MUKANDA MUTUMINA BENA FILIPOYI

1 Meme Paulo ne Timote, bapika ba Kristo Yezu, kudi bansantu bonso ba ku Filipoyi+ badi mu buobumue ne Kristo Yezu, pamue ne batangidi ne basadidi ba mudimu:+

2 Ngasa ne ditalala bia kudi Nzambi Tatu wetu ne Mukalenge Yezu Kristo bikale nenu.

3 Ndi ngela Nzambi wanyi tuasakidila misangu yonso indi nnuvuluka 4 mu disengelela dianyi dionso buenu nuenu bonso. Ndi nsengelela misangu yonso ne disanka+ 5 bua dikuatshisha dienu dia* lumu luimpe katshia ku dituku dia kumpala too ne mpindieu. 6 Bualu ndi mushindike bualu ebu ne: yeye uvua mutuadije mudimu muimpe munkatshi muenu neaye nawu too ne ku ndekelu,+ too ne ku dituku dia Kristo Yezu.+ 7 Bidi anu bimpe bua ngele meji nunku buenu nuenu bonso, bualu ndi nenu mu muoyo wanyi, nuenu badi babanyanganyi nanyi ba ngasa mu nkanu yanyi+ ne mu diakuila dia lumu luimpe ne mu dilujadika kumpala kua bakokeshi.+

8 Bualu Nzambi udi ntemu wa mundi nnujinga nuenu bonso ne muoyo mujima ne dinanga dikole dia buena didi nadi Kristo Yezu. 9 Ndi ntungunuka ne kusambila bua bualu ebu: bua dinanga dienu ditungunuke ne kuvulangana kabidi bikole menemene+ pamue ne dimanya dijalame+ ne dijingulula dionso dia malu;+ 10 bua nuenu nukebe mua kumanya malu adi ne mushinga wa bungi,+ bua nuikale kanuyi kalema ne kanuyi nulenduisha bakuabu+ too ne ku dituku dia Kristo; 11 ne bua nuwujibue ne dimuma dia buakane didi diluila kudi Yezu Kristo+ bua lumu ne butumbi bia Nzambi.

12 Mpindieu bana betu, ndi musue numanye ne: malu anyi mmende bimpe bua kutantshisha lumu luimpe, 13 bienze bua ne: nkanu yanyi+ bua bualu bua Kristo imanyike patoke+ munkatshi mua basalayi balami ba mukalenge wa bena Lomo bonso ne kudi bantu bakuabu bonso. 14 Mpindieu bana betu ba bungi mu Mukalenge mbapete muoyo mukole bua nkanu yanyi ne badi baleja dikima dia bungi bua kuakula bua dîyi dia Nzambi kabayi batshina.

15 Bulelela, bamue badi bayisha Kristo bua lukuka ne ditembangana, kadi bakuabu pabu ne meji mimpe. 16 Badi ne meji mimpe badi bamanyisha Kristo bua dinanga, bualu mbamanye ne: mbanteke bua kuakuila lumu luimpe;+ 17 kadi bakuabu abu badi benza nanku bua dikokangana, kabayi ne meji mimpe, bualu mbasue kunkebela ntatu mu nkanu yanyi. 18 Ntshipeta kayi tshidiku? Mu mishindu yonso, nansha biobi bikale mu lubombo anyi mu bulelela, badi bamanyisha anu bualu bua Kristo, ne ndi nsanka bua bualu ebu. Bushuwa, nentungunuke ne kusanka kabidi, 19 bualu ndi mumanye ne: bualu ebu nebumfikishe ku lupandu ku diambuluisha dia disengelela+ dienu ne dikuatshisha dia nyuma wa Yezu Kristo.+ 20 Bualu ebu budi mu diumvuangana ne dindila dianyi ne muoyo mujima ne ditekemena dia ne: tshiakufuishibua bundu mu bualu nansha bumue to, kadi ku diakula ne dikima dionso, Kristo neatumbishibue mpindieu ku diambuluisha dia mubidi wanyi, anu bu muvuabi bienzeka kumpala misangu yonso, nansha kupitshila ku muoyo anyi ku lufu.+

