ne Kristo Yezu, nuenu bavua kumpala kule menemene nudi basemene pabuipi ku diambuluisha dia mashi a Kristo. 14 Bualu udi ditalala dietu,+ yeye uvua muvuije bisumbu bibidi bilue tshimue+ ne mubumbule tshimanu tshivua pankatshi tshivua tshibikosolole.+ 15 Ku diambuluisha dia mubidi wende wakumbusha lukuna, Mikenji ivua ne mêyi menza ne mapangadika, bua kuvuija bisumbu bibidi abi muntu umue mupiamupia mu buobumue nende,+ bua kufila ditalala, 16 ne bua kulengejija bisumbu bionso bibidi bia bantu ebi ne Nzambi bikole menemene mu mubidi umue ku diambuluisha dia mutshi wa makenga,*+ bualu uvua mujimije lukuna+ ku butuangaji buende yeye nkayende. 17 Wakalua, kunuambilaye lumu luimpe lua ditalala nuenu bavua kule menemene, ne kumanyishaye ditalala kudi bavua pabuipi, 18 bualu ku butuangaji buende, tuetu, bisumbu bionso bibidi bia bantu, tudi ne budikadidi bua kuya kudi Tatu ku diambuluisha dia nyuma umue.

19 Nunku kanutshiena kabidi benyi ne bantu ba ku babende to,+ kadi nukadi bena tshimenga tshimue+ ne bansantu ne nukadi ba mu nzubu wa Nzambi,+ 20 ne nudi bibakibue pa tshishimikidi tshia bapostolo ne baprofete,+ padi Kristo Yezu nkayende muikale dibue dia mu ditumba dia tshishimikidi.+ 21 Mu buobumue nende, nzubu mujima mukuatakaja bimpe pamue+ udi wenda ubanda bua kulua ntempelo wa tshijila bua Yehowa.*+ 22 Mu buobumue nende, nuenu penu nudi nuenda nuibakibua pamue bua kuikala muaba wa Nzambi kusomba ku butuangaji bua nyuma.+

3 Bua bualu ebu, meme Paulo muena buloko+ wa Kristo Yezu bua bualu buenu, nuenu bantu ba bisamba bikuabu, 2 binuikala bushuwa nuvua bumvue bua mudimu wa dilama+ ngasa wa Nzambi uvuabu bampeshe bua bualu buenu 3 ne: ku diambuluisha dia dibuluibua, bakammanyisha bualu busokoka bua tshijila anu munkavua mufunde mu mêyi makese. 4 Nunku panudi nubala bualu ebu, nudi mua kujingulula dimanya dianyi dia bualu busokoka+ bua tshijila bua Kristo. 5 Mu bipungu bikuabu, kabavua bamanyishe bana ba bantu bualu busokoka ebu bu mudibu babubuluile bapostolo ba tshijila ne baprofete mpindieu ku diambuluisha dia nyuma,+ 6 mbuena kuamba ne: bantu ba bisamba bikuabu badi ne bua kuikala bapianyi pamue netu, ne kuikala bitupa bia mubidi umue netu+ ne bangatshi ba mulayi pamue netu, mu buobumue ne Kristo Yezu ne ku diambuluisha dia lumu luimpe. 7 Ngakalua muena mudimu wa bualu ebu bilondeshile dipa difila tshianana dia ngasa wa Nzambi uvuabu bampeshe ku butuangaji bua malu adi bukole buende buenza.+

8 Bakampesha ngasa eu,+ meme muntu udi mushadile too ne kudi mutambe bukese wa ku bansantu bonso,+ bua ngambile bisamba bikuabu lumu luimpe lua bubanji bua Kristo budibu kabayi mua kujingulula 9 ne bua meme kufikisha muntu yonso ku dimona diludika dia bualu busokoka bua tshijila+ budibu basokoke munkatshi mua bikondo bia bungi mu Nzambi uvua mufuke bintu bionso. 10 Biakenzeka nanku bua mpindieu, ku diambuluisha dia tshisumbu,+ bamanyishe mbulamatadi ne makokeshi bidi miaba ya mu diulu mishindu ya bungi mishilashilangane ya meji a Nzambi.+ 11 Mbienzeke nunku bilondeshile bualu bua tshiendelele buvuaye mulongolole mu diumvuangana ne Kristo+ Yezu Mukalenge wetu; 12 ku butuangaji buende tudi tuakula ne dikima mushindu eu ne tudi ne budikadidi bua kusemena pabuipi+ bikale ne dishindika ku diambuluisha dia ditabuja ditudi nadi kudiye. 13 Nunku ndi nnulomba bua kanuteketshi bua makenga andi nkenga bua bualu buenu, bualu adi umvuija butumbi buenu nuenu.+