21 Bualu, buanyi meme, kuikala ne muoyo n’Kristo+ ne kufua ndiakalenga.+ 22 Mpindieu meme ne bua kutungunuka ne kuikala ne muoyo mu mubidi, ntshipeta tshia mudimu wanyi; kadi bualu bundi mua kusungula, tshiena mbumanyisha to. 23 Ndi ngelakana pankatshi pa malu abidi aa, bualu ndi njinga kusuludibua ne kuikala ne Kristo;+ kakuyi mpata ke bualu budi butambe buimpe.+ 24 Kadi bidi ne mushinga wa bungi bua meme kushala mu mubidi bua bualu buenu. 25 Nunku, bu mundi ne dishindika edi, ndi mumanye ne: nenshale nenu bonso ne nengikale nenu bua nuenu kuya kumpala ne bua disanka dienu mu ditabuja, 26 bua disanka dienu divulangane bikole mu Kristo Yezu bua bualu buanyi pangikala kabidi nenu.

27 Kadi nuenze malu* mu mushindu udi muakanangane ne lumu luimpe lua Kristo,+ bua nansha meme mulue bua kunumona anyi tshiyi mulue,* ngumvue lumu luenu bua meme kumanya ne: nudi bashindame mu lungenyi lumue, nuditatshisha pamue ne anyima umue*+ bua ditabuja dia lumu luimpe, 28 ne kanuyi nutshina baluishi benu mu bualu nansha bumue. Bualu ebu mene budi tshijadiki tshia dibutuka+ diabu, kadi tshia lupandu luenu;+ ne bualu ebu budi bufumina kudi Nzambi. 29 Bualu mbanupeshe diakalenga bua bualu bua Kristo, kabiyi anu bua kumuitabuja, kadi kabidi bua kukenga bua bualu buende.+ 30 Bualu nudi nuluangana mvita inuvua bammone nduangana panyi,+ inudi numvua mpindieu ne: ntshidi nduangana.

2 Nunku bikalaku dikankamija kayi dionso mu Kristo, bikalaku busambi bua dinanga kayi buonso, bikalaku buwetu bua mu nyuma kayi buonso,* bikalaku dinanga dikole ne diumvuilangana luse kayi dionso, 2 nuenze bua disanka dianyi divulangane pa kuikala ne meji amue ne kuikala ne dinanga dia muomumue, kuikala mu buobumue mu bionso,* kuikala ne meji amue.+ 3 Kanuenji bualu nansha bumue ne lungenyi lua dikokangana+ anyi lua kudimona bapite bakuabu,+ kadi ne didipuekesha,* numone bakuabu bu banupite nuenu,+ 4 panudi kanuyi nutangila anu malu enu nkayenu,+ kadi nutangila kabidi malu a bakuabu.+

5 Nulame munda muenu meji a buena avua kabidi munda mua Kristo Yezu+ 6 uvua kayi nansha muele meji a kukeba bua kuikala mulongo umue ne Nzambi,+ nansha muvuaye mu tshimuenekelu tshia Nzambi.+ 7 Kavua muenze nanku to, kadi wakadivuija tshianana, kuangataye tshimuenekelu tshia mupika+ ne kuluaye muntu.*+ 8 Kupita apu, pavuaye mulue bu muntu,* wakadipuekesha, kuluaye mutumikidi too ne ku lufu,+ eyowa, lufu lua pa mutshi wa makenga.*+ 9 Bua bualu buine ebu, Nzambi wakamupesha muaba mubandile+ ne wakamupesha dîna didi ku mutu kua dîna dikuabu dionso+ ne bulenga buonso, 10 bua mu dîna dia Yezu tshinu tshionso tshia badi mu diulu ne badi pa buloba ne badi muinshi mua buloba tshitue panshi,+ 11 ne bua ludimi luonso lumanyishe patoke ne: Yezu Kristo udi Mukalenge+ bua butumbi bua Nzambi Tatu.