14 Bua bualu ebu ndi ntua binu bianyi panshi kumpala kua Tatu 15 udi dîku dionso mu diulu ne pa buloba dipetele dîna kudiye. 16 Ndi ndomba bua anuanyishile ku diambuluisha dia butumbi buende bua bungi bua nuvuijibue bakole mu muntu unudi munda,+ ne bukole ku diambuluisha dia nyuma wende, 17 ne bua ku diambuluisha dia ditabuja dienu, Kristo asombe mu mioyo yenu ne dinanga.+ Elayi miji+ pa tshishimikidi ne nushindamapu,+ 18 bua nuenu ne bansantu bonso nuikale bakumbane menemene bua kujingulula bimpe menemene tshidi butshiama ne bule ne butumbuke ne buondoke, 19 ne bua kumanya dinanga dia Kristo+ didi dipite dimanya, bua nuwujibue ne tshiuwidi tshionso tshidi Nzambi ufila.

20 Mpindieu kudi yeye udi mua kuenza bivule bipitshidile kule ne kule malu onso atudi tulomba anyi tuelela meji,+ bilondeshile bukole buende budi buenza mudimu munda muetu,+ 21 butumbi buikale kudiye ku butuangaji bua tshisumbu ne ku butuangaji bua Kristo Yezu bua bipungu bionso kashidi ne tshiendelele. Amen.

4 Ke bualu kayi, meme muena buloko+ mu Mukalenge, ndi nnusengelela bua kuenda biakanangane+ ne dibikila divuabu banubikile 2 ne didipuekesha* dionso+ ne bupole buonso, ne lutulu,+ nulejangana muoyo mule mu dinanga,+ 3 nudienzeja ne muoyo umue bua kulama buobumue bua nyuma mu tshisuikidi tshia buobumue tshia ditalala.+ 4 Kudi mubidi umue+ ne nyuma umue,+ anu bu munuvua babikidibue mu ditekemena dimue+ dia dibikidibua dienu; 5 Mukalenge umue,+ ditabuja dimue, dibatiza dimue; 6 Nzambi umue ne Tatu wa bonso udi ku mutu kua bonso, wenzeja malu ku butuangaji bua bonso ne mu bonso.

7 Mpindieu bakapesha muntu yonso wa kutudi ngasa bilondeshile muvua Kristo mupime dipa didi difidibua tshianana.+ 8 Bualu badi bamba ne: “Pakabandaye muulu wakaya ne bakuatshibue; wakafila mapa mikale bantu.”+ 9 Mpindieu dîyi edi dia ne: “wakabanda” didi diumvuija tshinyi? Didi diumvuija ne: uvua mupueke kabidi miaba ya muinshi, mmumue ne: pa buloba. 10 Yeye muine uvua mupueke ke uvua kabidi mubande muulu+ mupite diulu dionso,+ bua apeshe bintu bionso tshiuwidi tshiabi.

11 Wakafila bamue bu bapostolo,+ bakuabu bu baprofete,+ banga bu bambi,*+ bakuabu bu balami ne balongeshi,+ 12 bua kupingaja bansantu mu njila,* bua mudimu wa kuambuluisha bakuabu, bua kuibaka mubidi wa Kristo,+ 13 too ne patudi tufika ku dikala tshintu tshimue* bua ditabuja ne bua dimanya dijalame dia Muana wa Nzambi, ku dikala muntu mukole,*+ tufika ku tshipiminu tshia dikola tshia tshiuwidi tshia Kristo. 14 Nunku katuikadi kabidi bana batekete, batukupakaja eku ne eku anu bu bakupakaja kudi mavuala ne baya netu eku ne eku kudi lupepele luonso lua dilongesha+ ku dishimakajangana dia bantu, ku budimu mu mayele adi ashimangana. 15 Kadi patudi eku tuamba bulelela, mu dinanga, tukolayi mu malu onso munda mua yeye udi ku mutu, Kristo.+ 16 Kudiye, mbalamakaje mubidi wonso+ pamue bimpe ne mmuenza bua wikale ukuatshishangana ku diambuluisha dia dinungu dionso didi difila tshidi tshikengedibua. Padi tshitupa tshionso tshienza mudimu watshi bimpe, bidi biambuluisha mubidi bua kukolawu padiwu udibaka nkayawu mu dinanga.+

17 Nunku ndi ngamba njadika mu Mukalenge ne: kanuena ne bua kutungunuka kabidi ne kuenda bu mudi bantu ba bisamba bikuabu benda+ mu meji abu a patupu.*+ 18 Meji abu adi mu mîdima, ne badi kule ne muoyo wa kudi Nzambi bua dipanga didi munda muabu, bua mioyo yabu mipape.* 19 Bu muvuabu bajimije bikadilu bimpe bionso, bavua badifile ku tshikadilu tshia dikamakama*+ bua kuenza malu a bukoya bua mishindu yonso ne lukuka luonso.

20 Kadi nuenu kanuvua balonge ne: Kristo udi nunku, 21 binuikala bushuwa nuvua bamuteleje ne balongeshibue ku butuangaji buende, anu mudi bulelela buikale mu Yezu. 22 Bavua banulongeshe bua kuvula bumuntu bua kale+ budi bupetangana ne bikadilu bienu bia kale ne budi buenda bunyanguka bilondeshile majinga abu adi ashimangana.+ 23 Nudi ne bua kutungunuka ne kuvuijibua bapiabapia mu ngelelu wa meji udi ulombola meji enu,*+ 24 ne nudi ne bua kuvuala bumuntu bupiabupia+ buvua bufukibue bilondeshile disua dia Nzambi mu buakane ne lulamatu bia bushuwa.

25 Ke bualu kayi, mpindieu unukadi balekele dishima, yonso wa kunudi ambile mukuende bulelela,+ bualu tudi bitupa bia mubidi bidi bilamakanangane tshimue ne tshikuabu.+ 26 Ikalayi ne tshiji, kadi kanuenji mpekatu to;+ kanulekedi dîba dibuela nuenu bikale anu ne tshiji;+ 27 kanupeshi Diabolo mpunga.*+ 28 Muntu udi wiba kibi kabidi to; kadi enze mudimu bikole, wenza mudimu muimpe ne bianza biende,+ bua amone mua kuikala ne tshintu tshia kuabanyina muntu udi ukengela bintu.+ 29 Dîyi dibole kadipatuki mukana muenu,+ kadi anu dîyi dimpe didi mua kukolesha bakuabu padibi bikengela, bua dikuatshishe badi baditeleja.+ 30 Kabidi, kanunyingalaji* nyuma muimpe* wa Nzambi+ uvuabu banutue nende tshitampi+ bua dituku dia dipikudibua ku diambuluisha dia tshia kupikulangana natshi.+

31 Nulekele dilaminangana munda dibi dia mishindu yonso,+ tshiji, bumfiika munda, dielelangana mbila, bipendu+ ne malu a mishindu yonso adi enzelangana bibi.+ 32 Kadi nuikale nuenzelangana malu ne muoyo mulenga, nuditeka pa muaba wa bakuabu ne luse luonso,+ nubuikidilangana ne muoyo mujima anu muvua Nzambi pende munubuikidile ne muoyo mujima+ ku butuangaji bua Kristo.

5 Ke bualu kayi, nulue bidikiji ba Nzambi+ bu bana bende bananga, 2 ne nutungunuke ne kuenda mu dinanga+ anu bu muvua Kristo pende mutunange*+ ne mudifile bua bualu buetu* bu dipa ne bu mulambu, bidi dipembu dimpe kudi Nzambi.+

3 Masandi* ne malu a bukoya a mishindu yonso anyi lukuka kabitedibu nansha munkatshi muenu,+ anu bu mudibi bikumbanyine bansantu;+ 4 nansha bikadilu bia bundu anyi biakulakula bia patupu anyi mineku ya busenji,+ (malu adi kaayi makumbane) kadi pamutu pa nanku ikalayi nusakidila Nzambi.+ 5 Bualu nudi bamanye bualu ebu, babujingulule bimpe nuenu nkayenu ne: kakuena muena masandi*+ anyi muntu udi mukoya anyi muena lukuka,+ mmumue ne: kuikala mutendeledi wa mpingu, udi ne bumpianyi mu Bukalenge bua Kristo ne bua Nzambi to.+