12 Nunku bananga banyi, anu munuvua misangu yonso nutumikila, kabiyi anu pamvuaku kadi nutamba kuenza nunku ne lukasa luonso mpindieu undi tshiyiku, nutungunuke ne kudienzeja bua lupandu luenu ne ditshina ne dizakala. 13 Bualu Nzambi yeye ke udi unupesha dikanda, unupesha dijinga ne bukole bua kuenza malu adi amusankisha. 14 Tungunukayi ne kuenza malu onso kakuyi manunganyi+ ne makokianganyi,+ 15 bua nuikale kanuyi ne tshintu tshidibu mua kunubanda natshi, kanuyi bualu, bana ba Nzambi+ badi kabayi kalema munkatshi mua bantu ba tshipungu etshi tshibi tshidi tshikonyangale+ munudi nukenka bu miendu panu,+ 16 nulamata ku dîyi dia muoyo bikole.+ Dîba adi nengikale ne tshia kusankila dituku dia Kristo, mumanye ne: tshivua munyeme tshianana anyi muenze mudimu mukole tshianana to. 17 Kadi nansha bobu benda bampongolola bu mulambu wa bia kunua+ pa mulambu+ ne mudimu wa tshijila* kudi ditabuja dienu dinufikishe, ndi ne disanka ne ndi nsanka pamue nenu bonso. 18 Mu mushindu wa muomumue, nuenu penu nudi ne bua kuikala ne disanka ne kusanka pamue nanyi.

19 Mpindieu ndi ntekemena mu Mukalenge Yezu bua kunutumina Timote+ mu matuku makese emu, bua meme kukoleshibua pangapeta ngumu yenu. 20 Bualu tshiena ne muntu mukuabu udi ne lungenyi bu luende udi mua kuditatshisha bua malu anudi nawu ne muoyo mujima to. 21 Bualu bakuabu bonso badi badikebela malu abu, ki nga Yezu Kristo to. 22 Kadi nudi bamanye tshijadiki tshivuaye mufile bua bualu buende ne: anu bu muana+ ne tatu, wakenza nanyi mudimu bu mupika bua kutungunuja lumu luimpe. 23 Nunku yeye ke muntu undi mutekemene bua kutuma diakamue pandi mmona mudi malu anyi enda. 24 Bulelela, ndi mushindike mu Mukalenge ne: meme panyi nendue mu matuku makese emu.+

25 Kadi bua mpindieu ndi mumone ne: bidi bikengela kunutumina Epafodito udi muanetu ne muenzejanganyi nanyi wa mudimu ne musalayi nanyi, ne mutumibue wenu ne muntu unudi batume bua kunkuatshisha ne bintu bindi nabi dijinga,+ 26 bu mudiye ujinga ne muoyo mujima bua kunumona nuenu bonso, ne mmubungame bualu nuvua bumvue ne: uvua musame. 27 Bushuwa, uvua musame muambe kufua; kadi Nzambi uvua mumufuile luse, ki nganu yeye nkayende kadi ne meme kabidi, bua tshikadi ne kanyinganyinga pa mutu pa kakuabu. 28 Ke bualu kayi ndi mmutuma ne lukasa luonso, bua panudi numumona nusanke kabidi ne bua meme panyi tshitambi kusamisha lungenyi to. 29 Nunku numuakidile ne disanka dionso mu Mukalenge bu pa tshibidilu, ne nutungunuke ne kuangata bantu ba mushindu eu ne mushinga wa bungi,+ 30 bualu wakamba kufua bua mudimu wa Kristo,* uteka muoyo wende mu njiwu* bua kungambuluisha pa muaba wenu bu munuvua kanuyiku.+

3 Ndekelu wa bionso bana betu, tungunukayi ne kusanka mu Mukalenge.+ Kabiena bintatshisha bua kunufundila malu amue amue to, bualu bidi bua diakalenga dienu.

2 Dimukilayi mbua; dimukilayi bantu badi benza malu mabi; dimukilayi bantu badi baditapa mubidi.+ 3 Bualu tuetu ke badi ne ditengudibua dilelela,+ tuetu badi benza mudimu wa tshijila ne nyuma wa Nzambi, badi baditumbishila mu Kristo Yezu+ ne badi kabayi beyemena malu a mubidi, 4 nansha mundi meme ne malu adi mua kunsaka bua kueyemena malu a mubidi kupita bakuabu.

Pikala muntu mukuabu wela meji ne: udi ne malu adi amusaka bua kueyemena malu a mubidi, meme ndi nawu mapite: 5 bavua bantengule dituku dia muanda mukulu,+ muikale wa mu tshisamba tshia Isalele, wa mu tshisa tshia Benyamina, muena Ebelu mulela kudi bena Ebelu;+ pa bidi bitangila mikenji, mvua Mufalese;+ 6 pa bidi bitangila tshisumi, mvua nkengesha tshisumbu;+ pa bidi bitangila buakane buimanyine mu mikenji, mvua mudileje tshiyi ne tshidibu mua kumbanda natshi. 7 Kadi bintu bionso bimvua mupete ndi mubiangate bu bintu bijimija* bua Kristo.+ 8 Kupita apu, bushuwa ndi ngangata kabidi bintu bionso bu bijimija bua mushinga mutambe bunene wa dimanya dia Kristo Yezu Mukalenge wanyi. Bua bualu buende ndi muitabe dijimija dia bintu bionso ne ndi mbiangata bu bintu bia butshiafu,* bua meme kupeta Kristo 9 ne bua bansangane mu buobumue nende, ki mbua buakane buanyi budi bufumina ku dilonda Mikenji, kadi mbua buakane budi bufumina ku ditabuja+ mu Kristo,+ buakane bua kudi Nzambi bushindamene pa ditabuja.+ 10 Tshipatshila tshianyi ntshia kumumanya yeye ne bukole bua dibishibua diende ku lufu+ ne kupeta makenga a buena ende,+ ngitaba lufu lua buena luende,+ 11 bua kumona bikalaku mushindu wa meme kufika ku dibishibua dia bantu ku lufu didi didianjila kumpala.+

12 Ki mbua ne: nkadi mumane kupeta bualu ebu anyi ne: nkadi mumane kuvuijibua mupuangane to, kadi ndi ndienzeja+ bua kumona ni ndi mua kukuata panyi ku tshivua Kristo Yezu munsunguile.*+ 13 Bana betu, tshiena ndimona bu ukadi mumane kutshikuata to; kadi ndi mujadike bualu bumue ebu ne: Bu mundi mupue malu adi mashale panyima muoyo+ ne ngipatshila malu adi kumpala,+ 14 ndi ndienzeja bua kufika ku tshipatshila bua difutu+ dia dibikila dia muulu+ dia Nzambi ku butuangaji bua Kristo Yezu. 15 Nunku tuetu bonso badi bashindame+ tuikale ne meji aa, ne binuikala ne meji makuabu mu bualu kayi buonso, Nzambi neanubuluile meji atudi batele aa. 16 Nansha bikale munyi, mu mushindu utudi baye kumpala, tutungunuke ne kuenda mu bulongame mu njila wa muomumue eu.

17 Bana betu, nuenu bonso nulue bidikiji banyi,+ ne mêsu enu ashale matangile bantu badi benda mu diumvuangana ne tshilejilu tshitudi banushile. 18 Bualu kudi bantu ba bungi (mvua ne tshibidilu tshia kubatela kadi mpindieu ndi mbatela kabidi ndila ne muadi) badi benda bu bena lukuna ba mutshi wa makenga* wa Kristo. 19 Ndekelu wabu nkabutu, nzambi wabu ndifu diabu, butumbi buabu mbundu buabu bulelela, ne mbateke meji abu ku malu a pa buloba.+ 20 Kadi kuetu tuetu+ mmu diulu,+ ne tudi bindile ne muoyo mujima mupandishi udi ufuminamu, Mukalenge Yezu Kristo,+ 21 wakudimuna mubidi wetu mupuekele bua wikale bu* mubidi wende wa butumbi+ ku bukole buende bunene budi bumuambuluisha bua kuteka bintu bionso ku bukokeshi buende.+

4 Nunku bana betu bandi munange ne njinga bikole, disanka dianyi ne tshifulu tshianyi tshia butumbi,+ nushale bashindame+ mushindu eu mu Mukalenge, bananga banyi.