6 Muntu nansha umue kanushimi ne mêyi a patupu, bualu tshiji tshia Nzambi tshidi tshilua kudi bana ba dibenga kutumikila bua malu a nunku. 7 Ke bualu kayi kanubuelakanyanganyi nabu to; 8 bualu kumpala nuvua mîdima, kadi mpindieu nudi butoke+ mu diumvuangana ne Mukalenge.+ Tungunukayi ne kuenda bu bana ba butoke, 9 bualu dimuma dia butoke ndienza ne buimpe ne buakane ne bulelela+ bia mishindu yonso. 10 Tungunukayi ne kukeba bua kumanya malu adi Mukalenge wanyisha;+ 11 ne lekelayi kubuelakana mu bienzedi bia mîdima bidi kabiyi ne mushinga;+ kadi nubiele patoke bua kuleja tshidibi. 12 Bualu malu adibu benza mu musokoko adi enza too ne bundu bua kuamba. 13 Mpindieu malu onso adibu bela patoke* adi amueneka patoke ku diambuluisha dia butoke, bualu malu onso adibu baleja patoke mbutoke. 14 Ke bualu kayi badi bamba ne: “Wewe udi mulale tulu, tabala, juka ku lufu,+ ne Kristo neakukenkeshe.”+

15 Nunku ikalayi badimuke bikole bua mushindu unudi nuenda kawikadi bu wa bantu badi kabayi ne meji, kadi wikale bu wa bena meji, 16 nuenza malu bimpe bitambe ne dîba dienu,*+ bualu matuku mmabi. 17 Bua bualu ebu, lekelayi kuikala bu bantu badi kabayi ne meji, kadi tungunukayi ne kujingulula tshidi disua dia Yehowa.*+ 18 Kabidi, kanukuatshiki mvinyo to,+ bualu bidi bifikisha ku buenzavi,* kadi tungunukayi ne kuwujibua ne nyuma. 19 Nuyukidilangane* ne misambu, misambu ya kutumbisha nayi Nzambi, ne misambu ya mu nyuma, nuimbila+ Yehowa* tshiapamue ne mijiki+ mu mioyo yenu,+ 20 nuela Nzambi wetu ne Tatu wetu tuasakidila misangu yonso+ bua malu onso mu dîna dia Mukalenge wetu Yezu Kristo.+

21 Nukokelangane+ mu ditshina dia Kristo. 22 Bakaji bakokele babayabu+ bu mudibu bakokela Mukalenge, 23 bualu mulume udi ku mutu kua mukajende+ anu bu mudi Kristo ku mutu kua tshisumbu,+ bu mudiye musungidi wa mubidi eu. 24 Mu bulelela, anu bu mudi tshisumbu tshikokela Kristo, bakaji badi pabu ne bua kukokela babayabu mu malu onso. 25 Nuenu balume, tungunukayi ne kunanga bakaji benu,+ anu bu muvua Kristo pende munange tshisumbu ne mudifile bua bualu buatshi,+ 26 bua atshivuije tshia tshijila, utshitokesha utshisukula ne mâyi ku diambuluisha dia dîyi,+ 27 bua alue ne tshisumbu kudiye yeye muine mu butumbi buatshi, katshiyi ne katoba anyi munyengu anyi tshintu tshikuabu tshia mushindu eu,+ kadi tshikale tshia tshijila, katshiyi kalema.+

28 Mu mushindu wa muomumue balume badi ne bua kunanga bakaji babu bu mibidi yabu bobu bine. Muntu udi munange mukajende mmudinange yeye muine, 29 bualu kakuena muntu ukadiku mukine mubidi* wende, kadi udi uwudisha, uwunanga, anu bu mudi Kristo wenzela tshisumbu, 30 bualu tudi bitupa bia mubidi wende.+ 31 “Bua bualu ebu mulume neashiye tatuende ne mamuende, nealamate* mukajende, ne bubidi buabu nebikale mubidi umue.”+ 32 Bualu busokoka bua tshijila ebu+ mbunene. Mpindieu ndi ngakula malu adi atangila Kristo ne tshisumbu.+ 33 Nansha nanku, yonso wa kunudi udi ne bua kunanga mukajende+ bu mudiye mudinange; mukaji pende udi ne bua kuikala ne kanemu kakole kudi bayende.+