2 Ndi nsengelela Evodi ne ndi nsengelela Sentishe bua bikale ne meji amue mu Mukalenge.+ 3 Eyowa, ndi nkulomba wewe pebe, bu muudi muenzejanganyi nanyi wa mudimu wa bushuwa,* bua utungunuke ne kuambuluisha bakaji aba badi batate* pamue nanyi bua lumu luimpe, pamue ne Kulemento ne benzejanganyi nanyi ba mudimu bakuabu bonso badi ne mêna abu mu mukanda wa muoyo.+

4 Ikalayi nusanka mu Mukalenge misangu yonso. Nengambe kabidi ne: Sankayi!+ 5 Enzayi bua bantu bonso bamanye munudi kanuyi bena malu makole.+ Mukalenge udi pabuipi. 6 Kanusamishi mutu bua tshintu nansha tshimue,+ kadi mu malu onso, ku diambuluisha dia disambila ne disengelela pamue ne disakidila, numanyishe Nzambi milombu yenu;+ 7 ne ditalala+ dia Nzambi didi dipite dijingulula dionso dia malu nedilame mioyo yenu+ ne bieledi bienu bia meji* ku butuangaji bua Kristo Yezu.

8 Ndekelu wa bionso bana betu, malu onso adi malelela, malu onso adibu ne bua kuditatshishila bikole, malu onso adi makane, malu onso adi makezuke,* malu onso adibu ne bua kunanga, malu onso adibu bakula bimpe bua bualu buawu, malu onso adi mimpe, ne malu onso adibu ne bua kutumbisha, tungunukayi ne kuelela malu aa meji.*+ 9 Malu anudi balonge ne bitabe kabidi ne bumvue ne bamone kundi, nuenze malu aa,+ ne Nzambi wa ditalala neikale nenu.

10 Ndi nsanka bikole mu Mukalenge bua munudi mpindieu batuadijilule ndekelu wa bionso kungelela meji.+ Nansha munuvua nungelela meji, nuvua bapangile mpunga wa kuleja bualu ebu. 11 Tshiena ngamba nunku bualu ndi nkengela bintu to, bualu ndi mulonge mua kudikumbajila majinga anyi* nansha meme mu nsombelu kayi.+ 12 Ndi mumanye mua kuikala ne bintu bikese+ ne mua kuikala ne bintu bia bungi. Mu malu onso ne mu nsombelu yonso ndi mulonge tshia kuenza pandi mukute ne pandi ne nzala, ne tshia kuenza pandi ne bintu bia bungi ne pandi tshiyi nabi. 13 Bua malu onso ndi ne bukole ku diambuluisha dia yeye udi umpesha bukole.+

14 Nansha nanku, nuvua benze bimpe panuvua bangambuluishe mu dikenga dianyi. 15 Mu bulelela, nuenu bena Filipoyi nudi bamanye penu ne: panyima pa nuenu bamane kumvua lumu luimpe musangu wa kumpala pamvua mumbuke ku Makedonia, kakuvua tshisumbu nansha tshimue tshivua tshidisange kundi mu tshilumbu tshia kupeshangana bintu ne kuangata, anu nuenu nkayenu;+ 16 bualu pamvua ku Tesalonike, nuvua bantumine bintu bua majinga anyi, ki nganu musangu umue to, kadi misangu ibidi. 17 Ki mbua ne: ndi nkeba dipa, kadi ndi nkeba dimuma didi dikumbajija bintu bienu. 18 Kadi ndi ne bintu bionso bindi nabi dijinga, bipite mene bungi. Ndi ne bintu bia bungi mpindieu undi mupete bintu binuvua bantumine kudi Epafodito,+ bintu bia dipembu dimpe,+ mulambu muanyishibue, udi usankisha Nzambi. 19 Ku luende luseke, Nzambi wanyi neanukumbajile majinga enu onso+ bilondeshile bubanji buende mu butumbi ku butuangaji bua Kristo Yezu. 20 Mpindieu butumbi buikale kudi Nzambi wetu ne Tatu kashidi ne tshiendelele. Amen.

21 Nungelele bansantu bonso badi mu buobumue ne Kristo Yezu muoyo. Bana betu badi nanyi badi banuela muoyo. 22 Bansantu bonso, kadi nangananga ba mu nzubu mua Kaisa,+ badi banuela muoyo.

23 Ngasa wa Mukalenge Yezu Kristo ikale ne lungenyi lunudi nuleja.