6 Nuenu bana, tumikilayi baledi benu+ mu buobumue ne Mukalenge, bualu kuenza nunku nkuakane. 2 “Nemeka tatuebe ne mamuebe”+ ke dîyi dia kumpala didi ne mulayi: 3 “Bua malu ebe ende bimpe* ne bua ulale matuku a bungi pa buloba.” 4 Nuenu batatu, kanuikadi nufiikisha bana benu munda,+ kadi tungunukayi ne kubakolesha ne mibelu+ ne didimuija* bia Yehowa.*+

5 Nuenu bapika, tumikilayi bamfumu benu ba ku mubidi*+ ne ditshina ne dizakala, nuenza nunku ne muoyo mujima anu bu badi batumikila Kristo, 6 ki nganu padibu banutangila, bua kusankisha bantu,*+ kadi bu bapika ba Kristo, nuenza disua dia Nzambi ne anyima wenu yonso.*+ 7 Enzayi mudimu wenu wa bupika ne meji mimpe bu badi bawenzela Yehowa,*+ kabiyi bu badi bawenzela bantu, 8 bualu nudi bamanye ne: bualu buimpe buonso budi muntu wenza, Yehowa* neamufute bua bualu abu,+ nansha yeye mupika anyi mudikadile. 9 Nuenu penu bamfumu, tungunukayi ne kubenzela malu mu mushindu wa muomumue, kanuyi nubakanyina, bualu nudi bamanye ne: Mfumu wenu nuenu bonso udi mu diulu,+ ne kena ne kansungansunga to.

10 Ndekelu wa bionso, tungunukayi ne kupeta bukole+ mu Mukalenge ne mu bukole bua makanda ende. 11 Vualayi bia mvita bionso+ bia kudi Nzambi bua numone mua kukandamena bienzedi bia budimu* bia Diabolo; 12 bualu katuena tuluangana*+ ne mashi ne mubidi, kadi tudi tuluangana ne mbulamatadi ne bakokeshi ne bamfumu ba panu ba mu mîdima eyi, ne bisumbu bia nyuma mibi+ bidi mu miaba ya mu diulu. 13 Bua bualu ebu, ambulayi bia mvita bionso bia kudi Nzambi,+ bua nuikale bakumbane bua kukandamana mu dituku dibi ne bua kushindama, nuenu bamane kuenza malu onso.

14 Nunku ikalayi bashindame ne mukaba wa bulelela musuika mu bimono bienu,+ bavuale tshibuikilu tshia pa tshiadi tshia buakane,+ 15 ne bavuale bisabata ku makasa bua kuikala badilongolole bua kuamba lumu luimpe lua ditalala.+ 16 Kusakidila ku bionso ebi, nuambule ngabu munene wa ditabuja+ unuikala mua kujima nende mikete* yonso ya kapia ya mubi.+ 17 Kabidi, nuitabe bua kuangata tshifulu tshia lupandu,+ ne muele wa mvita wa nyuma, mbuena kuamba ne: dîyi dia Nzambi,+ 18 eku nutungunuka ne kusambila dîba dionso mu nyuma+ ne masambila+ ne disengelela bia mishindu yonso. Bua bualu abu, nushale batabale, nusengelela bua bansantu bonso misangu yonso. 19 Nusambile kabidi bua bualu buanyi, bua bampeshe mêyi pandi mbulula mukana muanyi, bua mmone mua kuakula ne dikima mu dimanyisha bualu busokoka bua tshijila bua lumu luimpe+ 20 lundi muikale muleji mpala+ walu mu nkanu, ne bua mmone mua kuakula bua bualu bualu ne dikima, anu bu mundi ne bua kuakula.

21 Mpindieu muanetu munangibue Tukiko,+ muena mudimu wa lulamatu mu Mukalenge, neanumanyishe malu onso bua nuenu penu numanye malu anyi ne mushindu undi.+ 22 Ndi mmutuma kunudi bua bualu ebu menemene, bua numanye mutudi ne bua akoleshe mioyo yenu.

23 Ditalala ne dinanga pamue ne ditabuja bia kudi Nzambi Tatu ne Mukalenge Yezu Kristo bikale ne bana betu. 24 Ngasa ikale ne bantu bonso badi banange Mukalenge wetu Yezu Kristo ne dinanga didi kadiyi mua kujika.